58 - Churachandpur A/C  pen miteng bildohpen ahih manin, mipite decision bawlna panpihtu ding leh candidate te adia platform hi ding in Zogam.com in candidate teng DOTNA 5 kibang ana ki bawl a, a nuai a bang in dawnna Pu CT Lian Guite akipan ki mu hi.
Zogam.com in Pu CT Lian Guite lohchinna leh deihsakna lianpen ki pia hi.

 

Zogam.com Dotna 5te:

 

1. Bang ziak a hon vote ding ka hi ua? Candidate dangte sang a na hoih zawkna bang a?

Dawnna:  "Lead by example," chih theichian kawm in, i gam tunding thak na dinga Diktatna a kibulphuh a, Kuhkaltak leh Chihtakna toh NASEP kipanta akihihna ah, khangthak te adia ettontak lampi sialtu khat aki man in. Atangpi in heutu dinmuna ding diing i mi deihdan i gen chiang un - Gam le Nam it,  Negulou, Ginom, Diktat taka nasem, Thanuam, Khentuam neilou, Political goal vision kichiangtak nei mi ahihding i chisek ua, hichibang hihna toh kei hihna kinaihpen ahihdan tamlou ka hon gen ding.

Kei, gamdang mun tuamtuam a siamsin banah nasema kum tamtak omsa, sepna ziak hilou a gam-le-nam itna leh awlmohna ziak liauliau a  innlama hong pai a khosa khat in i gam adia sep theihtheih sem a khosa dia hong kik a khosa mah kana hi tei hi. Chiklaipeuh a ka hihtheih khamkhama panpihngaite panpihtu, mihaksate huhtheih dandan a ana huh gige a akhosakna uh domsang ut gige khat kahih mipin hon haihlouh uh kaging hi.

Mipi deih dan taka Gam leh Nam humbit na dia theihtawp a panla ngam mi khat kana hi tei hi. Apaisa 2013 a Dam Sex case a issue liantak ana phusa, banah 31 August 2015 a 3 Bills vai a theihpatawp a damdoi inn mun a liam-le-baite leh Dharna tutna munte a hihtheih khomkhom a huh a, Delhi tanpha aleng mahni a sen-le-pai te senga i issue ziaka ana kipei tei khat kana hi hi. I gam buainate toh kisai a Delhi leh muntuam tuam a Political leader liantak tak te agelhthoha lai poimoh tamtak ana khakkhia a, huai kia leng simthamlou a mimal mahmah a leng amaute va kimaituahpih a vamutu kana hi hi. Mahni hihtheihna chiangchianga kalsuankhia gige khat kana hi gige hi. Manipur a tribalte haksa na kideidannaa omte nakpi tak a pona a Tribalte right protect a tribal custom and culture  promote ut gige  khat kahih man in - gam it khat ka hi chih mipin leng hon haihlou uh kaging  hi.

I gam pansan a nek le tak zonna ding om ahi. Mahni a kitoudelh ding ahi chih tangkou kou a hitheih kham a kitouhdelh theih nading lampi  atamthei pen bawlkhiak tum a panla den khat kana hi a mipi'n hon theih uh kaging  hi.

I gam a sepna ding tawmlua pen awlmohna ziaka, hih theih khamkham a nasep kichian neiloute huaikhom a, mahni a sumdawn dingdan sinsaktu kana hi hi. I gam a sepna tamsem bawlkhe thei dinga muantaak mah ka hihdan nasepa langsak tawmtawm mi ka hihziak in, midang khenkhat sang in mipin hon muangzaw ding in ka gingta hi.

I gama damlou ki etkolna dia hospital ineih uh ginalou leh kingakna taak taktak lou nasataka puah ut te' laka mi khat ka hi. Hun paisa bangtan hiam a pat damlou sisan poimohte sisan petu ding zonga vialdian gige a na hon theih khat uh ka gingta hi. I gam a imi-isa panpihngaite awlmoh taka panpiha aki vialdian lai in kuamah beh-le-phung, chi-le-sa, pau-le-ham, azong-ahau khentuam omlou in awlmohtak in ki panpih dialdial a, hiai mipin thei ding in ka gingta hi.

