Zanlam zek in Latom Richard in a college kaina Acharya NRV Institute, Bangaluru ah TV channel a khek ziak akisu buai in a seniorte’ khutlum thuak zoulou in si hi. DNA news in “Drug addict” ahi peuh chi in ahuai ma ni a gari neu accident ziak peuh a si chi’n gelh mawk! Hiai thu a Indete’ news report tuamtuam om sunsunte I et leh, India inhon nelhsiah dan leh hon thulak louhdan a chiang mahmah hi. Newspaper tuamtuamte’n hoihtak a sui detdet lou agelh nimnem ahih uh muh chian theih in om. Bangaluru pansan Manipur Student Unionte’n delh zui in FIR file ngalua, Manipur Home Minister, Gaikhanngam bang in Karnataka a Home Minister mah kiang a hiaithu kintak asaifel adeih thu lehkhathon khak hi.

A kidelhzui zohdan uh etton tak kasa petmah hi. I theihsa bang in Eimite leng India khopi tuamtuam a kitheh dalh in I khosa ua buaina I tuak zel thou uhi. Amau, amau kachih chu nathei maw?, bang a I buaina hon etzuipih ding omleh nuam na’n chia aw..chih kalung sim ahong suak tultul hi. E’n zaw buaina I tuah chiang un eikia iki ngaihsak ua,sai vengzel chu hi hilele hon delhzui pih ding milian kineilou(?). Ei-le-ei va kichih chih pen luideuhta adiam chi ing. AFSPA ziak in tamveitak Delhi mahmah ah kiphinna tuamtuam a omta, eilamte leng vatel zel theile mi’n hon phawk deuh kha d’uam? Atuam dan a kihuihui hang alah tuamlou hial, enle AFSPA deih huai louhdan thei lah “amau hon hih uh henla en..ana ki gal-et leh” chih bawl henghang mawk I bang maimah ua. Thil I sawmsawm na ua lah koi tanmah I tung (baih) kei hial di ua, tung di hile hangle amau’ lemsak ngai ve thou di bang ahih chia’h “min khumna” vanei le poi lawmlawm di adiam? Ei chauh khaat chet dia siam kihi lou a.

Akhual-atual a pawlpi hauh petmah a kihau,daih a kidaih hilele kuama’n zakha ngeilou…ei chih louh! Bang hiam North East vai or Manipur vai ahih chi’a ei pawlpi min kiza ngei khol hetlou, mi’n hon phawk louh di poisalou veuvau a I om uh hun nonlou hiveh aw. Eisung chauh lou a I letter head uh zang a mi mohpaih khong, mi choubawl khong, mi etsan khong, mi kipahpih khong I zongsat deuh d’iu ahi chi ing, kingeksak toh thuahlai ding in mi’ honbawldan bang I lungkim keileh “Bawl tang” suk hehu maile hileh bandh bawl khong le hong nuamdeuh dia, Kangvai hon pel kha moh di hya! Thuthehzak, a hun zil a mi vau lau theih leh zuausiangthou gen khong kiva deuh le, I nam damna ding khat houh hong himai diam maw? Kingeksak thu igen lailai in genzom le, vaite khong leh Meiteite khong bang akoi hiam uh anat leh thum pah hanhan uh,om kheikhai zozen uh eichu kipang tentan inchin Doctorte’n hon et chiang uale amau duat khoih zaw uh hiveh aw..Thagum a mizoh sang a thagum zangse lou a mizoh chuh hong pichin huai zawdeuh leh kilawm maw? Thagum zatna ding mun a chuh kidamlou hial a zatluat di’n.

Bang ngaihdan i nei?