Ka lawmte'n siamsinna ziak leh nek-le-tak zonna ziak a mundang a hon zinsan ziak un keichouh a khattang sawlbang hei a, ka sulnung teng uh keikia a gia bangzun a, lungleng leh thawmhau tak a om haksa ka sa petmah a, kei leng ka siamsinna lam a paimai bang ka ut a lah, ka inkuanpihte toh om khop mah ka teelzaw lai zeel a...Phavang nitum kuan, mual-le-tangte eng singseng leh Zogam huihkhisiang laang hiauhiau nuai ah lungleng leh thawmhau kisa in ka lunglen na te a noptuam deuh khakleh chi'n huihkhisiang laang hiauhiau nuai ah ka vakkhi a... Huihkhi lang hiauhiau ahih man in votsim mahmah a himahleh puan-ak lum ak na di hial a votbel ahi nai samkei... Khosung a naupangte' kimawl thawmging, ui ham ging leh zolengthe khuang ngelngel te'n ka lungzuan nep naksang in a tokthou zosop uhi. Nidang a lawmta, lungdeih libang ching a singdang englou nunnuam laitual vabang ka lenlai nite uh maimit laukhan a honglang dundun a...aw theibang sen a umbang ka kholhpihte koikuam a sawlbang heina hi uhiam? chi'n ka lungsim leh ngaihtuahna te chuh a paisaau petmah...

Khattang lungzuang leh thawmhau tak a ka pailai in chikmah a ka houpih ngeilouh, ka maingal hetlouh Kimbawite' inn kong ka tung in Kimbawi in honna houpih guih mawk a, "Umang, na lawmte'n hon zinsan ua leh lungleng kisa lua maw ngiaungiau pouh! Nangla bangchikchia zin di e? Honghoh ve..." hiai 'AW' nemtak leh khumtak ka zak in hong kihoupih na lam ka enzui a, a mi d ka muzok kei, ka en tuan2 a...ka gintaklouhpi'n Kimbawi ana hi maimah a, a nuihmai kilawmtak leh a samsan sim silselte huih in a mutleng seuhseuh ka muh in lamdang chihlouh kan gen di dang ka theikei! Paunuam leh a hun le mun zir a gen di kilawm thei chechet(present of mind) neithou ka kisak leh hiai hun chiah a zaw gen di ka theikei, ka thei mah2 kei, ka kam a beidong lua! " I, kong hoh man dah di aw, Kim" chi'n chih tengchouh a dawng bebulh in ka pailiam san maimah, saulou ka tun in ka nunglam ka etleh Kimbawi in honna en lai2 a, a khut hon viktou in "BYE-BYE" hon khak...ka mit haihia, ka theikei, a taktak zaw a bang! Ka lungsim a bang ngaihtuah ka hia chihleng ka theizou kei...!

Kimbawi bel mineelhuailou ahi zenzen kei a, a kamsiam in a paunuam mahmah a himahleh kei ka khua ua ka om vangziak a kinellou a, kihoupih ngeilou ka hipen mai uh. Himahleh, numei dangte toh kineltak leh kihoupih zungzung a omtheithou ung ua, hiai Kimbawi toh ka kinel theih hetlouhpen uh lamdang ka sa, a 'riau' khat om ngei di'n ka gingta. A man leng kei hon zahtak bawlsim hi'n leng ka thei. Ka khua ua ka om vang hang a numei dangte toh kimaingal tak a om theithou hi ung ua, bangziak a hiai Kimbawi toh ka kimaingal theih hetlouh tuamse uh? Ka khua ua ka om sun2 chiang a lah kimu gige thou ung ua....

Ngaihtuahna mumal loutak leh lamdang sakna toh ka paipai lai in ka inn uh ka tung a... Bangdang le gen tuanlou in ka room kidenna ngal in lupna tuang ah ka lum zetzat hi. Den a Kimbawi hon houpih na 'AW' nemtak ka bil kha ah a hong ging2 mai a, ka dawnna ka ngaihtuah kik a... Hou ka salua, hou ka sa ngeimai, ka ki-iplah tun2 zozen a lah huai hun tak a dawn di dan dangthei tuanlou ka hi chih chuh ka kiphawk veve himahleh, ka dawnna ka lungkim thei mahmah kei! Ka ngaihtuah zomzel a... Ka nunglam ka et a a khut a hon viktouh leuhleuh laite maimit laukhan a honglang dun2... Bangdia kenle ka khut a na viktou a, ana thuk samlou ka hi tel a, hai hina maizen ing e... Bangkim ah ka kimawhsa: kisiamtan na di him2 ka neikei...

Ka hohlouh tawp a le pansan di om deuh dia hoihtak leh ginatak bek a dawng hileng zaw... Ahitak a gen in zaw Kimbawi ana ngai gu lopetmah ka hi mai! Kimbawi bel ka khosung ua ding a melhoih pen2 lawi ahi a, nidang in leng ka lawmta ua nungakthu ka genchiang un Kimbawi min genkhak ahi deuhzut a himahleh, huailai in bel it leh ngaih ding in ka na koih kha kei him2 hi. Bangziak a tunitak nawnhoupih zual mai2 a ka lungsim teng hichitel a luahdim mawk na hi tel a, Kim? Na bang ai in hon mankha a hia? Theisiam kei nang e! Na bangngaihtuah a honna houpih zen2 na hia? Honna houpih lou himai le chin maw Kim..."hong hoh ve" chih mai2 in maw ka lungsim a hici luah tel! Bangdia na inn kong ua hongpai kha zen2 ka hia?

Ka zinkhiak nang lah a naita a, ka it petmah ziak in ka zin ma a ka itna thu gen ka ut. Himahleh, hichitel a ka zahtak bangchi'n ka itna thu ka gen ngam dia? A lawmnu Niangbawi gensak ding chilenglah Niangbawi tulaitak a khua a omlou zel a... Bangdia ka lawmte'n hon hici zinsan pahtel ahi ua! Ka haksatna hon puakpih a, hon dawn zangkhai leh hon sukbuchin sak di'n khat bek om hile u chin zaw...nouziak a Kimbawi ngai a duangvul mai ding ka hiam? Chi'n ka lungsim in ka lawmte khawngpeuh ka mawhsa dek2 sek hi. Huchia banglou hiam2 ngaihtuah a, a hoihlam kipiakna mawng2 neilou a lunggim tak a ka om sung in ka ihmu thei vanglak hi.

Zingkhua hongvak a, ka mangbek a Kimbawi toh itna simthu lel khawm dia ka kilam-et mah2 hang in ka lam-et a bangkei thamlou in, muh leng ka mu kei gentaklouh mang le neilou ka hi zo mah d e! Zingkar ka thou a, ka kilam-et bang a Kimbawi mangbek a ka muhlouh ziak in ka ihmut leng hou ka salua, ihmu'n leng ka kikoih kei! Ka kihahsiang zoh in zing tuitawi di'n ka kuanpah tingteng a, nidang a Kimbawi in leng tawisek, tuitawi na lam a kimu khazel himahle ung tuzingkar ka mu kei... Ka ngahna di'n khatvei ka kuanlai a, lui mun ka tun dek in luilam ka gal etsuk leh Kimbawi hongpailam ka gal muhsuk a...ka dipteng a hawm, ka sung ah bangmah om lou a bang... A man hon houpih ngeidi'n ka gingta, a hon houpih kei leleng ke'n ka houpih d chi'n ka houpih d dan khawng ngaihtuah fel diamsa in ka paisuk a... Ka kituak ua, ka lam-et a bangkei, hon houpih mah2 kei, kenleng houpih ding chi a ka houpih d dan khawng lepfel diamsa a ka koihpen bang in ka kam honghu kha a hia, ka kam ah a hongpawt zou kei, ka awm a bing petmah! Kihoupihlou in ka kipel maimah uhi.

