Khatvei papi khat in a innsung dinmun uh a etchiang in zi-leh-ta khualna ziak a kawlni suak sim a nnasem dia a kuan gige lai in a zi inn a na om maimai dan a ngaihtuah in leh, a zi in a thagimna leh tawlna theisiamlou a duat zoulou sa in a hong vui sim hi. Huchiin nitak lup di kuan in hichiin a thuum hi: "Aw Toupa, innsung a pa pen ka hi a, niteng in zing dak 8 a kuan khia in nitak khomui chiang in inntung ka tung zel a. Huai kal in ka zi inn ah ana om maimai a, ka sep gim dan theisam leh ka ut a. Huaiziak in aw Toupa, hehpih tak in ka hihna uh nikhat lel  kikhen na hon phalsak ka hon ngen."

Thuumna dawng zel Pathian bangkim hihthei leh vaihawmtu feltak, in a ngetna ngaihkhiak sak a, zing a thoh a a taksa hon et leh  nu pen bang in hong thoukhia hi.

A  zingsang in pa pen nu bang in hong zingthou ta hi. Kintak in mei hon toh a, ann huan in, atate uh a phawng hi. Naupangte kiang a singpi leh sang pia in skul kai din a sa kawm hi. A sun ann ding uh leng a keng sak hi. Huchih lai in apasal hong thou a sawtlou nung in zing ann a neta uhi. Annkuang le sil khin manlou in atate skul ah a vakha a, khat in a homework bu inn a manggilh ziak in huai la din a kiik hi. Atate a vakhak zoh in inn apai in kuang a sil nawn a, lupna bawl hoihlouh a om a bawl hoih hi. Inn hah siang a puanninte a sawp zou in tuang a hon phiat zoh in puan in zuut hi.

Huai zoh  in sun singpi dawn hun hong hi a, atate skul hong tawp chiang ua a nek di uh dawr ava lei zok in, fridge a koih dite koih  in a sumzatnate leng a gelh khe sipsip hi.  Atate uh skul kai tawp avapi a, nektheih a ngen ua himahleh sum a puak khaklouh ziak in lampi ah a kinial khop uhi. Inn tun in  a uniform niiinte uh kaikhawm in, puannin dangte toh sawp din a koihkhawm hi. Atate singpi leh neek diing pia in huai zoh in hon sil hi. A tate homework hih pih pan chih in nitak annhuan hun a hong hi ta hi. Huchiin nitak meh di allu aat in, sihzou a mal a, annhuan kawm in a puanphoute a vatuah hi. TV enkawm in puan a nawt a, ann a mit nung sawt law lou in a pasal leng hong tungta hi.

Pasal in sunni tum a a nnasepna a gim thu leh innlam a bangmah hihlou a om maimaite hamphat dan a genlai in pau hetlou in a ngaikhia hi. Nitak ann nek khit in kuang a sil a, annhuan in a hah siang a, pasal houlim pih a sawm a himahleh biak inn kai din a kuan san hi. Atate toh thawmhau tak in a na om hi. Sep ding neuhneuh a sep nung in dak 9 hong hita a, hihkhaklouh tampi nei mahleh tawl lua ahihman in lupna lam hon zuanta hi. Apasal hong pai hak man in a na lupsan a, kongkhak innsung lam ah kalh le lah apasal aheh di a lau a, kalhlouh di lah mi gilou leh gutate a lau zel a, kong kalhlou in leh ihmutsan ngamlou in lupna tung ah ana ngak hi. A hong pai tak in ihmut suah toh ihmut mai a tum a, a pasal in lah kikawi phot ana lunggulh zel a… a zi ahihman in a kiphallou thei kei hi.

Huchi pi in leng a zi innlam ana buai ahi chih a thei dek kei a, pasal toh dinmun kikhek hi tawlhuai zaw tham hi in a thei hi. A zingchiang zingsang in lupna apan a thoh toh kiton in lupna gei a khuk din in. "Toupa, ka zi toh taksa kikheng dia kon ngetna non sukpichin sak man in ka kipak hi. Ka zi inn a om maimai ka na sa a, tu in a gim theihdan ka theita. Ka sepgim dan sinsak ka tup lai amah sepgim dan ka thei ta. Toupa, tu in ka sinlai di ka sinta. Hehpihtak in ka taksa uh hon khek sak nawn in. Zi hih zaw a gimhuai lua." chi in a ngen nawnta hi.

Bangkim hihtheitu leh a pildan suiseng vuallouh khop a thupi Pathian in a hehpih mahmah a, a ngetna leng lem a sakpih a,” Na nget bang in kon phalsak, Kha sawm nung in innsung a pa pen na hihna ka hon pe nawn ding. Tutak in bel a hi thei tadih kei” chiin a dawng hi.

“Bangziak in ahia kha sawm ka ngak sese ding?”

“Zan zaan apan na gaai a”.