[This article is specially dedicated to all Mothers on Mother's Day, the 13th May, 2012]
Miteng in nu anei ua miteng in anu uh angaih pen bang un ken leng ka NU kaan a nu hoih leh nu manpha omding in kagingta kei.. Kei ading in ka pianna nu tuk a nu manpha a omkei... Kei ading in ka Nu mah a pilpen a kei a ding in kanu mah amuanhuai pen hi. Ka innsak te nu un tuibuk a muam a,ka inn khangte nu un tuibuk a muam a, ka inn pam,ka khosung a nupi tuibuk muam tam mahleh kanu kam sung apan a tuibuk gim hong pawt ka naksung hong luut tuk a gimlim a omkei ding...! England kumpi nu gim alim a,miten a pak gimlim sa a " forget-me-not " ana chih hial te uh sang in kei ading in ka nu kamsung a tuibuk gim hong pawtkhia tuk a gimlim leh namtui a omkei hi...

Kei ading a kanu'n gentheìhna athuak dan ka thei khinzou kei ding. A taksa tung a ka bitna pen ding huihvot leh huihsia in hon mut khaak louhna ding mun.. Nisa in hon haikhak a khovot in hon mek gawp louhna ding mun amah gilsung ah kha kua (9) sung vingveng a taksa in hontuam hi. Kei ading in ka nu gilsung a om a bit huai a alungmuan huai hi. Kei lungmuanna ding in ka nu'n haksatna gen seng guallouh a thuak a gentheihna sim seng gual louh a tuak hi. Kei a ding a haksatna hon tun thei ding a atheìh teng ka nu'n duh mahleh , a nengam kei a duh kei mahleh kei ading a hoih ding a a gintaak peuh hali zen in ane hi.
Kanu'n ka bitna pen ding mun agilsung a hon puak lai a a gentheih dingdan ka suangtuah theikei hi. Ahìhziak in ka nekding val nekha a kasung a agik hetlou 'Huih' lompi (sungpuak) ka puak lel ale haksa sa a damdawi poimoh ka hìhna ah kei damdawi nek a phatuamlou ahonpuak in nop chihna dingthu a omkei chihbel ka thei hi. Nopsa lou in nin huaitak ka hih hun a tam ding . Himahleh kanu'n ka khasiat khak ding lau in a ninthu kamkhat lel leeng agen ngamkei a amah haksatna ding himahleh kei omdan kilemlouh khak ding alauh man in nop asak dan inleng a om ngam kei hi.

Gim-le-tawl khawksa lou leh aduh nasan ne ngamlou a kanu'n kha tampi agilsung a ahon puak khit in leitung hinkhua mu ut in ka nu gilsung apat in pawt ding kahon sawm a, kanu'n ahaksat dingdan thei mahleh kei hon itna ziak in amah ading a sihtheihna himahleh sih leeng khawk salou in ka utna subuching ding in a taksa gentheihna bangmah lou a ngai in sisan tampi seng in khovak ahon musak hi. Ka hong pawtkhiat ding in kanu'n a thuak ngeilouh taksa a natna ahon thuak a , kidek sawm in khapetzen in pang mahleh naasak ziak in zumlezah khual zoulou in a kap a, naasa in akikou khia hi. "nu..na nasak luat leh kong pawt keiding" ka chih in kanu'n amel a naa a sakna tengteng sel a nui hiuhiau kawm in "bawi..na lunggulh taangtunna ding in hiaisang a naazaw leng ka thuak ding' ahon chi a , naasa a thum hithit zen in kapawt khiat ding ahon buaipih hi. Sisan luangkhia atam luat ziak a ka nu thachau in amit a vai a amuk a kaang a amai suak a daang dildel hi. Hucituk a haksa thuak himahleh kanu'n kei nopsakna ding bawl ahìhman in kamsia mal khatleng ahon loh kei a hak zoulou sasa leh nui zoulou sa in kamai en in anui hiuhiau lai hi. Nu aw non itna ziak a na thuakna thupi hina maizen e..

