Nikhat le om nailou in ka chim ngal hi. Light lah pai hoih lou zomah. Bang le hih di ei dia aw chi’in ka ngaihtuah hi. Bench tung ah tawntut in ka mobile a pat laa ka ngai a, ngaihtuah na chu a paisau khop mai. Koi ah pawt masak a, bang le hih masak zozen di a. Nungak hel di chi lelah kua mah theih kinei lou. Lawmte kua mah lah omlou zomah lai uh. Innlam pai bang a chang in ka kisik a lah, sungkuan te toh kimuh bang le nuam kasa himhim hi.

A bang a bang hileh chi’n pawt ka sawm ta khongkhong hi. Ka kisil siang zoh in ka room ah ka van te ka suahkhia a, ka puanak thak sitset khat silh in, liimlang mai ah ka hong ding tei ta chu. Kare!! Ka mel a dawk chiang tel mai. Hichi bang mel nei ka hih lam ka kithei pan hi. Liimlang hoih lou ahi di chi’in ka nulsiang thepthup hi..SALAH !! Mihing a piang khia chiatchiat, mi’ neih bang mit, bil, muk, sam leh a dangdang zaw neikim sam hi’ng a. Kuate hiam chihdan deuh in, “A pangkhawm siam kei tel mai uh..” kachi thei lel hi. Ka melsiat buaipih in ka room ah kei kia in ka omden hi. Ka Unu’ Fair & Lovely bang ka kinuh mawk a lah phatuam teuh lou. A ngaihna om non lou, pawt lah ut, a tawptawp in chu “Phamoh kei chidam peuh leng….” chih laa bang kasa thepthup hi.

Khe a pawt di bang ut lou nek sam. Tulai dan deuh a Gari a pawt bang chu I culture bang a ngaih hita. Huchi’n ka U’ a ihmut kal in a Gari chabi a guk a la in, kin deuh in ka pawt hi. Gari bang chu inn kiang ah start ngam lou zozen, sawnpawt phot, gamla sim ka sawn thoh nung a ka start leh a TUI (Petrol) bei ANA HI MAIMAH..!! Inn ah sawn lut nawn chih leh ka U’ toh innkong ah kituak kha guih mawk. Gen di thei lou in “Hehe…” ka chi lel. Aman le “Heheheheeee…” hon chih khum geih hi. Keile kisuanglah lawtel in “Hehehehee…..” kachi nawn a. A nuam kei tel mai. A tawp inchu khe in kava pawt khong hi.

Ka theihngei nungak khat Kymboi kiah vuahnuai ah kava hoh hi, “Kymboi om hia?” chia kava kan leh, a Nu’n “Omlou, bang di a..hong lut ve” chin hon dawng hi. Kenle “Bang di hituan kei..a himhim a koi ah pawt a” chi nawn. A Nu’n “Kymboi maw Inn ah a om louh na sawt sim ta eive, bangmah thei lou mo..aman…” Chia a gen zoh ma in “Bang chi dan e..na gen kaman kei na e..” chia kana pau tuh leh, a Nu’n “Aman Pasal nei ta ahi.” honchih khum chu, a kin a kin in ka tai pawt ngal. Nuam kei na nemnum maizen e.

Pawtna di thei lou in Kimpi Pan Dukan (Paradise Hotel kiang, Airport Road, New Lamka) lam ka zuan nawn vengveng hi. Sum lah nei lou kuva a bat a hai di dan ngaihtuah ta. Dukan kong ah ka tut lai in High Skul kailai a a ka Junior te numei nih Biaklun & Nenem hong pai uhi. “UMuan dam maw? Bangchik a hong tung e? Kuva hon khilai ve, nou gamdang ah om deuh te’n..” hon chi saisai ua, ka pau man der kei. Sum nei lou hih bang chu ut dek sam lou. Kimpi kiah (awl chik in), “UKim kuva hon ba sak maive maw” kava chih leh, a AW neih tengteng a hong kikou mah a bang.. “BAT THEIH LOUH” hon chi chu ka zum lum lou chauh ahi. Huai teng a le hun sa teuh lou in, “Innlam na omlai a na bat sa teng le non piak nai louh, kum thum bang hita, huai te non piak kei leh kon ba sak non teuh kei di, ki hope sang….” hon chih khum zawmah lai chu, ka nungak khilai dek te pai lam le ka thei kei hial.