Ka lungsim suangtuahna chuh a kipan nawn zel...zannitak a hon houpih lai ka dawndan bebulh a kipan kiliansak khawng honsa ahi dia aw...? "I, konghoh man dah d, Kim" kiletsakna kampau zaw hikei veh aw...aihleh tua bangziak a hon houpihlou zel? Bangdia pasal toupi khat hiai Kimbawi, a nelhuailou leh zahtakhuailua hilou, mipeuh in a houpihngam leh maingal ken ka hichi zahtak a tel a?. Tui ngah mahleng Kimbawi ka muh ut laiziak in a tei theihna teng, steel kuang nasan a tei in khatvei kuan di'n ka kisa lai, ka naunu Chiching in bang lamdang a honsa zozen a, hon engbawl in zuih a honsawm a, himahleh ka ngai teuhkei!

Tun chuh ka houpih teitei ta di chin kipasal saktak in ka kuansuk a, luilam ka gal et leh Kimbawi ka mu kei, lui ah kua mah le a om kei, kikmai bang ka ut a, himahleh, kuan ta vevet chi'n ka paisuk a, tuidim mengmeng, ka paitouh leh lamkawi ah Kimbawi toh ka kituak guih ua..."Umang ngah nailou maw, nang mah2 fel hive chin aw..." ka dawnna di ka buai mah2 himahleh, dawnlouh ka ut kei, "A, tua ngahta di, nangla ngahdek nailou maw, Kim?" "Khatvei khawng ka tawilai lai d, nang ngahta di na enghuai a ke...", (a dawnna d ka thei pah2 kei, ka ki-iplah man veu!) "gimhuai lua eive maw tuitawi, tusun koi a hoh d e Kim" ka chi a, "Inn a om maimai di" "nuam nasa vele nang, nitak ciah kong hoh diam Kim" ka chih leh "na man dia maw, na ud leh nangthu a kei, man kei niteh hehe" chihtoh thuah in luilam ah hon paisuksan...

Tunzaw ka puakgik tamtak dopkhiak thoh a bang. Ka zang hiauhuau, leengleng kilawm di mah bangphial...ahi, Kimbawi toh ka kihoulai ua a mithah nemtak leh a aw nalhtak banah a sam sansim singsengte ka taksa pum a theihna neiteng in a na theivek ua, a melhoih dan chuh a hon sekhe zung uhi.Om mai2 d bang bangdia honghoh oh hon chilou a dia aw, ka hohna d bek lah honkan kei zel a...ka ngaihtuah chuh a paizomzel... In ka tung a, tuitawi bang ka ut lai a lah ka ngah lo mah2 phot a, tui a na zangkiam hile uh chih khawng ka lunggulh!

Tuzingkar a Kimbawi toh hun sawtlou chik ka kihoupih buburlh u chu kei a ding in suangmanpha sang in leng a manpha zaw, ka manghilh ngeikei ding a, silengle sih man om deuh di'n ka gingta, ka lungsim a zangkhai tuan pet mah. Ka nnasep di tengbang ka huphurlh a om kei a lah hunsawt luttuak thei ka sa lua, nitak ngaklah ka hih man in! Bangteng hileh, zing ann ne khin na ka sem a, banglou hiam2 ka ngaihtuah nung in pai a honghun. Nitak Kimbawi kia pawt ding, bangvan ka aa diaw aw, bangka va gen daw?? Nitak ann nezou Kimbawi kia hoh din ka kisa aa...

Ka vante a hoihtheipente silh in leh kinuhtheih tuam2 te kinuhtei in Kimbawite' inn lam ka zuan a, keichouh ka hih man in ka lawmte ka ngaihna a lian sem2. Kimbawi kiang hoh ka ut mah2 hang in lehlamtak ah ka huphurlh in ka lin mah2. Chikmah a ngaihzawng nei ngeilou ka hi a, hileleng nungak hel in bel ka pawtkha cheuh2 sam himahleh, Kimbawite in a hoh ngeilou ka hih man un, tua ka hoh patnang ahi a, ka zahtak mah2 ahih zok mahtoh lit lam thu in bel ka lin petmah a lah hohlouh ka ut kei, zingkar a ka dawpsa leng ahih man in.

Lin pi2 leh dipkaw kawmtak a kapai sung in Kimbawite inn kong ka tung maimah, ka chi bang a ling a, kikmai bang ka ut. Kei le kei kikha muan in zingkar a kihoupihkha cheuh ka hih man un neuchik bek kimaingal deuh na'n teh ka ci sim a lah, gintak haksa ka sa...a thawm u bang ka ngaihguk piansiam a, mibel a tamtuak kei vanglak uh...

Kipasal saktak in kong ka kiu a,"honglut oi" a hon chih ka zak in ka manglam d a bang, ka lu aktuam ciah phazou hial in ka thei! A loutheilou a lutngaita ahih man in ka lut a., mi bel a tam kholkei uh tangval 3 leh papi chiamnuih haat mahmah 2 a om ua, vot sa kholkei mahleng zum man in meikiang,a mialna deuh ah ka va tu lenlan hi. Chiam nuih a hon genzel ua, ka nuih naih2 ua nuam bang ka vasa kik thethup hi. Himahleh, sawtlou nung in chiamnuih bawlpeih nawnlou u hia eihke'h a gah masa pulh masa chi uh a zo diam uah hon paisan souh2 mawk ua, kei toh Kimbawi chouh om kha ding ka bang maimah uhi. Ka lin petmah, pai bang ka ut phial a lah pah ka sa lua... Kimbawi toh kougel chouh ka om khata ua, gen di a vaangtel, a pau zosam ka om kei ua, ka chil(saliva) valhging na tawm u'leng ngaihzou hial a bang!

Singthem khawng ka kei tungtung maimah a, ka lungsim ah ka hohkhak bang ka kisik pet mah. A khenciah ka ki-en tuah luak kha zel ua, ka kinuihsan melh uh chihlouh bangmah ka hihkei uh, a pauleng ka om kei uh. A tawp in, pasalpen pau masak hoih chi'n ka houpih a, ka aw leng a suak lahphial zo mah, "Tusun bang hih e Thim(Kim chih d pen Thim chikha zozen!)" avangkim in awl2 in chuh ka kihoupih sam ua, himahleh, by-heart a genthoh ka bang uh, gen d a bei baih theilua! A tawp in zaw ka kimaingal deksim ua, himahleh, hun in hon ngakkei, pai a hong hun maimah.

Ka lung bel muankhat in a muang tuan mahmah ta, kimaingal zodeuh ka hih man un. Himahleh, ka itna thu genna di hial in bel ka maingal(nai) mah2 kei, ka zahtak lolai, huai ahi hon sunuamlou pen lai in. Lah, ka itna thu genlou thei ka hikei, ka itpet mah ahi mai, khovel ah a mah bang2 ka it leh ngaih dang om din ka gingta kei, om le a om kei d. Inn ka tung in ka ngaihtuah a, bangteng hileh, zum leh zah ziak a a si om lah hilou a pasal khat kihi sam ven chi'n zingchiang ahihlouh tawp a leng hun lem masa pen ah ka itna thu gen di'n ka thupuk.

