KI NGAIHDAMLOUHNA
(UNFORGIVENESS)
27-12-2018

By Upa T. Roumuan, Mumbai.

Ki ngaidam theilou nupa, innkuan, saptuam, khotang leh Nam te Pathian hehpihna in hon gamlat deuhdeuh lai ding ahi...

Mihingte a heh ngeilou ki omlou

Mihingte kuamah heh ngeilou leh thangpai ngeilou a om kei. I thiltuah (experience) leh i sou (temperament) a kibang kei kha ding, huaiziakin, i lungkimlouhdan ahihkeileh i thangpaihdan a degree a tehtheih hileh a kibang hetkei ding. Mi khenkhat thiltuah zaw haksa mahmah, i mihinna in a ngaihsiam theih hetlouh leng a om kha ding. Mi khenkhat in a tupmawng a hon su thangpai leng a om dia, mi khenkhat in ahihleh a hon suk thangpaih lam uh leng theilou a om kha ding uh. Mi khenkhat te ahihleh ei tung sese leng hilou, kuahiam midang tunga a thilhih uh ei ana thangpai pha chih leng omthei ahi. A khente ahihleh, ngaihdan leh thil muhdan kibatlouh khawng maimai leng ahi thei. A gimhuai mahmah khat ahihleh, ei pen mi kuahiam tunga heh mahmah, haw mahmah, hilehleng, aman huai thei hetlou in, kimuh khak chianga hon houpih gige zomah lai. Huai chianga ei heh in thangpai deuhdeuh zomah lai.

KI NGAIHDAMLOUHNA (UNFORGIVENESS) ZIAKA THIL OM THEI TE
(Possible consequences of unforgiveness)

Unaute, mi kua hiam i ngaihdam louh chiangin, i ngaihdam louh nu hiam, pa hiam, sang a ei a ngaidam theilou tu pen a thuaktu ki hi zaw gige ahi. Mi kua hiam i ngaihdam theih hetlouh chianga thil omthei (possible consequences) tamlou i en ding uh.

1. Pathian ngaihdamna tanglou thei i hi (Unforgiveness prevents God from forgiving us)
Matthai 18: 23-35

Hiai Laisiangthou mun ah “ngaidam nuamlou sikha gentehna” thu i Toupa Jesu Khrist kammal mahmah a a gen i mu ahi. Hiai pen i Toupa Jesu Khrist in a nungzuite “vangam ah kua a lianpen ding ?” chih khawng a kidot lai ua, vangam om dingdan gentehna bangzahhiam a gen te laka khat ahi. Sikha khat in a pu talent 10,000 a ba a, a pe zoukei a, himahleh a tunga zahngai dia a nget ngutngut ziakin a pu’n huai sikha pa a ngaidam hi. Huai ngaihdam a om sikha pen sikha dang khat in makhai 100 a batsak a, huai a batu pa’n ngaihdam a ngen ngutngut a, himahleh a ngaidam nuamkei a, a bat a piakzoh masiah sungkulh ah a khum hi. A pu’n hiai thu a zaktak in a heh mahmah a, aman huai mipa a ngaihdam banga, aman leng midang ngaidam dia a lamet lai in, a ngaidam kei a, huai ngaidam nuamlou sikha pen a bat a piakzoh masiah migawt te khut ah a pia hi. Chang 35 na ah i Toupa Jesu’n “Michih in na lungtang tak ua na unaute uh na ngaihdam kei u leh ka Pa van a om in leng huchi bang in na tung uah a hih sam ding..” a chi hi.

Unaute, i khelhnate bangbang a thuk a om ding hi leng, kuamah a hingtak i omkei ding. Mikhial i khelhna ziaka si ding i hih lai a, ei nget leng hilou, a hehpihna ziak liauliau a, a tapa Jesu Khrist leitung ah Pathian in hon sawl a, Jesu Khrist thuakna leh a sihna tungtawnin i khelhnate ngaihdam in i om uh. Chinglou taklou te ching in hon bawl a, mikhial siam hon tangsak ta hi. Pathian hon ngaihdamna leh I thiltuah neuhneuh te khawng tehkak mah dih. Pathian ngaihdamna tangsate Pathian in midang te leng ngaidam dia hon lamen ahi. Huai ziakin Pathian ngaihdamna tang sate adia zaw i mihinpihte ngaihdam pen i mohpuakna mah ahi. A huchih kei leh Pathian in leng i khelhnate ziakin vai hon hawmkhum ding a, ngaihdamlouh a omthei i hi chih theithak leng uthuai kasa.

