1. A masa pen in, na va lak award pen bang award hi a, bang min kivuah a, kua te hon piak hiam chih na hon hilh thei diam?

Ans: Lelte Chibil Award Paite ahi ka award lak. Lelte Award organising commette te honpiak ahi.

2. Bangchidan a hiaibang award sang thei na hia? Bang la or album pentak ziak a hiai award la dia sehkhiak a om na hia?

Ans: Z.A.A. leh lelte award organizing committe te deihsakna ziak ahi. Hiai album ziak chih a omtuan kei.

3. Award la ding a na hong om theihna leh a saang dia na va kuanna te ah, kua'n hon makaih a, kua'n hon panpih ahia? Chih tuh, sponsor chih bang om hia? Ahihke'h mimal vaai hia?

Ans: Mimal vai ahikei. Aizawl ah kapu Khoikhandai te innkuan in honna zintun in poimoh nateng ah honna makaih uhi.

4. Hiai na award lak in nang mimal a ding leh nang hon ngaina, na fans, te leh imi-inam a di'n bang phattuamna nei in na thei a?

Ans: Kei ka fans teleh imi-inam adia aphattuamna a katheih ahih leh ihihna, isiamna leh ipau ilaate uh minle hontheih pih na uh ahi.

5. Achihleh, music leh lasak lam ah, Mizo te leh Zomi te dinmun na muhdan na hon gen thei diam?

Ans: Music leh lasak lam ah unau Mizo te ahyh lebel state khat neitu ahih dungzui un a market ule alian a, alaa siam tampite adding in ki tung ding na a ching. Ei Zomi te ihih ualeh I market uh unau Mizo te a bang in alian kei a, kitungding natham ahi naikei. Huan ah unau Mizo te chu kipahtawi dan asiam ua alasiam leh musician te uh tha pe mah2 hi in kamu hi, ei Zomi te leng  nidanglai sang in kipahtawi dan isiam pan2 ta ua kipah huai kasa mah2.   

6. Award sang ding a na hoh lai in, honna vaitun a, hiaibang hamphatna hon na pia unau Mizo te na muhdan hon gen zek ve maw.

Ans: Unau Mizo te kamuh dan ahih leh milungsim zautak, mi siatna sang a mi hoihna lam kigen tuahzo mi hi un kamu hi. Akhua uleng a peaceful mah2, programme zinglam dak 1 phial tan lungnuam tak leh thoveng tak in kizang hi.

7. Ahihleh, hiai lou, award dang himhim lakkhak na nei ngei ta hia? Bangbang ahi ua? Bangziak a na muh ahia? Chih tuh a la ziak maw, album ziak, etc.

Ans: Siamsin Music Award Most promising Artist Gospel 2007 kana lakhata hi. Nang din zang ning chih V. Hangpu laa phuah ziak ahi.

8. Lamka leh i Zogam context et in, hichibang kipahtawina thilpiak leh recognition te i pibawl ngelkei uh abang a, huchi mah in na mu hia? Award functions chih khawng le nei ngei manglou ibang ua...

Ans: Hi, hucimah in kamu.

9. Awle, thubul ah kik zual le, kua ahihke'h bang in lasa dia hon inspire ahia?

Ans: Kaneu apat ana lunglut him2 kahih ban ah kanu’n hon inspire mah2.

10. I gam ah lasak lam a khantouh semna di'n bang kisam pen in na mu a?

Ans: Akisam atam mah2 a hilele huailak a poimah a katheih chu I market uh tua sang in lian zoleh huan ah kipahtawi siam le alaa sate leh musician te tha honpe mah2 din kagingta.

11. Music zat tuamtuam, genre achi uhia, like pop, blues, raggae, hiphop, rock, disco leh adangdang tampi te lak ah nang koi pen na zui a? Bangziak? Eimi te'n banglam zuideuh in na mu? Bangziak ahi di?

Ans: Genre khat zuih tuam bik luat kanei tuankei a Pathian phatna laa ahih naak leh kasa vek mai. Tulai in kamuh dan in atangpi in pop, rock leh hiphop eimi ten izui deuh un kamu aziak chu atuam tuam a omdi hiai ziak pentak ahi di chia vagen bikdi kathei tuankei.

12. A tuam riau khat. Eimi album him him i ngaih leh, recording lampang ah huchizaw deuh leh chih om naak abang a. Chih tuh, eilam te music pen sound synthesizer (keyboard), guitars leh drumset khawng lel ahi a, sound system pii deuh te a i ngaih leh maw, a music level khawng, mixing khawng....a technicals leh instruments chimai ni. Hiai toh kisai in na theihdan, muhdan....

