Manggam nnasemtu Pastor-te a ding a kivenna dingte
Rev. Dr. Hangpi Manlun. Ph.D
0). Thumapui:
Latin ham a, pastor chi khu Sapham a kila khia ahi. Greek hamin, ahileh poimen chi a hi a, a umzie ahileh ‘belampu’ china ahibanah, belampu in a belamte a etkawl dante genna ahitangpi hi. Tuabanah, poimenics khu belampu nnasep (pastoral) zilchienna lam a kawh hi. Tualeh, Ephesa 4:11-ah ‘Hattuom chawmtu’ chi khu poimen khu pastor chi toh kibang ahi. A hamkam khu Bible ah umzie chi thum nei in zah ahi. Tuate: i) Belampu genna ahi. ii) Khrist hina min (title) ding in, ‘Belam vengtu hoi’ china a zah ahi. iii), Hattuom puitute genna ding a zong zah ahi hi.
Tualeh, atomkimin, genta lei pastor-te khu Jesun a sisan a atatsa a hattuomte enkawl leh vaah khang ding a, hattuom kung a, asilpieh loupitahte ahi uhi. Tuaban ah, Pastor-te nnasepna khu Jesu Khrist nnasep sutzopna leh suhtang tunna a hiziehin, aneitupa Pasian a thupi ziehin, pastor nnasepna khu a thupi in aloupi mama hi. A hin, amaute zong mihing Adam-le-Evi hah-le-suonte ahiziehun, hatlouna leh chitlounate tuomtuomte aneithei ua, tuaziehin tam anuoi-ate a kipat a buoitheina leh puo/kiet thei zing ahiziehun, tamte i sui ding uhi
Pastor-te ading a silzau um leh kivenna ding a kul-le-poimaw dang tamtah umma leh zong, Sapham-in ‘W-3’ (thum) leh ‘P-2’ (Nite)- kigente i gen lang ding uhi. Tamte, khu mihausate, mi nadante leh nungah/tangvalte puona/kiehnate ahitangpi ziehun, ei Manggam nnasemtute zong puo/kiethei i hiziehun, i pilvan mama uh angai hi. Tuate ahileh:
1). Wine, (Zu-le-sa ah).
Tami khu Bible in zong ahagen mama hi. Tulai melmapa Setanin mite a sawlna/khemna ding a vanzat mama khat ahi. Mi nautangte gentah lou pastor leh Upa tamtah khu zu-le-sa a kideh zou lou a tamta mama uhi. Tuabang. sawlna/khemna tuohten, Daniel leh a lawmte, Kumpi ann neh zu-le-sate neding ua, thupieh ahilai un Pasian zauna hinkhuo a nei ziehun, a kisum tinten mai uhi. Tuate sangin annte louhingte leh tui sihte peding in angen ua, Pasian in alawm a guolte sang ua pilzaw leh damthei sah zawh ban uah, Daniel ngel khu mang letheina tan zong a pie hi. Awle, nang Pasian nnasemtu khu tami a kipatin na kisusiengthou zou naile? Nangma-le-nangma na kivel chienta in.
2) Wealth, (Sum-le-pai deina leh hausat utna):
Tulai leitung pen mite neinei en zong neive sam ding utna in a pumdimta hi. A langkhat lam ah, leitung ngainatna khawvel ah i tengta uhi. Tuaziehin, pastor-te zong kibit tuom louin, tamte neithei vena ding in, nehguhna sal ahte, sum-le-pai maimai buoipinate sal ah kitangthei in, minsietna leh hattuom ah buoina a pienlaw leng hi. Ei India gam ngel ah zong hattuom lamkai lien tahtah (Bishop)-te bang a nehguh zieh ua, court case nei bang, a tam mama uh a kichi hi. Tualeh, tulai a i project bawlte uh leh gam dang i ngainatnate uh zong khu atangpi in sum-le-pai deina zieh bang ahinuom mama hi. Tami sum-le-pai deina ziehin, hattuomten, i buoipi ding uh ‘hagau mangthaite mat’ sang in, NGO-te buoipi leh bawl ding teng bang i buoipi ta uh a bangta hi. Tamte adihlou-le-hoi lou china ahi pongsan sih hi.
