Thanlon Vangkhua Kituhna - II
By C Lian Langel.

Gen hetlou di ka chih guksim chu ahina a, kon gelh mai di aw. Ka thau tawi kha M-16 a pump na omloute, hiaite kha block theilou aki chisim zozente ahi. Himahleh, nitaklam kikap tuah sanlai tak in hong block thahah laizang hi. Ka ejector in a chamber sunga cartridge tang pen kaikhe zou mahmah lou, kou panna lam a mi 4 chauh pang ki hi ngal, tai vialvial bang lah thil hithei hi khollou zomah, ka buaisim hi. Loh ngaihna omlou, kikap tuah ziahziah lai a ei thau kap theihlouh a hong om bangzaw paih vovok dia hoih mai ahi. A tawp in ka khang ua lawmte gel ki guard sak in, lawmpa toh kintak in ka thau uh ka hon pheltuak uhi. Ama thau piston pen keia a vuah a kaihkhiat ka sawm uh ahi. Khut a mawk kaihkhiat zoh di a batlouh man in, ding kawm a ka khe a ka tot ek leh hong lengkhe vit hi. Huiha chih in om zozen. I thau lawng I khoih kha lah chu sat a sa mai, mei am khoih toh kibang lah hiai hun laitak a va koihkhak louh theihlouh zel. Kintak a kikhek kik nawn ngal in, khawlthau hoihtak a sung zol kilkel thaka kon zang nawn chu a block nawn kei himhim. I ki entuah lah chu ki hehpih huai thei mahmah likliak, mai leh nakkong lak khawng vom bibiai geuh. Tui chauh himai a duh huai, kawl nuai a lawmpa luang kava koihsuk lai uh, ka genkha kei dekna a, solacid ka nekzoh ua kha nahtang kung ana om zenzen khat phelkhap in a sunga angekna mun teng nek in ka nek thoh mai uhi, a lim a gen di zaw hi hetkei.

Huchia ka hong kipat thak nawn tak un amau lam thawm zak ding hong tawm hiaihiai maimah hi. Re-enforcement-te lak ah training thak tampi hong tel ua, thautang zong hunkhop hon paw keihkoih uh ahihmanin, I magazine hawm natan ei thun ngailou a hon thunsak thei ngal ding nungzui natan om in mi ka kidaih ta uhi. Zan bangleng hong sawt pahta ding ahihmanin, lawmpa’ luang ka koihna mun uh, kawl nuailam ah va lakkik ngai ahihman in, hong tungthakte leh kou ana omluite khat guide na nuai ah a la di’n kuan suk uhi. Khua mial nuai a torch-light toh pilvang tak leh kiveng kawm a ava zon uh ahihmanin hon muzou pahlou ua, hun sawtsim tak a zonna in va lutsak uhi. Huchia a va zon kawmkawm un kou leng ka panna mun chiat uah, Talpak te’n hon kapthuk ngel nawn keimahleh uh kap in ka kap thouthou uhi. A tawp in khau khawng toh pang in hon lakhe thei khongkhong uhi. ‘Hichi tuk a kense lak a bang chi a na va koihsuk theih uh e?’ hon chi zensam uhi. Lungsou vitvit laitak ahih ziakle ahi dia, ka va koihsuk lai un bel huchi tel a kensia ahihlam thei tuan kholkei mahle ung, a ni nawnlam a kava etkik un a kumsuk mahmah le ana haksa hial mah hi. Hiai kense lakpi a lawmpa luang leh ka thau uh pawkawm a a khenchia kapthuk zel hilai, ka kumsuk theih uh hi a lamdang mahmah thil ahi. Kou panna lam a pangte le taikhe gai uh ahita di ua, hon kapthuk di le a om nawn kei himhim uhi.

Camp sunga te’n hong paisuk ta di ua ahon theihsak man un a tunglam a pang teng in camp sung ka zuanta uhi. Tuzet in chu Camp sung ah ka tam mahmah ua, a mial toh kua teng a hongkuan ahi ua chihleng aki theithei kei hi. Heutupa’n lawmte gel luang pua a tuzan Dialkhia a paiphei vek ding chi hi. Zogam Salpha tegel luang puak nang bawl in, nitak dak 10 lakvel hi din ka gingta (ka sana ka tatmang khak sese ziak in) camp sung awl in ka hon nuseta uhi. Amasa a paite’n thautang a lampi hongsuk ziahziah kawm in, Thanlon khosung awl in konglut suk uhi. Lum a lumsuk nawn chu ka higet mai uh. Kou ana pangluite bel tui duh a buai gawp ka hihman un inn tuah masakna pen ah tui dawn ding ka chih uleh inn ana ki pawkalh zomah hi. A ban ah ka ennawn ua huaileng kikalh zel, a tawp in theisiam thouna unteh chi in a kalhna chabi ka kapsia khong uhi. Kongkhak hong in tui bel ka zong ngal ua, tuibel liantak a tui kikoih domkhia in tagah noimu bangmai a kon dawn sosouh bang uzaw, noupi khat dawnlam theihman ding ahise kei. Hinna tui dawn khalele kilamdang lawtuan keileh kilawm bang zozen aka.

