"Talent hon pia Pathian phawk a mahni ki discipline, ki control zohna poimawh kasa pen"
Ei Zomi sung leh mun tuamtuam a Guitar tum siam a theih Pu P.Thangthanlian @ Thanlian Zogam.com in ngai sang mahmah a, pahtawi theihna hi kawm in, amah tanchin leh thu tuamtuam te ah houlim pihna tarik 10 November 2012 ni in a tenna in Safdarjung, New Delhi ah va ki nei pih hi. Houlimna te a nuai a bang ahi.
Zogam.com: Pu Thanlian, na hoih zel uh hia? Ki hou sa mah bang a nang tawh houlim dia hong pawt ka hi uh. 
P. Thanlian: Kipah huai e, hong tu ua i houlim ding uh.
Houlimna i panpah mai ding ua, na background hon hilh zek ve maw.
Geljang khua ah kana piang a, tua zawh mun tuam tuam - Singngat, New Lamka leh Delhi ah kana khosa kha hi. Ka pa Dr. P. Nengzadou ahi a, ka nu ahih leh Khamzaching ahi. Unau 4 ka pha ua, ka tung ah Ngailiankim (w/o Pumchinkhup Guite) leh Nangsuanlun ahi a, ka nuai ah Lianbiakmang ahi. Tu in Safdarjung Enclave Delhi ah ka zi Chinghoih leh ka tate Chungthianhoih (3 yrs) leh Lunmuanthang (1 yr) tawh ka khosa uh hi.
Guitar na neih masak pen bang a, bang chik kum in?
Neu lai a pan acoustic guitar ana ki nei gige a, himahleh kei a di liu liau in bel Class X ka sim lai 1994 in burma lam te bawl electric guitar toh bass kana nei hi.
Bang la guitar ah na tum thei masa pen a?
Haha.. sawt lota ka thei nawn chiah kei.
Guitar tum na hong lunglut ziak kua band, bang music in hon influence deuh hi in na thei a
Guitar bel neu a pan ana ki tumtum ahi a, himahleh ka hong lunglut diak na ahih leh MTV hong om tung lai a rock band tuamtuam te ziak ahi deuh.
Music school na kai hia? Bang chi dan a hong siam khia na hia?
Music school ka kai tuan kei. Mahni ki zil leh practice touhtouh ziak ahi pen. Tape a laa ngaikhia in, huai a tum didan zongkhe zel ka hi.
Public a na first performance na hon hilh thei diam?
Class IX South Point School ka sim lai in Teachers' Day celebration na ah lawmte toh ka perform uh masa pen ahi. Ka lasak te uh - Smokie-For a few dollars more & Stumblin, Nazareth-Where are you now, Twisted Sister-The Price, CCR-Lodi chih khong hi.
Na band masa pen bang a?
Renegades ahi.
Renegade hon gen sau zek lai ve maw..
Renegade ki chi Lamka mi music lam a lunglutna ki bang lawmta te’n 1996 kum a kana bawl uh ahi . Band member te Tharte (vocalist), Brando (Guitarist), Lana (Rhythm), P.Thanlian (Bass) leh David Buhril (Drum). GNR, Poison, Metallica, Megadeth, ACDC, Eric Clapton.. etc te music ka tum tangpi uh. Ka live perform masak napen uh Saikot Kut Celebration ahi.
Lamka pawlam a Music tawh kisai a nana kal suan nate leh show nana bawl te bangbang khong a?
Delhi ka om tung a kipan in ka lawm vai te tua THEM CLONES ki chi band member te tawh kana tum khawm sek uh hi. Lawm te toh KROME ki chi band min zangin Delhi leh a kim vel ah college festival tuam tuam te ah show ka nei sek uhi - Lady Shri Ram College, BITS Pilani, IIT Delhi, Hans Raj College (as The Zomyz) etc. Tua banah band tuam tuam min in Mizoram, Nagaland, Bangalore, Jaipur, Luknow te ban ah Delhi leh a kimvel mun tuamtuam (Hotel, Farmhouse, etc..) mun te ah show kana nei uhi.Delhi ah ei singtangmi te conference, freshers meet chih te ah le kana performed zel.
Drixian Empire a le tel kha hi in kon thei a?
Hi… tel mah ing e. Drixian Empire (formerly known as Dark Krusader) kha Jessy in ana pat khiat ahi a. Amah leh a band member te Delhi ah hong om ua, amau lak a tel din hon chial ua, kenle ‘awle’ chi in kana zom pah hi. Drixian Empire min in hotel tuam tuam a diak in Ashok Hotel leh Dilli Haat khong leh mun tuam tuam ah ka na performed zel uh hi.
A chih leh McPie bang chi dan a hong piang khia ahia?