Tualeh, ei Manggam nnasemtute khun i buoipi ding uh hagau mangthai mat sangin, leitung mite ma bang a, sum-le-pai chau i hing buoipi chieng un, Pasian Hagau thopnate zong kitang zouta louin i umta uhi. Nikhat Thomas Aquinas in, Pope avave leh Aman sum tamtah anasim a, kisuomgla in, “Thomas Aquinas aw nidanglai a Petert-e, Johan-te hun lai a khutdaw khatin sum-le-pai a nget lai in, sana dangka ka nei sih,” chi hun ahinon sih hi achi hi. Aman zong ahingei mai e, “Amauhte ma bangin ka nei sun Jesu Khrist min in na keng in lamzotta in zong” i chitheita sih uh achisan hi. Mi khen khatte khun gam dang ah Theology sangin, Dollarlogy ava buoipi zaw ua, tuate khu ahoilou pawngsan china hilouin, ahilou lam a ang zah khah chieng un, i gam leh hattuomte a ding in khanna sang in buoina a tunlaw zaw leng hi. Thamlouin, Pasian mizah ding tamtah zong tami sum-le-pai ziehin, zahtheilou leh zahtahlou tamtah i umta ua, leitung sum-le-pai toh Pasian hing zahna ding leh manthei ding lai tamtah bangma lou a i umtah mai uh khu, i gam leh hattuomte a dingin, supna leh manna asuohta hi. Laphuotuten, “Khrista zal a tan ngam, thuoh ngam leh gentheina zousie tang ding a a kikoi lai un, eite pen, Khrista zal a nopsah ding, hausah ding leh thupi dingte kidel chiet” a bangta mai hi. Tamte, zong ahoilou pongsan ahisih a, ahin del pen leh tup pen i nei uh leh adihpen sih ding hi china ahizaw hi. Awle, unau tami sum-le-pai ngainatna ah, na kikoi siengthou zou eile?
3). Women (Sex), (Nu-le-pa lam a kideh zou louna).
Tulai melmapa setan in zong minautangte mai ban ah, pastor-te a sawlna/khemna ding a, a vanzat loupitah khat ahileh, nu-le-pa (sex) a thangtatna leh kideh zou louna ahi. Tami ziehin, leitung ah Pasian nnasem loupi tahtah tampite ana puo leng uhi. Tuaziehin, ei Manggam nnasemten zong tami setan thang a, i awhlouna ding un i pilvang mama ding uhi.
Tulai technology a san toh kituoh in, awl samtah a nu-le-pa (sex) a thangtah a muthei ding lemtang zong atam tamta mama hi. Dr. Billy Grahamin, “Tulai leitung khu nu-le-pa thangtatna khelna a tummang ding i hita uh a chi” hi. Mizoram a lawmte khat in, chiemmui thutah a gen khat ahileh, “Pastorte khu tuipi sung ah akesih ding ua, bus tungpan in zong a kesih ding ua, singdawn ah zonng a kesih ding ua, inn sawng ah zong a kidieh sih ding ua, ahin, a pilvan lou uh leh lupna tung ah akiethei zing uh” achi khu umzie anei mama ahi.
Tualeh, tami nu-le-pa a thangtatna khu Sodom leh Gomorrah-te puosietna leh Pasian gotna a tuohna zieh uh zong khu tami sex a thangtatna zieh ma uh ahi. Tambang, khemna/sawlna i tuoh chieng un, Pu Joseph gel dawh zing sawm va-ui. Aman, tami nu-le-pa (sex) a sawlna khu Bible kigel masang in zong ana dou zou hi. A langkhat lam ah, leitung pumpi a mihat pen hiding a, Pasian in a belguot leh guoljawl, Pu Samson puona zong tami nu-le-pa (sex) ma ahi hi.
Tuaziehin, Joseph-in, nu-le-pa (sex) mun khu anataisan a, Pasianin Aigupta gam ah Governor tan in a dawmsang hi. Pu Samson in nungah Delilah, malpi tung (khelna mun) taisan lou a, akuolpi tah ziehin, a hatna thuguhte gensieng in, ahatna tengteng awlsam tah a lahsahin a um a, atop ah amitte gel kheikhiehsah in a um a, leitung a mihatpa khu tami (sex) a, akideh zoutah lou ziehin, naupangte kimawlna in apang a, shi hunloupi in a shilawta hi. Atawmkin in genta lei, Joseph in khelna mun a taisan lai in, Samson in khelna mun zuonin, akuolpita hi. Awle, ei Manggam nnasemte zong tami nu-le-pa thangtatna ah i koisiengthou zouna uoi le?
4).Pride/Proudness, (Kiletsahna leh minthan ut seng nate).
Pastor-te a ding a sawlna kia khat ahileh mite sang a bawlthei zaw hi utnate, genthei/hawmthei kisahnate, semthei/bawlthei kisahnate, pilzaw leh tungnun ut nate, let-le-lal utnate ahinuom mama hi. Tambang in Pasian nnasemte khu Dawimangpa puona/kiehna mun (kiletsahna) a um zing i hilam i kimang hil sih ding uhi.
