KA TUAHKHAK TE LAK A KHAT.
By Biak S. Tawmbing

Hiai thu a taktak a thiltung ahi. Hiai laigelh saulou gelh khe theidia phalna honpia tungah kipahthu ka gen ahi.

November 29, 2018 nitak ann nekhin dak 5:30pm a phone call ka dong ahi. November 30, 2018 nitak a kon gelh ahi

Zan in nitaklam ann nekhin kisu halh ding chi in ka innsak ua school compound a JCB zanga nasemte en dingin ka vakhia hi, kava en a hunsawt lou nungin ka paita hi. Inn a ka laptop honga thugelh di ka kisak laitakin, phone call hongpai in, ka et leh ka lawmhoih mahmah khat ana hi a, Hello! ka chih pat leh pau theilou in hong ki dik in, ken leng gen ding theilou in ka ngai mai hi. A mittui chu kham zawh vual ahi kei chih haih vual ahi kei haksatna gen zawh vuallouh nei ahi chih ka haih kei hi, hello ka chi zel a himahleh hong dawng di vual ahi kei.... Ka lungsim ah huai hun laitakin I gam buai vungvung kal ah kuamah hon theih pih louh haksatna leh lunggimna nei a tam ngei maw.... Siamna pilna theihna leh mibang a degree sangtak nei hikei mite muan a ka om lamdang kasa a, Pathian kiangah kipahthu lungsim in ka gen hi.

Bang chi e? kah hetlou di ahi, haksatna na nei leh hon gen in aw ka chia himahleh apau theikei....sawtlou nungin phone a koih ta hi. Minute bangzah hiam painung in whatsapp message ahong ging a ka et leh amah ana hi a, hoihtak a haksatna lungkham bangmah nate kikum in, Pathian itdan te hon theichian a ka kipak mahmah hi.

Hinkhua haksa bah in na om maw?

Lam-et bei a kingaisia in,

Na mailam hun na gelgel chiang,

Hinman omlou simlei tung,

Kinepna bei in na om hiam?

Jesu sapna ngaikhia in.

Kata hong in ka kiang hong in,

Na hihna bang in hon sang ning,

Na lungkhamna leh dahnate,

Meibang theng ding ka siang ah,

Nang dia hinna ka piaksa hi,

Lunglel lou in hon zuan in.

Lohsapna in ahon tuam chiang,

Hem a simthu kileel chiang,

Sinlai na in na lungkham hiam?

Nemtu ngaiin na om hiam?

Hon iit Jesu’n a hehpihna maimit nou toh hon en hi.

Na lungkhamna leh dahnate,

Na puakgik hon theihpih hi,

Nemtu ngai a na maulai in,

Mite’n hon taisan zong leh,

Nang din Jesu amuanhuai hi.

Akiang nai in hon sang ding.

Tuailai tampitak te, nulehpa te, innkuan khosak haksa, ngaihzawng te ziak leh thil tuamtuam te ziakin kingaisia leh lamet bei a om tampitak I om uhi. Mi tengteng kingaise thei mah I uhi himahleh hon pikhe ding in Pathian a muanhuai hi. Khawvel ah taksa in a om keia himahleh Pathian I muan taktak leh Pathian in khawvel ah muanhuai ding mi ei a ding honpe zel hi.