“Faithfulness is more important than Fruitfulness’  chih ka thupi ahi” Rev Thang Ngaihte

Rev Dr Ginnei Thang Ngaihte, Professor Chiangmai Theological Seminary, Thailand a semlel in March 2012 in New Delhi hong pha uhi. Rev Thang Ngaihte pen India Zomite overseas missionary tallang pen ahi a, Pathian in veina  a piak Thailand ah a zi Ching Ngaihte toh khosa ua, atapa Khup in USA ah Asst Pastor sem in omlel a, atanu Nem in Missionary tate khat pasal a nei in USA ah khosa uhi. Zogam.com in Delhi hong zin chih a kitheih phet in Columnist Zoson makaihna in Nancy Chinghoih, Lalsuanmang Naulak toh a tunna uh EBC Guest House Dwarka ah houlimpihna, EBC Pastor V Nenglian lemgel siamna ziak in va neithei uh a, houlim i simsuk ding uhi.

 

Tua ka sepna Seminary student te Mission Exposure dan a Kolkota hong phakpih ka hi ua, Delhi a EBC Saptuaam te’n a theih khak un hiailam leng na hong phathei di uam chin hon dawp ua,a tuam a hong zin ngaituan lou din hun lem ahihtoh hong phakha ka hi uhi.

 

Kum 1974 apan EBC Saptuam ah ka sema, tua khit IEM toh kum 2 sem in 1989 in Overseas Missionary Fellowship, OMF International ah Bangkok pansan in Kum 11 Church Planting naa ka sem uh a, tua sung in OMF Regional Director na kum 7 ka len hi. Huai khit in Fuller Theological Seminary, USA ah doctorate ka va sin a, tua ka zoh in Asian Theological Semnary Manila a Mission Professor dingin honzawn ua kum 10 ka va sem uh a; ATS pen hong piching simta, a gammite professor leh doctorate degree nei 20 val banga hong om ua leh amau le amau kitoudelh theiding dinmun in hong omchiang un Pathian pina in Chiangmai Theological Seminary ah chialna hongpai a oma, tunin kum 1 ka omta uhi. Tulel in Asian Cross Cultural Training Institute Singapore ten Interim Dean ding a honchial ziak un Chiangmai leh Singapore ka kawmtuah zek hong ngai ding hi.

 

Ka graduate in kum 26 ka pha a, huai a pan sem chileng kum 37 khawng aphata di e..

 

Thupukna na bawl theipah maw ahih kei leh haksatna hiam daltu bangbang om a, bang hongchi ven a? Pathian sapna ka theih ma’n keimah kipiakna kum 1973 in ka neia, tua kakipiakna Thildang sem dia taisan ding ngaitheilo in hunlem hongom ngak in Toupa pina toh kituak in 1973 a St.Anthony’s college, Shillong apan ka graduate khit 1974 in Cattermole High School (NEIG Msission school)Lamka nuai ah Assistant Headmaster in kasem hi. Tua a pan thugen leh Saptuama sepna hong kihong in Thugen mihi dia heutte muhna toh Evangelist at-large leh Director hihna len kawmin kum 14 sung EBC ah kasem hi.

 

December 2011 in ka naupa uh Gouchin zineih in ka vapha uh.Tomchik I phak in thil a theihhak a, i gin thu iva genchiang in a dikkim sek kei hi. Bangteng hileh thil a kikhek lua in ka mu a, a paidan in khanlam I manoh mahmah ua, saptuam kei muhphak tan ah khalam dinmun lam ah hatthou mah lengle tradition/practice leh infrastructure/degree chihte hahbawlna uang adia aw ka chi sim hi. Hiaite hoih leh p0imoh himahleh khalam thil toh buktuah (balance) haksa mahmah thil ahi. Pilvang chiat kisam hin mu ing.

 

Ka muhdan in history ah enleng Pathian in Old Testament apan opportunity hon pia a,himahleh I ngaihsak keileh tua hunhoih (opportunity/privilege) a omden keiding hi. Bible ah hotdamna ah hun ah kon ngaikhia achih mahbang in Tanchin hoih I zakna hun sawtpek ahita, kum 100 bang valta hi. Upa ,Ordained ,minister leh theologian tampi I omta. Huai lak ah it mahmah in thu gen leng le a mipite decision a kinga hin ka mu hi. A itna thu theilou leng I hinawn kei uhi..1978 drugs toh kisai a lauhhuai dan Seminar ka nei a, huailai in hiaite khawng sapte buaina ahi,eilak a din poimoh kei a chi uhi.Huai nung kum 10 le phalou in drug I gam ah hong uang a, I tuailai ithuai tampite I taan uhi. Ka kuankhiak nung in lawmte li le nga in hong kik in I dou ngai ahi hon chi ua,ken le ka gen ding ka genkhin ka chi a, ka mi-le-sate ka itkei chihna hi hetlou in , miten a lungsim ua angaih khiak nopkei uh leh phatuam lou ahi. Bangteng hileh hihtheih chiang pangkhawm a panlak chu poimoh ka sa ve. I saptuamte itna veina ziak in khasiatna bel omtham ,Himahleh tutan in Pathian in mohpuakna hon piak South East Asia hi chih thei tinten lai ung a, tunung kum khat kum nih in Pathian in koi ah hon koih dia chihbel ka thei kei hi.

