Zan Khat Kia Hi
Gelhtu: Suanchinlal Guite

Sepna toh kisai in khat vei, nopbawlna (occasion) ah mi khat chiat tonpih theih chi ua ka kithalawp mahmah hi. A ni hong tung in ka naunu sisan kizoppih ka omkhop pih sun ka tonpih hi. Pawl sawm simlai ahih man in naupang sim kasa a himahleh ka sepna uh toh kisai a chiang zaw a muhsak ka ut ziak in ka tonpih hi. Nopbawlna munpi ding ka tun un ka naunu kiang ah kizepna/washroom pindan lam ah va pai in la na puan keng ei Zomi puan ngei toh hong kizem in chi’n ka sawl hi. Kei singpi leh neektheih omna pindan ah ka ngak kawm in a sanchi hilou a votchi noupi dim khat ka na kithuahpih hi.

Dakkal kimkhat zoh chiang in manta ding hiveh aw chi’n ka kikhenna mun lam uh ka zotphei leh ka naunu toh Nungak khat— din sang, sam eng hiauhiau, khedap sang bun, nou hinhen Zo puan ngeei a kizeem toh nuikhawm selsel in hong kiton uhi. Ka mit hong la lua ahi diam ka manglam bang kasa a, maikil-li nei (TV) khaw i muhmuh te toh kibang kasa hi. Ka naunu lawm ahi ding ka chihchia lah ka nau lawm teng thei vek phial in ka kikoih a. Hong naih phei hiaihiai ua leh hong vot hiaihiai hin’n ka thei hi. Sam nunglam a viik kom in awl-awl a hong ki-zephei nge-ngei (slow motion) uh kasak leh ka mai ah hong ding phut ua, ka nau in U Lal, kizepna pindan sung a hong kithei ka hi uh a min Mawii Guite ahi hong chi hi.

Ngaihtuahna paisau man sim ahi ding lungphu zong kisai kin mahmah hi. Vaite filim bang mai ahih ka ginta, ka biang guk san teituai ding hi. Om ding dan leh maitang meel put bawl dan ding ka ngaihtuah lai tak in, U Lal maw? na nau toh puangbih dan kana kihilh ua hong chih leh ka kiguih hi. Aw, fel mahmah chia, nang le hiai a sem maw kon mu kha ngeikei ngei ka chi chot hi. Hi sem e, ni thum hiam hipan hampha kei ve ua hong na vaidawn nasat sawm lua ua chi’n hong chiamnuih hi. Kinuinou sak deuh mai in ahihleh lutsukta le hun kipan pahta ding hiven ka chi seusau hi. Mit dim zen a en ut lua hinapi tutang gegaw kom in mailam kia ka en den phial hi. Amah lam neng khah ka hoikhak chiang in muinam henhen hi. Gen ut tam atam hillehle gen ding theilou, gen pat ding theiloupa kasuak hi. Aman U Lal kamtam tuak-keina chia maw hong chi kom in nuiseih hi (a khum tel mai). A neuneuh in nouneel genkei mahle ka om ding dan tuh theihsa ahi, huai hun zat sung hiai tan in hun sak phot ni.

Hun a tawp in ka nau a khut a leen in paita ni leh chikom in Mawii kimuzel ni ei chih ka thuah hi (omkhop zek lai a houpih ut selua hinapi). Mawii in ka omna uh hong kan a hiai pam zek, khe a paiphakna ahi chih ka hilh hi. Huai ahihleh kei le huailam pai ding ka hi ka kheli nei (car) kong heek phei ding hongna ngak un chih toh ka dawng kiikman ma in diang phei hi. Zum huai sim ka tangval e ka sata-kek e kichia en kheli nei neilou, heek theilou lai! Va paisan ding lah hilou deuh, tomchik sung in hong lut ua le, hong chi a lut mai ngai. Ka nau in singpi beek hong dawn ve U Mawii achihleh ka nau le ka lungsim theimah bang na e chi’n ka nuigu heuhau hi. Mawii le a lawm muhthak liklek nu’n chial ahihleh kineel sem nang in chi adiam poiloupi hun tamlai ve le chi’n dawng hi.

Innsung kong lut uh leh a suun a ka inn hah uh ka hawm thoh a, tuang sawt deuh ka na zuut khaklouh ka kisiikgu mahmah hi. Mawii, tutna bansau ah na tu aw chi-kom in kei pindan ah a kinthei bang pen in ka puan kava khek zualzual hi, ka che rang khop mai. Ka nau ann huanna lam a, a buaikal in hoih kasak dan gen-ngamlouh leh chih simsimte huu-la masa zen a gen mai ka tup lai in singpi manta hong kichi kuau a, huai nitaak singpi min baih kasak khiat dan lamdang himai. Nungak tuaktuak hong kihoulim panta ua kup theih ding a omkei khop mai. Kei le dingtou in van nengneng koih-hoih kineih in a-fel leh taima lua bang a lat tum in ka kawi pai vialvial hi. Ka nau in ann hong huankep ding ka hi a chihleh zaan a sawt mankha ding a huan nang toh ka na pai mai ding nidang chiah aw Mer (Mary).

