Bangziak a Kris a om gige ding?  By: Naulak Pauthiansiam
Gingtu tampi te’n hun tampi tak a I manghilh or iki theihkhem moh bawl uh Kris a om gige ding. Van a ipa Pathian intuh niteng leh hunteng a Jesu Kris a i om gige ding uh a tapa dia hong tel tak te lak ah nak pi tak in aki lam en ahi. Koi mun peuh a om ta leng zong gintute’n I nasep uh tuh “Kris a a om gige ding” hitop mai ahi. “Kris a om gige” ichih te kua te hi a, Kris a om (in bang hamphatna hong guan thei leh) I hamphatna khenkhat leh Kris a om in I hinkhua a ding a bang naa(gah) sem khe thei hiam chih-te Laisiangthou tang tamlou apan en zual ni:

Kuapeuhin ka na a sep leh honjui hen; ka omna ah ka nasempa leng a om ding hi; kuapeuhin ka na a sep leh Pain amah a pahtawi ding hi (Johan 12:26).

(Sikha ginom leh nungzui muanhuai intuh Jesu mah a bel tinten ngal a. Amaute’n bel a mawkna in nuakna a mawk bawl sam kei uh)

Huan, Pa ka ngen dia, aman Khamuanpa dang a honpe ding, khantawna na kiang ua om dingin; huai tuh thutak Kha ahi; Khovelin huai a nei theikei hi, amah amuh louh a, a theih louh behlap jiakin; nou tuh amah na thei ua, na kiang uah a om gige ngala, noumau ah a om ding ahi (Johan 14:16).

(Huchi’n nang amah na theih a, Amah nang mah a a om leh niteng in houlimpih inla Ama thu mang gige in)

Keimah ah om gige un, kei leng noumau ah ka om gige ding. Hiang, grep guia a om gige kei leh amah in a gah theikei bangin, nou leng keimaha na om gige kei uleh, na gah theikei ding uh. Kei a grep gui tuh ka hi, nou ahiangte na hi uh; kuapeuh keimaha om gige a, kei leng amaha ka om gige na, huai mah tuh tampiin a gah nak hi; keimah louin lah bangmah na hih theikei ua. Mi keia a om gige kei leh, hiang banga paihkhiakin a om a, a vuai nak hi; huan, a tom ua, mei ah a pai ua, a kang nak hi. Nou keimaha na om gige ua, ka thu leng noumaua a om gige leh, na ut peuh uh ngen un, nou adia hihin a om jel ding hi. Hiai jiakin ka Pa tuh pahtawiin a om, tampia na gah un; huchiin ka nungjuite na hi ding uh (Johan 15:4-8).

(Toupa gam kekletna a gah(fruit) hoihtak pokhe tu nahih theih na ding in niteng in Amah ah kip leh muantak ding in na om gige hiam?)

Huan, a thupiakte jui i hih leh, huaiah amah i thei chih i kithei hi. A thupiakte jui loua, Amah ka thei, chimi tuh amah mi juauthei ahi, thutak amah ah a om kei hi. Kuapeuh a thu jui peuhmah amah ah Pathian a itna a kim petmahhi. Amah ah i om chih hiaiah i kithei ahi. Amah ah ka om gige, chi mi tuh amah om bangin a om sam ding ahi (1 Johan 2:3-6). Huchiin, na Pa uh vana om a hoih kim sipsip bangin na hoih kim sipsip ding uh ahi (Matthai 5:48).

(Bang chileh hiai ki hih buching/tangtun thei ding hiam na chi kha maithei ding ua, hiaituh I tangtun taktak theih na ding in Ama thu izuih taktak uh ngai hi. We must seek a high goal not an easy one)

Huchiin naute aw, amah ah om gige un; huan, amah tuh hongkilak mahleh, a hongpaiin a mahah zum louin hangtakin i om thei ding hi (1 Johan 2:28).

(Bang in eite confidence lian leh thupi zaw ahon pe thei dia? I sia-leh-pha tungtawn a Toupa deihdan hih I tel zawk chiang in)

Kuapeuh amaha om gigein thil a hihkhial kei hi; kuapeuh thilhihkhialin amah a mu kei, thil leng a theikei hi (1 Johan 3:6).