Ka lupkawm in ka ngaihtuah a, "tunitak a hoh huai pasal 3 te lak a a ngaihzawng om a dia aw... A ngaihzawng om hileh a pai un kelkong tanbek vakha leh kilawm hia chilelah, numei a pilte'n chuh a ngaihnou te sang ua midang limbawlzo banah, ngeina dan him2 a le, nungakte'n a va heel/lengla om nak ua leh midang a lengla dangte uh pai leleng kelkong tan vakha ngeilou, tutmun a 'mangpha' a khak ngeina mah uh hi a... A paina nung penpen chuh a lou theilou a kelkong tan a khak ngeina mah uh ahi..."chi'n ka ngaihtuah na chuh a kisual nilouh hi...

Zingkar ka thou khia a ka gintak leh lam-et hetlouhpi’n ka lawm Thangpu hongtai lut guih mawk a, lamdang kasa petmah a lah lehlamtak ah ka kipak gusim mahmah hi.Kei a ding a lam-etna leh nopna kawlnisuak bang hial in ka ngaihtuah hi. A thu a le genlou leh pautamseloua kawibelh tonton bang ka ut zozen hi, ka lawm Thangpu tung ah lam-etna thupi tak ka nei…

E! Thang, bang chi dan e na hongtung guihmawk a, bangthu om ahia? Ka ka chihleh “Bang thu zaw om hikei; noukhawng mahmah le I hong ngai a eivoi, sawt omthei di zaw hituankeng, zingchiang ka zinsuk zui ngainawn ding ahi” ahon chi a…’zing chiang a zinsuk nawn di’(tuni chouh hunnei) chih ka zak in ka lungtang teipi a dawt mah a bang! Ken leng bangdang gentuanselou in a mau omlouh kar a Kimbawi ngaia silou deuh phet ka hih dan chiang huntawk in ka hilh pah zungzung hi. Thangpu om lailai, tunitak mahmah a ka itna thu Thangpu’n Kimbawi kiang a va gen ding chih ka ngaihdan himahleh, Thangpu’n le tua d dan hialin Kimbawi a maingal kei zeel…! Himahleh, laithon kagelh a, huailaithon pen tusun mahmah a Kimbawi kiang a vapiak ding, huai nitak chiang a Kimbawi’ thupukna bangbang va kankhiak ding chih ka ngaihdan uh ahi. Chikmah a laithon gelh ngeilou ka hih man in a gelh d dan, a bul patna di natawm le ka buai…

Laithon gelhzou Thangpu kiang ah ka va pia a, Thangpu’n le a ma zinsuk ma a honsai fel pih a lunggulh dan khawng honna genpih tiptip a ka lung anuam mahmah hi. Kapaizohnung sawtlou in vangneihhuaitak in Kimbawi, Thangpute’ inn kong ah paikha ahi ding a, Thangpu’n le ana pepah hi. Kimbawi in le lamdang sa ahi ngei ding, inn lam a paipah vengveng in laithona honsim a…
It pen Kimbawi,

Hiai laithon ko’n khak mawk pen lamdang sa ngei ding in ko’n gingta! Ken leng lamdang ka sa himahleh, ka taksa tung a theihna neiteng in hiai laithon gelh ding a hon se sungsung ua, kidek a gelhlou a omzou ka hih nawnlouh ziak a kisuanglahna lianpi toh hon gelh ka hi. Na lunglou lampang ahih a leh honna ngaidam a, na ngaihdamna bawmsung ah honna khe ding in k'on ngen masa hi.

Zanlam nitak a thawmhau leh lungleng tak a ka pawtna lam ah na inn konguah k’ong paikha a, huai a nonna houpih a kipat in ka lungsim leh ngaihtuahna tengteng na luahdim khin! Hon mang hilh dingvual ka hi nawnkei! Niteng hunteng in k’on itna a pung hulhul hi!
Kim, na sinlai dawngkawt kei ding in mun a awng lai diam? haibang k’on ngak; vangngaih simthu suut ding in… k'on itna honsansak a, simleitung tomkal nunsung a lungtuak a nih gel tuibang luankhop ka lunggulh leh utpen ahi! Ahia, na lunglou lampang ka genkhak om le zong vangkholai ah nuih chiam in hon leel lou aw….
Laikhak
Nang a kineem, Mangbawi.

Nitak ann nekzoh in ka lawm Thangpu toh ka kimu ua, tunitak mahmah a Kimbawi’ thupuk na va dong ding chih ahi. Huai kal a kei Kimbawite’ inn kong a haipi nuai ah ana om ding… Khua a hongmiala, Thangpu leng Kimbawite’ inn a hoh in ke’n leng ka na ngakna di mun ka luah pah hi. Vangneihhuaitak in Kimbawi a mahchouh ana om a, himahleh, ka kinep u’leh lam-et bang un dawnna kichian ka ngahkeiuhi! Midang tuam2 le va hoh a hih man un Thangpu’n le bangmah dang gen theinawn tuanlou ahih man in a hongpai a, Kimbawite’ inn ka hongsik ging luapluap ka zakzaw ka chi khawng a ling in ka om di dan danka na theizou kei. Ka kiang hongtung a, ka na dotpah leklak hang in gen di haksa a honsa ngawih2, ka lung a gim petmah, laithon ka khak bang ka kisiik maimah gentaklouh ‘kei le kei gaal kibawl’ bangin ka kikoih top hi. Ka dongtuantuan a, a tawp in “a hon ngaihtak tak2 leh kam in hon genheh a chi” a hon chih ka zak in ka heh tha peuh a suak maimah! Kam a ka gen ngam di tak in… Hon ngaihlouh deuh ziak a ‘kam aka gen hon kalh’ hi’n teh ka chih leh Thangpu’n hilou ahi, “numei pil khenkhat te hichi mah uh ahi, lungsim hon etna ua kilunglel man veu, hilele, lungke hetlou a ipang leh I zoh khiak chiang a muanhuai, muanmawhna ding omlou, lungke lou in pang in… a zoh baihlam lote kikhen le baihlam…” chi’n hon hehneem a. Kam a gen di ahih leh ka gen keihial di ka chi lungsim, ahi a lah ka ngai mahmah mai a,genlou leh hichia mai a manghilh thei di vual ka hi nawnkei. Thangpu’n le ka lohcin ngei deihsak thu hon khak in ka kikhen uhi.

Ka kam a ka gen di ahih le zaw ka gen dah mai di, ka sihpih leleng ka sihpih zo mai di chih khawng ka lungsim ah hongsuak a lah… Zingkar ka thou a(Thangpu leng ka va kha kei), tuzingkar zaw tuitawi ka ut kei, Kimbawi toh ka kimuh khak ding uh ka lau… Ahia,Kimbawi in leng kam a ka gen ngamlouh di thei; kingaihtuah vungvung ahi ngei sam ding..inn sung a nguai leh kingaihtuah vungvung a ka om lai in naupang khat a laithem khat a hontawi a… “N'on it n'on ngaih taktak leh nitak chiah khokhung ah hongpai in- Kimbawi” chih a kigelh leuhlauh hi. Ka kipak mahmah a lah, ka taksa in a ngam kei, ka lungsim in bel a ngam petmah aihhangin, ka taksa in a lin petmah hi!

Nitak a honghi a, khokhung lamzuan in ka paipah vengveng a... Kimbawi leng ana om khin tham. ka gen masak ding ka theikei, ka mai bang san puap2 hial in ka thei.. “Umang, zannitak a Uthangin hong gen, huai laitakin dawnna kichiantak ka hon pethei kei, huai banah, na taktak ahih leh nang a kipan, nang kampau mahmah a pat ka za nuam” a hon chi a, “Kim, Thangbawi gen pen kei kam a kipan,ken ka hilh dan2 a honggen ahi, huaibanah, laithon leng na muh ngei ka gingta, huaite khawng leng kei a kipan ngen ahi, gintaklouhna di thu a om kei, ka hon it in ka hon ngai petmah, Kim, nangtellou in hiai khovel ah kei a ding in nopna kawlni a suak ngeinawnkei ding,hin thaman leng a om kei! k'on itna honsansak theilouding na hiam? Nang ngai ka dung a vul mai ding non phalhia…?”

