Interview with SSPP FC Chief Convenor Pu Ginthanlian Valte by Zogam.com

Amasa pen in tutung North East Tamchon Football Tournament a SSPP FC in Champion hihna a lakziak in Zogam.com in ka hon kipahpih ua, congratulation ka hon khak uh hi. SSPP FC Convenor na hih nazal in Zogam.com in dotnop bangzah hiam ka nei ua, houlim leng chi ka hi uh.

Hichi bang vualtungtuanna dingin planning, finance leh logistic tampilut ding chih theihsa ahi a, amasa pen in tutung SSPP FC Tamchon Tournament telna dia budget bangzah khawng na bawl himhim uh?
Dawnna: Amasa in Champion i hihna ua no’n Congratulate ziakun kipahthu ka hon gen hi. Hiai tournament a telna ding in SSPP FC Management Committee in sum muhkhiak leh zatna ding toh kisai ginna a kipai in, a kidaih di sum leh pai I pawlpi ngaina leh it mi kiphal leh phatuamngaite tungtawn a hong om na di ahi chi in kipang hi.

Siamsinpawlpi in neihsa neilou ding ahih chiang in, koikoi a fund na kaihkhawm ua, na hon hilhtheihdiam, confidential lua a om keileh?
Dawnna: HUL apan sponsorship Rs 6,86,000.00 (c/o Pu Biaklun Shoute) kimu. Huchilou phatuamngai mimal tuamtuam te hon thohkhawm sum/sponsorship, nek leh tak, damdawi, etc khawng a kitoudelh ahi.

Siamsinpawlpi GHQ akipan panpihna bangbang na mu ua?
Dawnna: SSPP GHQ heutute’n Coach di Pu Chairman lemsakpihna toh ana guang uh. Player bangzah hiamte kuan leh paina di ticket hon la uh. Hiaite banah heutute bangzah hiam leng a taksa mahmah uh Delhi a hong pai in hong kithuahpih in, support hong pia uhi.

Player leh coach selection bang chi dan in na hih uh? Tutung SSPP FC player lak a paite kampau nidang sanga tawmzaw ahi chih bang le kiza a. Bang a na ngaihdan hiai toh kisai?
Dawnna: June kha a SSPP FC Management Committee Chairman innlam a pai lai in SSPP GHQ te toh meeting nei in huai ah Coach ding sehna nei uhi. Huchi’n player selection toh kisai coach mohpuak liauliau ah koih uhi.

Siamsinpawlpi hih i Paite minam min suang a Student Organization i neihsun uh ahi. Hiai i Pawlpi ah nam/zat tuamtuam in hiai tournament tungtawn a manphataka kizat khakna hong nei thei ka chih chiang in kipahhuai kasa hi. Huaibanah amaute ziaka i Paite nam tawisang a om a, mite’ tung et, theih phak leh ngaihsang hong suak kha thei chih bang ka ngaihtuah thakthak chiang in nuam kana sa lua hi.

Player toh kisai i gen lailai in, innlam akipan player kila ahih manin player te Delhi a hong kimawldi man uh bang zahzah na pia ua? Championship bang la i hi ua, Playerte winning bonus a om hia?
Dawnna: Player hong kuante match fee kipia hi. Match neih ni nitak chiang in player te camp site ah match fee piakkhiakna hun nuamtakin kizang gige hi. Match khat ah a kigawm in match fee Rs 75,000.00 bang kiseng ziahziah hi. Tutung Champion i hihna uah kuapeuh le kipak chiat i hihna toh player te tung a i kipahna etsakna in player khat ah bonus Rs 4000/- chiat kipia hi.

Tutung player discipline leh kimawl dan toh kisai lungtun huai na sa hia? Hon kumzekve maw.
Dawnna: Thamtham, lungtunhuai sa lua. A match te uah mi toh ki subuai, kisual, omdan hoih lou a om chihte om hetlou in kimawl ua, a et leng a nuam mahmah hi. A camp uah leng heutute zahtakna hoihtak a nei ua, omdan gamtat kho hei ah gen kai kuamah omlou hi. Hichibang a player kithunun zou leh mi hoih i neih khak uh hamphat huai kisa mahmah hi.

Management Committe in player leh official te Delhi a a omsung ua zuih ding rules and regulations hoihtak kibawl hi. Huaite player te toh simkhawm in, zui zou ding leh zui ngei ding ka hi uh chih thuchiam bawl in a suai kai chiat uhi.

Delhi a mifel tampi omlak a Pu Biaklun Shoute, Siamsinpawlpi JHQ, Delhi in Management Committee Chairman ding in sep hi. Pu Biaklun panlakna toh kisai tamlou hon kumve.
Dawnna: Pu Biaklun Shoute hih thil a hoih lam ngen etsawm gige leh lungkiathuai hun a le lungkiat sawm hetlou mi ahi. Kum paisa hunte a i vuallelh chiang un leng kum nawn chiang a nak zaw sem a panla ding chithei mi ahi. A huchih ziak takin kum teng in hat deuhdeuh, lunglut deuhdeuh bang hi.