Thanlon khosung ah hunkhop ana omlai mahle uh, ka thawm uleh khosung lutsuk ka hihdan uh a theihtak ua alanglang a taizak dan uh ahi, akhonung thu kithei dan in. Huaibanah, siluang’ paw dia ka sap uh gari head light a muh chiang ua tamtak hong kuan beh nawn uh ahi chi a ana patau leh buaise gawp leng ahi uhi. “Yam e, Yam e!!” chi kawm khawng a tai duaiduai ahi di uh kei gintak dan in. Khosung mi a matkhakte uh chihlouh ngal midang muh ding a omkei. Inn khat annhuanna dia a zat uh om a, a sung ka lut uleh ann huan minsa belpi dim ah ana om phiphe a chaak huaisim mah leh, galte’ ann neklouh himhim ding chih ahihna toh ka buavek uhi. Bangmah theilou khosung mi 2 kaplum om ahihdante ka hon theih chiang un puakna huai mahmah hi.

Kouleng lawmpa toh kikhah nawnlou in last guard in ka pang ua hiai hun inbel a taina lam khawng uah khatvei khawng thau a kapging uh kiza lel hi. Huchi’n awl in Dialkhai Vangkhua ka tung phei uhi. Dialkhai ka lut un Salpha taktak mah ka hi uh chih hon phawksak di’n, khomipi leh Thanlon apan an taiphei te’n honna dawn in honna kah khum ua nehnou deuhte adi’n a haksa mahmah. Sikhin phial ding a honna gingta uh ahi a, a thawm ging a thupi mahmah ziak ahi ngei ding. Lamka lam akipan Re-inforcement hong kuante leng hong tungtham ta uhi. Lawmte gel luang kintak a sawpsiang in, lawm khatpen puanak a sisan dim ahihmanin silhsak tak nawnlou a, lawmpa adia ka hihtheih tawp chi’n ka puanak suah in ka silhsak hi. Sun nitum a thau leh bomb ging zakdet ahihmanin, ki hi meimuai a ni thum tan bang I bil kha in thauging peuh ki zaza thei mawk hi.

Talpakte’ tam petmah zaw ahi di uh, khosung a patrolling paikual di, duty di toh, ann huan di toh, kou hon kap di toh ki zahzen uh ana hidan eivele. A tam mahmah hang un Pathian eilam a Apan ziakin, tawm mahle hang a tup bang un tangthei lou uhi. ZRAte’ thautang kihau sak ahih uleh BOMB a naktak a beih di himai chi a hong kuankhia ahi uhi. Eilam hihkhialh khak aihleh, Talpakte hong kuan ding uh ahi chih theita, thautang stock hunkhop Hq. a ngen in, a hon piakteng uh Hausate’ inn ah kikoih kha laizang. Kikaptuah taktak hun a huai thauthangte ki zangkha lou, khosung va lut thil hitheilou ahih ziak in. Himahleh, mahni puakteng a panpihna hong tunma ki manage thei di’n A hon panpih hi. Khomite’ gendan in mi 150/200 kikal vel hi ding un tuat ua, thau gintung apan a liam ki pawkhia zong tam mahmah in gen uhi. Hiai kikaptuahna pen kikaptuahna ka telkhakna tengteng lak ah a sawtpen leh a huaise penpen ahi ding. Zingkal khovak tung akipan nitak dak 10 tan vel ann nelou leh tui dawnlou in thau kikap hi. Pathian ompihna toh mi 22 lel himahle ung, ahon luhkhe zoukei ua, hingmat dia hong kuan himahle uh ahon hingmat zousam kei uhi. Salpha luang nih kikham mahleh, a liam nasa lua ki omlou hi. Pathian min phat in om hen. Hiai kikap tuahna thu zak hunhun a honna thumpih tengteng tung ah kipah thu ka hon gen hi.

I gengen na a hiai ki kaptuahna hong kipatna ziak ahihleh, kal bangzah hiam paikhinta a kha Thanlon khosung a Talpakte omzel uh ahidan report ki zaza sek hi. Kouleng Thanlon a operator pa zang in Thanlon khosung akipan pawtkhe din ka theisak zel uhi. Hiai hunlai inbel kitheihsiamna om tuaktuak in, midang area iva lut di chiang a information piak masak teitei a hon phal uleh lutthei pan ding chih ahi. Himahleh, kou ka pawt chiang un amau tung theizel ua, ka om chiang un muhdi’n omlou zel uhi. Zankhat kouleng thu ka piakzoh ua giah a sawm teitei ziak un, Leizangphai akipan in truck in ka zantai touh ua, pilvang tak in gari a tuang ka hihlam uh a theihlouhna ding un a gari awldeuh a taisak in khosung lutma deuh in ka tawm khia uhi.

Hiai zan vuah tam lawlou in zu nipnip a, kawlphe zotzot zel hi. Mi 12 chauh himahle ung, group nih kisuah in, kou mi 5 a hanmual lam uah kaltou in lawm dangten main road hon zui uhi. Operator pa’n Community hall a giak uh chi ahihmanin huai mun va phak a, tuzan mah a paikhe dia sawl di chidan ka hi uhi. Lamlianpi lam a paite toh kithuzak tuahzel in khawl zual phot ni vuahzuk toh chi in ka kithukim uhi. Kouleng inn tuah masakna pente phawng sawm mahle ung a pam a pen ah kholzo di ka chithak uhi. Khua a mial mahmah ziak in ki sukha phial in ka pai ua, kawlphia a vakzok chia lampi kimu in huai ka zui uhi.

Huchia awl a ka kizuih phei laitak un ka pam ua lampi sak ah, “KANANO!” hong kichi guih mawk a, kouleng kintak in…

(Sunzom nawn maini)

Related Articles:

Thanlon Vangkhua Kituhna - I
Thanlon Vangkhua Kituhna - III
Thanlon Vangkhua Kituhna - IV

.