TRIBAL MOVEMENT PHASE II AH
TRIBAL MIZIA DEUHMAI IN KAL I SUANKHAWM UH AWLE
By Pastor Rawna Kopsiam

Amasa in i gam-le-nam a ding a hinna a na pia khiate zahna salaam ka hon bawl nawn hi. Salaam i buk louh ngal a mau a din hihtheih dang kinei lou hi. Amaute i it un i ngai mahmah mah mai uhi. I gam leh minamte a dia a kipiakna uh thupi i sa in zahna sang pen i pia hi. Amaute sisan in Manipur Tribal mite hon zawmkhawm a, sisan manpha hong luang in political awareness thupitak hon tun a, I khangi khang ua mangngilh nawn louh ding sisan manpha chu ahi ta mai ve.Amau bel leitung haksatna pellam ah separate administration taktak om na mun tungta uh ahihman un leitung administration toh zaw kilamdang sa mahmah unteh. Zong tawldam mahmahta ding uhi. Huai ban ah Gam-le-nam itna ziaka liam-le-baina a na tuak unaute i phawk in i thuakpih mahmah uhi. Zahna i piak toh kitawn in ahaksat lunggimnate uh i phawkpih zelzel uh poimawh mahmah hi. A site i buaipih bang in, gam-le-nam a dia thuakkha a damlaite kithuahpihna pia thei zel leng lungnuam mahmah ding uhi. Martyrte i ngaih thupi bang ua liam-le-baite leng i ngaih thupi uh hoih mahmah ding in ka lamen.
PHATUAMNGAIHNA PHATUAMLOU
Phatuamngai i chih chiang in thil a phatuam ding ahihnak leh ngai poimawh, awlmawhtaka sem tuntun chihna ahi. A phattuamna omlou dingte ahihleh tawpsan pah, nutsiat pah theih kha, Phatuamngaihna phatuam ahi. Huai kawmin, Phatuamngai tak a hih a i na kitheih, maban a Gam-le-Nam a dia hoihzawkna ding lamen a thupukna i na lak sate, i hih lelte' in ei siatna ding, i Gam i Nam siatna ding, ei sung a kimelmakna a tun kha thei khop a thil kilang a, hoihsaklouhna miten a gen kheukhou nung ua leng, thupukna chu thupukna, Sialpi pai a pai ding himai, chia thupuknate en-kik utlou leh a hoih zaw ding a kheng utlou a, hih teitei na pen, Phatuamngaihna phatuamlou suak thei zel hi.
Tlawmngai i chih chiang in phatuamngai toh ki-unau, nna hoih sepna, a phatuam ding ahihnak leh a semtampen, a tawlpen, a sengtam pen, zum-le-zah tuah ding om leh leng poisa lou, gam-le-nam, khotang hoih nang ahih nakleh a mau a dia man na ding ahihleh leng poisa lou apang teitei, a tlawm zaw hih leng poisa lou, Bible in bang dia kizangsak zaw mai lou achihte ahi. Ka man leh mang ka hi mai ding chih tlawmngaihna paukam ahi. Hiai bang lungsim neite tribal mite i hi uh. Hiai bang lungsim toh khovel a apiangkhiate i hih mahmah uh midangte hon phaklouhna ahi. Phak leng hon pha ngei kei un teh. I gam leh minamte leh khotang a ding a hoih zaw ding ahihnak leh kiniam khiak in semsem - damdam chi in thukhat in vaihawm khawm zel ni. Midangte idea koppih theih zel bang pilhuai mahmah ahi. A hun leh a mun zir a ngaihdan khek theih zel bang leng thilhoih leh phatuam mahmah ahi. Tutung in midangte idea zang phot leng ei idea pen nawlkhin chihna hilou in hun dang a dia limsit chihna ahi. Hun lemtang ah ei idea hong kizat theih hun om veve ding ahi.

TUP LEH LUNGGULH KIBANG LAH KIGENSETUAH
Centre lamte, Bill thumte tungtang ah a sa-ik mahmah uh chih leh tribal mite hong angvan mahmah uh chih thudik gen khiak tam ngailou ahi chih theihsiam hoih mahmah ding hi. Tun Bill 3te laka a khat, chiang taka hentang in a omta, a dangte leng hong hichi toulai ding in lamen lehang. Hichibang hong om theihna hi, kei ziak ahi, amaute pawl pang ut kei le uh leng koute panlakna ziak ahi, chia Pathian min gen khalou leh hiaitan A honpina a leng kipahdan le theilou a, phunphun a i om khak ding uh, thil lauhhuai mahmah ahi.
