Missionary Day 2012 Thupuak | Gingtute Mohpuakna

Pastor Dr Thangminlun Mangte
Bethel Baptist Church, Llv.
    

Khovel ah tanchinhoih puak ding (Khamangthang mat) tuh Saptuamte a dinga nasep poimoh penpen ahi. ~ Oswald J. Smith.

Oswald J. Smith in a laibu The Challenge of Missions a agelh hiai a tunga I taklat mah bangin, EBC Saptuam in leng khamangthang matna nasep pen Saptuam dinsan hi a thei in khamangthang matna nasataka uangbawl in Missions Field bang EBC min in 7vel ineita ua, tuateng mai hilou, Partnership a agency tuamtuam toh I sepkhawm theih man in Pathian min iphat hi. Huchihlai in, Saptuamte a ding kia isak khak ding lauhuai kasa, Saptuamte ichih chiang in, Khrist a gingtu mimalte kipawl khawm na ahih man in hiai mohpuakna tuh gingtu nang leh kei a ding a poimoh penpen ahi chih na suak hi.

Huchihlai in, tutung Missionary Day I zat utoh tonin ngaihtuah thak leng, Missionary Day May 7th ni a izat chitchiat uh bangziak pentak hiding hiam? Ccpur Dist. ah tangthupha honglut patni ahihziak ahi diam? Huai dia lah I zatdante uh kibanglou zel.

Bangteng hileh izatni pen a dik leh diklouh lam gen ut hizawlou in, midang ten leng nang ziakin Pathian min a phat theih na ding un bang na sem dia? Na mi le sa te lak ah mo? Midang, namdang te lak ah? Chinuam ihi zaw hi. Tuni in eiten leng foreign missionary te ziakin nikhat ina chiamteh hial uh. Foreign Missionaryte I ngaisang kei chihna hipahlou, amau sanga ei a zaw, I mi isa mahmah Pu Thangvang Guite kichi leh unau vaiphei kampau apan Pute Thangkai & Lungpau te phok thak le kachi hi. Abiktakin, ei Zomi Paite kampau lak genin Pu Thangvang Guite tuh missionary thupitak, pahtawina mihing lam a pan le tangtak mahmah hilou ding adia aw kachi hi. Amah kiang a Jesu Khrist ana petute phat huai uh, huaite sang mahin amah eilawi hon pesawntu phathuai leh pahtak huai zawsem lou di adiam? Gim le tawl, haksatna I theihphak pihlouh uh tamtak athuak ding chih haihvual hilou hi. Huaiziakin, Missionary Day ah Pathian phat & I pahtawi theih na dia ainah ana phahtu Pu Thangvang Guite ziak in Pathian kiang ah kipahthu gen le ka chi hi.

Pu Thangvang Guite toh kisai article Upa G. Nengzalam gelh kasim khak na ah hichin kigelh: “Amah Pa Thangvang Guite Aizawl ah 1910 in laisim din kuan a, a laisim kawmin Borhsap aakbuk enkol in kha 1 in Rs. 3/- loh hi. Pu Taisena skul ah kai in lai vasin a, Pu Sena tungtawn in Khrist a hondampa ding a sangin piangthak a, Mission sapte toh Senvon ah honglut khawm uhi.” Hiai ahi Missionary thupitak ichih nopna. Amah Pu Thangvang in Khrist aneih pen koihdap mai lou in Dec. 26, 1914 in Evangelist Teacher ding a lakin om a, huchi’n a khua mah uh Phaitong ah nasep hon pan in, sun chiah a in uah laihilh in, nitak chiah Pathian thu a theih bangbang mite hilh in Khrist tuh mite ana pesawn hi. Huchi’n amah leh a nungzuite hahpan na ziakin 1915 in Phaitong ah Biakin phuhkhiak in om hi.

Hun hongpai zelin Pathian vualzawlna thupitak tang in Saptuamte hong khang tou in, a sulnung uh mang nawnlou ding a chiamteh tampi te lak a tawmchik hiai bang ahi: (i) Sawm a khat pemasa pente tuh Pu Thangvang Guite & Upa Nengkhat. Upa ordain masapen hiding in 1928 in Upa Nengkhat in ordain na tang. Saptuam dana si kivui masa pen Pu Awnthong, banah Hausa Pathian thu awi masapen Pu G. Goupau & anau G. Phungkhothang, Hiangtam Lamka hausa te chih ahi.

Huaiziakin, Pu Thangvang nasepna gah tuh tuni a Missionary Day ilop theihna uh ahi chileng genkhial law din kaki ging kei, banah apianni hiam sihni hiam bang Saptuam ni poimoh (eg. Missionary Day) khat bang in zang le?? Ahia, a poimoh penpen tuh, aman Khrist in hontatna ziak leh Saptuam dinsan theichian a, ana panna gah sui leng tampi tua igente banah om tham ding. Huchi ahih leh, amah banga Khrist tatkhiakna tang kichi sam eiten tuni in I sulnung ah mite’n hon gen ding un bang nutsiat I sawm a? Nikum a izat dan ngeina bangmah chijel mai lou in, tukum in bang lam ah kalsuan I sawm a? mimal, inkuan, Saptuam in Missionary Day izat toh tonin enle midang Khrist theinailoute ading in, Pu Thangvang in eite, I minam Khrist kiang honna zotpih bangin enle kua hiam 1/2 bek Khrist kiang ah piding in iki chial thakthak hi. Hiai toh kisai in nang leh ken hihtheih I nei, FMPB ten thupi dia a zat uh “Go or Send” chih thei in nang nakuan kei dileh na tang ding midang sawl in. Hiai ding a thupukna nalak thak leh tukum Missionary Day nazatna lohching na hi ding. Toupan midangte a ding a vualzawlna hi ding in hon ompih in hon vualzawl zel hen.