Drixian Empire a band member a tam zaw te in Lamka lam hong paisan ua – ka drummer uh Thangkima in poimohna aneih ziakin Lamka lam hon paisan a, a tang di’n Benjamin Thanggoumang Guite hong pang hi. Tua zawh in poimoh na neih ziak mahin Suaka in hon kik san nawn a, huaizoh sawt lou in Jessy mah in leng Lamka lam hon paisan nawn hi. Drixian Empire Jessy minphuah ahih ziakin amah lah om nonlou ahih chiangin band min thak phuah hoih ka hon sa ua – McPie hon bawl khia ka hi mai uhi. McPie kahih nung unle lamka lam ka hong pai chiang in Jessy toh Drixian Empire min in Nagaland leh mun tuam tuam ah ka performed zel uh. Jessy in hon beisan ni in leng a nitak ah perform na di nei kahi uh. Miss you Jessy. RIP!
Bang chi dan a band min dia McPie na hon phuah uh a? McPie Band tangthu le hon gen ngal le teh.
Ka gen mah bang in Drixian Empire band member te Lamka lam hon paisan vek chiang un band min thak phuak ding chi in, a min di ka deih teng uh lekha a ka gelh khia u a, huai a dawh khak penpen zang di ka chi uhi. McPie ka dok kha uh. McPie band member te ahih leh Julia (bolte) – vocalist, Alan – Keyboard, Mesak – Bass, Benjamin Thanggoumang Guite-Drum, P. Thanlian-Guitar te ahi. 2005 kum in ka drummer uh Benjamin in London a hon paisan ziakin a amah tangin Steve Kid Valte drummer dingin hong pang hi.
McPie in Ashok Hotel ah ka performed mun pen ua, tua banah hotel/restaurant tuamtuam Café Morrison, Farmhouse chih te khong ah le ka play zel uh. Tua banah Lamka leh Mizoram Tour leng kana nei ua - Aizawl, Lunglei leh Champhai te ah concert ka nei uhi. Tua banah Concert for Burmese Democracy Delhi ah leng ka na tel uhi.
Music tawh kisai in pahtawina bangbang nana sang a?
Best Guitarist at Confluence Rock Concert Competition 1998 leh Best Guitarist at Cafe Morrison 2006 Rock Competition te ah kana la.
Bang music genre na ngai na deuh? Bang band na ngaisang pen a?
Music genre a bel classic rock ka ngai na pen a, tua lou blues leh metal le ka ngai ut veve. Favourite band gen di chu tam petmah - Pink Floyd, Bob Dylan, Jimi Hendrix, GNR, Rolling Stones, Deep Purple, Black Sabbath, Metallica, Megadeth, Nirvana... etc khong a hi tangpi.
Guitarist na ngaihsang pen?
Jimi Hendrix, Jimmy Page, Randy,Rhoades,Eric Johnson, Richie Blackmore, Eric clapton te ka ngaisang. eh! Yuto Miyazawa le.
Ei singtangmi te a kipan musician kua kua siam nasa a?
Guitar lam pang ah Mizo te siam kasa - Maitawka (Tribal Power), David (Dream Hunter), Hmingpui (Albatross) te siam kasa vek.
Drum lam ah Steve Kid Valte, lasak lam a Zorock Rosangliana.
Lamka ah music lam khangtou hi in na mu hia?
Music lam ah khangtou lua kasa. Talented mahmah tam pi om in ka mu hi. Music hi ta leh lasak lam hi ta leh khangtou in ka mu a, Band om te bang mahni original la sa ua, ei pau kia lou sap la nasan a original la nei ua thupi kasa. Instrument I neih te uh le changkang mahmah ta in ka mu a, tua banah recording studio bang le punbeh in khangtou mahmah kasa.
Ei lam a la recording hih tengin Music Video Album bawl sawm vek ua, bang a na ngaihdan?
Tulai eilam dinmun ah video a om kei leh laa chouh kua man Album lei khol lou leh ngaingai khol lou din ka ging. Huai banah i local channel neihte khong publicity om theihna hoihpen hi in kamu a hiai te ziak ahi pen din ka gingta.
Lamka a pan ki bawl music album te i ngaih chiang in music paidan tangpi ki bang a tam zaw hi a theih ahi a, hiai kha bang ziak hi pen ding in na gingta?
A ziak pi pen dia ka gintak ahih leh sum tampi ki seng ngam lou, ki sen zolou or sum tampi seng leng le sen zah muh kiik ding gintak louh ziak hi in kathei. I market uh a neu law lai, tua banah album bawl na dia hun piakzawh louh ziak leng ahi di. Album bawl khin sa ka theih te a lungkim tan ua bawl ka theih a vang mahmah. Huai banah laa, music te uh hiai sang a hoihzaw a bawlthei dia talent nei ihi ua, Laa, Music i phuah chiang un tua sang in hun tam seng zaw le idea hoih taktak hong pot mai di ahi. I sung a omsa hong potkhe lou tampi om ahi chih theithak in chihtakna toh hun tam theipen pele i laa, music te ama sangin hong hoihzaw leh changkang zaw tham di. A om sa te hoihlou, changkang lou ka chihna hilou in.
