NA KHUT A KINGA HI LELTAK A HI

Biak S Tawmbing

(Tulai kholak ah hi in, dawr munah hotel ah hita leh houlimna hot topic Election 2022 hitang pi hi, himahleh hiai thu kigelh ah kuamah guptuam leh kawk tuam neilou a hon kigelh ahi.)

Heutu hih ut
Sum it
Thuneihna deih
Gam it
Nam it
Hiai teng lak ah koipen na teel dia? Koipen in khantouhhna hon tun dia??

Nam chi le kibang vek hang a ki khentuam di omlou, i ki khenzakna pen i pau himok a..ipau in bangtan hon tun di a hia chih ngaihtuah tham ching mahmah hi.

Selected candidate khong hi hen la,huai le rotation in pai thei lai leh bang a chi dia?? Pawlpi i neihte mahmah in hiai na semkhe thei le uh chih huai mahmah hi

I gam it i hih leh majority minnority chichi lou in khat selected bawl in huai in i deihdan in vai hon hawm hen la..i deihlouh dan a hon sep a hon bawl leh ki tawp ngam di khop in mipi te'n thuneihna nei le..huai dia pan lathei di i pawlpi neihte himok a hi chi leng ka genkhial het kei di

Sum in i ki khemkhem a, sum in hon tankhe zoulou a hi chih i thei a i muchian kilkel ta hi.Huai ziak in a mipi lam le pankhawm dan siam in, i MLA neihte khekdan leh rotation sakdan kisin ni

Mikhat kia i lalsak det chiang in, hihthei bawlthei kisakna lianpi nei un, mipi amau lalsaktu te bangmah a hon mulou uh a hi chih thei ni!! Heutu hih di kituhna sang in, ka mohpuakna zoulou ka hi, chih ki muchian saktu di mipi te hi hang

Mi a pil leh ei le mipil ki tamta a hi chih theichian ni.. mi'n laisiamna a hon beih leh eilak a le laisiam tamta i hi chih le theilai ni, sum a ki khongkhe dingte leh, sum deih a ki candidate te hi zaw lou in, hon makaih a bangtan hiam i tupna hon tunpih thei di te mah theichian ni.

Kuate hiam chihdan leh, kei lai theihna leh amau theihna gawm lengle pawlsawm pass zou nailou di te khong i ki makaihsak taak in bangtan i tung mah dia!! Khovel changkang lam manoh in, sum leh khuak zangkhawm a ki beihna a hih man in, sum pen na nungsak in khuakpen masak zaw le i lohchin di maban hi lel hi

I gam ki bang a hihna ah, pankhawmna mah in hon vualzou sak di hi zaw a hi chih thei ni, i gam neitu Meite te a pan ki tatkhiak zoh teitei na dia pan lakkhawm poimoh a hi. Huai dia pan la di tute ipawlpi a hi a.. sum in zaw hong ki khongkhe mahmah kei un chii'n i ki chial thakthak a hi.

Gen ding tam in, gelh in gengen ni chi leng bei ngeilou ding ahihman in, a tawpna ah hiai thei ni. Sum leh pai hawmtam ki tuh lou in, itna hawmtam ki tuh zaw ni.