CHINA IN SEHAL PILTAKIN KHOVEL AH ZUNG SAUPI KHA !
~ Rev. T Thangzasiam
‘Huan a ki thahna uah leh a mi bumna uah, a ki ngaihna khelhna uh leh a guktakna uah a kisik tuankei uh’ (Kil 9:21)
THUPATNA: Hichikhop a natna lauhhuai bawlkhia a, khovela thehdalhtu hidana ngoha om China sorkar tungah gamchihte lungsim putdan a kikhengta !. Misiamten a genzel ua, China sorkar a tenhuai dante, khovel suksiat vek a amah kivawksang a tupdan uh TV leh Youtube channelte ah muhding atam hi. Coronavirus tuh gamdang akipan hileh alauhuai leh a kithehdalh theihdan khovel maiah _whistleblower_ a pangin, ki galginna dak a khen ngeingei ding uh chih khovel lamet ahi. Himahleh tua naksangin a selgu ua, a genkhe ma sasa tuh anung leh ma theihzui nawnlouh khopin koihkhe zel uh hidia gintak ahi. khovela a kithehdalh nung, selguk zohvual ahihlouh chiangin anepthei bangpen a gen in, kuamah panic louding, hoihtak a etkol leh under control hidan in khovel a zekhem uhi. China sehal piltak chih mahtakin gam tamtakte muktuamna (mask) koihkholh (stock) tuklehdingawn-2 valtak leikhawm phawt in, natna in khovel hongluh taktak chiangin gam hausa tampite mask natawm neilou leh khutsam in a koih hil-hel uhi. Hiai dinmun dingtuh China in mukhol sa diama gamtang ahi uh.
Khovel sukbuai poisa lou China communist sorkarin virus hon thehdalh taktak mai tuh gam hausa tata a thuaknak a pang masa in. Tu’n ei tenna gam kilkoi tanpha hotspot suakthei dinga figure khangtou charchar in, masawnna pailai tuh a kholchawt mai hi !. Khovel gam hausa taktak te tuh buai kisain China nuai ah hong kun duamduam ua, huai huntak China sorkarin hun lemtang a lain khovel hondampa bangmai in kivawk khiak sawm mahleh, dictator Xi Jinping plan a pai fuh na diam ? A dinmun muh theihna masa pen tuh hiai ahi. Kalmasa May 21, 2020 nitaklam dak 3:45 vela China vaihawmna lianpen te tutkhawm laitak in, Beijing khopi tung khomial sahtak in hontuam thupmai tuh khenkhat ten chiamtehna hoihlou (bad omen) bang hiala ngaiin. Tua China gam dinmun leh maban ding hilhkholhna bangin ngai uhi.
GAMDANGTE A KHEMPUK DAN: China in kum-10 vel paisa akipan khovel control sawmin budget US $ 1.5 trillion tak bawlkhia in gam dangdang a loan apia ua, project lian pipi a paipih uhi. Gamjawng deuhten a poimoh bangzel un rail lampite bawlsak, airport bawlsak, longkhawlna (seaport) leh lamlian khong loan sum tam taktak pia in bawlsak uhi. Tua gamten loan a recover zohlouh chiangun a project septe uh kum-99 sung lease bang in neitu hihna agreement signed pih zel uh. Etsakna dingin Pakistan, Myanmar, Africa gam Ethopia leh a dangdangte China thangkam ah awk vekta ua. India simlam aom Sri Lanka te longkhawlna khat sum tampi loan pia in ‘modernization port’ chiin a puahsak ek ua, Sri Lanka in lah China lakah loan adinkik zou nawnta kei hi. A omzia tuh China duhthusam tangtung chihna ahita, kum 99 sungtak mahni a chei a chei theihding in lease a signed pih ua. Tu’n India khotaw ah amelma lianpen China in kidouna long (warship) lian pipite munpi dingin a bawl a, India a ding a mit a ninlut banga dongkholh ahita ve. Tuabang bawkin India Ocean a Maldive leng a buai mahmah. China in PoK a om Jhelum river ah US dollar 442 billion tak beina ding 1,124 megawatts pekhe zouding power project bawlna dingin, Pakistan toh CPEC nuaiah contract signed felta uh. India adin bangzah takin a poiban dia ?
UNO nuai a department tuamtuam a lubawk post tampi ah Chinese mah a ki koih miahmiah mai uh. Sumhat a aleikhiak Africa leh Asia gam genthei taktakten China deihna ah vote a pezel ua, China communist in kristiante nasatak in sawisa zel mahleh UNO bilbuk tanleng a dengpha ngeikei himhim !. UNO lubawk tamzawte China in kamhum zouvek chihna ahi. UNO nuai a kahiang poimoh tak WHO kitel Kum 2017 in Dr. Antonio Tedros leh Bristish mi Dr Barron kikhing uhi, China in Africa khomualpi a gam tamtakte sum hata leikhia in Africa gambung a WHO member 53 te lakah 50 ten Dr. Antonio Tedros (China support)support) vote pia ua, a pumpi in vote 133 mu a telching hita hi. Tu’n khovel ah Corona ziakin millions tamtak buai mahleh Dr Antonio tuh China Cover-Up maimai tu lel ahih banah, Xi Jinping khuangbet dandan in alam maimah hi. Trump a hehna omze bei ahikei.