Sawtlou a kingaihtuah nung in khovel a ka piankhiak a kipat ‘aw’ neem penpen leh hon kipaksak pen, tunitan a hiaibang kipahna aw ka zak nailouh “YES, I LOVE U TOO”!! Chih ka za, ka bil ah a lutdan a nuamtel... Kim, khen kei ni aw, Phamna lou ngal in gibang honkhen kei hen… Aw le, Umang,tuni a kipan in kei le ‘nang a’ ka hi den ding, phamna lou ngal in khenkeihen!! “Umang, na om na lam ah kei sang a hoihzaw, melle puam hi’n neih le lam ah hizong leh kei sang a et-lahhuai zaw a tam mahmah ding chih theihsa ahi, huai ni khua'n le tua ‘gin omna tong I chiam lung in ngilh ken aw…’ “Kim, ngilh zenzen lou e, ka taksa puma sisan lum a luan a, ka lungtang a phut litlit laisiah nang a ka hi den ding. Nang zong tangpaal zatam te’n na pakhoih, zu khum tawp nuam in hong vel lutlut mah le uh, tak in naubang a na sang ke’n aw.. Kim, Kim…”. Hiai hun Ka amm ngeimai, hun in lah honngak kei a, nitak sawt ding a bang maimah a,hun paimet hina maizen e... kikhelah mahle ung kikhen phot ngai ahih manin ‘mangpha’ kikhak in ka kikhen phot uhi.

Inn ka tung a, Kimbawi aw neem mahmah, leitung ka damsung a honsu kipak pen dia ka gintak, ‘Yes, I love u too’ chih ka lungsim ah hong ging2 mai a ka lung a nuampetmah, khovel a midang om lam lephawklou mah ka bang! Hiai nitak kan a ka kipahlam ka thei kha naikei! Ka ngaihtuah a pailaitak in Zinghal chiang a zin di ka hihlam ka phawkkhe guih, lamdang ka sa, ka gingta theikei! Zing chiang chouh hunnei ka hita uhi, zing chiang chouh hilele sunchiang a kithuah thei d bek hile ungzaw ka theisiamdeuh; himahleh, sun chiang a ka vanpuak di loulam a ka va laktawm ngai,lou lah gamla petmah, tun baihzoh di vual ahi kei! Zing nitak chouh ka zinnsuk ma ua kithuahna di hunnei ka hi maimah uhi! Ka kipah mahmah hang in lehlamtak ah ka zinna di hongnai loguih mawk a, hi ka sa theikei… zing chiang sunnitum a kithuah ka ut ahi alah, ahi theituan bok kei… Kim, ka lungsim hon theihpih hile chin zaw hon hehpih mah ding hi ve chi’n, nikht le kithuah manlou a kikhen mai ding zaw hi ka sa thei mahmah kei…ka kipah hunsung tom hina maizen e …

Zingkhua hongvak a louka kuankei di chih ka ut petmah a lah chi leng le chileh chih louh kibang, genlouh hoih zaw in ka thei. Anne zou loulam ka kidenna suk pah vengveng a, meh di lak meng2 a paipah ding chih ka lungsim ahi. Lou ka tung a, ka lam-et bang in thil a paitheih tuak mah2 kei, meh di a vang petmah, loulai dungteng zon ngai didan in a om… ka hehtha peuh a suak! Nitak lam vaihun tan inle ka ngahzoukei himahleh, ngah bang2 puak a paimai di’n ka kisa…hat taktak a kapai hang in paihak deuh ka hih manin ka khomial sim veve hi… bangpeuh ah ka kipum nawh a, ka buaipet mah, ka hih masak ding leng ka theizou kei! Ka kihahsiang khit inn ann ka ne zualzual a, huchi’n Kimbawite’ inn lam zuan in ka taivengveng.

Zingchia zin di chih mawk, ka omlouh kal a ka mel a muhnang bang ka pia dia aw… piaklouhtel, sawtpi takkimulou a om di ung ua… Kimbawite inn ka tung a, tangval ana omkei vanglak ua,himahleh, papi bangzahhiam a omziak un bangmah gen theih di vual ahi kei! Atawp in ke’n leng Kimbawi kiah gen di poimawh petmahnei ka hih dan ka hilh a, aman leng dawr a hoh di chi’a hong kingenin ka pawt uhi… “Umang, bang e na gennop?” gen di haksa ka sa petmah, genlouh lah hitheilou ahih man in, “Kim, zingchia ka zin ngaita ding eive…” ka chih leh a nuihmai kilawmtak leh a aw suak nalhtakte, amel-apuam mam hit-het lai ‘lounuak’ khoihkhak mah bangin a zoi ningniang maimah hi! ‘Kim,lung hi mawh ke'n, ei gel a di khual ziak a zinkhe ding ka hi, I om na peuh ah gin-omna I suah ding a, Sian in naubang hon kem dia, dam a kimu nawnna ding ihi Kim…” “Umang, ahilotham himahleh, nitak beek om lai theilou ding maw?... a dang a genzom theikei, kenleng ka gen theituan kei… kapkhiak huthut bang ka ut a lah pasal pen va kah di chih ka ngaihtuah chiah hi kasa kei, ka kidek hamham,kidek a haksa ngeimai…! “Kim, I kal ah melma tam zong leh lungtuak a nihgel itna simthu khaubang sut a, gin-omna thu I chiamte ngilhkei ni aw…” chikawm inka pombelh tinten a, Kim, ka omlouh kar a ka melna muhna dingchiin ka khi, ka ohlai ka suah khia a… “khovel a meelhoih penpen pou na,liangtung, Kimbawi’ ngawng ah ka khi-oh lai ka oksak hi…”“Umang ahihtheih liai a lehhon zinsan dah ve aw…”

“Aw le Kim, nang thuthu hi hen! K’on zinsan kei di, nang toh om khawm, neknek nekhawm leh dawnkhawm, a nuam leh haksa thuakkhawm in loubang I tul khawm ding” chih mai ka ut a lah hithei ka sa kei deuh zeel a…”Kim, bang mah kingaihsiat na di a om kei, ka siamsinna le lakloh lua ahih man in ka zin louh theihlouh ahi… I damding a; I kimu nawn nawn ding, Kim..” chin a biangsan tiitiai a khitui hongluangkhe te awlawl in ka nulsak hianhian a. Kimbawi inleng “Himah e, chih leh zingchiah hon tawnsuk inlan saulou k’ong kha ding aw…” a hon chi a, “ I Kim, hongkha koh! Kikhak zaw nuamlou ahi. Huaiziak in, tu’n na meel ka muhtawpna leng hi(phot)diing ahih man in na nuihmai kilawmtak toh honkha khia zaw in Kim..” chi’n ka pombelh tenten kawm in I muk san tiutiau ka tawpsak a..”sihtanpha in aw…” Kikhen diing a haksa ngeimai, a pai ut zosam ka om kei ua lah zan khua leng a sawt ta, dak 10pm bang ging diing ahi tak man in kikhenlouh theihlouh ahi mai. Gin-omna thuchiam te chiam tuantuan in kikhelah leh aam tak in a zaknop huai hetlou ‘Mangpha’ ka kikhak mai uhi…

Inn ka tung a, ka sungte ana lum khin ua ka van di saksa in Bench tung ah ana koih meihmuih uh ka muh zaw pekdarlh zengzung di’n ka mu, ka hehtha a suak petmah mawk hi. Ka lum a, zingkhua hongvak diing ka ngaingam mahmah kei. Taikhua hongvak diing a, ka sungkuan leh ka damsung a dia chibang ka teel ka ngaihnou Kimbawi ka zinsan mai ding ka ngaingam kei! Ngaihtuah ka hau mahmah a lah ka ngaihtuah pentak ka theikei! Ka lunggim petmah! Ka lungzuan petmah ahi, ka mit a kipan mittuite hongkisa lah mahmah ua dimlet in a hongluang khe zungzung himahleh, nulsiang ka sawm kei, ka lungkham nate a tamthei lam ka mittui a a luankhiak ka deih!

