An Open Letter to Mr. L.L. Muana, the Country/Gospel Singer & Tumging lunglutte teng
Dr. Pum Za Thang Tombing
Chicago International Airport,
Ohare, Gate #H 6
May 30 2012 @1:10PM, Central Time US.
Lawm It Muana,
Na dam zel uhiam, kithuzak louh na ahong sawt dekta a, kon phawk luat man in, Chicago Airport a kipana Philadelphia zuana kalen khiaknawn ma a hun saulou ka neih sungin lai kon gelh zual hi. Tutung US ka zin a kon phawkna diak pen zan (Sepnawnni 29/5/12) 11AM-1PM sung a Nashville(The Music City), Tennesse a, “ Country Music Hall Of Fame & Museum”(US a Lasa siamte) kava veh a Lasa siamte tung tang ka sima, ala te uh 1960-2010 sunga te kava ngaih khiak chiang in kon phawk lua a, ka muh te kon hawmsawn (share ) nuam hi.
Nashville,TN khuapi pen US leh leitunga Music ngaisang te khuapi, ‘The Music City’ achih hial uleh recording studio ahoihna mun pen pen ahi-a, leitunga music siam pen pen te’n hiai khuapi a music course khat alak tei tei na mun nana hi mawk hi! Tua ban ah Tennesse State pen US gam sunga Country Music ngaisang pen a theih State leng ana hi hi! Tuaziakin Nashville khuapi (Down town) laizang tak ah Building lianpi khat sawng thum, “Country Music Hall of Fame & Museum” chih a State Government in a bawla, US gam sunga Music /Lasa siam min thang 115 te lim leh a la sakte uh ngaih khiak theih vek in a om hi.
Na lasak sek ‘Jim Reeves’ ate leh 1960 veela minthang mah mah Elvis Presley lasak leh mi tuam tuama a ngaih khiakna (booth) sung ah hoih tak in akingai khia thei hi. Ih tuaidek laitak ua I ngaih sang mah mah uh Elvis mah mah thupi kasa pena, ana thupi mah mah ahihdan ka phawk thak thak hi! Mi te’n leng angaisang mah mah uha, Memphis khopi ama khua leh akivuina khopi Airport sung bang ah tuni tan in a lasak te aki ‘play’ lai a, mi tam tak te’n a makizepdan leh sam hiat dan (hairstyle) tawh a khosa lai tel uh hi!
A floor nihna,“Country Music Hall of Fame & Museum” ah Elvis Presley’s “solid gold” (A bangkim)CADILLAC Car leh a Gold Piano ( apiano tutpha na ngawn Gold akibawl)a zi Priscillas in 1968a a present “Grand Piano in 24 Karat Gold leaf” kava et lai in lamdang kasa lua a, photo & VDO in kon la zaw zen hi. Tua ban ah a sihni August 17, 1978 a News a lai kigelh khawng leh a sihdan leh a sihma deuha a lung zuan dan, a zi tai san dante ka ngaih tuah chiang in, leitung min thanna leh sum-le-pai te bang mahlou ahih dan ka phawk thak a, na lasak ngei ahi, “I’d rather choose Jesus than silver or gold” chih bang ka phawk thak thak hi!
Tua bana Elvis Inn, Memphis (two hrs. drive from Tennesse) tua Musium et theih dia kibawl sunga a , a kipahman (awards) tamtakte leh ahan leh a private Jet te kangaih tuah chiang in, Kumpi David in, “Mi gilou nakpitaka thunei a, a pouna muna singnou dawng thenthon banga, ka biambuam lai ka mu a. Himahleh lampi ah mi a va pai ua, ngai dih, amah a na omta kei maimah a: ahi-a ka zonga, himahleh muh theih ahita kei hi “ (Sam.37:35-36 ) chih ka phawk khia hi!
Tua bang ahihmanin, lawm Muana, nang leng US na zin peuh peuh chiang in hiai Music khuapi Nashville leh Memphis a va tawn ngei ngei ding in ka hondeihsak mah mah hi. US ah khopi tuam tuam a kipan inei lunglutna bang bang Music lunglut mi tampi te’n Holiday zang kawm in hiai mun ah a Nupa pa un hiai la luite leh VDO en te ka muh chiang in eipawl (Senior citzens) ngen ahi ua, khenkhat ngialin mitsidiau diau kawm a alate ngaih leh zuia lusu ngiau ngiaute ka muh chiangin kei leng ka lung a zuang zou sim mawk hi! Hiate ziakin tuma kum 25 malam khawnga, Guite kual, Vangaitang , Karbi Anglong leh muntuam tuama, Pathian thugen leh Lasa a I zin khawm lainite uh ka phawk taka, kei kia in nehnou simtak in ka lawmte theihlouh kaal in ka om mawk hi ( Praise the Lord for those sweet memories )!
Bang chik chiang in Ei gam ah I La siamte, La phuakte leh Tumging siamte zahtak, deihsak leh ngaihnat in I om ding uah aw, chih bang ahon ngaih tuah sak mah mah mai hi. Lasa siam, La phuak siam leh tumging siam tak tak te amau tempaina (Lasak, laphuak , tumging tum) a suah/zat louh chiangua kuamah ngaihsak louh leh phawklouh khawng (Poetry a Nungak Luci banga gam sim thama vul,vuaia om te) khawng ka muh/ngaihtuah chiang in poi sa a, nang leh Zomi Lasiam tampite kon phawk luat ziakin lai kon khak hi.
Toupa’n hon vualzawl henla, nang leh I lasiamte leh tumging siamte teng teng mite adinga vualzawlna nahong hih touh zeel ding uh ka hon deihsak hi.
Mangpha, Lamka ahkimu ni maw,
Na U, Pum Za Thang
______________
.