Pu Biaklun Shoute in kumdang a hon laihsuah bang in tutung in leng HUL apan in Sponsorship Rs 6,86,000/- hon mu hi. Tua kia hilou in match neih ni teng in playerte piak ding sahbon, lotion, ice cream leh vanzat chi tuamtuam hon ngaihtuah gige hi. Tutung in Player hun khoptak Coach in ana confirm sa, a teamte un a khah theih pahlouh uh om hi. Tuate bang amah mah in a team officials leh heutute houpih ngitnget hi. Tua bang teng a pan ana lak ziakin player hoihtak tak kinei kha thei hi.

Pu Biakun Shoute in a Committee te ngatna lam kibang chiat din hon hanthawn a, i tup uh mualsuahna din a sun a zan chih omlou in hon makaih peih hi. Hichibang a heutu kipezou i minam in i neih khak hamphathuai kasa hi.

Management Committee sung a mohpuakna tuamtuam a om a. Chairman, Convenor, Manager, Coach leh a dangdangte mohpuaknate simtute theihsiam dinging na hon hilh thei diam?
Dawnna: Chairman a lian pen ahi. Aman overall in a Committe enkai hi. Chief Convenor in meeting makaih in, department tuamtuam te nna ding hawm, amau toh kichimat tak a sepkhawm leh a nasepte uh etzui na, SSPP FC adia a kul leh poimoh omte ngaihtuah a, huaite kizen leh feltaka sepkhiak didan geel. Lai khak khiak ding omte bawl, pawlam mi toh kisai khakna omte ah Chief Convenor kizang hi. Chief Convenor in Chairman kiangah progress and update omte pe zel a, thu haksa, la haksa omte kikum in nna ki semkhawm hi.

Manager in Coach toh pangkhawm in player leh amaute adia poimoh omte kikum in geelkhawm zel uhi. Practice na mun di leh huai adia poimoh omte ngaihtuah, practice hun bawlsak, player liam leh bai omte etkolna, etc chihte Manager in enkai deuh hi.

Coach in player selection, amaute dawp fel, practice pih, game plan leh strategy bawl, match neih chiang a player pang masa di te selection bawl, player leh match toh kisai himhim amah mohpuak ahi.

Media & Publicity in SSPP FC vai mipi theih tuak omte khah khiat, Siamsin Bulletin (Tamchon Special Issue) bawl, Banner, match neih ni mipite theih dia bawl, Fans motivation, etc te amau etkai deuh ahi.

Logistics department in player te omna di inn zon, nek leh tak, zan puan, um leh beel suk tuah, player te airport apan pi leh khak, match neih ni leh practice chiang a player te paina di ngaihtuahsak, player te paizoh chiang a inn hep, vante koih hoih leh a kul leh poimoh om bangbang sep tuh amau mohpuak ahi.

Secretary cum Finance Secretary in meeting recording bawl, committee te laka theih tuak omte theihsak, sum leh pai zatna leh muhna tengteng hoihtaka record chihte ahi.

 

Pu Ginthanlian Valte (left) and Pu Biaklun Shoute (middle)

Coach Sonpau kha 2015 kum a Tamchon Final a player a kimawl ahi a, kimawl sang a coach lam tempai zaw ahi diam? Coach Sonpau nasepdan non kumzek thei diam?
Dawnna: Kimawl lam sang a Coach a tempai zaw chih dan lam inle ka koih kei a amah kimawl tam nawnlou, serious game/tournament khawng a dia fit kisa zou nonlou dan in a gen hi. Coaching B Certificate holder ahi. Huai banah, player te bangle a duhthusam tak hon kaikhawm a, player te strength & weakness theichiang mahmah ka sa. Match day chiang in team meeting neih pih sek a, player te a hanthawn banah player te lak bang ah match toh kisai gennop neite gensak zel hi. Player te'n leng zah mahmah uh hi'n ka mu.

SSPP FC kha Tamchon kimawlna lak a fans haupen leh hoihpen a theih ahi. Hiai fans te na bang chi mobilize ua?
Dawnna: Hiai toh kisai management committee a ka hiang poimoh tak Media leh Publicity Dept ten a hih theih tawp uh suah in platform tuamtuam WhatsApp, Facebook te ah fixture leh promo te post den uhi. Theme dan pian a i zat promo leh fixture, banner te a i tuansak “Lumbang sung aw biak tung Thianmang” chih in mipi lungsim a khoihkha mahmah ding in leng ka gingta. Tuate banah heutu masate’n lungkelou in honna paipih ua, hiaitan I tel ngal leh khatvei bek Champion hih utna lian mahmah in leng ka thei a, tuaziak tak a le a kua kua kilawp chiat ahi diam ka chi hi.