Ka khovel masa ka nu gilsung toh kakhovel thak kibanglou lua ahiziak in ki adjust theilou in nuam salou in ka hong kap a, ka nu keiziak a atha ngeina pawlou chau a daang diikdiak zezen kuamah sukbuailouh a lum a ihmu utlua in haksa sapipi in kanop sak dingdan a hön koìh sawm in amah peihlouh genlou in phalbi khovot nuai ah kei buaipih in abuai hi. Phalbi khovot nuai ah a anglum ah hon kawi a, ihmu dek pan chih in ka zunkawt in a anglum ka buak kawt a kei nopsaklouh ding alauh ziak in ka kituamna kawt khek ding in athou a, ka numel ah Litna leh haksa sakna thupi petmah ka muthei a kanu'n heh ngohtat a nak deuh a hon khoih ding ka sak lai in a thangpaihna neuchik le kilangsak louhial in anemthei pen leh anuamthei pen ding in ahon khoih lai hi. Hucia ka kikhekna ziak a khua votsa a ka kahna tawppan in ka nu thagim luatziak a ihmu suk diaudiau pan chih in ka ek in kakawt zel a nuam salou in kakap a ka nu nuamtak a ihmu dekpan in kei nopsak louh ding alauh ziak in peihlou mahleh phun hetlou in ahon buaipih zel a kei hilou a midang hile zaw ka nu heh ding dan ka suangtuah thei hi. Tun leng ka nu ahehpet mah a a ihmut a khelah petmah a himahleh kei khasiat ding alauh ziak leh kei nopsak ding adeihna ziak in kanu'n haksa a sakna kamai ah neuchik le akilangsak ngamkei... Ka zun leh ka ek thak a dak kal simna a zat theih ahimai a ke ziak a sisan aseente mukik nailou ahihziak a lung am vungvung kanu'n phalbi khovot nuai a zaan thoh haksa asa petmah hi. Ahihziak in kam khat le awsang in hon  hou ngamkei a khatvei le heh ngohtat in a hon naak khoih ngamkei hi.

Kei ziak a sisan a seente muhkik ut in ka nu'n ann aduh a nedia annkuang a um in khat tang kisakna ziak in kakap a kanu a ann kamlim ziak a nek peuh khumpet mah a ne a duhlua hinapi kamkhat bakpan in keilam a hon zuan a gilkial vungvung in kei nopsakna ding kia ahon buaipih hi. Huchih hun inleeng ka nu'n kamsia hon loh lou in "bawi" chi in a hon sam hiathiat lai hi. Ka hong lian deuh a ka nu'n hon ompìh den ut mahleh ka lawm ka gual ka en khak ding a lauhziak in gam nuai singlak a vak khia in kei a ding kia ngaihtuah in nasem in thagim tak in a pang a agil akial mahmah hun in nekding limchitak nekpah theìhding mu mahleh nengamlou in "kata in duh ding hi a" chi in chilphul tak in a sakhau ah hon kuah a vai hongtun in kei a hon pia hi. Kanu'n duh mahmah leh agil kialziak a duh vungvung a ne ut petmah kei hon deihsak ziak a a neek ngamlouh a hihziak in, ka nu itna tengteng leh deihsakna tengteng tunkhawm ahihman in a limdan atuam a alim petmah hi.

Alawm leh a gualte lak a a om a nek ding limchi a neek ni un leng ka nu'n kei duh luat ding ngaihtuah in "kata in duhlaw ding hi a" chih ngaihtuah in limtak in a nethei kei hi. Nelou a tawisak theih ahih hun in duh mahleh kei nek khak a ut ziak in nengaplou paulam in "ka gil avah lua ka tawi ding " chi in kei a ding in a hon tun tiipteep hi. Kei tellou in ka nu'n aduh adeih limtak in a kituam nektheikei. A poimoh teng a ngaihtuah hun in ka ta ading akim hia chi in a ngaihtuah a ,  Kei a ding a sam omlou a a theih chiang in amah ading alei pan a huai leng ka ta in a deih khat hong omleh ka leisak zoukei kha ding chi in adeih sang a mantawm zaw kei poimoh omding kigin na a lei hi. (kei deih a hong omle lei theipah dia sum akep theih nading in)

Ka hong lian hiaihiai a kanu itna in kiam lam manoh hetlou in a hon it ngei in a hon it a kei theih siamlouh ziak in a thu manglou in ka ut bang in ka om a, pai hun a inn ka pai louh hun in ka nu'n ann leng ne zoulou in ka ta in bang vatuak kha a diam, mi'n na vua u hia, ken mi vavua ka hiam chi in ka paina dia a lam etna lam mit khamlou hial in hon na en a ka tun ma gawtmun a om bang tuk in lungsim nuamlou tak in hon na ngak hi. Inn ka hong tung a ka hehkhak ding lau tak in "bawi, hong pai hakna chia...." hon chih pat leh thu simlou tak in ka dawng a, ka hehsan lai a huaihun chiang in ka nu'n khasiatna alalou in keiziak a thuakna nengchik le a gen ngeikei hi.
Ka nu'n kei a ding a hoih a thei mahmah a "bawi, huaite hoihlou a huaite hoih ahi" chi in a hon thuhilh zel a theisiam lou in a laisiam louh khawng leh midang pau a siamlouh khawng ziak khawng in ka nu'n bangmah theilou ding in ka koih a a thugen zuih ding inle ka koih kei hi. Lian mah leng ka nu a ding a a ta ka hihna beitheilou ahìhziak in kamsia in kamkhat le a hon hou ngamkei hi. A thugen zuilou in keimah kikhut dot in amahoih saklouh Zi ding in ka hon gu a ka nu'n a deih kei petmah a himahleh ata a hon itna ziak in a deihlouh pi ata bang in apom a ka tung ah kamsia khatvei le a zang tuankei lai hi. Ahon it mahmah na theisiam lou in ka zi toh noptak a khosak ka utziak in ka nu le ka pa taisan in inntuam ka hon luah ua ka nu'n hon itna kiam tuanlou ahihman in hun a neihteng in ka inn uh a hong pha a ann hoihtak in kane hia, ka poimoh uh a om hiam chih a hong kan khial ngeikei hi. Koitak hiam a kipan meh ding annteh limchi,a chituam deuh tamlou amuh hun in amau limtak a anek khop uh himahleh kei nek khak ding a deih ziak in a pok hat a ne ua a kimkhat kou nupa in limtak a ka nek ding un a hon tawi guigui hi.