 

Saptuam a mohpuakna Director hihna khongtoh kitawn in Mission nasepna gam leh mite veh in Missions sepna kisap dan Toupa’n hon theisak sem sem hi. Toupa’n Cross-cultural Missions a pai dia a sapna kichian tak 1982 a Singapore a Haggai Training Institute a kava hoh in lenna sungah Thai tuailaite tungtawnin a Thaite Pathian apan a manthat dan uh hon musak hi. Tua a puakgik Toupa’n honpiak mangngilh theih naksangin mangngilh ka sawm chian uang hiai hiai bangin 1987 in EBC a Director ka hihna hun beitoh kitawnin Overseas a sem dingin ka kuan khia uhi. Haksatna tuam tuam: Thupukna buchingtak bawlna dingin kum 4 sung a lut hi. Aziak lian deuh deuh thum ahihleh Saptuam a kasepna term beima saptuam pawlpi in honkhah khia thei kei ua; tua banah overseas a hon support ding kuamah ka nei kei uh (ka kuan khiak nitan un leng). Hiai pen’ test of faith’ chih lel hilou in khitui luanhuai tampi ka tuahna uh ahi a, hiai ah igen seng kei ding hi. Tua banah, tua hun laiin missionary a kuan ding chih khong hing leh dama kimu nawnlo dia kingaihsutna alian a inkuante lem sakna a ngah hak mahmah a, hun bangtan hiam kivei phawt a ngai hi. Sapna ahih leh kei theih dan in a tawptan in muhpah theih ahih kei a; kal khat khit a kal khat zel, nikhat khit a nikhat zel Toupa I zuih leh a muan huai dan niteng kum tengin kichian hiai hiai in tuni tan in Pathian honsapna ka chiang deuh deuh lai in ka thei hi.

 

Pathian tangtawn thiltup en le hang gamteng a pai a tanchin hoih gen ding chih ahi. Ei kia awlmoh in eikia kibuaipih pih leng le Pathian tup pipen (purpose) ahihkei leh piching tuanlou ding hi.Kei muhdan in bel Pathian deihdan I khoihleh aman le ei lak hon khoih ding .Himahleh ei kia kibuai pihpih mawk leng Pathian “Do by yourself, I will go by myself to mission” hon chimawk leh lohcinna omtuan lou ding hi (Haggai 1:5ff).Himahleh nungak tangval Pathian sapna mute kuankhiakna ziak a Pathian zahngaihna eilak a chikchiang hiam a hong tung ding.Huaiziak a Pathian vualzawlna leh thilhihtheihna adeihdan I sukkhak chiang a I innkuan, I saptuam, I gam leh nam tung a tung ding hi. Ngaihdan paikhat ah eilak I ki it masak ken bangcin midang I it theidia chih omtham himahleh Jesu in le genthei tagah mite na kiang uah om gige ding uhi chi, a bei ding chilou. Chiklai peuh in na huhthei in hilele nang hon zui in chia sappawl nei hi.Tangthupha zangei nailoute kiang va zaksak pen thupiak lianpen (the Great Commission) poimoh ahi.

 

Ken dotna hon dongkik leng bangziak a saptuam kipan ahia? Bangziak a a tuam om poimoh sakna om ahia? A omsate’n khat a om hoih a sakna uh bang ahia? Huaitoh kisai in etdan nih in khentheih hi : Khatna ah Apostolic Church; huai in a gen noptak bel ei le ei kikep ding,doctrine a khan ding, hoihtak a pastoral ministry hihding ahi.Anihna Missional Church: Huai ihihlebel ei le ei kikep ban ah a purpose thupi zaw Mission hizaw ahi. Huaiziak in heututen saptuam khat a omkhawm , kikhen khiak hileleng a tuppen bang hihiam chih theilou ka hihman in ka hon dawnna ding haksa ka sa hi. Himahleh kei deihtelna non dot uleh bel kei a ding in bel mission hi gige ding hi.