2. Pathian kiang i zotna hon dal thei ahi. (Unforgiveness prevents us from coming into God’s presence)
Matthew 5:23-24

23: Huaiziakin, maitam a na thilpiak na lat lai a na unau in na tung ah lunghihlouhna a nei chih na theihkhiak leh.
24: Huai maitam ma ah na thil nusia inla, pai inla, na unau kilempih in, huaizoh in na thilpiak lan in.

I Pathian uh a siangthou a, amah mai a kilan dingte leng siangthou dingin hon ngiat ahi. Pathian mai a thilpiak lan dia i din lai a, kua hiam in i tunga lungkim louhna a nei chih i theih leh, huai thilpiak nusia a, i tunga lungkimlou nu hiam, pa hiam, toh kilem phot ding, huai khit chianga i thilpiak pen lan pan ding chih i Laisiangthou simna mun ah i mu hi. Hiai pen kuamah dang thugen hilou in, i Toupa Jesu Khrist kammal mahmah ahi. Mi toh kilemlou ahihkeileh mi toh ki ngaidamlou pi a i thillat pen Pathian adia namtui lou leng a na hithei ahi.

Unaute, ki ngaihtuah thak ni uh, mi huat mahmah nei kawmkawm a, ahihkeileh mi ngaidam thei hetlou leh mi toh kilem lou pi a Pathian mai a i thumthum khawng uh, ahihkeileh Pathian nna i sep khawng uh Pathian a dia nam tuilou hetlou ana hithei ahi. I mihinpihte ngaidamlou leh haw mahmah kawm a Pathian maitam i zotsek na te uh Pathian adia kihhuai hi kha ding ahi. Mi i ngaihdam theih hetlouh thutuam hileh, amau bang Pathian kianga gawt ding khawng a ngen zomah chih bang om thei lai. Mikhial leh a kibawlhoih nuamloute zaw denchiangin Pathian in a tung uah vai a hawm law tel na ding. Huanah, Pathian in ei a hon it bangbang a, mi i huat mahmah, i ngaihdam theih hetlouh te leng it mahmah ahi chih thei thak ni uh.

Ki ngaihdamlouhna in Pathian maitam toh hon ki gamlat sak ahi chih thei thakthak ni uh.

3. Pathian apat helna ahi (Unforgiveness results in rebellion against God)
Romans 12:19

19: Deihtak te aw, phu kila kei unla, Pathian hehna awn zaw un, “Phulak himhim keimah lak ding ahi, ken ka thukna ding, Toupa’n a chi” chih gelh ahi.

I Laisiangthou simna ah, miten na tunga thil a hon hih khial, hon pampaih, hon nelhsiah, hon simmoh chiang un leng phulak ding Pathian awn zaw un ana chi hi. Phulak himhim Pathian a ding ahi chih Thukhun Lui ah leng mun tampi ah a kigelh hi. Hilehleng, hiai pen zuih haksa a kisa mahmah chiat a, thukkik thei dinmun a omte a dingin thukkik pen a baihlam pen ana hi sek ahi.

Hilehleng unaute, thukkikna Pathian a ahi. Mi kuahiam in i lungsim hon suknat mahmah chiang ahihkeileh a hon khasiat sak mahmah chiangin i na thukkik sek a, hiai pen kha Pathian mun luahna ahi. Pathian apat helna ahi chih thei leng uthuai kasa. En Pathian vaihawmna leh dinmun luah tum mawk sek hang a, “God step aside, I don’t need you now.. let me deal this by myself....” i chihna ana hi laizang ahi. Toupa, tu hun in kon poimoh kei, hong kidaihlah dah in, ken ka buaipih na di, i chihna ahi leltak ahi chih theithak leng uthuai kasa.

