TASAM LOU A OM NA UT HIA
By Pastor Rawna Kopsiam

Tasam lou in i dam sungteng om mai zen leh a nak ut huai e maw. Banglam peuh ah tasam lou a om ding chu kua a utlou i om thahah dia. Himahleh hiai a tasam lou chih in hauh emum na lam sang in a hun leh poimawh bang zela neih leh panpihna muh lam gen ut zaw a bang hi. Kumpi David in a naupan lai in belam chingching sek a, a belam chinna ah belamte kul leh poimawh a thei mahmah hi. Belamten a nek ding uh loupa hing a poimawh ua, dawn ding tui leh khawl tawldamna mun nuam leh galmuanna mun poimawh uhi. Hiai belamte poimawhte David in inn a koihsak vek hi zenzen lou ahi. A poimawh bang un gamlak ah zawn pih zel hi zaw hi.
Belam hi gamsa dang banga hat leh teitak ahihlouh ziak in ven leh kep ngai mahmah ganhing ahi. Man a nesia thei gamsa hat mahmah humpi, vompi leh ngiate lak a bittaka a om theihna ding un a mau thahatna neilou un a chingtu a kinga ahi mai uhi. Hiaiziak ahi ding Jesun leng kiloh belam chingten a belam chinte uh a din a hinna uh a pia ngam kei uh. Lauhuai a om chiang in a belamte a taisan mai sek uh. Kei zaw belam chingpa hoih ka hi. Belamte a din ka hinna ka pia achih.

Kumpi David in a mah belam chin experience apat in Amah mimal takngial leng chin ngai a kep ngai lua a hihdan kithei mahmah in Amah chingtu hi Toupa ahi chih thei chian mahmah hi. Mun khen khat ah Toupa hon chingtu hilou hileh ka hinna mun dai ah a om khinta ding chi hi. Kumpi David in Toupa amah chingtu a aneih ziaka a taksap loute :
Khatna: Nek leh tak a tasam lou. Tuni tan a i lauh penpen uh chu meikuang paisuak, ann huan ding nei lou, nekding neilou a om khak ding ahi. Hauh emum ding ngaihtuah banlou zing leh nitaka nekding neilou a om khak ding lau kitam mahmah hi. Hiai bang din mun a ding kha miten Toupa amau chingtu ahihdan theichian khawl se uhi. Belamte leng ganhing hatlou ahihman un a bitna ding un chingtu hoih ah kinga mahmah uhi. Toupa Chingtu a neituten nek leh tak tasam lou ding uhi. Jesun tungleng vasate en un buh a tuh kei ua, buh inn ah leng a sekkhawm kei uh. Vantunga om na pa un amaute vak hi. Noute amaute sanga manpha zaw tham na hihman un hong vak mahmah ding hi. Ahihang a gam leh diktatna zawng masa un chi hi.

Nihna: Hinna bawl hoih zel. Hiai khovel hamsiatna gam ateng i hihman un huihsia hisiate ziak in nat leh sat tampi kithuak thei zel hi. Damloua i om chiang in sihmai ding kilau thei mahmah hi. Hiai hun chiang in Toupa i hinna hon bawl hoihsak zeltu ahihdan phawk thak in a om zel hi. I nek i dawnte i hinna leh taksa pum hihsia thei tampi tak om napi in kidek lou leh kidam hetlou in i ne in i dawn in i hih suk zialzial uhi. Huchipi in leng Toupan i hinna hon bawl hoih sak zel lai hi. Kipah huai chi ua. Damlouhna kia hi lou in i heisuk i heitouhna sihtheihna mun ngen ahihman in kumpi David in leng Toupa hon chingpa hi kei leh ka hinna mundai ah om khinta ding hi a na chi hial hi. I Khristian hinkhua leng niteng a bawl hoih leh kepbit ngai gige hi.

Thumna: Diktatna tasam lou. Hiai hi tulai a mimal leh i nam pumpi un leng i taksap pen uh a bang mawk hi. Kumpi David in bel Toupa hon chingpa ahi a diktatna lampi ah hon pi zel dinga, diktatna ka tasam kei ding chi ngam eive. Khristianten bang dia diktatna tasam nak i de aw. Diktatna in nam a tawisang chichi napi in diktatna lampi i tawt kei leh bel i nam pumpi ua tawisang a om ngei lou mah ding zaw i hi ve ua. Siamna pilna leh sepna lam aleng nam dangte phazou lou i chihchih uh kha diktatna lampi i tawtlouh ziak uh hi di eive maw. I gam ua diktatna a om nawn kei leh Toupa hon chingpa ahi i chi ngam lai ding uam? Toupan a chin mite bel diktatna lampi tawna pai zel ahih uhleh ei diktatna lampi tawn kha loute Kuan hon ching hipeuh mah ding ahi le.