Zan a ihmu haklua ka hih man in zingkar lam ka phawk mahmah kei! Ka nu’n Mang hongthouta ou, na zinnang gari na lap kei di, hongchih ka zak in ka chimul bang a suak sungsung zozen hi. Limn petmah chuh ka hi mai! Keileng zin di vevet chi’n ka kisa mengmeng a sungte toh ‘mang’ kikhak in ka zinkhe mai zaw… ka zinkhiak hang in ‘nungkaih’ ka vei petmah, ka khete hon len om mah a bang, kal ka suan zou mahmah kei! Huan, zannitak a Kimbawi kia ‘hongkha dah oh’ ka chih hina zenpi’n zingkar in Kimbawi mel hongkilang di khawng in ka ngaihtuah mawk a lah melmuh di’n a hong om mahmah kei, hong kha koh ka chihsa ahih man in..’hongkha oh’ chikha hikha maile’ng chih khawng ka lungsim in a hong om a lah hongkhak louh mah hoihzaw in ka thei, chih bel hongkha ngei leh ka kikhen zoh uh ka gingta kei! Tutung a ka zin zaw nidang a ka zin toh a kibang kei tel mai; kilawpna khat le ka neikei, ka linpetmah…

Ka omnalam ka tung a, kong bangkim ah, ka heisuk hi’n ka heitouh hi leh lunglenna ngen in ka pum dim, puaksiam a haksa ngei mai. Sunni hongtum in zan khua mial ding hong kisa a, vasa chi tuamtuam hong ham in vailam the hongkhuang ngelhngelh bang aw… Taikhua val ding buh-al hongkhuang aa, gan hing chichih in siamtu pahtawi in a ‘aw’ neihteng uh suah in hong chiau vengvung ua…Kei aw, singdang gamlei ah chik leh lungzuan ka bang ding hiam…Heh hong neem di’n ka siang hong leeng ve aw…Kim. Kei ka heina daidam lua sa’ng ngaihna tongdam lellou; ngaihna melmulou ding in, tungsol kha leh si-al tangte’n kei lungzuan honnemlou; ngaih aw, nanglou kei lungzuan honnem zou dang om lou…!
Kimbawi toh ka kingaih uh ka khosung ua kithanglua ahi ngei ding, kua peuh houlim na leng ka hi mai uhi. Tua kawmkal ah, ka nau Chiching in lai honkhak na ah, “Ukim in maw deih a hon deihsak mai, nektheih khawng honleisak gige eive…huailoule, Ash! Umang, Ukim ka neih di kal ka ngaklah ee…” hon chi a ka nuih bang a za sim alah lehlamtak ah ka kipak gu mahmah ve! Ka lungsim ah Kimbawi in zaw itna diktak toh hon it mah hi’n the, muahmawhna di om kei chi’n ka kihehneem a… Kimbawi bel muangle ka muang him hi!

Tua kawmkal ah ka inn geite uah tangval Paunou kichi khamtheih hih, anu-le-pate’n a khamtheih man di a kiloh zoh hamham khak leh chi’n ka khua ua skulpu a pangdiing chi’n sawltou uhi. Paunou bel mikhiphat mahmah leh suahngal huntawk ahi a, a khosakna u’leng thupi lokhawlkei mah leh a kampau a kipan in a zahtak huai huntawk! Haipi a polam mam pikpek a sunglam lungvei toh a kilamdanna a om kei! Paunou bel mi I chihsa mah bang a kiphat mahmah leh nungak thei mahmah khat ahi a, huai ziak in ka khua ua skulpu a vasem ding chih ka theihphet in ka lungsim a nuam kei pah ngal hi. Chihbel, Kimbawi I chih ka khua ua ding a nungak melhoih, kuapeuh ngaihsang ahih sam ziak in leh Paunou’ kampau te a theingeilou te a di’n a zak a nuam a, kital puk baihlam mahmah diing chih ka muhkholh luat ziak in ka lung a nuam theinawn tatak kei.

Hun leh nite hongpai zel a, Paunou leng ka khua uh a tungkhin thamta. A theingeilou te ‘ a din chuh khopi a kipan ahih zawkmah ziak in a ngaihsang huaipet mah, thugen a siam a, a dangnaal petmah! Paunou mahmah leng mihoih dandan in a va om a, kikhom deuhzut ahih man in naupang heutu khawng in leng ava pangkha thethup hi! Keileng ka lungnuam thei tatak nawnlou ahih man in Kimbawi laikhak diing ka chisim sek a himahleh, mi a paidi lemchang ka mu kha ngeikei. Nitaklam khat ann nezou bench tung a ka tut zetzat leh ka khote uh papi khat honghoh in laithon hongpe chat a, ken leng bangchik chiang a kik ding a Pa Thuam ka chih leh zingchiang in ka kikzui ding chi’n hon paisan ngal hi. K’en leng ka naunu honkhak ngei hi’n teh chi kawm a laithon ka et leh Kimbawi honkhak ana hi daih a, ka tutna a thou khia in ka room lam ah ka vasim zozen hi…