 

Kei muhdan Pathian in Kristian hisa tampite te Pathian theilou za laka za phial omte lak a ahonpilutna aziak om dingin ka gingta hi. Eimah kibuaipih ding hilou in midangte Krist kiang pi ding hizaw ding a; I hinna, inasep leh ineih teng leng Toupa dia zang dingin hondeih in ka mu hi. Tuabang I vision hileh bel Missional Church I neih ngai ding ahi; hiai bang ministry focused structural change pen makaite apan a hong kipat kisam dingin um ing.

 

Bangtan saptuam ki involve (tel/pang) ding adiam chih ken le theihhak ka sa hi. Thukhunlui ah Zawlneite’n naktakin social concern neiin thu hangsan tak in a gen uh, Pathian apan a zak uh ahi. Tulaiin miteng thugen dia kisa ihih chian mitengin authority Zawlneite banga nei ihi ichih leh bel tua bang authority nei omlo ahih khak ding lau huai hi. I gam hoihzawk na ding a, koi tan apan hoihding, kuaten tua mohpuak na nei or authoritative message nei chih bang leng thil piak leh Pathian sapna honghi zel kha ding hi. Biblical teaching or practical involvement bang lam hiam bel michih in panna nei chiat ding ihi uh chih ka gingta hi.

 

Pathian nasepna kizatna chih pen michih sep ding himah leh I mohpuakna a tuam chiat Toupa’n honpia hi. Atunga dotna mah bangin kuante’n sem dia; bangchi sep ding?Koi mun leh koi hun ah chihte theih siam dia sinsakna kisam ahi. Doctor-na hiam, Engineer na hiam michih in I sep theilouh bang dan ahi. Pathian nasepna michih a ding ahi-a; hima leh I sep ding tuam chiat aom hi. Zogam a saptuam makaiten (Pathian sap miten) politics, gam vai hawmna ah moral and spiritual authority a neih ding uh ahi, mohpuakn kichi leh authority kichi pen a kikhen theilo thil ahi. Toupa sap thil piak neiten moral and spiritual authority leng nei uhi. Hiai pen zanglou a surrender mai ihi hia; a zanglou dingpi in zang hia; kuaman zanglou hia chihte thil theihhak ahi, amau leh Pathian kal thu ahi hi.

 

Pathian deihdan thei mi kitam hetlou kha ding ahi; tua thei dingin leng panpih ngai mitam pi omhi. Tua omdan bel Pathian deih dan zawna ah careers guidance in mohpuakna lianpi a nei a apangkhawm ding thil ahi hi. Careers guidance pen Christian Careers guidance a kisam mahmah hi. Aziak bel I kim I kiang kha-gilo demonic environment ahi .Mi hon advise ding leng atam ban ah huaihun tak a spiritually mature person te, intellectual lama theihna neite or expert mite a houlim ua I tuailaite hiai lam a pini chih guidance ineih hoih ahi. Tua I paidan ah school a utut in hong, doctorate tampi I nei hi. Himahleh tulai or international standard a kizangthei ding a kisek poimoh ahi ‘Global village’ a teeng ihih dung zuiin. Tua ding in pan I la uh hiam chih leng etthak poimoh hi. Nidang a thil kisam leh hihdan tuni in kikhek ving veng simta hi. School hiam, seminary hiam ,institution khat peuh sub-standard a mi’n a honkhiak leh tuailai tampite hihna hihsia (poisioned) uh hiin ka thei hi. Kum bangtan hiam paita a Sangai Express a ka article khen khat in a simkhak ka lamen hi.

 

Anih in poimoh ka chi ding. Psychology without theology of the living God is most dangerous one. Metropolitan a semding chu ahithei tan in team-work poimoh ahi. Tua bang a a team I neih theih kei leh na akisam lam training (degree) hi sese lou piak ding. Saptuam pianzia- structure toh kisai in abikin Metropolitan city ah hiai ngaihsut kisam- Kuamah nna teng a veka specialized omlou ahi-a tuaziak in saptuam lian neih a huai a pastoral team hoihtak –preaching, teaching, training, member care, holistic ministry, mission outreach leh a tuam tuam sem ding kiningching zaw deuh a saptuam kep a hoihdiam? Or Local saptuam tuam a kisapna mun dan a neih a memeberte a thilpiak uh muhkhiak a tua thilpiakte zang dia training piak a, saptuama khasum sang neih ngai chihte tawm neih abaih zaw diam? Tua pastor khat in saptuam khat kem a hoihtak a nasepna poimohte hivek zawh vualding hilou hi. Metropolitan city a nasep pan ihihziak in ministry philosophy kichiantak toh nasep paitouh hoih ding hiin mu ing.

