Tulai in Khovel kilchih ah, siamsinna i poimoh ngaih mahmah mai ua. I tate siamsinna ding in siamsinna inn hoihhoih bang in deih in i kidelh huan sek uhi. Huchi tel a siamsinna i poimoh ngaih lai un, bang chi dan a ana la kha ka diam ah, Bang hang a siamsin i hi ua ahihkeh bang hang a siamsinna hi chi poimoh ngaihtel i hi di ua aw….chih ka na ngaihtuah kha laiziang a, a ziak di ka muhkhe zou naikei lai hi. Tate bang lai pai mahmah lou, lah sawl hat thu a sim maimai uh. Huai chiang bang a chu gawtna thupitak piak toh kibang mai hilou? Tutan a i siamsinna ziak uh ka na muh dan khenkhatte:

1. Nek  muhna ding/kaam muhna ding: A tamzaw in i ngaihdan uh hiai hi in ka mu hi. Siamsin kei in thei kei le kaam kimulou di, kaam mukei le kigenthei a neek di kimulou di, i chi deuh tangpi uh hi in ka thei hi. Ahihhang in, Government leh Private a semte kia in neek di mu ahi tuan hetkei a. Amau a hihtheihna (talent) zang siamsiam in neek ding vuak hilou in, gou bang a khol theih ding khop in thil a kai khawm thei uhi. Khovel a mi hausapen hihna kum bangzah hiam ana lata, a pocket money zah lel a le Manipur Government in Central Government a sum bat din zou ding khop a hausapa Bill Gates in a genna ah, “Exam na ah subject khenkhat in ka fail a, ka lawmte subject teng in a pass uhi. Tun amau Microsoft ah Engineer in a sem ua, kei huai neitupa ka hi” (I fail in some subject in exam and my friend pass in all subject. Now they are an Engineer in Microsoft and I am the owner of Microsoft) chi in ana gen hi. A lak ua a siamloupen leh miphalou pen nuai ah a dang a siamte’n a sem mai mah uhi. Laisiam ziak a nek muh ding hileh a mulou di pa ahi. Kaam hoih neih ziak kia a neek muh zaw hihetlou hiveh aw….

2. Mite zahtak a omna theihna din: Mite zahtak hih utna ziak bang, mite tung et leh mite tung a leen ut na ziak bang in tampi’n siam kisin hi. Kei ngaihdan in mite zahtak tham hihna di’n siam a va siam luat a degree sangtak va lak le a ngai teitei khol kei, huai sang in I thilhih ah diktat in, thilhoih hih peuh le min hon zahtak mailou di uh hia? Chi dan kei ve. Ei sung mahmah ah en le, Paite-te’n mi thupi a i neihte uh bangzah in Master/Doctorate Degree a ngah ua leh? Tulai a i Master/Graduate-te tata hilou maw Rehab centre lam naihte (a tangpi a et a ka gen ahi). Hiai bang degree hoihtak nei a centre a lutte zahtak huai uh a hi diam? I politician neihte uh en le, Doctorate/Master zou bangzah i om ua? (a mau simmohna a gen hilou ka hi). A hihhang in a laisiam(education) lam hilou a ahihna uh i etziak in i zahtak ua a gengen uh, ‘HI’ chi dia mansa ngen kihilou maw? (Uang lua teh hon chite’n hoihtak in va en khia ua, ken bang thei tamlou hilai…). Huchilou a lah a langtang a sel/nang ngamlou i hih chiang ua…. Na chi uh hia??? Hi khol kei leh le ‘Eimah ve….a dik hi’ chih dupdup zel a om. Thupi masa a etsakna a i lak Bill Gates leng lehkha siamziak a zahtakna mu ding hileh a lawmte’n amah sang in a mu zaw ding ua, amah a tang lou pen hi kha mai thei hi.