Unaute, ki ngaihdamlouhna (unforgiveness) pen Pathian apat helna (rebellion) ahi chih thei thak ni.

4. Pathian thiltup sukbuaina ahi (Unforgiveness is being at odds with God’s plan)
Genesis 50:20-21

20: Nou zaw ka tungah thil gilou hih lungsim napu ua; himahleh tun’in mi tampi hing leh dam a humbitna dia thil hoih suahsak Pathian lungsim ahi zaw.
21: Huaiziakin, tuin laukei un. Nou leh na ta neu chikchik te uh ka hon vaak ding a chi hi. Huchiin, amau a lungmuan a, kamsiam takin a houpih hi.

Pathian in i hinkhua ah thiltup (Plan) a nei chiat hi. Genesis 37-50 kikalah Joseph tangthu I mu hi. Pathian in Joseph hinkhua ah a plan ahihleh, denchianga gamsunga kial hongtun chianga mite panpih thei dia Aigupta vaihawmtu a koih ding chih ahi. Hilehleng huai ma in mihing adia thuak haksa tampi thil a hon tuak tou hi. A tangval tungin a unau ten a bawl genthei mahmah uh a, a belam chinna mun a a va veh lai in, “mang neipa” chiin a na kou ua, a pa un deihsak taka a puanak tual a khuisak ana suahsak uh a, kokhuk ah a khia uh a, sumsin mite kiangah a na zuak uh. Joseph hinkhua I ngaihtuah chiangin, tangvalnou khat hi pan, a guk a a khasiat ngoingoih hun a tam mahmah ding. Himahleh, aman a u te tungah bangmah lungsim sia a neikei a, Pathian vaihawmna ginom takin a ngak zaw. Aigupta a Potipher zi in a hilou lou a a ngoh lai in, “Toupa, a hi nawn mahmah kei, ka dikna thu ka gen tei ta ding, ka thuak zou nawnkei” a na chi in, Potipher kiangah thudik gen leh, amah muang mahmah a, a innsung a thuneipen a a koih hia, Potipher in leng ana gingta maithei. Huchi hileh, suangkulh a tang kei ding a, Pharo mang hilhchetna ding hunhoih a mu kei dinga, Aigupta gamsung a vaihawmtu in a pang kei maithei. Tua Joseph tangthu I theihdan uh toh a kibang hetkei ding.

Unaute, Pathian in i hinkhua ah plan hoihtak a nei chiat a, ngaihdamna hinkhua toh Amah vaihawmna ngak zaw ni uh. Ngaihdam theih louhna (unforgiveness) i neih leh Pathian thiltup (plan) subuaitu a ki pangthei ahi chih thei ni.

5. Khasiangthou hih lungkham sak thei i hi (Unforgiveness results in grief of the Holy Spirit)
Ephesate 4:30-32

30: Huan Pathian Khasiangthou hih lungkham kei un, tatna ni adingin amah ah chiamteh na hi uhi.
31: Khatna, thangpaihna, hehna, hanna, gensiatnate leh gitlouhna tengteng tawpsan in om hen.
32: Huan, ki hehpih chiat a lainat neiin om unla, Pathian in Khrist a hon ngaihdam bangin, noumau leng ki ngaidam tuah chiat un.

Unaute, Ei gingtu te Khasiangthou in hon sungten ahihkeileh hon tenchilh ahi. I sunga Khasiangthou om pen denchianga tatna ni a dia chiamtehna i neih pen ahi. Huchihlai a, ei i lungtang a khaatna, thangpaihna leh hehna a dim a i om a, ngaihdamna hinkhua himhim i neih keileh zaw, i sunga om Khasiangthou hih lungkham kha hi ding i hi. Luka 12:10 ah.... “... Kha Siangthou hilhial gensia zaw a gensiatna ngaihdam sak ahi kei ding hi..” ana chi hi. Unaute pilvang mahmah ni, Galatia 5:22-23 kikal a kigen khagahte; itna, kipahna, lemna, thuaktheihna, migitna leh a dangdang kigen te i neih kei leh zaw Khasiangthou lungkham sak kia hilouin suk thangpaih theih ahi. Ngaihdam theihlouhna in Kha siangthou hih lungkham ahi.