I gam education system naktak a segawpsa awlmoh mahmah a tungdingthak tum mi ka hi. Government school I neihte uh gina taka function a omlouh laia - tua New Lamka Upper Primary School muihthei dinmun a adinlai a puahpha leh tungding thak leh lungluttak a enkaitu in,  Govt school dangdang te leng lungluttak a enkai a tundingthak zou dingmah ahi chih mipi ten na hon ging uh kaki nem hi.

I gama i lampi hoihlou leh tuinek ki ningchingloute hoihtak a puahphat leh ki ningchinna dia panla ut tinten mi ka hi gige hi. I gama lampi hoihlou leh kuakte mahni neih dandana puansia thuap a thuap sek pa leh tuinekding lakna a meter-guage kithuah leh tui ki ningching theita ding ihi uh chih idea nei a semkhe ngei dia mipiten lam-etna na hon neih uh kaki nem hi.

Tutanpha a MDC hihna kumkhat leh akim ka let sunga mipite leh gam adia Govt apat thil hongpaite dan kipete toh kituaka ahiding bangtak a semkhia leh thil kiselgu omhetlou a dittattaka hihding ka chiamte leh ka gente ataka semsuah mi ka hihziakin, MDC hihnung a khangthu adia chiamteh tham Annual Financial Report nounel tak a mipite' muh dia luikhe thei mi kana hi hi. Ka sepnasate ziak a hon muanga, tua leng a gensate hon hihtang tungding ngeingei ding ahi chih muanngamna toh mipin hon vote ding kaki nem hi.

Aziaktuh, mi diktat ding itel ding akichi kei a, midiktattaka sem toutou leh sem lellel a semzom ding mi mah muantham zaw ahi. Ana kisepnasa chiangchiang a diktatna leh muanhuaina kitaklang tou den ahihna ah mipite' lametna mah inleng asemnailou sanga ana semsemta te mah muantham ahi chih kamkia mai a genkhia hiloua nasepa latsak ahihding akichih ziakin, entuh nasep kipankhinthamta aki hihman in mipiten midang anasep uh kimu nailoute' sanga, ei isep sunsun kilangte vote zaw ding un ka gingta hi. Khenkhatten leng sepsa-bawlsa taklat theihding omkha om ding ahi, ahihziakin adinmun utoh kituaka asepkhiak uh omte tehkaak ding un ka ging hi, en tuh imuhkhiak zahzah toh ina sepna miten hon theihpih uh ki gingta hi.

# Hiaite tengteng banah, Candidate dangte' sanga mipiten hon muanzawkna di ziak ka gintak tuh nasep ka lunglut lamtak ahi a – NASEPNA LAM AH TU TADIH IN MUANHUAIPEN HI DING IN KA GING TA!

 

2. Telching in om le teh na bial ah bang development nna nasem masa pen dia?

Dawnna: Development lam toh kisai in igam in itaksap mahmah Lampi hoihloute puahphat, Tuinekding tuisiang kiningchingtak bawl leh Gamsung siangthouna dia hawktui luanna ding nulluh kichiantak bawl leh khopi sunga luita te tuuklam chianga let theizel te apang(embankment) bawl dingte ahi.
I gam a government office gina lou te tohhing (restore) thak vek nading a panlakpah ding katup ahi.

Dotna danga akigensa bang in Govt nuai a siamsinna buk te puahphat thak ahi ding.
I gamsunga kimawlna lam a talent tuamtuamte zonsuah leh chiil ahihtheihna ding un kimawlna ding mun athak bawl khiak ding.

I gam sung a nek-le-tak piangte akipan mahni kitoudelhzou dia huanhai leh huangvulh ganta vulhna lam pibawl a, khutsiam-silbawl nna hasuan a, igam mahni a kitoudelhzou gam suahsak tup le ngim ahi.

 

3. Na bial a muanna leh bitna bang chi'n na bawlhoih in na kembit dia?

Dawnna: MLA masaten aterm sung ua zatding office policy ana bawllouh ziak ua etkaina nasep ana omlou ana hi hi.
Amasapen in State Government department 28 val a om ua, Police department leng tel in. Hiaite' zuihding office procedures - office staff tuamtuamte' nasep ding (job description) hoihtak bawlsak masapen ding, a nna ding uh leng pe ding ka hi. Banah kai hun, tawp hun, suty lak ding dan kichiantaka bawlsak ding ka hi.

