Aw Nang 'KHUGA DAM' -

By Jamin H vualnam

Atui (Khuga Dam) lah kiching in amual aguam tuum suak pialpual, aluan-naang tuilong (Pipe) lah lianpipi in kikhung suak zengzung, a kholnaang (Tanky) te lah munchih vengchih ah ahawmpi in kidiah khaang (crack) vek tah. Bangziak ahi diale tua isuan leh ikinepna uh Khuga Dam Tui tunitan dong a kingaknataak achinlouh nilouh??? Abulpi leh hong kipatna a Dam mahmah diklou hia? Atuilongte a tui luang theilou maw? Tanky te a tui kikhol theilou hizo hia le? Ahihkeileh lah atui kidaihzou mahmahlou ahi zodiam?!... Aziak asan leh adiklouhna khat a om chihna hipeuhmah in maw. Tuabang mah in, I Zogam (khuga dam) lah paamtuul in kiphah diapduap, atui hongluan ziahziah naang (pipe) Heutu, Makai, mipil leh misiam, 3M (MDC/MLA/MP), Officer lianpipi, Organisation, Association tuamtuam lah kiphahsuak zeelzuul tahang a. Azaalzouding a hamphat pihding leh akholnaang (tanky) mipi, khua-le-tui lah munteng, gamteng a kizalh phengphung. Eikhong hichibang zeelzuul mudia ipianmatham pek a District bang anakinei zozeen (Churachandpur). Huaileng. 'Lamka' chih a khekzoulou, khek ut-tuanlou, sawmlou himhim ihi uhia? Churachandpur chih lah ideih kei uh ka sasa a. Huan, Ei-le-Ei, gamkhat, sakhat, pau-le-ham kibang/kithei, innten lou ten kibang, nek-le-taak leh tawndan kiguizuih te' bangziak a kituaklou, kitongtong, kimelma a Ui-le-Kel bangden tel ihia. Tunitan a Khuga Dam Tui ineektheih louh leh phattuam pih taktaklouh toh kilamdan na ineikei uh. Huaileng aziak asan leh adiklouhna a om chihna hinonzel in maw. Abulpi (dam) centre/state hia, aluanna leh alampi (pipe) 3Mte (MDC/MLA/MP), Hetu/Makai, Oficerte, Organisation/Association te hia, ahihkeileh akholna (tanky) mipite leh koihiam a pan diklou ahia chih zonsuah a hoihtak a suichet ahihnung a ibawldik/bawlhoih kin uh deih huai petmah ta hi. Tuiduh dangtaak a aneu alian, ateek a khang, amei apa ipuuksih khit ma un.

Kuahiam mikhat, pawlpi khat, organisation/association khatpeuh chihna hilou in, Keimah lungsim honkam leh ngaihtuahna apan in genbehzek taleng. Hundang leh kumtampi paisa thu leng hilou, zanzek kumkhat/kumnih sung apan lungtang honsun gegulh nilouh, naai la a hontum litlit thu hivo! Eipawl in ingaihtuahna leh ilunggel bang, deihdan leh hisaap dan a thil hong omlouh a apailouh chiang in ipumhehsuk ua paltheih palmoh pal in i ui-ngawl gamphut khasek uhi. Tuabang gamtatna in siatna, supna, hoihlouhna leh kikhonung siikna piangsak a lah kikhelta ahih hun omthei hi. Huan a vaangtah kholdiak te'n Zawng (monkey) thuaksik Ngau in thuak chihbang deuh in kimokthuak khanak hi. Achang in huchibang gamtatna ahoih leh phattuam hun om mahleh aphattuam louh hunleng om veve ahihdan phawkkom in, aziak asan leh a diklouh nalaitak theih chet poimoh mahmah non hi. Ahi a mikhat in banghiam asep dingchiang in amah leh amah kikhutdot khenkhat om mahleh a tangpi in midang kuahiam khat thudotveu a, ahuchih louh topin alawm avual amaingal mikhat theisak/hilh khanak hi. Ahuchilou te lah midang kuahiam khat/pawl/group khat in asawl hi nuam mahmah hi. Tuabang ka ngaihsut chiah, Jesu Khrist, mohna khelhna leh chitlouhna neihetlou hinapi a huphulh ngoihgngoih koma sih tanpha a tatna nna hong sepsuah Apa thupiak leh sawl a om ahihdan honmusak sonson hi. Huchibang ahihleh a sawltu leh a semsuahtu kua athupi zaw in kua ikipahpih zawdua le? Kipahman piakding hita leh kuan a tangzo dia? Gawtna piakding chita leng kuapen gawt a kuapen ngaidam diing? Ngaihtuah tham ching petmah. Akpi leh Aktui kua upa zaw chihdan piansim a kiseel theih na khop ei ve.

