TOUPA' ETKHIAKNA

By : Hauzel Gou

I Laisiangthou ah etkhiak a om mi tampi imu ding; huaite lak ah thupi kasak mahmah khat tuh Abraham' in ana tuah etkhiakna ahi. A hinkhua ah Toupa' etkhiakna haksa tawpkhawk ana tuak a, atapa tang neih sun aginna ziak in Toupa' aa di'n ana pephal mawk hi. Abraham in, Toupa' thupiak ana zuih ziak in, 'ginna aa Pa' (father of faith) ahi chih tuni'n khovel in ana theita hi. A lehlam ah David in, 'Tangtawn Toupa aw, Nang hon entel inla, hon chian in. Ka lungtang-le-lungsim Nang entel in' (Sam 26:2) chi'n ana leh nget zaw hi. Toupa'n igingtu hinkhua ah etkhiakna leh haksatnate i tuah ding ana phal law dan ahi hi.

Gingtu diktak ichihte tuh, haksatna tawpkhawk a etkhiakna ana tuah hun lai nangawn ua Khrist' a dia aginna uh kipsak gige te ahi uhi. Toupa'n iginnate kipsem ahih theihna ding in, lamchi tuamtuam ah etkhiakna hon nei den a, alehlam ah setan in hiai hunte remchang ana sa mahmah zel hi. I leitung hinkhua ah, Toupa' etkhiakna ziak in, hatsatna tampi ituak ding a, i gingtu hinkhua ah ituah ding mah leeng ahi hi. Innkuan sung buaigawp leh chih ngaihna theilou a, lungkham mangbang tak a, i om hun leeng a om tham ding. Damlouh- hita'n ituahte ziak a, lungkham a, ki ngaise vungvung kawm a hun izat ni leeng a om tham ding. Akhenchiah, Toupa'n ka thumnate dawntaak honsalou ahi dia aw.... chi'a lungke gawp a thumna le neih peihlouh hun leeng om tham ding. Neek-le-taak, innsung khosa haksatnate ziak a, lungkhamnate'n hon pumtuam hun leeng a om tham ding. Nupa kal kisia a, abawl dingdan tuan theilou a, lungkhamna tawpkhawk ituah hun zong a om ding hi. Igam-le-nam maban ding ngaihtuahna ziak a, chimoh-le- mangbang tak a iheutute uh leeng a om ni uh tam ding. Huaiban ah, apoimoh pen tuh saptuam sung a i heutute'n zong nasatak in etkhiakna atuak ngei ding uh chih theih sa ahi. Leitung pen i innmun ding a igeel khak chiang in, haksatna ituahte itheisiam thei kei hi. Huaiziak in, hiai leitung zaw i inn ding hilou ahi chih theih gige ding ahi. Toupa'n igingtu hinkhua ah naaktak a, etkhiakna a hon neih chiang in Amah' adi'n punna ana hizel a, huaituh eite' adia vualzawlna naak ahi nuam mahmah hi.

Toupa' etkhiakna ziak a, i mimal hinkhua a, kuamah ikup ngamlouh haksatna-le-lungkhamna ituah hun a om tham ding. I innkuante chihphetlouh izi/pasal leh sanggamte nangawnle kum ngamlou a, lungkham-mangbang kisa a, ki ngaise vungvung a leitung hinkhua chimtaak gawp ziak a, mahni kithat tampi i om ta ua, poi mahmah hi. Amaute'n kei tuah sa'ng a thupi zaw kuaman tuaklou ding uh ahi chih ngaihsutna ana nei uh hikha ding hi. Hichibang lungkhamna tawpkhawk ituah chiang in, hiai laisiangthou ah ki bulphuh theile ut huai mahmah ding hi. 'Nalungkhamni in hon sam le chin, hon hunkhe ding ing a, nang hon pahtawi ding na hi chi hi'(Sam 50:15). Hiaibang hun pen Toupa'n iginna hon etkhiak hun ana hi nuam mahmah ahihziak in Diabol (setan) hun awn mailou a, ilungkhamna tengteng Amah Toupa' kiang a itut gige ana poimoh law dan ahi.

I niteng hinkhua ah, khemna leh etkhiaknate i tuah chiangin, bang chi'n i dou zel a le? Setan in hunteng in hon khem ut in, ilungtang thuzoh theihna di lampite ah hon zol gige hi. Huaiziak in, hiaibang khemna ituah chiang in, Toupa toh pang in i dou zel a, haksa hetlou in i na zou zel hi. Toupa toh pang in hiai khemnate/ etkhiaknate zou zel le hang, a dangte leng haksa hetlou in izou thei gige ding hi. I hinkhua a khemna leh etkhiaknate idou zoh theihna ding in, bangchi'n thupukna ila a? Toupa toh pangkhawm gige a, hangsantak a hiai khemna leh etkhiaknate tuh zou dia thupukna laak tuh poimoh hi. Hiaibang thupukna tuh eimah mimal ah kinga liuliau ahihziak in, kuaman thupukna hon laak pih theilou hi. Thupukna kiptak ilaak chiang in lohchinna te'n hon zui mai ding hi. "Lohchinna i chih thiltuahphut ahi ngei kei a, a hun diktak a thupukna ilaak dik khak ziak a, agah imuh ahi zaw hi". Pathian min a haksatna leh etkhiakna i tuah tam peuh leh, Pathian ompihna leh thil hih theihna i hinkhua ah i hon thei semsem ding a, hiaihun chiah Amah kia'ng zuanle vualzawlna in ahon delh zuizel ding hi. Huaiziak in, i niteng hunzatna ah, Toupa' aa dingin thupukna kiptak nei gige le, hiaibang etkhiaknate izou thei ding a, atawp chiah Toupa'n hon vualzawl ding.