Ei singtangmi music lam ah bang ziak a tuantual deuh se i hi uh hia? Bang chi leh music lam ah i khangtou thei dia?
Sum leh pai haksat ziak, huai banah self disipline ki taksap ziak khong ahi pen diam maw. Public encouragement leh support tasam mahmah in ka mu hi. Ki gen siat sangin ki pahtawi a ki panpih tuah leng i artiste leh musician te a dia encouragement hoihtak hi ding a, khangtouhna hon tun dingin ka gingta. Tu dinmun in Lasa siam leh musician te i treat dan uh piching zou nai kei a, et thak poimawh kasa. Huai banah practice, practice and practice.
THANLIAN WITH FAMILY
Lamka pawlam North East States dang te music lam ah khangtou na sa hia?
Khangtou lua uh. Nagaland a band khat bang Billboard top 10 a omkha, Mizoram band khat le Korn opening a pangthei om. A music vanzat te uh thupi leh changkang lota. Huaichiah laa siam leh musician te pahtawi dan, respect dan siam uh ka sa.
Lamka ah Music School hoih leh ki chian om nai kei a. Music School hoihtak a om hoih na sa hia?
Music School hoihtak a om hoih kasa.Om leh bel music lam ah ki khangtou lotel ding, aziak a tam zaw music school a kai ki omlou in self taught ngen ki hi sim. Talent nei ki tam lotel himah leh Music tawh kisai paidan School ah ana zil te uh a nep a noi, mahni ki sinsak ten ki chaan or thei kha lou ki hi.
Zomi sung a artiste khenkhat te a min uh kon gen dia, na lungsim a hong om masa penpen hon gen le teh maw.......
Lengtong - huai hun lai a dia advance kasa, a laa te uh hoih thei kasa.
The Twins - neu lai a i na zak hia, siam mahmah uh.
Rabbi – music chi tuam deuh, hih hoih mahmah uh kasa. I culture ua music genre tuam deuh hangsan takin hon paw khia ua, a lyrics te uh hangsan le honest kasa.
Rig Vedas - Album hon bawl te uh kana gingtak sangin hoih kasa zaw. Hih hoih mahmah uh. Guitarist uh Mangzalian ka theih tung tawh teh in improve mahmah kasa.
GoHau - one man band, amah tuk a album bawl khia tam om dia aw, suan huai mahmah. - skill siam kasa. Live sangin recording lam a hih hoih kasa zolai.
V Siampu - ei mi lak a laphuah siam amah kan om dingin ka gingta kei.
S Chingnu – a laa te lunglen huai lam tam a mi lungsim le la zou kasa. A aw le hoih.
Lia Lunching - Siam aka, a aw le control. Love song apat Gospel ah hong kihei a huaikia lou a tanu leng Gospel singer minthang i neih te lak a khat hisak zou, et ton tak mahmah kasa.
Zorock Rosangliana - Zorock chu Zo Rock taktak eivoi…. ei lak a rock hon pan khe masa pen ahi di..Ka ngaisang..very unique.
Thawnkham – eimi lak a tulai deuh comtempory music hon paw khe masa pen hi in ka thei. Kipahpih huai lua.
Kapno – Siam kasa, a diak in unau burma lam a pan siam kasak pen ahi di.
S Pauginmuan - Laa siam ahi. Amah aw tawh ki tuak di la a teel siam kasa. Deih tui leh serious kasa. Talented mahmah. Studio work lam lah hihthei Guitar le Bass guitar tum dia ei lakah tulai a ka muanpen ahi.
Mimin Baite - a aw sang huaichiah hoih kasa mahmah. Rock a heavy lam eive a ut te.
Steve Valte – music lam ana ki pan baih a hih fuh mahmah, dedicated kasa a, ahih di thei mahmah kasa. Very talented.
RAV - talented thei mahmah uh. Siam uh.
Mi tampi ngaihdan in music lam a pai te khamtheih hih a ki bual tangpi uh chih ahi a. Hiai tawh kisai bang ngaihdan na nei a?
Music lam a pai lou te le khamtheih hih omthou uh hi lou maw? Music lam a pai tengteng inle khamtheih hih hituanlo, a hih om a hihlou om. Hiai tawh kisai mahni self discipline leh ki control zawh na in thu pua in ka thei. Khamtheih hihlou a le music hih theih lua ahi.
Tulai show na nei zel hia? bang band ah na tel?
