KA MELMA PA THEI KHOL HI LENG ZAW
By Muanching Emcies..
Ka min hon noutawi luat ziak un pasal hi mah leng biakte (min kibang tampi om ahih ziakin mi kibatpih a om leh hon theisiam un) chii'n hon sam ua ken le ka hi saksuk mai ta ve. Unau pasal nihchauh ka hih man un ka ki it ua duat le ka ki duat diak un ka thei hi.
Mi phazou kei mah le ung kou khom in zaw nuam kasa huntawk thou un ka ki thei. Ka pa hon suangtu hi mah leh lawm bang a ki houpih theih leh ki pawltei in nuam kasa mahmah uhi.
Nek leh tak lah nisa nuai a ki lohtom a zawn kunkun ngailou leh kou kaihkhawm ngailou a ka pan kaikhawm zou mahmah lai chi ni. Kou zattom di kia ki zawn in hi chii'n nuamsa thou ka hi uh chisuk ni mo! Aziak chu nektom zong tampi te lak a ki telkha lou deuh ahih na ah.
Innkuan ki khopna makaitu bang ka ki khelh thoh ua kou unau hun atunchiah ka zi te uh ka sawlsawn zel uhi. Aziak ahih leh zi te le ki zilsak ngai a hihman ahi.A utlou chu hi lou in, ka pan ka zi te uh duatdi hon kham kei a ka zi te un le ka nu leh pa duat di hon khamlou in hi chii'n nuamsa tak in ka om uhi.
Sungte inn phakdi bang ei sawm le ngailou in ka pa'n na sungte vaveh in zi hoihtak hon pia ua ki paklou mo!! Khong hon chi zel a ka ki pakthei lua hi.Kei sangsang in ka zi ki pak zaw din ka gingta a huai kei lungnopna ana hi zel dan hi. Ka pa mi theisiam ka sa lua a pa hoih hichi bang ka neihkhak khong pathian kiah ki pahthu ka gen zel hi.
Nitak chiah lupdi chiah ka zi toh lupna bul a khukdin kawm in thumna ka neihpih zel hi,ki naungek sak ka diam zi te luppih di sese hi kei leh le kawisa a lup chihkhong ka utse se sek hi. Pasal tampi in atheihsiam louh uh khat ahih leh zite khateng a niknin neihchiang khong a achi uh na atai uh na leh om nuamlou petmah a om uh ahi chih ahi. Hiai hunchiang in tuilum khong bawl in atai khong ka depsak sek a nuamtuam sa lua ahih dan hon gen zel hi.
Zi duatlua non chih uh leh le ka himai ta ke ka chisuk mai a. Bangmah ki samlou chi le genkhial kha di ka diam,hichia nuamsa tak a om liliai lai in khovel a bompi puakzak mah bang in ka hinkhua hong puakzakta hi.
Nikhat bazar kai van leite khut a khailah pipi a khaikawm a inn ka lut leh ka tommang dek. Ka zi ka itpen ka duatpen ka deihthohpen leh ka ngaihpen toh innkiang pa ana lumkhawm mai zen!!!!
Pau le ka pauthei nawn kei bangloh di bangchih di??? Kua'n hiai bang a tuak ut tel dia!!! Khovel bei hen la ki lengmang geih leh chi nang e.......ka lei le ka dangtong a abelh dikdek mai hi. Khovel a galdou di tampi omte lak a hiai kherkher galdou dia ka maituah tel zaw....!!!
Awl in ka tusuk nawk a ka gimlua ka bazar kaina hilou in ka mai a ding ka melma ka zohlouh pa mel ka en a ka zumlua a ka mai ka leh hum mai a ka kapta hi.