TUKUM CHRISTMASS
By. H.Chingbiakmuan
Hun leh nite hongliam zela khohunte bang hong danga kumtawp ah i ding nawnta. I niteng khosakna ah haksatna,dahna,natnate bang tuakin i iit leh ngaih tamtakten sihna hanmual hon liamsan ua i suun mahmah laiin nopna leh pahna tamtak le i dong a,michih in aki bang a imuh uh hun leh nite tutan zangtou theizel leh mailam huna lametna hon neisak i Toupa Jesu Kris hon iitna thupi isa a amin phatin thupina tengteng amah i pia ahi.
Awle, kumtawp ah i dintoh kitonin sinlaiten exam zou in,khualgam a omten innlam hon zuan panta ua,i Toupa Jesu Kris nang leh kei adia mimbang hong pianni Christmass lawm dinga kisak kholhna in khopisung jelsuak in aneu alian iki salah mahmah uhi. Hiai hunnuam zangdia ikisak lai in nalungsim ah bang aom a,bang alian pen a?Hiai hunnuam kumtenga nuamsa leh kipaktaka innkuana i zatlai in ah midangten bang chi bang in azang uh chih na ngaihtuah ngei hia? Christmass i ngaklah mahmah lai in khosak haksat ziak,sumleh pai taaksap ziak,iit leh ngaih te suun ziaka ngaklah hetlou nu le pa tamtak leh innkuan tamtak om uh ahihdan mangngilh keini.
Abiiktak in tunin ah kum bangzah hiam hiai hun anazang himahleh azat didan ale zangkhalou,zang theilou,zang ngamlou damdawi khamtheih,zu leh sa a ana kibual a saltangte,amau hatna a suakta zou nawnlou te kianga Pathian hon iitna leh amaute adia hondampa hongpiang ahihdan thute zasak a,amaute kianga tanchinhoih kipahhuai gamdai a belamching te kianga Van Angel ten avapuak mah bang ua khamtheih sala tang i sanggam tamtakte kiangah vapuak dinga tukum a Toupan nang abiiktaka honteel ahihlam thei a kalsuan dingin iki chial ahi.Hiai khamtheih a ana kibual a,akhen chia mivan bang,sumbang gu a,akhen bangin mikhem a akhamna di ahih nak leh poisak le neilou a gamtangte nang bang chi in na en in na mu a? Bazar lai khonga gawng dildel leh tawthep dildel a kiveite namuh chiangin iplah huai nasa hia,simmoh huai nasa hia?Gari a natuang khom khak chiang un na ten in na kihbawl hia? Damdawi khamtheih kikap ziaka poihlong,liam leh bai bang namuh chiangin choh nasa hia,ahihkeh atuh gah mah at ahi nachi hia? HIV Aids veite bang na bangchi et a,overdose a mi asih chiangun ahuntawk athei keia a over dose mah kei dia nachi lungsim hia?amaute hehpihhuai nasa hia,na panpih ngei hia?amaute adin na thumsak ngei hia?ahih kei leh iit huai le salou,thumsak ngeilou leh vei ale neikhangei vetlou nahi hia?
Tunin ah nang na simmoh ngailou in midang asimmoh di tamlua ahi a na hilh ngailou in simmoh huai ahihlam amaute kitheilua uh ahi. Nang na tuam bawla na enghou ngailou in a enghou leh enghouna azaak uh tamlua ahi. Himahleh nang na iit a na panpih keileh midang kuamah a iit a panpih di omlou khathei ahi. Mahni hatna a suakta zoulou,tamveitak pan anala a lohsamte bang ahi ua kimuan ngamna le neinonlou te ahi ua,mahni leh mahni kimohsakna a dim a kingaihsiatna,zumna,vualphaloua kikoihna,kisikna,lungkhamna leh haksatna,natna tampi toh genthei taka Christmass na tawm azat di bangtak ale zangkha ngeilou ahih lai un adinmun uh deih a ut a ateel uh ahi ichih sak diam?nang tua na dinmun na teel ahi hia,na hinkhua ah kuamah poimoh ngeilou in nakingai hia,na mailam hundi na thei hia, kum hiaitan dam di kahi nachi thei hia?Unau ei hinkhua natawm ale i theihna bukimlou leh i mailam hun di ale thuneihna leh theihna neilou a i damsung nite sutom a susau theilou ihihlai in damdawi khamtheih,zu leh sa leh khelhna tuamtuam a saltangte simmoh a mohsa thei hinawnlou ihi. I Toupa hoihna ziak lel a hiaitan tung i hihlam kithei a hampha ihihlam phawk in ahon sapna za in kalsuan ni. Tunin ah saltang tamtak in nang hon ngak uh ahi. Nang ziak in tukum Christmass innkuan tamtak kipak tak in zang thei uhi. I Toupan nang tungtawn in nu le pa tamtak te biangah kipahna khitui luangsak ut uh ahi. Lungkhamte kianga kipahna tuntu,lametbei a kingaisiate kianga lametna hing tuntu, saltangte kianga suahtakna tuntu hiding in Toupan nang honsol ahi. Damdawi khamthei zongsang,HIV Aids leh natna tuamtuam veia lungkham te adia vualzawlna hiding in Toupan hontel ahi. Hiai hunhoih namuhlai a nakuan kei leh hunhoih dang munawnlou thei nahi.
Toupan a iit mahmah khelhna sala tangte kiangah michih ading a tanchinhoih kipahhuai, Jesu Kris Hondampa amau ading a le piang ahihdan theisak dingin hon deih a hon muang ahi. Unau na dawnna bang ahi dia?? Ki ngaihsun in..