Mr. Thangkhanmuan Tonsing makaihna in a hongtung March 18, 2012 a kipan June 2012 sungin Gospel – Missionary Journey 2012 chi in EBC Mission Field tuamtuam-te vehna neiding ahihdan kiza hi. Aman a gendan in hun paisa a damlouhna giltak nei mahleh damna Pathian in pia hi. Pathian in a ompihdante leh a thilhihna peuhmah a vualzawlna a ngahte ziaka kipahthu genna, leh, Missions Nasepna vei ahih ban ah a mun mahmah a Mission Field vaveh a, hihtheih khomkhom a panpih ngai mite panpih ut ahihdan gen hi.
Mission Journey hunin a mun mahmah a gam mite Video Coverage bawl a, Missionary nasemtute leh a gam mite mit a muh honghih chianga Khristian Tuailaite Missionary Nasem dinga hanthawntu ahih ngei lamen a hiai bang tum ahihdan gen hi. Tua Video kila dingte tunung chianga Laa hiaithu toh kituak a Editing hoihtak a bawl a zuak khiat dingin, muh zahzah Missionary Nasepna dinga piak ding chih ahi. Hiai hih a za zawsem a Pathian nna a sepna ahi chi hi.
Thangkhanmuan Tonsing
Journey masa Manipur Mission Field ah March 18, 2012 in panding a, June 2012 sungin Nepal Mission Field ah zohna bawlding hi. Amah kithuahpih dingin Mr Tunglut Thuamkhopau, Church Leader and Social Worker; Mr H. Biakson, M.Div (Gospel Singer) leh Mr P Ginsonlian, Youth Leader te’n zui in kithuahpih ding uhi.
Comment: Heutupa Thangkhanmuan Tonsing toh kum 2006 a kipan in kana kizui kha ua, ka lawmhoih mahmah ahi. BYF, EBCC Zion a dingin kum tamtak makai in ana pang hi. Laa lama tui mahmah leh Paite-Zomite lak a (L) Bounglienkung nungzui muanhaui khat ahi. Aman BYF Zion Laa lam ah nakpitak in masawn pih hi. Ama makaihna nuai ah Laapawl hoih a kigen mang nawnlou ding ‘HON DOMSANG’ leh ‘TUL NGEILOU’ Video Album bawlkhia uhi. Hiai Journey hih ama a ding hilou a, Pathian min thupina dinga sepsuah tum tinten ahihman in phathuai kasa mahmah. Aman hiai a ding liauliau in Gospel Singer tuamtuam kaikhawm in Laa hunkhop Audio Recording zouta hi. Kei ana suangtuahna ah seenna tawm liai dingin ka umkei, tuate ama mimal a ki seen vek ding ahi chi hi. Pathian min a kalsuan ding a kisa ahihman in thupi kasa a, a poimohte Toupa’n a piak ngei lam en ing. U-leh-Nau, Lawm-le-Vual kuapeuh in, hiai banga Pathian min a kalsuan ding tuh I kithuahpihna uh hiding in thumna ah phawk ni chi in kahon chial hi.