Keile beidong kisa in dawr kong ah ka tut kawm in laa ka ngai hi. Ka lungsim in chu, “Tuni ka pawt a FLOP mawk di e..” ka chi hi. Lungkia dimdem a ka omlai in..khawldih, ka mit vai zaw hikei maw, ka mit bang ka nuai thithe hi. Vengnuam lam zuan in Nungak khat hong paisuk kamu a, a gal a pat in le melhoih a hi chih ka gen thei ngal mai hi. Hong kisawi suk ngiahngiah mai chu, a gal a en tu a di’n a mit tai huai khop mai, mit phia lou zen in kana en den hi. Slow motion a hong paisuk ngaihngiah mah a bang hi. Hong naih hiaihiai a, ka gintak bang tak in Kimpi Dukan ah hong lut hi. Chiang deuh in kana en a, a perfume gim ka hon diik kha bang chu, hinna huih diik kha mah kibang in, ki nui heuhau mai dan hi'n. A etlawm sa in, ka mitbang ka si kha daudau zozen hi.

A duang etlawm na in hon kuai zou tel, a sam sau ngihngiah te a liangtung ah a ki phalh zihziah ua, a mit la chu tuipi dum diidiai mah bang mai. A biang san cheuchau te kumpipa huan a apple min dek san tentan te sang in le a etlah huai zo tham. Tawp chokchok bang a ut huai tel mai. A mel himhim le 'Vaai Mistery' ten siamnel tak a a bawl uh a bang kasa hi.

“Hichi zaw deuh leh…” chih di a om mahmah kei. Hoih in a hoih pumlum ahi deuh tak. Nou le hoih nasa di un kon ging. A awmbawk la chu, amah toh ki tuak geih, etlah huai hun tawk chi mai ni maw. Beach ah bikini in hong pai lele sun nileng in a et theih thou di. Melhoih et a nuam a, lungsim a zangkhai hi. Hiai nu a muh ziak a “Oho.. nang nana hi maw?” chia Unaupa (L)Thangboi Mangte in siam tak a’ ana awih ngiahngiah ahidiam kachi hial hi. A hi tawk di maw?

Huchia bang teng ka ngaihtuah lai in, a paikhiak lam le ka thei nawn kei hi. Ka hong daak khiak leh a gaal ah ka muh changchang lai hi. A kin a kin a a nung delh in, ka phak dektak in kenle houpih di ka chi hi. Awl a, a kiang va naih phei in “Den a bang hong lei e, kon muh ngei bang kon sak dan chu aw..” chi’in kava houpih ta hi. “Ka Pa kuva di hong lei zual kahi, non thei ngei kei di.” Chi’in hon dawng lauh hi. Houlim sutzop na didan chu a vang khop mai. Gen zok di thei lou in, “Bangkhat na FB min hon hilh ve Friend Request kon khak di” ka chih leh. “Nang kua e, zummoh vanglak, kon thei ngei kei ka chih za lou mo??” Hon chi gega vial hi.

Ka lungsim in, “Vial mahmah New Lamka ah kei hon thei lou om dia hia.” ka chi hi. Keile lungkia tuan teuh lou in, “Hon thei lou taktak na tel mo, hon thei kei le chin le na No. bek hon pia ve maw, i ki SMS zel kei dia.” chi’in kamsiam theih tawp suah in ka ngen mawk hi. Hon ning sim chu a hi ta, “Kon thei ngei kei ka chih leh hunsak ve, bang kisa e, na mel siatsiat toh, Tuivai zawng na batbat toh, limlang ah ki-en ngei lou mo? Nou khawng maimai houpih di ka hi kei aw. Na melmel toh, khovel ah nang kia Pasal om le chin le kon deih tuan teuh kei di. Nang leh nang le ki-en ve, pheuhphouh chin, leekluak teh..” chi a hon kikou khum toihtoih mai chu aw, ka bil ah a lut chiang khop mai.