Lungtup mualsuah pih dia simleitung ah tangpal zatam lai ah deihchi bang ka teel Umang,
Tungsiammang huaina zal a zolei tangbang na dam ngeilam-en ing, kei zong I sulnungteng ah khattang sawlbang hei in, lungzuan sial dinglelin dam sam ing!
Umang, na zinsukni a kipat in na sulnung na honhilh a, ‘laithon’ beek honkhak diing in k’onna lam-en gige a lah ka lam-etna bang kei! Nang a kipan thuzak kal ngaklah mahle’ng za ngeilou ka hih man in ka kidek zounawn kei a, lai honkhak mah hi’ng. hon phawknawn lou leh hontheipha nawnlou na hih tak a le zong hiai ka lenthelnah mawltak honna simsuaksak hamham in aw….
Nang a kipan bang mahthu, a hoihlam hi’n a hoihlou lam hitaleh zak nei ngeikei mahle’ng- nang a dia ka gin-omna lah chih takna bel ka khahsuah kei, khahsuah le ka sawm kei, khah leng ka khahsuah theinawn kei bok di! Ka ngaihtuah zel a- kei ka na gin-om tentun hang a nang a kipan bangmah thu zak neilou ka hih man in ka lung a nuam theikei. Umang, na hon it lai a ahih leh hiai ka len thelnah hon thukkik in aw..lamen tak in ka na ngak den diing…
Nang a dia sihtanpha dia gin-om,
Kimbawi.
Ka simkhit in ka kipak petmah a, leh lam ah Kimbawi hehpihhuai ka sa a, ka kisuanglah petmah hi. Laithon ka sim thakthak a, ka by-heart man phial! Ahi, “Lungtup mualsuah pih dia simleitung ah tangpal zatam lai ah deihchi bang ka teel leh nang a dia ka gin-omna lah chih takna bel ka khahsuah kei, khahsuah le ka sawm kei, khah leng ka khahsuah theinawn kei bok di!” chih teng mahmah in ka sinlai gubang hon zen diak hi’n kathei. Kimbawi ka ngaihna bang a puang hulhul mai a, asak mel lawmnou muhkal chuh ka ngaklah petmah! “Kim, keileng nang a ka hi den diing, sihtanpha in aw, Kim..” ka laithon kipahhuaitak, chik mah a le hichi bang mu ngei dia ka kilam-et hetlouh ka lukham nuak a koih thrinthren in ka laithon thuk nang gelh di’ng ka kisa ngal hi. Laithon gelhzou zingchiang a station lam a vapiak di chi’n ka kem a, zingkar thohbaih deuh ngai di ahih man in ka lumpah a, tunitak ka lupzaw nitenng sang in le a nuam zaw in ka tawl a dam zaw thamtham hi. Lungnopna bukim toh zalna laikhun ka beel zaw kua dang ka eng kei…khovel nopna buching hi’n ka koihtop!
Zingkhua a hongvak a, laithon khak di chi’n station lam ka zuanpah vengveng mai hi. Himahleh, vangtahhuaitak in gari pai a om kei, mikiang a ka kan a leh lampi siat ziak a gari pailoua hi,lamlian le hoihpah kholkei teh a gendan uh honna chih khum lai zomah a, ka hehtha a suak a, khovel lungnopna kichi om keina e, lungnop leh kipahhun tawm hina maizen e…hamsiatna khovel zaw hi mahmah a ka maw khawng ka chi lungsim a…Huchia, lungkimloutak leh nguitak a ka paitouh na lam ah ka laithon khak ka puaksak di pa toh lampi ah ka kituak ua, ken leng a pai hunhun a a puak di chi’n laithon ka pe ngal hi. Hun bangtan hiam nung in zaw lamlian ahoih a himahleh ka laithon puaksak di pa a damlouh ziak in apaithei pah kei. Huai hun sung in thu hoih ka za vaang mahmah! Kimbawi, ka gintak leh lam-et sim ngei bangin Paunou toh kingai ahi uh chih thu ka khote uh hongzinte’n kei kiang ahong gen theih omsun uh ahi, a zak a ahak petmah mai…! Ka lung a nuam thei mahmah kei a leh ka gingta kei, ka ngaihluat ziak in “A gingpeuh sazu lah hilou a” chih khawng in ka kihehnem a lah ka za mun mahmah ngal aa…! Zanlam a ahon laikhak ka en kiik a..” , “Lungtup mualsuah pih dia simleitung ah tangpal zatam lai ah deihchi bang ka teel leh nang a dia ka gin-omna lah chih takna bel ka khahsuah kei, khahsuah le ka sawm kei, khah leng ka khahsuah theinawn kei bok di!” hiai diudeu te mahmah in ka lung a sunuam, ka muangmawh theikei, muangmawh di’n le ka koihthei himhim kei! Khat veivei lah la gingta deksim a lah gintak haksa ka sa ngawihngoih, ka it leh ngaihluat ziak in… Kim, bangsim lel na hia, bangsim in honnawk kha a maizen a tulai ka thuzakte’n ka lungsim hon deng na mahmah e, Kim…Phamna lou ngal in khenkei heen chi a nih gel lungtuak a tong I chiam ngilhta na hiam…?
Paunou le Kimbawite’ inn a phat theihtawp a kiphat gige, neih-le-lam a mi englou leh tukthei-taithei a ut-ut a kikhoh ziahziah dan khawng in kigen sek hi. Ahitak in zaw ‘cycle’ khat nei mah uh e! Ken Paunou te’ inn sungthu ka na theikha vanglak hi, ki-inn veng ka hih man un. Himahleh, a inn kuan khosak dan uh Kimbawi kia va gen a, Kimbawi lungliap theihna dia kampau zat bel ka ut tuansam kei, ka ngaih mahmah hang in. Kimbawi in zaw neih le lam en-lah lel ahi chih ka chiang mahmah ta, a ma’ aa di’n ka chin kei chih leng ka kithei himahleh, midang a di’n ka phal kei, ka phalthei himhim kei.

Lehlam ah, Kimbawi’ nu-le-pan zaw Paunou sang in kei hon deihsak zaw un ka thei, dik leng a dik ngei diing. Himahleh, Kimbawi bel keisang a kamzol zaw leh kipe zouzaw mah ah a kipeksuah zou kei; kipek suah le a tum kei, kei a kiang a a itna hon koihsak leng a lakiik tuansam kei. Huaiziak in, a khenchiang in Kimbawi ka hehsan dekna a lah ka hehsan zou kei, ka hehsan thei kei, ka itna ziak in a hoihlouhna tengleng hoihvek in ka mu, bangkim ah a dik! Hontheikha peuh in hon awlmawh ahi ngei diing ua, Kimbawi zulhzauna ngen hon genpih vettak uhi, Kimbawi ngaihsak nawnlou ding in thuchah hoih pipi hon bawl sek mahle uh ka bil in a za theikei, ka bil ah a lut thei mahmah kei. “Mihai” Chuh ka tang mun viau gentaklouh, lawm-le-vual lak a leng ka vuallelh lou hilhel, himahleh ka itna a ‘dau’ tuan thei mahmah kei, huai nak sang in ka itna muh theih a pung a bang zosop hi! Ahi, ken leng ka thei, khovel ah Kimbawi sang a hoih zaw, pilna-siamna leh neih-le-lam a leng etlah huaizaw a tam dan, zong lengle ka mu di, zonglouh in le hong kipe khia leng a tam, himahleh huaite tengteng ka itna di Kimbawi in a la khinta, a ka itna neihteng Kimbawi ka itna in a deep mang khin, khvel ah Kimbawi bang a ka it leh ngaih a om nawnkei diing, piangleng a hongpiang sam kei diing! Bangteng hileh, khanawn chiang a kholam paitheita diing ka hih man in Kimbawi thu a ma kiang a kan leng ka sawmkei, a man hon hilh khak leh chi’n kineem tak in ka ngak zaw diing chi’n thupukna ka bawl ta.