(Mi kua peuh thei zen pi a va khial teitei mi in bel Amah mu leh theihna khatle anei het kei hi)

A thupiakte juimi tuh amahah a om gige a, amah mah leng amah ah a om gige hi. Huan, hiaiah amah tuh eimau ah a om gige chih i thei uh, Kha a honpiak ah (1 Johan 3:24).

(Nang tuh chiangkuangna na nei na hiam Khasiangthou na sung a teng taktak mah ahi chih leh nang tuh Ama thupiak-te zui taktak mi nahih lam? A thupiakte jui mi tuh Khasiangthou tungtawn in Kris ah a om gige nak uhi.)

Tuhun in banghang a gintu-te hihsiat leh khemna a puk ki tam lua hiam ichih leh Hosia 4:6 ah Toupa Pathian in hiai ana chi hi, “Theihna neihlouh jiakin ka mite hihsiatin a om ua; theihna na deih louh jiakin, ken leng, kei dia siampu na hih louhna dingin ka hon sam kei ding; Na Pathian dan na mangngilhta chih theiin, ken leng na suante ka mangngilh ding.” Pathian I theihlouh man uh leh a tapa Kris Jesu a I omlouh man un mi tampi tak in kisiat loh a ahuchih lai inle le mi tampi tak ten Kamsangte leh Pathian kammalte a bupin nial khin uhi. Tu hun inle saptuam sung ah zong Pathian leh a kammalte theih telna a om louh ziak in pawl khatte kisia uh hi. Kris a om ding ichih chiang in Jesu hondampa leh Toupa dia sang leh a thutak Thu um ding kia hilou in, I pumpi a hing biakpiakna ah pia in ama nung zuih ding chihna ahi hi. Niteng leh hunteng a eimah pumpi deihna zui ding maw? Ahihkaleh nial ding chih pen I teel detdet ding ahi. Tua bang a telsiam te adin huai in tuh tangtawn mun hong tunpih ding hi. Gintu khat ihihna toh eite’n I singlamte pua a Kris nung izuih chiang in eimah deihna nialin(Lk. 14:26-27) simmawhna leh thuakna, chi-li thuak dinga ki-ap ihi hi, tuahte tuh: 1. Khelhna lungulhnate singlamte tungah sihkhawm sakin I damsung khelhna toh kidou ding chihna ahi (Gal. 2:20). 2. Pathian kumpi gam manawh kawmin Satan leh khuamial vangletna toh I kidou ding (1 Tim. 6;12). 3. Jesu mah bang in leitung a I om sung in gindan tuamtuam-te simmawhna leh bawlsiatna I thuak kha thei ding hi. 4. Gingtute’n siangthou hinkhua jangta ihih man in leitung thil toh kisai, ngaihtuah-nate deih lou in amaute gamtat dan-te nialna toh itna sungah theihpihtu(witness) a I pan manin leitung mite muhdahna leh simmohna I thuak ding (Jn. 15:18-25). Abul a I taklat sa Laisingthou tang tamlou te izuih zoh louh diu leh I zuihtheih het louh diu Toupan ahon pe het kei a, jui zou het lou di ihi chih hon thei hileh a sila masa te kiang ah gelh thoh in a iitna laikhak tuh eite lak ah ahon pe sam kei ding hi. Pathian zahngaihna leh ahon thupiakte te zatdan I siam ua leh bel eite gah thupi tak pokhe tu dia hong bawl ut leh mansa gige ahi chih thei thak thak ni. Huaiziakin, nang tuh Ama thupiak na juih kei a, nangmah tuh Amah a na om kei a, Jesu toh kilawmtak-na (relation) hoihtak na neih het kei leh bel nang tuh mi zekhem(deceive) na suak ding. Hi thei hileh unau te aw ken zaw michih in tangtawn a amah toh om khom thei di’n Jesu toh kal nei vek leng ka chi ahi. Ana nei kha hetlou hita lehzong ahihka ana neisa aap gawpta ihih khak tak lehle tu mahmah in khanglou in tuni mahmah in ki bawl thak in lungsim ki ngainiam tak toh Jesu khebul zuan thak leng chi’n iki chial ahi. Toupa Jesu Kris a ana om lou nahih a, khial nahi chih naki phok leh tuni mahmah in ama kiang ah ngaihdam ngen in amai jong leng aman tuh ei ata deihthoh tak te toh tangtawn a inkuan khat a om khop ut(lunggulh) leh honna vaidawn dia mansa gige ahi (Johan 3:16).