NA KHEMPEUH IN A ZIAK NEI TEEK HI
By: Muamuan Tawmbing | This email address is being protected from spambots. You need JavaScript enabled to view it.

I khovel paizia kinoh hehu lak ah mihing te zong kinoh hehu in ki om teek hi. Na khat peuh leh sep leh bawl thupiang khat peuhpeuh ah zong hih hehu in ki boh hehu hi. Tua ahihman in thil khat peuh a omchiang in i muhdan leh tua toh kisai a i lungsim dawnna i piak zia pen sukha mahmah hi. Etsakna ding in mikhat nasep hiam a thilhih khat ah kansui masalou a muh natan a hapsuk in, a kullou pi kinialna leh thuman omlou kinaakna piang sak pahpah hi. Khovel thiltung te kintaktak a puankhiak hita a, a thu mah sang in a kim bek in thu gen bang zawzen ta hi. Tua ahihman a lim tungtawn a ina muh zia pen paidik theilou in a kullou pi buaina tunloh thei hi.

Huchibang hunbi khovel a ki omta ahihman in tuate pumpelh a thu khat peuh leh thiltung khatpeuh tungtawn a omzenei kinialna leh thuman nei kikupna a omna ding in a ziak, a-san, a-hang (reason) theih masak poimoh sakna om hi. Aziak ahihleh na khat peuhpeuh ah a ziak zouzai leh a kisawmna san, a kisepna san pen a thei mite'n theihsiamna toh thukup bawl thei uh a, tua in ahoihlam a kupna, thumopna leh taihilhna banah pahtakna i chihte piangsak in sapte'n constructive criticism leh Constructive  argument banah constructive view a chih uh i muhna dandan a ahoihlam (positive approach) piangsak in thuman tamtak piangloh thei hi.

Genchet semna ding in, mi kuahiam in a khuttal sattan mawk hi. A khuttal sattan ahi chihtan thei in bangziak a saattan hihiam chih kansui lou pa ading in tua mi pen a bang chi muh dia? Awilou in mihai peuh chisuk thei hi. Ahihkeileh kuahiam kisual ziak a ki suliam a om chiang in huai pa in huaipa vaw liam chihtan leh a lim khawng kia a kilat ciang in ngaihdan leh muhdan kichinglou pipi piang thei hi. Mikhat thangpai a innsung a kitom, a zi vua ahihkeileh Heutu te'n a vaihawm uhleh a thupuukna uh soiselna i chih te zong a tangpi in a gahkhe teng kia i theihziak uh hisim hi. A omzia bel, tua thu kipuuk leh kivuakna pen a ziak neivek chihna hiding a, aziak pen bang hihiam chih i theihlouh man in eima muh dandan a thil hapsuk kihi lel hi. Haihuai, mulkimna bei chi a thukna i piak pahpah te un pilvanglou, consciousness tasam ihihdan uh langsak a, gel detdet leh sut detdet lou a thil hamtang boh ihih dan uh langsak hi.

I gen ut pen bel ahoihlou leh diklou te pompihni chih a hi zenzen kei hi. Himahleh tua buaina thiltung leh thupuukna khat apan buaina dang a piang sawnlouhna ding banah ahoih lam a thu piangsak tu ahihtheih na ding in a kisam mahmah AZIAK-ASAN pen suut chimtak keini hang chi ut ihi. Aziak theilou a hamsiat a, aw kha leh khutlum toh hih sukpah gawp pa in Aziak leh Asan thei hileh hih hetlou ding a, theihsiampih kawm in a awidan or awilouhdan, a lungkimdan or lungkimlouh zia damdam in sung khe ding a, tua in kikupna leh a tungthu toh kisai khempeuh ah a damdam kinialna, kikupna chihte piangsak in a kumtu, a thuaktu, a khialtu, a simtu tengteng ading in sinlai hoihtak leh kuamah kisubuai lou a zohna bawl theihna guan ding in um hang.

I tapa or tanu hiam in I Tangal ana baw gai leh soisa suk a hapsuk pah ding zong hilou a, bangziak a ana baw khamawk hihiam chih dong le'ng, tuini'n maimai ana sa kha a,a bawm a zat utziak zong hithei hi, tua apan in pilna khat guan thei kihilel ding chih bang dan in i niteng hunzatna ah zong midang te nuntaak zia leh hih khempeuh ah a mau khomkhom in aziak leh asan nei ding ahihna uah i kam i kaak ma, i thukma, i hapma in kansui in geel detdet lehang, buaina leh thil khat peuhpeuh in buaina dang piangsawn saklou in felpah ding a, alang tuaktuak ading in zong punna ompen ding hi.

Sapte thupil in, "Buaina i chih pen buaina hilou a, tua buaina i buaipih dan pen ahi i buaina uh" chi in ana gen hi. Huaiziak in buaina pen a om theimah, i deihteel zong hiken teh, himahleh i buaipih dan leh tua buaina toh kisai a i lungpuut pen vel in veng lehang chidam ding a, tua buaina pen vengpah in thumanpha suahtu suak phet ding hi. Tua ding in a ziak leh asan te kan chipchip phot in kinoh hehu kei lehang chidamna hong guan ding a, midangte kinial a, kina a, kilai a, kimuhdahna piangsak lou in theihsiampihna toh ngaihdan tuamtuam kibanglou te Luikhat a luang khawmsak thei ding hihang. Tua ding in i hun khempeuh ah sinteek in sin in, i khuak ngaihtuahna a manpha leh pilhuai thei pen ding in zat sawm chiat le'ng i chi ahi.

(Hinkhua a ana paltouh leh sinkhiak te, hoih hi a theih ziak a midang kuahiam in zong a phattuampih ngei lam etna ziak a luikhiak ahi hi, a chinpen zong hisam keng, himahleh hih sawm tu hi ing)

Lungdam