Ka nu a hong upa a ahong tek hiaihiai a a duh leh a deihte ka ta te toh a hong kibang a a khenchiang in ninhuai ka sak ton a om hi. A duh tuamdeuh leisak ding a honthu khak chiang in thupi ngaihlou in ka mang ngilh hun a tam a, mehlim tuam duh a leidia a hon sawl chiang in sum taksap lai khawng in ka hehsan tha a suak khazel a sum taksap dan theisak lou in kha setak a ka pai sak hun a om zel a huaihun chiang in pitek haigawp chih lungsim a koih in ki mohsakna ka neikei hi. Ka nu'n bel khasiat hun inleng sawt ahon nuakzou kei a a hong pha pahpah a a khen chiang in nuihsan in ka na chiam nuihsan khanak a heh mahmah in ka taikik sak khanak hi.

Kanu teksia in amit ahongmial a huchi pipi in ka inn uh a hongpha teitei a huai hunchiang in a hon itna ziak ahihlam ngaihtuah khalou in a pawthat ziak khawng sa in hong pawt gige lou ding khawng in ka na hilhzel hi. Hun a hong pai a ka nu'n a zun a ek kisiak zoulou a lupna tung ngak in ahon sihsan hi. A zihzeh hikei mahleh a vangkim a vakem kha ka hihman in zuntha ding ektha ding a konglam a ka vadop khiat khak hun in buaihuai kasa thei mahmah hi. Nitak khat a nihvei/thumvei kava dopkhak hun in nin huai kasa mahmah a a lupna tung a kuang doh a thasuk ding in ka nu ka hilh zel a himahleh kei omlouh hun in huchin thazel mahleh kei a hon muhchiang in kong lam a thovengtak a tha ut in ka pom khiat a hon ngen a hon gawt ut se dan a ngai in ka lung a kimkei hi.

Sawt damlou in ka nu'n hon sihsan a ka nu om nawn louh ziak in thawmhauna lianpi ka nei a himahleh kep ngailua ahihziak a thoveng ka kisakna nei in zaankhat ka ihmu a kamang lam in kanu'n.. ‎"Bawi, nitamlou sung ka zun ka ektha ding a konglam a non dop pawt ziak in buaihuai nahonsa mahmah a himahleh ken na ang a tomchik nahon pomsung nuam kasak luatziak in nin huai nahon sakna atheilou bang in ka om hi. Bawi kaduh leh kadeih kahon ngen hun in kakhase mahmah a, ken nang kon deihsak ziak a gil kial tak a neksuk ut pipi a kanek ngamlouh laikhawng ka ngaihtuah a, ka deihtuam kahon nget hun a nahon leisak louh hun in kakhase mahmah a nang deìh dong leizohlouh khak ding kalauhziak a kei adia ahoihlou kakilei lai kaphawk a.. Lin ngoihngoih a tom chiksung zuntha dia nahon dop khiat chiang in phalbi zaan nuai a nang nopsak nading kadeìh ziak a khovot sa pipi a kazan thohlai ka phawk hi. Himahleh kahon itna ziak in kakhasiatna neuchik le kamel ah kahon sulang nuamkei hi" ahon chi a khanglou in kaneu lai apat kanu honkepna katheih liaisiah ka ngaihtuah a.. Hina ngut e.. Nu aw na anglum nop kasak bang a nangle kei anglum nuamsa ding neimah ve maw.. Ken leng na anglum tuk a nuam anglum ka mukei a,na kam sung a tuibuk gimtuk a gimlim ka dik kha naikei hi.,ka chilung sim hi..