Kumteng in SSPP FC Tshirt bang bawl in om a, tutung Tshirt leh Jersey pen kua designed a?
Dawnna: N. Chinkhanhau (Hau Paite), Ber Sarai, New Delhi leh Siamlian, Vasant Kunj, New Delhi te design ahi.

SSPP FC managed na dia haksakna na tuak tham ding ua. Haksakna na tuahte uh na hon share thei di hia?
Dawnna: Khopi a thil sai, huaile kal nih val lam tham sep leh bawl di omden ahihna ah haksatna om thou sam mah e. Ahih hang in fans te lunglutna, management committee te kipiakzohna leh player siam mahmah i neih ten tha hon guan a, haksatna omte le phawk zoulou di khop in hon koih thei uhi.

Delhi context ah, Siamsinpawlpi Tamchon ah a telnung Siamsinna, education lam focus kiam a chi pawl om ua. Tua banah nidang a hihsek Siamsin Sports leh Conference te bang nei vang mahmah ta chih gen in om hi. Hiai toh kisai bang ngaihdan na nei a? Tua banah Tamchon a sum tampi seng a i focus uh phattuam leh hihtuak mah nasa hia?
Dawnna: SSPP JHQ Delhi in tumalam deuh in Siamsinte khualna in “Kilamlahna Vaiguan” chih bang hun bangtan hiam kalteng in ana sai uhi. Delhi a om siamsinte’n i mohpuakna uh leh Delhi a i omna san uh thei chiat in, i zilnate uah sangpi leh mitung a leng zou di khop a zou in, kaam hoih taktak gelhkhia bang tam le i Siamsinpawlpi tawisang na khat hi di ahi.

Maban ah kumteng a Conference leh Sports i neih zoh ngei na ding un i pawlpi uah kuapeuh ki inntek sak in, sum leh pai, tha leh zung, neih leh lam a kithuahpih in, phungvuh chiat sawm ni uh aw.

Delhi khopi a ei Paite minamte namdang midang laka i ki expose na te uh lak a khat tuh hiai Tamchon Football tournament ahi. Hiai tournament tungtawn in i minam in mite theih in record hoihpi pi ana kinei ta hi. Etsakna din – Best Fans, minam kituakte chih bang ahi. Tukum ngial in houh a mang ngei nawnlou ding in 12th Edition Tamchon Tournament ah Champion hihna bang i la zomah uhi. Hiai tournament in i minamte mahmah lungsim mun khat a honpi khawm in, nuam kisa khawm in, kipak khawm in i om dupdup mai uhi. Hichibang a i minamte hun nuam leh kipak taka om theihna dia sum I sen tuh iai huai mahmah lou in ka thei.

Champion cup lopna Delhi a sai hilou a, Lamka lam a cup puaksuk toh kisai na hon hilhchian thei diam?
Dawnna: Hiai toh kisai committee in “theih tuak” chi in hilhchetna 23rd October 2018 in kibawlta hi. A tomkim in Pathiani kikhopni toh kituak ziakin hun kibichilh petmah a, sum le pai lam a giautau deuh ziak leh players te a om kimnawn louh di ziak uh hipen ahi. Management committee in lemtang masa penpen a lopdi dan kingaihtuah ahi.

SSPP FC final kum 3 a chinna ahi a, tutung i vualzohna uh bang ziak ahi na chi a?
Dawnna: Lungke hetlou hial a kum 12 sung vingveng i pankhawmna ziak uh ahi. A diak in fans te hahpanna leh kipiakzohna mahmah thupi lua. Huaibanah Coach in player hoih leh ki discipline taktak hon kaikhawm, amah mah in playerte a deihdan tak a makaih, management committee te lungsim munkhat pu a om chiat, kuapeuh in mohpuakna ngai poimoh tetet a sepkhawmna gah hi in leng ka mu. Tuate tengteng tung ah Pathian in i thumnate uh hon dawng a, i deih leh lunggulh ngitnget uh a hon piak ahi ka chi hi.

Kumnawn chiah lohching nawn dingin na kiginta hia?
Dawnna: Tukum bang a kituaktaka I pankhawm uh leh Pathian panpihna toh thil hithei ahi.

Aw le hiai tan in i hunsakdia, na hun manpha na hon piak ziak in kakipak lua uh. A tawpna dingin SSPP FC fans te na thuchah nop om hia?
Dawnna: Amasa in fans te tungah kipahthu ka gen hi. Fans te a neupen apan lianpen tan in hihtheihna tengteng suah a, gim leh tawl khawksa lou a i team uh i gup dan uh thupi kasa lawtel hi. Maban ah leng tukum mah bang a I hihtheihna lam chiat ua pang a, i aw , i tha neih tengteng toh SSPP FC adia Fans hiden ding in ka hon ngen hi.

All photos are Copyright reserved by Ginza Vualzong (Nema Photography)