Singpi dawnzou amau nungakte gel mangpha kikhak khinta uh ahihleh kelkong (gate) tan beek va khaksam kilawmlou ding hia chi’n ka va kha hi. Genna hun lemtang hong om taktak ta ei, i maw huai ka nau toh non kiton pawt ua maw, na khaw heidan, na khut veidan leh na kizepna toh na khedap sang but ka muh in kalungsim damsung suangkulh sung a taang bang mai in ka mit leh lungsim a pawt khethei nawnkei chih ka gen ngam tuankei. Bang chi pat ding chih ka buai guklai tak U Lal, kou inn le gamla lou ahi hong kha ve, khelinei hilehle zan sawt dekta a, numei kia pai nuam lawlou ahi hong chi hi. Numei himhim ka gingta nawn dekkei chi phanphan pa tuh gingtaklouh malak lawi naakphehsa kong bangta mai hi. Nou le na haichilh lamgei a ma muh hiam sawtlou koi hiam a na muh khat na haichilh aw.. melthra.. aw.. melthra... na chih khat in hong kha ve He UU...! ! hong chi leh nial ngaihna rengreng na thei huahkei ding uh. Aw, na gen dik lua hong kha mah ning ei chi kom in ka tuangkhawm uhi.

A keelkong uh ka tun un, a inn uh a sang in a vaak chiang kek-kok khop mai. Hong lut zual in khuavot toh na puansilh pan lua sawtlou hong kisulum in hong chinawn a, i genta ve naakphehsa chihmah tak heh hetlou ka hi. Lutpah therthar a nu-le-pate om ding chihlam le ngaihtuah kha mahmah lou, itna huihkhua a leengta i hih chia. Vangphat huai chih ding hiam apate na omkei ua, damlou veh a mun gamlapi a hoh uh ahi chih hong hilh hi. Kimihoih sak sawm lua i hih chia a ba’ng ua lim kitaakte en hauhau in U Lal hiai ah na tu aw hong chihma tulou ding chia om henghang laitak, na tu-tellou maw U Lal hi hiai—Nou etlawm tak kimupailet thei sung a tuisiang kilkel gimsiip sim a mantamte hong pia hi. Ka dawnkei chih ding lah duh zennapi amau mihaute paidan ahi kha ding va nial dah ni chi in ka sang hi. Ann na neek ding Tangvalte zansawt nung a pai, numei toh teh in lauhhuai lou zaw ahi a chihkawm in a pindan a va kikhek hi. Puan sanaal leh malngal, ngou-san, siing sim leh mawltak hong silh hi. A silh peuhpeuh toh kilawm sa in ka pum hoihsak deuhdeuh hi. Hong naih phei hianhian tuh khuavot ziak a inn a bang zual pa’n khualum a sa baih khop mai. Bangteng hileh hong theisiam mai in Mawii, nidang chiah aw hun tam lawlai kimu-zel ni, tua ka nau amah kia a om ding ahi ka lung-himoh ka chih laitak ka khanglou guih hi. Aw! zalmang na hi sese.

Puansilh kihawk khelou in zanitak ka mang hikeileh aw lungsim a ka chih vungvung lai in ka lupna nidang sang in namtui zaw ahi chih ka thei hi. Ka taklam khutkuak sung ah, a lu-um nip leh maam mahmah om hi, ka maai sam gimnamtui veuveu in na tuam ahih chih ka theih in ka halh khia zawt hi. Mawii toh a lupna a, na lumkhom kana hi den ua, aman nunglam hong ngat a ken siikkeu bang in a nunglam apat ka taklam khut toh na kawi ka na himai mah. Mawii zong hong thou a a sam eng silsel hong hen kawm in na ihmutlim hia U Lal hong chi hi. Kisuanglah lua gen pah zok ding theilou, nuam mahmah ei ka chihleh hong theisiam lua in nuam kasaklouh ding hong awlmoh zaw hi.

Mawii kiang a ka lupkhak dan uh ka ngaihtuah dek chia tui man tam hong piak chauh ka thei aban ka thei nawn kei hi. Awl chik in Mawii bang chidan a na lupna tung kha ka hia chih ka dong hi. U Lal, tui kong piak zoh sawtlou in na hong it leh ngaih dan na theih bangbang in non gen a, kong dawng kiikma in tutna sau ah na ihmu hi. Na ihmut thut kong theisiam lua, huai tuingou pen na dawnkhak ngeilouh ziak a nang a dia takh lua ahi. Lupna a kon puaklut ziak a ka lupna tung a ihmu na hi. Kipahthu ka gen dek leh U Lal kong gen ut khat om, hong na ngaihkhiak sak in, ih maw... zanitak kon muh ma a ken na lim mukhinta, ka vengte uh nang toh school kaikhawm i behte uh khat a limkhoihkhopna (album) ka va et leh mitampi lak ah na meel ka muh in hoih hong sa lua ing a, ka lawmnu kiang ah mi bang chi bang mi hiam chih ka dawt leh chiamnuih hat-a-hat ahi hong chi. Zan-nitak a tak a kong muh thut leh kiguih zawzen ka nervous dan chu, nang lah chihtak tuak lua hong sa ing a ahong chihlaitak ka nau in kong hon kiiu a — hong phong lakloh lua akei.