AWLMOH THUKUP-2
- Lianzamung Tonsing
Corona natna hileng ziak in India 3rd Stage hita ahi chih mun khenkhat ah kisuah hi. 3rd Stage a chih theih ua leh bel 1st Stage, 2nd Stage om chih na hih peuhmah ding hi. Misiam ten Stage a calculate dan uh i theih kei a, ei theih luat le a poimoh kholkei.
I theihchiat sa mah bang in, Corana natna hileng in India kia sukha ahi kei a, Khovel Pumpi a gam tuamtuam tamtak sukha in, suk khak a om nailou gam te leng kivenna lam uangbawl mahmah uhi.
Natna hileng ziak in nek leh dawn ah haksatna i tuak panpan ta ua, nek leh taak ah haksatna tuak taktak leng, panpihtu ding(reinforcement) ding gam(country) khat leng a omlou thei hi. Ki panpih thei zo di sam omlou in, gam tuamtuam te amau buaina chiat buaipih in a om ding hi. Bible a mou dawn dek te bang sim in, thautui ki hawm a ki panpih thei zosam omlou in khovel gambup a gam tuamtuam te ki piil buai thei hi.
Lamka leh a sehvel a sanggam laizom teengkhom te suansam hi naikei kei mahleh, panpihna ngen ki om ta a, ki tam deuhdeuh lai ding bang hi. Tu leh tu a chiamnuih sim a nui hakhak kom a i thugen khenkhat te toh bangtan hun i zang thei lai dia chih i ngaihtuah chiang in ahun (timing) hongtung naikei a ahi maimah diam? Innsung ah anntang kg 10,20,30 tan khong mi tangpi in ki nei lai ding in ngaihsut huai a lungmuan huai isa tadih lai hi. Hi leh leng i beidotna ni ding nai mahmah maithei hi.
Bangchidan in maw? I paidan tangpi in khatawp/khabul date 2-7 kikal in khaloh/pension kila tangpi a, huaizoh chiang in i khakhat khamding anntang ki lei tangpi hi. Ahih leh, khakhat khamding lei hun hongtung dek ta veh aw maw? Huai hun chian koi ah lei ding, Kua kiang a lei ding, Leiding i mu diam?. Leiding i muh sunsun leeng aman tamzo hi din gintak huai? Anntang lam a sum tampi i sen leh family budget hon hihbuai kha pah nawn thei hi.
Gamsung vaihawm tute panlak na ziak in anntang tamlou lou hongtung thei zel a kipah huai i sak kom in, hiai anuai a calculation ah lungsim nguntak in pe leng uthuai sa ing.
Churachandpur district ah milip 2 lakh vel om dan in hisap zual ni.
Innsung khat ah mi 5 om din hisap leng inn 40000 vel om di chihna ahi.
Innkhat in khatvei huan in anntang kg 1 huan leng, nikhat(morning+evening) in kg 2 bei dia, inn 40000x2 kg = 80000 kg anntang bei gige chihna ahi.
80000 kg = 80 ton chihna ahi ahi. Khatvei thu in gari pei 10 nei te khat in anntang ton 20 vel paw zou in hisap nawn ni. I hisapna dantak a pai ding hileh nikhat in churachandpur district kia a din anntang tata pei 10 neite dim 4 poimoh gige ding hi.
Hiai hisapna a dik chet kei ding a, himaleh 25% dik din hisap leng churachandpur district kia in nikhat in anntang gari pei 10 neite dim khat ki poimoh gige di suak hi.
Manipur pumpi population 2600000 vel din hisap nawn leuleu leng...Milip 200000 a ding in anntang gari dimkhat a poimoh leh, milip 2600000 a ding in niteng in anntang gari 13 a poimoh ding chihna ahi.
Kial teh taak hongtung henla, Gam khat leh gamkhat ki panpih thei lou in, state khat leh state khat leng deihbang a kipanpih theilou dinmun in omleh tatsatlouin nikhat in anntang gari 13 manipur ah hong lut gige thei diam?
Pathian pina toh natna hileng in venlam hon nawt lamen komkom in, venlam hon nawtlou hileh chihleng lungsim ah ngaihtuah jel ngai hi.
Hiaiteng maituah lou a i om theih na din gingtu ten Toupa sam ni.
Ka kipak
Awlmohna Lianpi toh
LIANZAMUNG TONSING
Bungmual, Lamka
LIANZAMUNG TONSING
Bungmual, Lamka