Huai adin thil peuhmah Chi leh Nam a khenlou in, deihsak tuam leh deihsaklouh tuam leng neilou a, thil ahi ding bangtak in ka hih ding hi. Abik takin Police Department mahmah naktaka etkai ahi ding.

Huailou in, policete station mun nih kia a koihlou in, police picket 35 bek in ka khenzaak dinga, khosung leh gamsung kilchih ah police picket te koih in gamsung muanna leh bitna ka enkai ding.

Khopi sung meikang akipan bitzawk ahihtheih na ding in State Fire Brigade Department te khopi sung mun 2 bek a picket koih beh a, a vanzat ding uh gari leh vanpoimohte piakbeh ahihna ding ua panlak ding.

Singtanggam hauhsakna leh asunga ganhing leh gamsate lakmang a omzelte etkaina toh kisai in State Forest Department te nakpi a puahphat a, check gate leh picket lampi ka-hiang poimoh diakna munte - Teddim Road (Singtanglam lampi leh Phaizanglam lampi te), Tipaimuk Road leh Sugnu Road te ah koihveka diktattaka etkai ahi ding.

 

4. Election siangthou tak a om theihna dingin bang chi'n pan na la dia?

Dawnna : Election siangthou theihna ding in michih in mohpuakna kinei tek hi. Adiak a ki candidate ten mahni campaign na munte ah diktatlouhna leh sianthoulouhna lam hasota neilou a, diktatna leh sianthouna lampi a tawntu leh makaitu hihtup chiat ding ahi. Ahoihlam a kidem a i Christian hihna toh kituak a, diktatna tawisang dia ki taiteh zawk ding ahi.
Hiaitoh kisai in, Election controllerte leh Security Authority tuamtuamte kiang ah written in vote siangthou taka khiak ahihtheihna ding in agelhthohin ngetna ka pe ding hi. Banah, mipite kiangah leng vote guklou ding leh asiangthou theipen a vote khiak ding ahihdan inn kikhopna teng ah ki tangkoupih gige a ki tangkoupih lai lai ding hi. Election ni a kua hiam diklou taka hih akimuh leh concerning authority te kianga theisakin action la dingin pan ka la ding hi. Dikloutaka chin sang in; diktat ziaka chinlou ka ngam zaw hi.

 

5. Na gam leh na mite rights bang chi'n na kembit in na enkol dia?

Dawnna: Hiai toh kisai ding atuam liauliau in committee khat dinkhiak ahi dinga, constitution toh kisai a expert te consultant a koih in, huchiin hiai committee kei Chair na nuai in tulel a  i tribal rights toh kisai a buainate uh leh tribals mi leh gamte humbitna dia dan kikhungte nouneltaka zonkhia a, constitution toh kituaka bawldika, Indian Dan bupi sunga Sixth Schedule provision nuai a Manipur Tribals gam leh mite humbitna Dan constitution in honna piaksa liauliau kheklamdanga omte bawldik thak a, hiai Dan piak a iom ua singtanggam etkaina dia danbawl theihna thuneihnate tunding thak ahihtheihna dia panlak ding ahi. Indian constitution sunga 6 Schedule nuai a ei Singtangmite' rights tuamtuam kigente i gam a anen-aham a khentuam omlou a ki implement nailou hi. Six schedule/Seperate administration ichihte mipin demand ki chiantak ihon neihtheih chiang un, mipite' deih/mipite' ki minna penpen delh in chiklai peuhin apoimohna tengah kalsuan in ka tai ding chih ka hon gen hi.
Singtangmite' Rights adiaka ei Manipur a singtangmi omte ading biika  kihumbitna dia Indian Constitution in ahon piak provision pen Manipur Govt in nelhsiahtaka hon khek lamdangsak pen uh bawldikna nna leh HAC te thuneihna tundingthak na dia panlak ding. Hiaipen ei Singtangmite nelhsiah leh nuainun a I omna uh pulakna kalbi hongsuak dia, huai akipan in Sixth Schedule nuai a Manipur Singtangmite kep bitna dia Indian Govt in 1972 a provision honna piak uh - Hill Area Autonomous District pen original provision dan geih a tundingthak na dia phut ding. Hiai kalsuanna pen state danga Sixth Schedule provision anapiakte utoh etkaka ei adia hoihpen leh zattaak ding pen pen bawllema kalsuanpih ding ahi.