Lina: Hangsanna tasam lou. Diktatna chu humpi bang in a hangsan chi hi hang maw. Hangsanna tasam mahmah i hihleh bel i diktat zohlou ziak mah uh ahi mai diam maw. I gen ding bang a thugen ngam nawn lou, i sep ding bang a nna sem ngam nawn lou chihte hi min hon vua ding uh, min hon that ding uh chih sang a masa zaw chu diktat lou i hih ziak hi zaw veh aw maw. I Hinkhua lau thawnna toh kidim. Nidanga khelhna thu hangsan taka gen sek china tua bang dia gen ngam nawn lou la. Kuaman gen nawn ken na gen leh kon that ding uh hong chiloupi. Nang leh nang kisiamlouh na hih chia. Nang khelhna hih hih chin a midangte khelhna hihlou di a vathu hilh chu nuam nawn chiah lou di ei mah ve. Ka man leh mang ka himai ding chih ngamtei chu poimawh mahmah hi. En i man khak di uh lau thei lua.

Ngana: Khamuanna tasam lou. Nidang in pi leh pute hun lai in mihing hilou in gamsa khawng lauh in nei uhi. Tulai in gamsa hilou in i mihinpihte kilauta. A mal a om ding bang kilau. I hauh deuhdeuh leh khamuang theilou deuhdeuh. Paunak in Tangtawn Toupa vualzawlna in hauhna tun a dahna toh kihel lou hi chi hi. I hauhnate in khamuanna honpia lou a dahna lungkhamna toh om gige na hih leh zaw i hauhna Tangtawn Toupa vualzawlna ahi kei a diam maw. Salam a khamuan louhna kia hilou, Khalam a leng khamuang theilou na hih leh zaw Toupa hon chingpa a nei kha lou na hi lim ding ka chi sanggam aw.

Gukna: Vualzawhna tasam lou. Hon doute mitmuh in ka ma ah dawhkan na bawk khin a, ka lutang thauna nilh khin a ka nou a dimlet hi. Tunitan a vualzawhna chihte himhim i hinkhua a kilang thei lou. I hih peuhmah lohsam, vuallel lam a pang den mai bang ziak ahi dia le. I khristian hinkhua ua leng vualzou ngei mahmah lou. Nung tawlh hiden mai. Puksia den thou zou nawn lou. Aw khuapi hoih etlawm ve chia na sung ah vualzoute leng. Tunkar i ngaklah mahmah khuapi kha vualzoute om na ding ahi. I tungzou tei na diam le. Kilawh belampu khat in houh hon chingching kha ahi a hialeh. Melma na tuah chiang a hong taisan geih zel ding chingtu nei na hi kha ding kivel thak in. Ngai in Belampu hoih in hon sam tu in. Amah kiching sak mai lou ding na hiam.

Sagihna: Hoihna leh chitna tasam lou. Hoihna leh chitna in ka damsung teng hon zui zel ding hi. Toupa chingtu a neite a damsung un hoihna leh chitna in nusia lou hi. Hiai pen ahihleh nang na kitheih sang in midangten hon theichian zaw ding uhi. Na hoihna na chitna midangten gen ding a nei ngei uh hiale. Na gitlouh dan, na huham dan khawng kia gengen ahih uhleh bel hoihna leh chitna in hon nusiata ahi zaw diam. Toupa chingtu a nei ten nek leh tak kia tasamlou uh hilou in chin hiai a tunga i gente leng tasam lou uhi. Nang mimal kivel thak dihle hiaite taksap na nei hia?
Mikhat damlou TB vei hi dia kigingta in, Doctor kiang a va pai in chin. Doctor TB vei hi din ka kigingta a hon enchian dih a chih leh Doctor in, TB veite omdan chu ka thei mahmah hi. Kon gen dia nang leh nang a na kivel chian mai in aw a chih bang deuh in hiai a tung a i gente zang in na kivel chian mah dihle nang hon chingtu Toupa ahi na hiam ah. A gam leh a diktatna zawng masa lehang atunga i gente zaw Toupan hon pia mai ding ahi.