I MLAte uh buai lua uh ahi diam?
~ Ginza Vualzong.

Mipiten kong tuamtuam a haksatna i tuak uh hi. Hiai haksatna i tuahte uh bil hon dohsak di MLA a om kholkei hi. Ahi, pandemic ziakin nek leh tak haksatna i tuah lai un antang bag bangzah hiam zaw hon panpih mah uh e. Huchi lou haksatna dang i tuahte uh ngaihsaktaak hon sa khollou uh hi.

I gamsung, a bialsung uh development work le chi zawzen nai khang. Mipite a dia niteng a haksatna i tuahte uh bek hon ngaihsak uh hen la, a aw uh hon suah in hiai haksatnate akipan lampi hon bawl sak le uh chih huai mahmah hi.

Bandh:
A vangkim in i gam ah bandh om sek hi. Hichi bang bandh a om chiang in akisai hetlou mipite a thuaktu in kipang nakkhem hi. Tunai zek in Phougakchau khua a job card ni 2 loh deihziakin kiphinna om in lampi bandh uh hi. Lamka mi toh amau job card kisai kha hetlou hina pi in zin leh vak nawnkai sak mahmah uh hi. Emergency a damlou ki-ensak di bang, ahih kei leh lenna ticket laksa zin teitei ngai chihte a dia haksatna lian mahmah suak hi.

Office:
Office a nasep nawnkai tam mahmah a, a diak in District Transport Office bang. Gari registration leh driving license ngaihtuahte a dia nasatak a nawngkaina om ahi chih newspaper leh media tuamtuam ah gen in om hi. Hiai bang le etkai tuak mahmah hinapi in tunitan in ngaihsak a om lou hi.

Tuinek:
Manipur ah second town chi in i kisaktheihpih mahmah ua, himahleh tunitan in inn chih ah nekdi tui kailut sak zou nailou ihi. Ki backward mahmah lai chihna ahi. Mi a tamzaw in tui i leizawh lai ziaka problem dan a ngaihtuah thei nailou leng i hi ding uh. MLAte inn mahmah a leng tui kailut dia gingtak huailou ahi.

Vanman khan:
Bandh hiam ahih kei leh lockdown hiam a omzek chiang in van man pung gige. Van man a pun chiang in mipite mah haksa tuak hizel. Vanman pun enkai di kimu zou ngei mahmah lou.

I MLAte un hiai mipi haksatna tamlou i hon taklatte theikha lou mah uh ahi diam? Khat in a gelhthoh a va piak sese ngai ahi diam ah. I MLAte un bang buaipih a abial mipite haksatna theilou zen a buai ahi ding uh aw? Assembly Hall khong a thukup nei a buai chih lah hilou, development nasem a buai chih lah hituan lou. Hichi bang mipi haksatna omte ah MLA power a show ua, a kisaipih department-te a pressure a piak ding uh hi lou hia? Etsakna in bandh ziak a zin leh leng nawngkaina bang ah Police force-te duty sak le uh, van man khan toh kisai bang in DC leh akisai pih department-te vau le uh thil hong paidik mai di ahi. Mipi haksatnate ah a bil uh doh deuh leu zaw mipi pahtak lawh ding ua, term non election a vote zon a baihlam mahmah dia, sum a seng tawm zaw ding uh hi.