 

Khopi tuam tuam ah Saptuam te ah tuailai te 70 per cent ahi tangpi uh ahi. Huci kawmkal ah innlam a saptuam chih in amau belamte kepna ngai poimoh chi in saptuam a phutchiat uh hi. Tua bang kal ah mun tuamtuam a khopi tuailaite lak Youth Pastor/Chaplain deihna bang lian mahmah hin langta hi.Huaitoh kisai in Khopi tuailai ten bangchi panlak hoih hihiam? Eilam saptuam te kivaipuakdan tangpi in Centralized Saptuam ngen I hisim uh hi. Ka chihna bel Lamka a I munpi chiat un vai hon hawmdan ua pai I hi uhi. Huci ahihleh chu I headquarter lamchiat uapan hon sawl uh ngaiding bang hi.Himahleh I heutute un huai vision bang tan mu uhhiam chih ken theilou ka hi. Tulel dinmun ah I heutute muh dan leh panlakna dan tan a ipai uh ngai ding bang hi. Huaiziak in I khangthu a dingin hunthak leh thil thak I tawt ngei nailouhna a lut ihihman idea hoih nei ten consultation hiam neih a pan lak ngai in ka gingta hi.

 

Tuapen Innlam a heutute’n hon dawng thei zaw ding uh. Ka gensa bang in traditionalism lam nawt I bang uhi. Innlat ding, gari leh latding tuam tuam bang tamchi theilua, denchiang in hiai I Bible bang leng practice toh hong kikim leh Roman Catholicism dinmun toh kinai kha ding ahi.Huailam I nawtzaw ding hiam chih bel ka theikei,hilele a trend bel om hi.Kum bangzah hiam nung chia Bible leh tradition/practice ki bang dan a ngai poimohna I lut leh bel hong haksa ding hi.

 

Pathian thu ahibanga a zui hileng I pi-le-pute sangmah a itna, phatuam ngaihna leh ginomnate nei tam zaw ding ihi hi. I pi-le-pute Pathian in manphatna value ichih ana piak tetung a Toupa hoihna value lamtouha om dinglai vangsiat huai takin tua manphatna mangsak hiai hiai I bang hi.Hiai hoihna kichite khotang a sawm thua neih theih ding ahi khawl kei dia Pathian lam mah a I puklut a ngai ding hi. Mimal, inkuan, saptuam/ khotang sep ding mohpuak omtek ding hi. Pathianin mihingte a hon lamet lian leh mohpuakna hon piak Tangthupha gena mite Hotdamna huang api leh leitung/khovel vengbit leh bawl hoih dia ‘chi leh vak’( Mathai 5;13-16) dia hon koih ka chi hi. Tua penetration mohpuakna ei tunga om hi chih theih mahmah ding ahi. Khotang society in bel mimal influence mahmah eimah ve.

 

Tua dotna toh kisai thil dawn hak ahi. Kei etdan in Pathian in semkhe dia hon lamet leh deihna bangzah hiam chih quantity and quality thei kei mahleng a sem khe zoulou pente laka khat ka hikha ding chih ka lau thawng hi. Ahihhang, Pathiana kipahna hidia ka gintak leh kei a lungkimna ahihleh ‘bangzah semkhia leh bang dinmun a lian a ding’ chih sangin Pathian hondeihna theichian mahmah a ka hihtheih tan a ginomna toh ka zuih Toupa lam a kakipahna ahi hi. ‘Faithfulness is more important than Fruitfulness’ chih ka thupi ahi hi. Sepkhiak gah tam, dinmun lian leh sum leh pai tampi khol, in-leh-lou tampi thupi leh tampi neih chih khong hoih mahmah bang mahleh tuate in Toupa nasepna ah ka lungsim ala hek ngei keia, Toupa ka phat hi. Muanhuai leh itna toh Toupa honchihna thei chian a zuih ding chih ka damp san khat hiin ka thei hi.

 

Hiai thu poimoh leh saupi a gendia hoih himahleh tomchik in ka hong dawng ding-Michih Pathian in i hinna ua thil tup neiin a mi tuam kibanglou chiatin a hon bawla; tua subuching dingin michih in thilpiak I tang hi, chih kuapeuh in Laisiangtho thu isel thei kei ding hi. Tua ahihleh tua michih aom muh khiak ding. Anihna ah tua thil piak zangthei dia sinsak (train) ding, Thumna ah, michih saptuam leh khotang Toupa thilpiak aneih bang chiat uh zat sak ding ahi (Hiai in leadership leh ministry structure leng sukha ding ahi).