Hun hongpai zel a, Kimbawi’ lawm Niangbawi leng hongzin chih ka theih in ka va zongpah vitvit a... Kimbawi’ thu, Paunou toh kingai taktak mah hina uhiam chih ka va dong zungzung ta mai hi. Amah Niangbawi ngei in leng iim nei vetlou in hon sekhe suk zungzung aa... “Umang, Kimbawi ka lawm hoihtak, ka neulai ua kipat a kithuah den ka hi ua hiai tungtang zaw gen nuam ka sa kei, Kimbawi dikna khatle om lou hia ka theih man in, himahleh, na hon dot ngal in chuh k’on gen diing, a gensia dan a na h on ngaih hetlouh diing a hi bangbang a hon gen diing ka hi. Kimbawi toh Sir Khual a kimuh tuung un Kimbawi in itna mit in ana en pah a, ana kipe zou petmah hi. Sir Khual in leng huaithei ahih man in maingal leh neelpah a, nang zinsuknung kal khat-hu diing khawng in ‘damsung a di’n’ chi’n itna guikhau bang ana peh khawm manlang uhi! Sir Paunou in bel ngai taktak lou hi’n ka thei, Kimbawi kipiak zohluat ziak hi’n ka koih! Ahitak in gen le- Kimbawi bel itna hawmsiam mahmah khat ana hi hi. Chih bel, nang toh na kingaih ma un le Muanpi toh ana kingai khin thamta ahi ua, Muanpi’n nangtoh na kingaih lam a theihin itna a piaksa a la kiik... Hiai thu leng ka theihna a sawt kei, k’ong zinsuk ma deuh a ka theih ahi. Kimbawi ka lawmhoih mahmah in ka ngai a, ka haksatna leh puakgik te leng im neilou in Kimbawi kiang ah ahi bangbangin ka gensuk zel himahleh, Kimbawi in bel kei bangmah a hon sim lou ahi ngei diing, thil bangkim a hon imm sek a, Kimbawi thu himhim a nu-le-pa leh sanggamte theihma a thei dia kilawm ka kisak leh miteng theihnung in ka thei giaigiai sek zel hi. Ipu-ipa ten ‘baang in leng bilnei ahi’ achih uh dik ahi ngei ding, bil ana neilou hi zenzen leh bangmah thu theilou a, mihai bang a ka om heihuai hun a tam mahmah ding, Kimbawi hon bawldan bel ka khase huntawk thouta! Ahitak in zaw Kimbawi in ngaihzawng khatchouh nei ngeilou himhim dan ana hi hi”. Hiai thu dik, gensiatna di omlou a thudik, Kimbawi’ omdan ka theih in ka thang apai petmah a, Kimbawi ka kiang ah om hile zaw ka khut ka kha kha diing, ka kidek zoh ka gingta kei. Niangbawi kiang ah ka dong zom zeel a.. “Zanlam a hon laikhakna a lah sihtanpha a gin-om diing ahih dan khawng hon gen zel a...” Niangbawi in leng, “ a hon gen mah ke, nang a kiang a itna honpiak a lakkik louh pi, tua k’ong zinsuk dek in leng ‘Umang kiang ah Upau thu bangmah ana gen ken la; gin-om tak a om ahi ana chi in aw’ khong hon chi lai eive! Umang Kimbawi zaw ngaihzawng lam a zulh zau petmah ahi...himahleh, nang thuthu, bangkim nangkhut a kinga ahi mai... Tam ka hon gen lo kha a, Kimbawi gensia ka bang zozen, kei leng Kimbawi tung a khase velvel ta ka hih ziak a hon gensuk muatmuat mah ka hi. Hiai thu Kimbawi na theihsak ngeignei leh Kimbawi mel ka damsung in le ka mu ngamnawn kei diing, a’hhang in na gen bel ka gingta kei. Huan hiai thu ka hon gen zungzung hang a kei nang a dia hong kipiak bawl ka hi zenzen kei, huai lam zaw lungsim a le neilou ka hih dan hon theihpih diing in ka hon ngen hi. Bangteng hileh, nang thupuk na bangbang ahi”. Thu hiai zah zouzai za mahle’ng a kipahhuai khat beek le a om kei. Paulou hial in ka pai a, ngaihtuahna mumal leng ka neikei, heh petmah chuh ka hi, hi chibang a Kimbawi tung a heh thei diing in ka kigingta kei. Himahleh, a lamdang lua, bangchituk in heh mahleng Kimbawi ka itna a kiam thei mahmah kei, ai’hhang in a Kimbawi ‘do-ha’a kipan kihepkhiat diing chih bel ka lungsim ah hongsuak thei sam, ka kipak petmah.

Paunou leng a ‘kelluphum’ a hongdawk khe panpan ta a, a khamtheih hih zongsat chi tuamtuam te selzoh diing vual ahi nawn kei. Saptuam te’n le naupang heutu a kipan a tawpsak ua, kumtawp diing ahih tak man in skulpu’n bel a pang hamham lai hi. Hiai Paunou gin-nat louhdan selvuallouh a dawkta ahih man in Kimbawi nu-le-pan bel kei(Mangbawi) mah limsak a, Paunou pen hemkhe diing in Kimbawi kunsek mah le uh Kimbawi in ngeingaih mahmah kei, Paunou toh a kingaih lam uh ken theilou diing in a hon koih a, ka ngaihlai ngei a gingta. A gingta khial kei hial, ka ngai lailai mah, suul honghei kal ka ngaklah petmah! Suulkik hong hei leh zaw ka pom mahmah diing, tu’n le manghilh ka sawm hang in ka mang hilh theikei, a mithah kilawm tak leh a samsan sim silsel huih in a muk leng seseuh leh a tongdam nem tak te ka lungsung ah a mang theikei, a hongkilang thakthak ua, manghilh naksang in ka itna leh ngaihna a pung zosop hi.

Hunte pailiam zel in keileng zinghal chiang a ka kholam uh zuan a pai diing ka hita, ka phhur mahmah a lah lehlam ah, naktak in ka lin zeel hi. Khua ka utna teng beiphial hi’n ka koih a, ka zindek laitoh kikhai hina maizen e.. Kim, i tonchiam te ngilhlou a, gin-om tak a na om a, k’ongtung diing ngaklah tak a na om diing k’on sak leh...zin hawm hia, Sian’ lemgel? theisiam theikei nang e...! Zan lam a govt. a sepna di zong a ka va ki-interview leng a hongsuak a, vangneih huaitak in ka ching zo mah hi. Hiai thu ka zak phet in ka kipak mahmah a, himahleh, ka kipuhsung bel a sawt kei. Kimbawi ka ngaihtuahna ah hongkilang dundun zel, ‘Kim, Pathian vualzawlna zal a zaw hon vaklah khollou diing hi ve’ng, tui bang kigawm na di lah a haksa ta ngal a...poi hina maizen e... Kim, ka kam muh n’on kipahpih sam daw?’ Inn lam ka pai a, ka sungkuante’ toh kimuh kal ka ngaklah, himahleh, Kimbawi melmu diing, Kimbawi ngailo mahmah diing ka hih dan ka theichiang lua a ka huai in hon linsak mahmah mai. Kipak mahmah mah le’ng dahna lam in hon bawm tam zaw, ka thuk zou kei, kei a di’n khovel ah nopna himhim om nawnlou hin ka thei, a hoihlam himhim ka kipe theikei, kei kan a khovel a vangtah om nawn di’n ka gingta kei, piang leng piang sam kei heh!!

Hunte zaw khawllou hial a pai ahi sam ding, zing khua hongvak leh ka kholam u’zuan a ka zintouh hun diing ahi ta, lit toh ut ka thuah a ka lunggim petmah. Ahi a lah, a loutheilou a pai himhim ngai hi’n ka koih. Zankhua’n ka lungbuai petmah. Khua tung diing ing a, ka leenchil tongsam Kimbawi’ sakmel mu diing in a, ka ngaihna puanbang a hongthak dia...thuak hak hina maizen in chia... Kimbawi in hon khensiang hi leh zaw a dan om deuh di’n ka ging. Tua hon khenlou, singdang toh honkop ahih ziak in theihsiam haksa ka sa. Ken lah khen ngam tuanlou. Hai hina mai zen ing e, lung honsit a phungdang hon zotsan ta bang dia ka khen ngamlouh, ka hi chi ngaih teitei lai ahi? “Kim, ‘lungtup mualsuah pih dia..’ na chih bang a hia na lungtup? na lungtup i mualsuah zou diam?? Tun-le- zua aw, bang simthu hiam aw i piantual uh ana niam tuam se!!??