Ka kiang ah pai te bang in hon en luakluak geuh ua, khutchin kawm ah tum theih himai le maw ka chi ngei mai. Zum lua kisa in ka khua-ul in ka pumkawt vek hi. A hon paisan lam le ka thei der kei. Tuni chu flop taktak ei ve chi’in innlam ka kik a, lamtawn in ka kingaihtuah hi. “Bang dia hichi melsiat lawmlawm ka tel dia aw, Tuivai zawng le kimu kha ngei sam lou a huai toh va kiteh kak chih himhim.” chi’in ka thangpai petmah a, utleh inn ah Deih Anglai khawng ngai kawm in ka om maimai di, ka chi ta hi.

Gate ka hong lut chet chih di’n ah ka verandah uah ka Pa ana ding gemgum ka mu a ka kiguih zawzen hi. Bangmah le ka gen man kei. “Koi ah va pawt geet na hia, na Vok-ann huan di thei lou a. Tuban ka thu lou in na pawt non rengreng sinkei, innkhuam toh hon henbelh di ka hi. Inn ah na om lelah nek di kia zong gualgual nilouh, huchih louh kal a ihmu, zatna bei. Na lawmpa Thangboi te bang na en ton ngal kei dia, sawl ngai lou a nna sem ua, sum loh ua, nang tel chu aw, kon thei zou mahmah kei. Nitak ann ne zou lah kamkhuah na toh tai pawt pah, pai hun lah thei lou, kong kalh tu a pang gige. Nang kon vak sang in Australia Vok Tilnei khat vak zaw leng le ka meet zaw di. Na mel lah sia zomah, Zi le na mu zou dia hia, mu le chin le na bang a vak sawm na hia oi. Na melsiat lele Laa bek siam ve? Zatna di himhim ka hon thei kei, pai inla phaitam ah Vok-ann va huan oh..KIN!!” Chi’in hon hang khum zialzial maizen chu aw, nuam het lou ahi.

Den mahmah a lampi ah ka thiltuah le deihkhop lua ka kisak hia. Inn bek ah tawldam leh lungnuam deuh a om di ka chih lai in, lungsim sa vilvel kawm in Vok-ann huan na buuk ah keikia in kava tu hi. Lungkham, mangbang tak a ka omlai in ka Momawi ka lungsim ah a hong lang guih hia, ka halh huai hi. “Ka Ngaihno mahmah hi aw, hon duat eive maw, kei sang a le hon ngai zaw hia, bang dia midang kava delhdelh sek ei dia aw? Tuni a mah kiang ah va hoh bang hi maizen leng hiai bang teng tuak lou di hi’inga maw. Poikei tuahsa chu tuahsa hita, tunitak chiah kava pawt di..” chi’in kei leh kei ka lungsim in ka ki houpih hi.

Momawi kia ngaihtuah ah ka om lai tak in ka lawmpa John kintak in a hong tai lut a, “Muana, gen masak di pen le ka thei zozen kei, bangkhat Momawi thu nana zakha hia?” chi a hong pau thethu tamai chu aw. Ka BP a sang top !! “Bangthu a tamai zen a, bangmah ka zak louh pi” chi in ka dawng hi.  John in le kisuanglah mel tak in, “Kon gen mai di aw, Momawi in Pasal nei dek chi ua, huai I Vengkhang lam ua Rice Mill nei te Tapa’ Mungbawi toh khanawn chiah kiteng dek uh…” hon chi numnum ta hi.

“Ka ging thei kei, ka phal thei kei, hichi bang thil om thei lou di. KA GINGTA THEI KEI..!!!” chia ka kikou khiak laitak in ka kiang ah ka lawmpa Siama in hon sawi ek ek a, “Muana, bang chi e, halhsuah dih na kuan hun di hita. Huai ah singpi san ka awmsa om va dawn in la, va ki hahsiang oh, ihmu mangpau hi deuh reng mai” hon chi hi. Ka hong halh suah chu.. Katereisei! Maizen aw!!!... ka ZALMANG ANA HI MAIMAH !!!

Hilele, numei te mawngmawng chi kawm numnum thou-thou in ka sepna mun zuan in ka kuan ta hi.