Tulai mite khu tahsa-le-hagau ah khantouna leh masawnnate i tangsang deudeu ua, i kiliensah in i chapou deudeu uhi. Proverbin, “Kiletsahna khu puona mai ah a pei” achi hi. Pu John Newton, “Chapouna/kiletsahna khu hattuom melma/gal lien pen” ahi achi hi. Tualeh Pasian in zong mihingte lah a, a dopsangthei lou koite e, i chi leh mi kiliensahte ahi uhi. A zieh ahileh, Pasian in amaute a dopsan masangin, ana kiliensah ua, tuachin dopsang theilou ding in, a kesuh paipai uhi.
Tuaziehin, leitung a Pasian mizahte koima a kiliensah ana um sih ua, tuachin Pasian in zong ana dom sang leng uhi. Ei Khristiante gentahlou, leitung pumpi a mizousie ngaisan leh unau Catholic hattuomte ngelin misiengthou (Saint) chia ana min vaw uh, Mother Teresa khun, a damsung a sil thupi tamtah abawllai in zong, “Kei bangma ka hisih a, Pasian khut sung a pencil bang lel ka hi a, ka silbawl zousie laigeltu in a khut a pencil toh siltamtah a gel bang a, ka nnasepte zousie Pasian in kei tungton a bawl ahi” achi hi. Pu William Carey, ngei in zong a damsung in silthupi tamtah a bawllai in, “A shiding kuon in kei hing phat/patoi sih unlen, Pasian patoi un” chiin a gen hi. Eite toh a kikhie mama uhi. Eite pen min ang patat sih leh ei-le-ei bang i kiphat ua, Pasian patat sangin mihing patat bang i dei zaw uh abang mai hi.
Tulai a Manggam nnasemte i hileh Jesu Khrist sepban sem a, suoh/sila nnasem ding i hilai un, khawvel mite ma bangin i nnasemna mun khu letna, lalna, thuneina mun bangin i ngaitua uhi. Tualeh, aneupen hi kitu dingte i hilai un, nuazuite bang a koi e a lienpen ding chi bang in let-le-lalna kituna mun a bangta hi.
5). Power (Thunei utna khelna).
Tami ‘power’ kichi zong chini in a khenthei ding hi. Tahsalam thuneina leh Hagau a thuneina/silbawltheinate ahi uhi. Masanglai a sawltahten, Pasian silbawltheina (power)-te nei in, damloute, mishite na ngawn a kaithouthei uhi. Peterin, Pasian Hagau Siengthou thopna toh Pentecost nin, khat vei maimai thu agen (sermon) leh mi sangthum (3000)-bangin pienthana anei law uhi. Eiten, lah sangni, sangthum vei sermon i nei leh zong koima khat zong piengtha sahzou lou, akibanglou khat khu aum ngei ahi ding hi. Banah, tulai i pulpit sermon-te uh zong hingzou nawnlou a, gotmun ah khun air condition ahi chi bang lel in miten i thugente uh angaita uhi. Pasian thugenten zong Pasian thutah kigen seng nawnlou in, mipiten zong Pasian thutah sangin, chiemmui thute, khawvel thute ah i bildaw zawta uhi. Sami gingtu Lot in zong Pasian in Sodom leh Gomorah-te, mei-le-kaat a, gawt ding a chilai a, Lot in a mahpate leh innsung mite kung a, a vagen leh amauten, chiemmui bawl bangin a thugente ana ngaisah ziauzuau uh toh kibang in miten zong i thugente ang ngaisan nawn sih uhi. Atawmkim in, i pulpit sermonte uh zong hingzouta lou a bang hi.
Tuabanah, ,Pasian guoljawlna toh hattuomte zong malam sawnin sum-le-pai leh bangkim ah ma kisawntou hi. Tualeh, hattuom lamkai a pan zong khawvel politician-te mabangin, kituthaw phielin i umta uhi. A khente lah mani utna mun a penson tan a um ding a panla lah aki umta mai hi. Amauten, Pasian deina mun a um a genthei deutah mai a, nnasep sangin, mani deina mun (comfort zone) a um a, nuom tah a pension tan amin a Pasian nnasep ding banah, thuneinate zong khawvel lamkaite mabang a zangkhiel kitamta hi. Atahtah in, hattuom sung a Pasian nnasepna satan khu letna, lalna leh thuneina zahna ding mun ahisih a, tuanah sangin suoh/sila nnasepna ahilam a khen chiengin, kimanghilthei leng zel hi. Tuaziehin, thuneinate zangkhiel a mani seppite tunga thuneitah um khah ding zong i kiven zing ding uh ahi.
6). Thukhumsitna:
Awle a tung a i gente lah ah bangza vel ah i saltang un, i hina uh ahi eile? A khente ngel khu abawn a nei dap pawl bang i um maithei ua, a khente kia ahileh khat-le-ni vel bang ah i saltang maithei ua, tuaziehin, tamte apat i suotat zou nah leh Pasain nnasemtu lawching leh ga thupitah nei i hingei ding ua, tuabang hithei ding in Pasian in hing guolzawl chietta hen aw. AMEN!!!