NEGU LOU THEI KAHI KEI
~Thangsangkham

Alangtang in kuaman ka kiang ah “Negu” nahi hong chikei mahle uh, kholak thuleng apat in mite’n ka NEKGUK dan khong houlimna a zangsek uh ahi chih ka haih kei. Huchibang a hon dem/gen tamzaw ten a ngaihtuah phaklouh uh BANGZIAK A NEGU KAHI HIAM? chih ahi. Kenleng ka hiai dawnna thuguk kep in kana kem sek a, tunzaw hiai thuguk kipuangta leh ka chi hi. Tampi te’n Sum- leh- pai kiningchinna leh hauhsak utna ziak kia a negu non sakha di ua! Amin pawtu lel ahi uh, huaite khenlam ah aziak lianpi a om. Adawn a kuaitan mailou in abul apan in suut ngiat le.

Ken leng NEKGUKNA kana haw ngeisam a, ka utlam leng ahikei. Mahni phutawk sep a, dinmun toh kituak a khosak a hih theih dandan a khotang a kizat sam kana ut a ka na sawm zel hi. Tuabang ding in theihtawp suah in leng kaki thei a, ka phaklouh tantan a nakizang ka hi de aw ka chi sek. Keimah khawm a ka theih dan in ‘behlap’ di tuan ka thei kei. Ka sepna lam ah leng diktat thei pen in ka sem a, huaiziak mah in ka sepna a ka dinmun sanga niam zaw tampi te sang in ka khosakna le’ng a ‘niam’ hi.

Hichibang a diktatna ziak in banga ka lawhtak ?

Ka mihing ngaihtuahna in mite’n hon zahtak leh hon kipahpih phetlou hon phat lai ding un ka gingta sek hi. Mi tengteng theih leh pahtak ka lam-en thahah kei. Mahleh, ka omna veng bek ah ka dikna miten a theih ua, hon pahtawi sam uh ka gingta a, a guk in leng kana kinem hi. Adik takin mihing hihna ah mi tallang leh mite theihphak hih ka ut sam a, khaw khat a mite ‘dot’ hih ka ut sam hi. Banghiam chang a ahoihlam a ka min a lohkhak chiang un kana kipaka nuamleng ka sa a, maban zel ah tha leng hon pia hi. Himahleh tua bang hun ka tuak tam kei a, ka tuah sun chiang in le hon liahthei dite kalah hon zep lut uhi.

Hi e, bangmah iim di om kei. Khotang a dia nasem pawl tuamtuamte ah dinmun neih sam ka na ut gu thei mahmah a; mahleh tuabang ding in ka min kilou ngeilou hi. Ka tha leh zung, ka pilna-siamna sang in sum –leh- pai thoh di nei gige leng dinmun ka tang ngei ding chih ka ginglel kei. Huai ding in lah ka loh kham khop lel in ka khosa a, sum-leh-pai veksuah di ka neih kei. Tuaziak mah in mite ngaihdan in, MIHAI.. Officer khat hi si, mahni hamphatna di le khuat theilou, sorkar motor, mahni motor kol a kol, khotang a dia le thoh phallou ka na hi gige! Tua kia hileh phave, donpi-donke om hun chia lah phut zah le pe zoulou leh Saptuam thawhlawm ah le Officer pihte thawh zah le thawh ngamlou khop a chiil ka na hi reng .

Tun zaw ka pai dingdan ka theisiamta.. Negu theilou ka hi kei!! Ut leng ‘sawm ah sawm’ leng piak theih ahi chih kathei ta. Gen taktak leng banghiam nikhua a mi kiphal chi a aphat ek ek te un amau a loupi thoh in amau neihsa kiamlou in mite a panpih thei ua, vantang a dia sem ahi uh chih ka thei. Ka haih bik tuan sam a! Huaiziakin, innvengte inn daamsak/khupzou hial ding in ka tenna inn ding ka lamta. Midangte bang in kei mimal sum-leh-pai ka seng kei. Mi vantang neih phaklouh thil chi tuamtuam ka kaikhawm a, gil zut hauhhauh in kilawhte nasep ka en a, khuttal zung a kawk in nna ka hon semta hi, ka kawk khe lian thei mahmah tave! Bang Pawl Pawl hiam panpihna di’n sum ka koih khia a, ’genthei panpih ngai’ achihte uh panpihna di’n ka kha khat lawh sang a tam zaw ka zang zel a, Saptuam lam chi le lah ka lawh heek hetlou in mi thawh sanga tamzaw ka thoh a, thawh lawm bawm hong koihte kiang ah . “ Thohlawm bawm aneulua “ chih ka chiamnuihna tam pen ahita.

Tu zet inchu hon chibai ut lah tam, lem leh lemlou a kiphathu gen ut lah tam. Hon mu leh houpih utlah dim, Pawl/Organisation omta phot ah Patron, Life Member, Executive Committee Member, Senior Adviser chihte kei a ding mawng a kikoih ahi de aw chih theih khop hial ahita. Tangtawn member ( Eternal Member / Perpetual Member ) hih theihna bang om hileh ka tangkha zek himhim di. Mipi punkhawm nikhua in mipi lam nga atut leh sik ngat atut chihte zaw mitsi sa inle ka siamta. “Khuallian” leh “ Khual Zahhuai “ chihte ka veilam leh taklam bang ahi uh. Banghiam Function teng in “Chial tuam” te lak ah ka awl ngeita kei. Pawl tuamtuam apan Member hihna leh chial a ka omna laai leh pahtakna laai ka saante abu a bawl tham leh akoihna ding inn bawl tham ahita.

Saptuam Upate kipahthu gen ut lah bei lou, Biakinn a thugen dia seh a ka om hon hilh masatu hih kituh mah bang in ka inn ah Upate khuai vaitung mah abang uhi. Upa tamtak in biakinn sang in ka inn ngaina zawta uhia chih baihlam tak ahi. Biak inn ah Pathian phatna leh pahtawina thu gen sang in kei hon pahtawina uleh hon phatna uh kigen tam zaw hita hia chih theih khop ahi. Saptuam upa telnawn chiang ngial intuh ‘tuhtu omlou ‘ ching leng kilawm.

Ka nekguk ma a zaw kuaman ‘ ka ui – ka ak’ hon chilou mah uh hiven. Ka dikna ah leng hon gum leh pahtawi in hon phat ngei kei uh. Tu’n chu ka omdan teng akilom ahi vekta, ka thugente leng BIBLE sang in dik asa zaw uh. Gen uang leng “hiai suang ek ahi” chileng “uih e” chi in a nak ahum di uh. Ka nekguk ma a ka tan phaklouh tanvou lianpipi ka tang a, mite zah leh dot ka hong hita! Ka neihsa ka piaklai a kipaklou in keia hi hetlou ka piak chiang in hon pahtawi deih khoplou in “deihsakna’ pakkhi” hon pe zel uh. Huaiziak in ken zaw NEGU LOU THEI KAHI KEI!!