Khat veivei ngaihtuahna ah, ei-sung kigense tuahtuah mai, ki-enghoutuah, mimal khat leh mimal dang khat kigense tuah, pawl khat leh pawl dang khat kithulak tuahlou dan in langsek mahleh, hoih takin kidong le hang, kua a bill 3 te a paisuak ding deih, ei singtangmite huchi bang lungsim nei kua mah omlou ding hi, a diakin ei Zomi sung ah. Himahleh, thu ginalou i kiphuah tawmsak ziak maimai ua, hichituk a i sung uh chidamlou hi ding hi. Kingaihtuah thakni uh. I lungsim tawng uh kitheihtuahlou/kitheih sawmlou a i om ziakun, a mau pawl lungsim taktak a panglou chia i kingohtuah vengvung lai un leng, kei muhna ah, ZRO, MP, MLA, MDC, innpite, JAC, MTF-D, ATML, Numei Pawlte, i tup uh leh i lunggulhte uh kibangvek hi in ka mu hi.(i lampi zuih dan uh zaw kibang kim sipsip lou mai thei),
Tup kibang, Lunggulh kibang, himahleh a kibang dan a kalsuan khawm utlou, sawmlou a melma dan phial khawnga ki-etsawm i hi ua hia, chih theih dekdek in omhi. Upaten kamsung ah lei leh ha leng kimuhdah ziak hilou na pi in kikei kha sek ahi chi uhi. Gam-le-Nam it mahmah, tua ziak mah ah naktaka kipei in, makai a leng pang, himahleh i gam i it sang a, kua hiam khat i huatna, kua hiam pawl i huatna lianzaw a bang sim mawka, ki-en thak ni uh. Mimal kua hiam khat huatna, kua hiam pawl khat huatna ziak a kalsuanna in, i Gam-le-Nam a din bangmah phattuamna hon tunlou dinga, manthatna hon tunzaw ding hi. Hichi bang a i om uhleh melma Setan deih dan a hi dia, i theih louh kar un, Talpak khenkhat khuak kikopihte i hi kha zaw ding uh e. State lamten Bill thumte ziakin Cental Govt lam nihvei thumvei deng thakthak mahle uhleng Central Govt lamten a na phawk khaklouh uh, a mangngilh uh thu hilou ahihman in phatuam nawn khollou ding hi. Talpak Thautawite a lauhman un, State Govt in zaw Central Govt lamte a thudan in, a changchang in a muh uh ngai kha mah in teh.
THA KIPETUAH NI UH
Bill 3 te tan a lungkim i hi nawn kei ua, 6th Schedule kou Tribalte a sa ahi, hon pia mai unla, Manipur State apat hon inntuan un, Separate Administration in hon koih un, chia Government a thutut a kikoukou i hi uhi. I Unau Naga lamte a toh (Naga Peace Accord, Final settlement) a hong piang khia khawm mai diam, ahihkei leh, kha nih kha thum hong kihaal diam theih hilou. Bangteng hileh Central Govt a i thilngette uh kha UGte, Government a i palaite uhleh mipi tel lou a piang khe ngeingei lou ding thil ahi chih mipi lam in ngaihtuah in nei thak nawn leng uthuai ka sa mahmah mai hi. Thautawite, Palaite leh Mipite'n kal i suankhawm uh leh i lohching ding ua, khat lel i kinawtsiat uh lehleng, bangmah i mu kei ding uh. Tua i thildeihte uh, Political decision ding ahia, political will a om chiang kia a hong piang pan ding in a lamet huai hi.
Huaiziakin, Political will i chih chiang in Govt lamte / Party tuamtuamte ei Tribal mite a a hong lunglut ding uh leh en leng a hong lunglut theihna ding ua i chalaisiam ngai i gen na ahi. Tua bang a om theihna ding a, panmun kihawm siam a, mahni panmun chiat a chitaktak a panga, kithuzak tuah vek a, kal i suan khawm uh a lou theilou ahi. I Thautawi te uh (UPF & KNO, ZRO) hih ding om ding, Palaite (MP, MLA, MDC) hih ding om ding, Mipi lamte (Innpite, JAC, MTF-D, ATML, Numei Pawlte) hih ding om ding, i hih dingte uh kigense tuah lam hilou a, i hatlouhna lamte ua kipanpih tuah a, kal i suankhawm chiang ua, malam sawn thei pan ding i hi uhi. Mipi leh Palaite' pressure piak hat ziakin Thautawiten Govt toh a kihouna uah tha ngah ding ua, Thautawite' chihtakna leh vaihawm siamna hang in mipi leh Palaiten, kalsuan dan ding kichian thei in, thah ngah ding ua, Thautawite leh mipite kithutuahna hang in Palaiten Government/Political Party te lak ah Political will create/bawl thei ding ua, thah ngah ding uhi. Tua banga tha kipetuah leh tha kingahtuah a i om chiang un, Pathian in i kalsuannate uh hon vualzawl sak dinga, i lunggulh leh tupte uh tangtung thei pan ding i hi.