3. Hauhsakna/Kipahna ding: Nu leh Pa tamtak in i ta neulaite’n lai a sim utlouh hiam/skul a kai utlouh chiang ua i gen sek uh “Lai hon zil di chin a, hong siam di huai zoh kaam hoihtak nei a, sum tampi loh di chin a. Huai chiang a hausa a nuamsa di, huai chiang a chu na deihdeih neizou di chin a kipak a kipak di na hi” chi in i na khem sek uhi. 2008 kum in Darjeeling a training khat a ka telna ah, Engineer khat toh ka kihou kha uhi. Aman a genna ah, “Kha khat in 1.5 lakh khong ka lohna a, ka lung a kim tuan kei. Huai nak sang in ka innkuante a dia nnasem ka hihlai in, amau toh hun ka zang khawm man kei a, ka tate’n deih bang in hon ngai in hon maingal kei ua, ka zi toh lah ka kisel gige phial uhi. Mite’n ka siamna ziak, ka sepna hoih ziak bang leh sumtampi ka neihziak bang in hon zahtak ua, kipak gige di bang khong in a hon gingta uhi. Kei lah a lehlam tak ka na hi a, ka tate kiang ah mikhual ka bang a, ka zi kiah ka om chiang in lungkhamna ngen toh ka om zel a, ka office lah chu huai teng ngaihtuahna mun ahimai a, ka khovel a neu in a neu a, damlai meidil a om mah ka bang” chi in a hon gen hi. Hiai in zaw a hauhsakna ziak a kipatna ana mu hetlou dan chiang tak in a muh theih hi.

4. Zi/Pasal hoih deihziak: Tamtakte’n zi/pasal hoih deihna ziak in siam i sin uh hi in ka thei hi. Siamsin in siam le zi/pasal hoih mu di chih kilam-en tampi leng ki-om. Tulai in lehkha siam kaam hoih tak nei, nupa a kituak hetlou, kinana bang ahihkeileh khat omlouh kal suam a numei/pasal kal a thaangtatna bang uang mahmah zel hi. A chih leh lehkhasiam kaam hoihtak nei a huchi bang tuah sang in, mihoih mi chitak mah deih huai zaw hilou hia? Huchi bang tuakkha a kipahpih lua lah i om di un a gingtak huai het kei a. Kaam hoihtak nei khat toh kiteng a huaitan tun sang in mihoih kaam neilou deih huai zaw leh kilawm maw?

Achihleh bang hang a siamsin i hi ding uh? Pilna deihna ziak in maw? Bang pilna eita i zong uh??? Pawl (class) i hong sang deuhdeuh a, zatna di om ngellou i hon zil toutou zel uhi. Hiai ka chihna san a hihleh pawl tawmchik i hih lai in in + (plus), - (Minus), /(divide) leh x (multiply) chih teng i zil ua, pawl i hong sang deuh a pawl 8/9/10 khong i hong hih chiang in chu (x + y), y2 + x2, , Let x be the number… khong chi in bangbang hiam tamtak i gelh suk daudau ua, a tawpna ah x=?? chi in a answer chi dan deuh khong i hon gelh khe zel uhi. A chihleh tulai a number zang a nnasem, hou chih a gen in Bank a sem, ahihkeh Engineer-te khong in Let x be the money.. chi in a sem di uam? A hihkeh y2 + x2=??? Chi dan te zang a nnasem uh a hi diam? A chihleh hiai formula chituamtuamte khong sep (kaam neih) chiang a poimoh di a hi diam? Skul kai lai a tamtak in fail na subject a kinei zomah…Sala!!! Class-A i hih a kipan a class-4/5 tan khong a i zil khiakte mah hilou maw sepna sang pente’n le a sepna a a zat uh. Sepna sangtak neite’n A B C…..Z zang lou a lai gelh uh a hi diam leh? Ahihkeh 0 1 2 3….9 zanglou a number dang zang uh hia? Mi gendan deuh leh hiai lam a i chil ana kivei khak kei leh chil kiveina di lam zong a huai a mi phaklouh di khop a pang di himai…chi aw??? Geihlel!!! Ah! Gengen leng ka ka buai deuhdeuh di, Ka theizou kei……. A utut hi hen aw……

(Hiai article siamsin laite discourage na dia ka gelh hilou a, siamsinna lam tempaina ana hikha loute a dia, thildang amau a thilhih theihna (talent) zang a le neek di leh i hinkhua bawl theihlua hihdan gen ut ka hi aw.….. Huaichiah i phak zohlouhte kidem a chih dan uh le hikha mai thei ahi.)