Salphate isuun lai uh (anti-3 bills ziakin), asihdan uh ithei, thautang kikoih maimai sukha a si ahikei uh, thautang kaapkhetu a omziak ahi. Huan tua thau kaaptheihna (mihing/mipi tung ah) sepaih kuamah in aneikei himhim (sepaih toh kidou ihihlouh ziak in). Huchia thautang khahtheihna neilou pi a mi akaplup theih uleh koihiam apan in phalna/kaaptheihna a mu uh chihna hilel hi. Achihleh akaaptute bangchibang action akila a? thautang a mipi kaap theihna phalna petu kua? Tun koi ah bang dinmun in a om a? Misi 9te lak a khat leh apuante kigumang zeih!!! Adik hetlouhna banghiam zaw omtawk mahmah in teh! Tuakia leng hikei, Unaupa Thangliansiam vuaklup leh khetlup ahih nung a awklum sonson, naak hin non keimah ve!..? Poi isa ua kuapeuh lung honphong, YPA panlakna in lampi zui in mipi'n public ground ah DC, SP kiang ah MEMORANDUM ipia ua ipangkhom ua kipah huai lua. Chihleh unaupa sihna tungtang a thu-le-la veng sipsip hia le? Athat tu leh asihnung a khailum lailai te' tua koi a bangchi? Thilpaidan leh omdan adikhetlouh nakhat zaw om kiukiau mah in teh! Tuaban ah mimal innkuankhat teenna inn huangsung a Bomb vakoih chihtel bang tuh, hongthat kahita chihnatuk hilou maw?!!! Akoihtu leh a koihziak, ahihkeileh asawltu om maw? Thunung thuma bangmah suitheih louh chihdan deuhte zaw...!!!. Adikhetlou thil kiselgu banghiam khatzo omtawk mah kiukiau in teh! Beinailou...beinailou... adangkhat omlai, igenzou vet deh....March ni 5,2017 nitak a Lamzang khua a election vai a unaute mi nih (Thangmuansang leh Thangsuanmung) pimang a gaalmat samat bang hial a si leh hingkaal a kisoisak chih hizeltel lomlom..!!! Athu ala alum hithit lai ninih nung suntang lai a Thangmuansang naupa' Zi pimang hinon!!!...Huihaaaa....hunta hunta huntaaaa..... Akoi abang hileh mipimangte leh soisatute, inn luh leh haal chia mat a om suangkul taangte bail/khahkhiat chih hiphot, hoih touzel chihding hia/hilou???... Maban bang dinmun in hongom zel dia? Bang chibang vaihawmna, kalsuandan leh ki-ukna te'n Igam leh Amite adi'n lampi hontotpih du'a chihtuh kuapeuh bildoh leh mitsuan hi gige eive....

Ahimhim thudan in mi'n ahinna hial ataan ngalleh aziak asan leh thudik thumaan bang ziak a suitheilou ihi d'ua le? Tuabang suidia pilna siamna leh hihtheihna nei omlou ihi d'uam? Suitheih louh chih bilbel thil omthei mah ahi a hia leh? En isui a ihihtheih keileh ahihtheite (eg: CBI) khut a mohpuakna piaktheih louh ahi diam??? Khuga Dam Tui adiklouhna leh hoihlouh namun itheihchet phot keileh bolhoih chih omtheilou ding. Huan upmohthu leh gintak thuziak a hiaimun, huaisan ahi adiklou leh hoihlouhna chia bawlhoih dia kisakmok chihleng thildik hilou leh bawldik chih omthei tuan lou ding ahi. Tua ahihman in asiatna leh hoihlouhnatak; abulpi hia, atuilong hia, atanky hia ahihkeileh atui kidaih mahmahlou hizohia chihte theihchet a huai pansan a bawlhoih nang kong/lampi diing hong ommai louding a diam??? 'Khuga Dam Tui' a ombangbang i hamphatpih a lungkim kituak leh mailam galdot a kinepna hoih leh siangthou a ikalsuan nang in tuh asiatna, hoihlouhna, diklouhna mahmah a bawldik, hihdik poimohpen kasave, ken chu....(theihlouh ziaka genkhelh a om leh ngaihdam).
-Jamin H vualnam