TU HUN IN
A hihleh chik chianga kalsuan khawm ding, chih dotna poimawh tak ahi. Hiai ding in, HUN PAISA (Past) in, a gah hon piak theih omlou, pai khinta hi ven (ki et-kik theih chauh ahi), HUN HONG TUNG DING (Future) in hon piak theih om tuanlou, hong tung nailou hi ven (panmun bawl/khoh theih leh duhthusam sam theih lel hi), a hihleh bang hun a lohchinna om ding ahia le? TU HUN (Present) kia in, lohchinna leh vualzawlna hon tun thei. TU HUN a zang manpha leh a zang phatuamte a lohching hi mai ahi. Huaiziakin, i lunggulhte uh i muh theihna ding un, TU HUN a, i heutu tuamtuamte uh, i Thautawite (KNO-UPF, ZRO), i Palaite (MP, MLA, MDC) leh mipite (Innpite, JAC, MTF-D, ATML, Numei Pawl etc) te'n kigensiatna, kimuhdah nate tawpsan a, hoihlouh i kisakna uh a om leh mawh kimaisak tuah a, khat-le-khat kitawsawn tuah a, kal i suankhawm ua, i zatmanphat uh poimawh penpen hi. Hun hong tung ding (future) te a duhthusam samsam mai in, TU HUN HOIH (Opportunity) mangsak kei ni. Kum nawn 2017 a MLA election ding khawng ah zaw kibuaisak kei ni, mimal chiat in i deihte uh i tel ding ua, i deihlouhte uh i tel kei ding ua, veng hi mai ahi. Gam leh nam ittu mi piching ngen in teel ding i hih chia.
TRIBAL MOVEMENT DAN NIHNA (PHASE II)
Tutan a i dinmun uah, Central Govt in ei Tribalte hon aangvan mahmah uh ahi, chih a chiang mahmah hi. Huai kawmin, ei deihdan geih a, bill 3te tha khat thu a thah gaihvek ding chih pe'n, a langkhat lama Talpakte hong kiphin kik ding dan, sisan naisan tampi luang a, ruang tampi kikham beh ding hi thei a hihna leh, amaute mah leng India mi mah a hihna ua, etdan kirual deuh a hon et uh poimawh zel hi. Himahleh, awlawl a tua billte zaw, bang mahlou hong suak vek ding a lamet huai mahmah ahi. A hihleh en tua maban bang chi kalsuan ding, chih dotna poimawhtak ahi.
Tua Martyrs 9 te ruang toh i thil nget uh kikhek i sawm mawk pen khovel a idea hoih pen hi khawllou mai thei , chih nguntaka ngaihtuah thak tuak ei diam? Central Govt ngaihtuahna din, tua i thil ngette uh toh kikhek ding i chih pen, hon hih pichinsak bang hile uh. India ah thil ngen/demand bawl tampi om, ei a sanga tamzaw ruang hong kikham henla, ka thil ngette uh toh hon khek un, huai ma ka misite uh ka vui kei ding uh, Tuma lam in leng, Manipur Tribalte thil nget huchin na hihsak uh, chia thil hong om touhtouh ding, a kiven uh ngai mahmah ding in a muh theih hi. A hihkei leh Govt in misi ruang toh demandte kheng toutou ding ei diam? Tua bang idea toh lohching ding hi le, khovel hong pai zel ding pen, misi ruang a kilei/kikhek touhtouh ding, mulkim huai lua lou ding ei diam? Huaiziakin, Govt lam inleng i thil ngette uh hon pia utsim hi le uh leng, Salpha 9te ruang hon vuiliam phot uhen, chih lungsim nei ahi mai duam? Manipur Tribal mite a dia zingkhua vak ding mualdawn santa hilou hiam. Ahihleh maban bang chi'n kal i suan khawm ding uale. Mipi lah amhai gawp, gen leh sak lah tamlua, gennei peuhmah la khauhpai theilua/ vocal thei lua, Heutute a dia leng thupukna lak ding buaihuai, din khawl theih lah hilou, lah koi lampi zui a kalsuan ding chih theilou a malam suanlou a i om khak ding uh thil lauhuai tak ahi.