CHANGKANNA ZANGIN, GAM CHANGKANGTE LAKBEH ZEL: Thil paidan leh China in khovel a play dan i et vengveng leh Sehal pil chih inle a genchian zoukei. Setan in tulai _technology_ zangin gingtute a khem ichih bang deuhin, tua na mobile phone zat changkang taktuh 4G ahia, hiai sang a changkang zaw leh thilhih theizaw 5G bawlkhiak sawm in, China in khovel gam changkangte lakbeh touzel hi. Etsakna Canada, UK, European Union leh Australia te project semkhawm dia chialin, US dollars tuklehdingawn tampi petmah antah (bait) dingin a thehkhe malam phawt hi. China Telecommunication Giant kichi Huawei company zangin malak honpan ua. A project uh a success ngeingei leh America tunglam pekah muvanlai bangin aleng vengvengta ding ua, America in loh ngaihna theilou in lu-nget (dandruff) thak khuak bangmai ding a hisap ahi. Donald Trump in European union leh Australia chihte China toh semkhawm louding in nawkzel mahleh, Kristian te suk chimit sawm China thangkam ah na awk khinvekta uhi. Chih ngaihna himhim omlou khopin China in zung akai thuk lawman ta. Himahleh, Pathian hong kipan a Coronavirus hon thehdalh in, khovel mit a hongvak a, gam tampiten siat leh pha theihna singgah nekha bangmaiin China hidden agenda tuh chiangtakin a mu theita uhi. Pathian tupdan khat om ahihmel kuan a thei a !
AKTA KILOH KHUH: Corona virus in Communist China policy teng hon pholhsuah bang a theih ahih manin khovel mit a vakta, India PM Modi tanpha halhthakin China in India a economic investment ahih sek khenkhatte tuh a khakbing sak miah mai hi. Pu Modiji Good Job ! project pailel khenkhat suichet ding, project thak himhim sorkar phalna lakzel ngaiding leh India software apan Chinese App himhim zat nawnlouh ding hileh kilawmta hi. Europe gam a Sweeden, England, Germany leh a dangdang tenleng China toh sepkhawm a utnawn kei ua, China bawl himhim nawlkhin vektum khenkhat a om hial uh. Ni tamlou chik paisa in Australia PM Gingtu hoihtak Scot Morrison in _Virus khovel misiamten pangkhawm in suichetna nei uhen_ chiin Geneva, World Health Assembly ah kikou pih a, Gam 123 takin neh takin anti-china bill a passed ta uh. Xi Jinping a pangzou takei a, a mah gum ngeingei dia a lamet Africa gam 52 ten China gumlou lamin vote a kheta uh. China apan zalenna sualkhia ahi mai uhi, Trump khazak nuaiah gam tamtak te ki pasal saktakin China dem zawngin pau miahmiah mai uhi. China in Telecommunication changkang takzang a khovel awpkhum in panla mahleh, Trump hong kipanin China company Huawei te mobile phone bawlna vanzat, a lou theilou a poimoh super-conductor chips a supply sek tuh sattan nawn in. Technology zanga USA leh khovel tunga len a sawmna tengteng a ki Akta kiloh khuhta, tu’n meisel delou a zanmial lampai bangmai ahita uh.
CHINA ADIN VANPI A NIMTA: China gam makailian Mao Tse Tung nunga communist makailian leh thilhih theipen tuh Xi Jinping, China President ahi. Jinping khazak nuaiah China in khovel ah a penpen hihsawm in naktakin panla uhi. Maleng a sawn hatbawk uh. Europe leh America gamte, S.Korea te, Japan te banga gam khangtou hihsawmin China hong kipekin. Khovel gamdangte hauhsakna sawkkhawm in hong ki sulian ekmahleh, America sanga hatzaw leh thilhihthei zaw Superpower No 1 hih sawmtu, China vanzat tuh khovel siatgawp theihna ding leh mulkim huaitak pulnatna virus in gam kilkawi teng hon zelsuakta hi. Hamphatna leh punna thupi taka zangding akisak laiin khovel thangpaihna sawkkha tuh ahi peuhmah ta.
Tuma a nitumsenglou gam vaihawmtu Great Britain PM. Boris Johnson in hiai natna a veita a. German Chancellor Pi Angela Merkel leng a kikhum tuam hial ngai in. Sangaktung ah kua alungkim dia chih bangdeuh ahita mai hi. Sehal chalak China in natna hii dalhzak khinta chih theih nung natawm inleng a heutute uh White House sunga President. Donald Trump pindan thupitak Oval Office te visit in, a va tu ua Trump tuh virus louphet in a koih uhi. Khovel sorkar ten a ngamnawn manglouh uh China leh a boss Xi Jinping in khovel sukbuai a awpkhum a sawmlaiin. Lauhna nei hetlou a maituah ngam omsun Pathian hingbia Donald Trump, America president dinga Pathian in hon vawksang thah tuh khovel humbittu ding a atel ahi thei maikei ding a hia? June 1, 2020 in George Floyd sihna ziak a mipi kiphinten a halsiat uh St. John Church biakin tuh Trump in vapha in, Minute-5 vel hun vazangin biakin a ngaihnatna sulang teitei hi.
THUKHITNA : Hichi khop a khovel a sawisak laiin Chinese sorkar in khovel maiah kisiam tanna thu genlailai, khovel mai a ngaihdam nget sangin, hiai buaina hunlem a lain nawk theihteng ban nawkdingin kisa in. Khovel pumpi a nawk lellel hi. India a nawk nawn a, Taiwan nawktheihna lampi tengah a beizui a, Mt Everest tanpha kagam uh ahi chihthute a gingsak ua. Tun Hongkong issue tuh a mawk a venglou ding bang khop a serious ahita. Agamsung a kristian biakin JCB a phudalhtu leh kristiante sawisatu Xi Jinping tuh kuamah soisel ngamlouh bangin ki koih mahleh, A gam in Pathian vaihawmna haksa sem a thuak theihna ding a Pharo lungsim banga hih khauh ahihphot mel kuan a thei a !