Ans: Hiai lam hi kenle kathei lokei a himah leh kei muh dan in eilam chu sum leh pai ihak sat lai ziak mah uh ahi a Music lam zilna a degree leh diploma cih khong zilzou I om nailouh ziak uh, Khoih mun leh lunglut ziak mai2 a siam itam zok ziak uh hi in kamu.

13. Ahihleh, nang ngaihdan in huchibang a cross-border awards leh recognition te ei a dia hoih mah hi in na thei hia? Ahihke'h hoihlou? Bangziak?

Ans: hoih hi in kamu aziak ahih leh laasiam te ading in experience leh exposure hoihtak ahih ban ah milak a ilaa uh hoih tak2 te phou khiak theina ahi.

14. Chidaih le, eimi numei zawlla sa a om nawn kei sim mawk a, hiai toh kisai na ngaihdan hon sekhe ve maw.

Ans: Hiai thu ahzo ngaih danlua le kanei tuan kei, ilunglut nalam ciat kisa himai din kaging.

15. Eimi lasa te lak ah kua na ngaihsang pen a? Bangziak?

Ans: Kanu Lianlunching ka ngaisang pen aziak ahih leh a aw hoih kasa mah2 a huan ah lasiamte encourage leh makaihtu hoih taka hi. Kei mimal ading inleng nu hoihtak leh laa sak lam a hn inspire leh guide tu hoihtak ahi.

16. Awle, tulai tak et in, eimi new generation singers te lak ah a minthang pen na hi chile'ng i khial di'n ka gingta kei. Huchih lai in, lasak pen career taktak dia bawltheih di'n na gingta hia, eimi context et in? Hithei ahihleh bangchi bang a panlak a hoih dia? Ahihtheihkei lelah, bangziak?

Ans: Kakipak e… Career tak2 dia bawl theih din kaging naikei aziak ahih leh I market uh aneu mah2 laiziak in.

17. Tunung zek chiang a hong pawt ding album chih khawng na nei hialeh? A om leh na hon hilh thei diam? A omkei leh, huchibang bawlkhiak na sawm hia?

Ans: Album chu tulel in bawlkhiak ding a om naikei phot himah leh khat bek chu pathian in lem asak leh bawl non tei2 kasawm. 

18. Chiphiing le, lasa dia na kipiak tuung in banghiam kizilna [training] chih khawng na na nei hia? Kua'n hon train a? Ahihke'h, huchibang poimoh na sa hia? Aziak tuh, vai leh sap lasiam te khawng pianken a lasiam hikhollou, kizil tawm ngen a hisim ua. Eimi te bel a siamsa a piang te mah lasa dia kipia ibang ua chih thu ah...

Ans: Kizilna bangmah kanei kei Pathian in talent hon piak ahi. Training chu ahih theih leh thil hoihlua ahi.

19. Ahimhim in, eilam lasiam te exposure i nei kholkei ua. Unau Mizo te bang muntuam, gamtuam tuam ah a pai thei ua, a mi a sa te un a sam siausiau ua. Eimi te'n huchibang exposure i nei sam uhia? Poimoh na sa hia? Nang la, huchibang gamtuam muntuam a lasa dia chialna na mu ngei hia? Koi ah? Bang na chi a, na va hoh hia? Na experience na hon kum thei diam?

Ans: Kei theih dan inchu iki sam zek2 ta uh hi in kathei. Poimawh vachih hial dichu ahi kei a hilele hoih kasa. Singapore ah laa sadin ei Zomi omten honsam kha ua hilele lehkha zilna lamziak in kahoh thei kei huan ah Nagaland a unau naga te apan inle chialna nihvei kamuta himah leh exam lai toh aki tuah khak zel ziak in kahoh thei kei hi. Tulel in U.S.A. Zomi inkuan kichi I unau te un khompi a lasa din honchial ua dam a pathian in lem asak a visa kamuh theih leh hoh kasawm hi.

20. Awle, hiai Award la dia theihsakna na muh in bang reaction na nei a?

Ans: Kaki pak mah2.

21. I zogam.com simtute a di'n thukhah nop na nei hia?

Ans: Kalasak tung a kipat a honna support a honna ngaina tetung ah kipahthu kagen a maban ahleng honna support a kalasak te honna ngaih khiak sak zel din kon ngen.

Awle, houlimna di hun na hon pia a, dotna te hoihtak a na hon dawnsak man in kipak mahmah ing. Maban a thupi zaw a na hong lohchin deihsakna Zogam.com min leh kei mimal a kipan in ka hon khak hi.

[courtesy: L.S.]

.