KI NGAIHDAMLOUHNA NATNA LAUHUAI AHI
(lungtang koltanna leng ahi)

Unaute, unforgiveness ahihkei leh mi ngaihdam theihlouhna i chih pen Laisiangthou siam te hi’n, Psychologist te hi’n, medical expert ten a gendan un I treat pah kei leh Cancer toh kibang ahi a ana chi uh. Cancer natna i theih chiatsa bang in, hihdam pah ahihkeileh a natna omna mun kia hilou in, a kim a kiangah zung hon kai a, mun tampi hon peh a, hihdam haksa mahmah ahi. Hiai lungkimlouhna/mi tunga thangpaihna i neih pen ziakin hon su thangpaitu kia hilou in i kim i kianga mite toh i ki tanauna (relationship) leng suse thei ahi.. Thil saupi i deihlouh pen tan leng tuntheih mawk ahi. Hebrute 12:15 ah hichiin ana chi a.. “Pilvangtak in en un, huchilou in zaw Pathian hehpihna ngah zoulou kuahiam a om ding a, khaatna zung banghiam hongsel a nou a hon hihbuai in, huai in mi tampi hihnit in a om ding uhi.”

Mi i ngaihdam louh chiang in lungsim natna ki nei den ahi. Hiai in i hinkhua ah thil tampi suse thei a, huai pa hiam huai nu hiam in i tunga hon hih ahihkei leh hon hihkhak louh ziak a i khasiatna leh lungsim natna in i khovel etdan (world view) leng tuam sak zou top thei ahi. Kuamah leng gingta thei nawnlou a leng om theih ahi. Thil tengteng leng a positive lam a la thei nawn mahmah lou, banghiam thil hongtung teng lah, i lungkimlouhna toh kizom sak vek in, a taktak in ei a i lungtang koltaang ki hi daih ahi. I lungtang natna kia leng hilou in i taksa mahmah leng hon sukha a, i damtheihna leng hon suse dimdem thei ahi chih thei leng. Hiai in i hinkhua ah thil tampi suse thei ahi chih thei leng uthuai kasa.

Hiai koltanna apat kisutkhe ni uh

Unaute, tuni’n kuahiam tunga lungkim theih hetlouhna leh ngaihdam theih hetlouh mi i neih leh ki ngaihtuah thak ni. Mi khenkhat thiltuah te zaw, haksa mahmah leng a om tham ding. Hiai nu, hiai pa, zaw ngaidam thei vual kahi kei chi leng i hi maithei. Ka mihinna in hiai zaw ngaidam thei mahmah lou kahi i chih leng a om ding. Ki ngaihtuah thak ni, koltanna a taangkha kihi zaw ahi.

Mi khenkhat in mi a ngaihdam theilouhna ziak uh, admit ut kei le uh leng, kisaktheihna ziak ahi. Hiai thu chiah zaw ka hi theikei, hichia ki bawl himhim zaw ka mi hinna in a ngaisiam thei kei ding i chi maithei. Unaute, a taktak in kisaktheihna i chih kha Pathian huat penpen ahi a, Setan ahihkeileh Lusipher i chih hong kipat khiakna leng kisaktheihna apat ahi chih i thei. Unaute, Pathian mai a kisathei ding kuamah omlou i hi. Pathian kha nnasepna tuiluan dan toh ki bang ahi ahi a, a niamna mun lamlam a luang ahi. A ki ngainiam niam lamah Pathian vualzawlna luang ahi.

Tangthu saulou khat

Unaute, a taangpi in i ki ngaihdamtheih louhna te a phattuamna om hetlou hi tangpi ahi. I ki ngohtuahna ten hun paisa thil te la leng a lakik thei tuankei.