Zingkhua hongvak a ut leh lit thuah in kholam zuan in kapai ta mai a... Khosung ka tungdek in Kimbawi toh ka sulnung teng uh ka mu a, lungleng in ngaihtuahna a paisau petmah, kipasal sak ahaksa ngeimai, kahkhiat loiloi bang ka ut. Kimbawi in kipaktak a hongdawn di khawng in ka gingta a lah thi hithei in ka koih kei. A hon mukha peuh in sepna neita(di) ka hih chiang in hon kipahpih thei mahmah ua, a hih theih dan chiat un hon ‘chibai’ sauhsauh mah le uh kei a kipan kipahna mel a dawk hetlouh lamdang a sa mahmah uhi. Khua ka tun pen Kimbawi theihsak hetlouh a nitak chiang a ngam-le-khat a va hoh mawk ding chih ka tup dan ahi. Ahi, ka mai a kipahna mel a lat hetlouh pen ka sungte’n le lamdang a sa ua, Kimbawi ziak hi ngei dia gingta in hon thuhilh vakvak ua lah ka bil in zaknop a sa nai tuan kei hial! Kimbawi bel ahih theih liai a leh ngaihsak louh teitei diing a hon chi ua, kei ngaihdan leng ahi bok, himahleh haksa ka sa petmah! Suul honghei in ka lim ah hongkhawl leh ka chi vungvung lai...!

Nitak honghi a, Kimbawite’ inn lamzuan in ka pai vengveng a, kong leng kiu masa selou, kihehsak deuh mai leh ki-inntek saktak a ka lut-guih leh Kimbawi toh Paunou, a mau gelchouh om ana kikawt tettat ua ka thangpai petmah. Kimbawi midang a dia koih theilou, phalleng phallou ka hih man in ka ‘aa’ bawl mahmah veve hi. Ken leng engbawl in ka va tu kenkun a... Kimbawi leng kisiamtanlou ahi ngei diing, kisuanglah in keikiang lam ah hongtu a...ka houpih kei,ka kihehsak(a taktak in zaw ka hehsan kei, ka hehsan thei mahmah kei). Paunou toh kou kinak theihlua ka hih man un Paunou in honhou pih a, Paunou toh kimaingal tak a ka kihou theih uh Kimbawi in lamdang a sa, nuam a sa thei taktak kei. Paunou in bel hon ngaina a,honna vaidawn hoih mahmah a imm neilou a thil gen di’n hong kisa mawk a, Kimbawi in a pautuh, bangmah gentheilou diing in a koih hilhel zou hi. Paunou in lah bangmah theilou, kenleh Paunou thuambawllou, Paunou diklouhna leh chitlouhna lengtheilou, keitoh Kimbawi ka kingaihlam uh a theihlouh ziak a itna ana pe kha maimai ahih man in Paunou bel siam ka tan mahmah. Paunou in hon ngaina mahmah ahih manin Kimbawi in pautuhtuh mahleh hon gen khe thouthou a, “Mang, Kimbawi ton pih mai diing chi keivoi” hon chi zo-mah a, ken leng “ Tonpih ou ngut in, kenleng na sungte kiang a hongpai chiang a Vaphual hon man diing ahi ka chih ahi” chi’n ka dawng thuk zo-mah a, Paunou bel kipak mahmah a, himahleh, Kimbawi mai ah kipahna mel muh diing a om kei. Paunou toh kimaingal tak a ka om mawk pen uh lamdangsa, a kellu phum dawk disa ahih manin huai lunggim pih ahi pen mai, ken lah thumu kisa in ka engpau deuhdeuh zo-mah lai set hi.

Sawtlou nung in kimbawi’ nute hong pai ua, Paunou toh kingeih vaklou ahih man un Paunou paipah hi. Keilah Kimbawi nute’n Kimbawi toh hon deihsak mahmah ahih man un ka ki-angtang sak mahmah mai hi. Kimbawi ka en a, amai a kipahna mel a dawklouh hang in a nidangteng sangmah a leh hoihzaw leh ngaihhuai zaw diak hi’n ka thei zo mah hi. Ka itna a pung hulhul a; ka zin di nitak a gin-omna thuchiam a, itna ziak a a muk san chinchen ka tawpsak kuaikuai lai hunte ka ngaihtuah a...sapkik theih hileh chi-na maizen ing e...tui bosa lah kiluak kik theinawnlou a maw....Ka ngaihtuahna a pausau, a nehnou petmah. A khe mawng a kipan in ka en tou charchar a, gensiatna di himhim ka mu kei! Ka et-et na lam ah ka zinsuk dek a khi ka piak a ok nawnkei a, kan louh teitei ka sawm hang in ka kidek zoukei. “Kim, na khi lah awi?” chia ka dot leh kamsiamtak in ‘sumang kah kei voi Umang, a poidan’ hon chikhe ngeingei a, ka hehkei, a aw neem tak in hon kipak sak zou tel mai! Himahleh anun, “Paunou oh pen hilou maw, huai love sign lim om pen hia, a ngou”a hon chi a, a thil iim chuh im vual louh di’n a hong dawk. Kimbawi in gen di a a theikei, ka hehpih kiik zozen a lah ka heh petmah, ke’n itna ziak a ka neih zoh sunsun pia ing a, a man midang ana piak mawk ka ngaithei kei, ka piak leng ka kisiik petmah.

Saawtlou nung in Kimbawi nute’n hon lupsan ua, kou gel chouh om kha diing ka bang uhi. Gen diing ka theikei, khen mai diing ka diam, ngaihdam hon ngenleh ka ngaidam lai diam?? Ka lungsim ah zaw ngaihdam a, itna guikhaubang zopthak ka ut petmah. Ka lam-et bang ngei in Kimbawi ki-im utsam lou ahi diing a ngaihdam a hon ngen a... Kim, k’on ngaidam lua, ngaihdam na hon ngeima thamtham a leng k’on ngaihdam na hita chih mai ka ut, himahleh, chih louh hamham ka sawm, keileng ka kiliansak mahmah eu-au hi. Pau selou a paimai di’n ka kisa a; konglam ah hongkha in ngaihdam ngen in ka mai ah hon kun in a mittui hong takkhe suk zungzung mai ka muh in chuh haksa ka sa petmah. Gen di ka theikei, pau selou in ka pai ngeingei in ka pai zel a....

“Umang, zing nitak chiah khokhung ah kimu ni aw..” hon chi a, “Khokhung, gin-omna thuchiam i chiamkhawmna, i thuchiam te vala kiik diing maw!?” ka chih leh a hong kidiik ngaih semsem a, ka lungsim bel a neem petmah himahleh, amai ah ka kihehsak mahmah hi. “Umang, hehpih tak in hon ngaidam hamham in aw, itna guikhau bang zom kiik diing chile’ng a zekai lo diam...” a hon chi a, ken leng ka hon ngidam lua, kon ngaidam tham himahleh, itna gui khaubang zopding in zaw hihthei nawnlou ahi Kim. honngai mahmah mahle’ng i kal ah guam thuakpi a om, huai kanzou diing in hatna ka neikei, nangleng na neih ka gingta kei chin haksa sa pipin ka pau teitei hi. Kim, hemlam simthu zatam na hon khak te taksimthu nasa ing tang seklung mawl in, hizong na hemlamsimthu ka tanlel leng kei a ding in nuam tuam hi...itna guikhau bang zop kiik ka ut a himahleh, na kawi in theileh selung liap diing hi.. huai ziak in, hunlui mualliamsa ngilh in la, Upau toh na maban ding uh khual in honggam tang zaw in... Gin-omna taktak suah in la, vondeih zatam hontawi un aw... Kum zatam kivei zong leh ken k’on itna zaw a bei ngeikei diing...Tangtawn in k’on it dendiing... Ginom ding a tong i chiamte paitembang kuah a, ‘aguk a singdang siang honna zotsan’ lou hile chin zaw...Kim... Tu’n leng k’on ngaidam himahleh, hiai khovel ah zaw nang itna a kipan in ka na kihemkhe phot mai diing...! Tangsanggah lung honsit a, lungsit a phungdang zuansa tangkiik sang in hon ngilh mai ning, Kim, Zaal Mangpha...

Nu, ka kipak!

.