FRIENDZ ki chi band ka nei ua, Lamka lam ka om chiang in ka perform zel uhi. Friendz band ahih leh kou lawm ta ki pawl khawm te'n mun tuamtuam ah show nei ding in a hon sam sek ua, tua ki pan band khat bawl tuak ka sa ua, lawm ta ngen mah ka hih chiang un “Friendz” kasa uhi. Friendz lineup- Pauginmuan (Bass Guitar, Vocals, Backing vocals), Pauthianlal (Guitar,Backing Vocals) Aram/Ricky (Drums, Vocals, backing vocals), P.Thanlian ( Lead Guitar,Vocals, Backing vocals). Drum tum siam RTV (Routhanvung) le kou lak ah hong tel zel. FRIENDZ in Manipur Idol (Imphal) ah le ka perform ua, huai banah Manipur mun tuamtuam ah kana perform zel uh.
North East sung a musician minthang Lou Majaw tawh bang chi dan a ki thei kha na hi ua? Lamka leh Imphal a na perform te uh hon gen ve.
FRIENDZ a ka drummer uh Aram (Ricky) toh Lou Majaw ana kithei ua, Aram in Lamka toh Imphal a concert nei dingin Lou Majaw ana zawn a, hu chi in Lou Majaw shillong apan hongpai in, kei Delhi apan ka pai a, huchi’n concert kanei khom uhi. Huai a band lineup hiai dan ahi- Lou Majaw-(Vocal, Guitar) Aram/Ricky (Drums), Pauginmuan (Bass Guitar), P.Thanlian (Guitar).
Lamka a pen ahih leh Education Awareness campaign concert ahi a, student te a dideuh a ki organize ahi. Imphal a pen ahih leh Lou Majaw in Imphal GM hall ah kum 30 paita in concert hong bawl a huai khit kum 30 chin na GM hall mahmah ah concert ki organize ahi. Nuam mahmah.Experience hoih mahmah khat ahi.
I gam a nu le pa ten a ta te uh music lam a pai dingin a hanthawn khol kei ua, a ziak pi pen a hih leh nekmuhna leh ki ngakna tak hi a theihlouh ziak uh ahi. Nang muh dan in nek muhna leh insung khat ki ngak na tak in na thei hia?
A masa pen in sports hi leh music hi ta leh lunglutna a ki khaam mawk hoih kasa kei. Nu le pa in a lunglutna a guide zawk a, lampi dik a i pi zawk poimawh kasa. Music tawh kisai a nek le tak muhna ding in eigam ah haksa mahmah lai in ka thei a, himahleh khopi mun te ah bel opportunity tam mahmah hi. Thil teng a bul tung ah struggle masak gige ngai ahi chih theih a poimawh. Hotel leh mun tuamtuam ah sum muhna hoih hun tawk mahmah kasa.
Khangthak musician te bang chi dan a ki prepare dingin na hanthawn a.
Talent hon pia Pathian phawk a mahni ki discipline, ki control zohna poimawh kasa pen. Patience neih a ngai. Mi tuam tuam toh ki deal kha ding ahih man un, mi toh ki deal siam le poimawh mahmah. Huai banah a music chi tuamtuam genre khat kia lou tum siam poimawh kasa. Last but not the least…. practice practice and practice.
Music tawh kisai a na van zat te bang bang a, bang a na favorite guitar?
Ka favourite ahih leh Gibson Les Paul ahi. Tu tadih a ka van neih te hiai dan ahi -
GUITAR :
Gibson Les Paul Epiphone Custom SG-400 (Made in USA)
Gibson Les Paul Standard traditional (Made in USA)
Ibanez - JEM-7vwh -Steve Vai signature.(Made in Japan)
Yamaha Acoustic Guitar (Made in Japan)
EFFECT/GADGETS :
Zoom GFX-8
Boss ME-8
Boss Distortion DS-1
Boss Super Overdrive SD-1
Boss Super Chorus CH-1
Boss Expandable multi effect ME-X
Boss V Wah PW-10
Boss Drive zone OD-20
Boss Pedal Board BCB-60
Behringer Digital Delay DD-400
Beta Alvin Acoustic simulator AC-100
Digitech RP-50
Digitech Crossroads Eric Clapton signature
Rocktron Banshee Talk Box
Biyang Mad driver OD-10
Biyang Metal End RME-1
Nux Equalizer EQ-7,
Audio-Technica Wireless System DR-2000 series (DR-R22 reciver and DR-T250 transmitter)
Roland Micro cube
Hu chi in hun sawt kuam nuamtak a houlim ahih nungin, Pu Thanlian in a music van te hon la khia in, Zogam.com vaisai te tawh Jam Session nuam tak nei ua, tua zawh in inlam chiat manawh in ka ki khen ta uh hi.