Khatvei tangthu ka simkhak khat-

Nupa khat a kiten khit nunguh kum 10 khit in tapa a nei pan uh a, a deihthoh mahmah ua, a nupa kikal ua a hinkhua ua kipahna pen uh ahi. Khatvei a tapa uh kum 2 mi ding khawng ahih in a pasal in zingkal khat dohkan ah damdawi buk khat kisin lou a mu a, a nnasepna a kuan ding a kinoh ziakin a zi kiangah, “Huai damdawi buk sin inla, cupboard sungah ana koih in..” chi’n a nnasepna lamah a kuan san hi. A zi leng annhuan inn lamah a buai luat ziak in, a pasal thugen za mahleh, a mangngilh kha zual a, a sin pah kei hi. Huai naupang pa’n damdawi buk a et leh, etlah huai sa in ava dawn kha a, a dawn gai vek hi. Huai damdawi pen poisonous mahmah, piching in leng neu chikchik (dose tamlou lou) a dawn ding chi ahi. Huchi in, naupang pa a damdawi gui in a hong puuk a, a nun damdawi inn ah a taipih pah lawplawp a, hilehleng a damsuah zou ta kei hi. A nu a lungkham mahmah a, a innkuan uh kipahna pen pen, a pilvan louh ziak a omnawnlou mai, a pasal maituah ding a huphulh mahmah. A tawp in a pasal leng a nnasepna mun nusia in hospital ah lungkham takin hong lut a, a tapa deihthoh takmai tanglou a lum dildel, puanngou a a tuam uh a mu a, a kianga a zi ittak lungkham taka tu, a pasal leng a na en ngamlou a mu hi. A zi a en a, a tapa luang a en zel a, a tawp in a zi a phongtou a, thumal 4 a gen hi. “I love You, Darling..” a chi a, “Aw, kei hihkhelh ahi, hon sawl se lou in, huai damdawi buk ken sin in koih kha maimai leng maw !!, Hon ngaidam in aw..” chi’n a angkawi hi. A zi in leng, “Hilou, u, ken na thugen ana ngeihngaih pah in damdawi buk sin in, cupboard sungah ana koih pah kha hileng zaw...hehpihtakin hon ngaidam in aw !!!” chiin a hong kapkhia hi. “Hon ngaidam in aw... hon ngaidam in aw..!!!”, “Kon ngaidam ahi... kon ngaidam ahi...!!!” kichi in a kikawi tonton ua, hun haksa pen ah leng tha a kipe tuah thei uhi.

Mi khenkhat hileng i bangchi phet dia aw !. Suangtuah theih thil tampi a om. Kingoh tuah a, ki ngaidam thei hetlou a, i lungtang na den a leng om theih ahi. Hiai nupate, a tapa pa uh si a hita. Hong hingthak nawn ding leng ahikei. Ki ngohtuah a a phatuamna ding om leng ahi het kei. Hichibang a thazoi tak a a om hun un a poimoh pen uh, a ki khamuan tuah thei uh.

Unaute, tuni a i poimoh penpen te laka khat ki ngaihdamna mahmah ahi. I nupa kal ah, nu-leh-pa leh tate kikal ah, mou leh tekpi-tekpu kikal ah, i innsung ah, i lawmta kal ah, i sepna mun ah, i saptuam sung ah, i khotang ah, i nam sung mahmah ah. Pathian deihdan leng ahi. Ki ngaihdam theihlouhna pen koltanna thupitak ahi. Mi i ngaihdamlouh te sanga ei a ngaidamlou pen a thuaktu ki hi zaw gige ahi. Mi khenkhat thiltuah te zaw haksa mahmah, ngaihdam mai ding chih i mihinna in haksa sa mahmah leng ahi kha ding. I thiltuahte zaw mihing I hihman in mangngilh zaw a haksa kha ding. Himahleh, Pathian ngaihdamna tangta te adia zaw I mihinpihte ngaihdam pen I mohpuakna ahi. Hiai koltanna apat suakta in Kum 2019 thak Pathian in dam a a hon muhsak leh, kumthak muak dingin Pathian min in I ki ngen ngutngut ahi.

A ki ngaidam theilou nupa, ki ngaidam theilou innkuan, ki ngaidam theilou saptuam, a ki ngaidam theilou khotang leh a ki ngaidam theilou Nam te; Pathian hehpihna in a hon gamlat deuhdeuh lai ding ahi.

[Note: Hiai thu, dan toh kituaklou gamtatna (crime) toh kisai hipah lou in, i mihinpihte huatna, muhdahna leh lungtang ki suknatna lampang focus a hong kigelh ahi]