Hiai bill 3 te tan a lungkim i hita kei ua, maban ah tup-le-ngim sangtak nei i hi uh. Tuni tan a itunna uh, Tribal Movement hun/phase masa dan in koih leng bang a chi dia? Hun haksapi himahleh hiai tan honpi a hon makaih a, bill 3te leng hiai tan dinmun a hon koihsak Pathian kiang a kipahthu genna in hun zangle hang chiha ut huai mahmah. Huan, tutan a hoih lua hen aw, chia i kalsuanna ua, i hihkhelh khak uh, khat-le-khat i kisuk lungnat khakna uh, i kihehsan khakna uh, mimal kar ah, pawl khat leh pawl dang khat kar ah leh Pathian mitmuh a leng kilawmlou i hih khak uh tampi mahmah om kha ding hi. Thunung-thuma om nawnlou ding a kingaihdamtuahna, boycott leh etsante lakkhiatna, thupha kitawituahna, thu-khat, la-khat, satkhawm ding a kilat khiatna leh Pathian tung mahmah a ngaihdam ngetna, JAC makaihna in, Thautawite, Palaite, Pawl tuamtuam leh mipite'n, 30th August 2016 makhawng bang in, Programme chituam deuh khat nei dupdup leng ut huai mahmah mai maw?

Bill 3te passed nung kum khat chinni, 31st August 2016 ni in, Program Thupitak a bawl a, Tribal Movement dan nihna (Phase-II) puan khiatna neih dupdup mai ding, lunggulh huai kasa mahmah mai hi. Hiai Program a dia poimawh mahmah ding hong kilangte (i) i Movement in i tup uh leh lunggelte uh, maban pai ding dan/road map kichiantak puan khiatna neih ding leh (ii) Salpha mi 9te, zahna sangpe'n leh thupitak a vui khiat ding, chihte bang a chi dia le? Salpha mi 9te i it un i lainat mahmah mai ua, a kipiakna uh a thupi in manpha i sa mahmah uhi. Amauten a hinna uh ei a damlaite lungnuam zaw a i om theihna ding uh leh i gam maban ding uh khualna in a na pia khiata uhi. Zahna sangpen i pia thak zelzel ding uh aw.Huaiziak in hun i sak chiang un khovel pumpi theih ding in a vuina programme bawl hi henla hiai toh kitawn in maban movement pai ding dan kichiantak puan khiak hi ngal leh bang a chi di ??? Hiai program a chial khiat tuak kasakte:
i. Tunitan a Parliament House a, MTF-D panlakna a Member of Parliament a, i thu uh hon tangkoupihte tengteng.
ii. Manipur State polam a om himahleh i movement uh hon awlmawhpih Chief Ministerte, Politiciante, bureaucrats, Pawl tuamtuam leh mimal tuamtuamte.
iii. Member of Parliamentte laka Tribal mi tengteng.
iv. North East' Member of Parliament Forumte.
v. National leh international level tan a i Movement uh hon lunglutpih thei ding, mimal, pawl tuamtuamte
vi. Local, State, North-East, India leh international level tan a Thuthak saite/News agency tuamtuamte.
Hiai hun a tel dingte, Manipur sunga Church leader tuamtuamte, Manipur a Tribal district teng apat heutu tuamtuamte, Innpite leh mipi a tam thei pen, Thautawite (NSCN-IM, KNO & UPF), Outer Manipur MP, Manipur Tribal MLA tengteng, movement ziaka pawl kibawl khia tengteng, JAC, MTF-D, OMFT, ATML, AMTWU etc teng tel in, MANIPUR TRIBAL MOVEMENT PHASE-II thupitakin puankhiatna nei dupdup leng ut huai kasa mahmah mai. I Problems/buainate uh tamtak i theita ua, i lunggulhte uh leng i thei mahmahta ua, tua poimawh mahmah chu, i tupte uh tangtun ding (SOLUTION) ahi. Tua dotna poimawh mahmah khat chu, ARE WE IN THE PART OF THE PROBLEMS OR ARE WE IN THE PART OF THE SOLUTIONS, chih ahi.

HEUTUTE' KALSUANKHAWM THEIHNA DIN THUMNI UH
Government in tua i Thautawite toh kihou taktak dia hong kisa panpan, naktaka i thumpih ua, i nungthuap ding uh poimawh mahmah hi lou hiam? Ei sung a, tua suangthu 3 (Thautawite, Palaite leh innpite, JAC, MTF-D, ATML, Numei Pawl etc) a i heutute uh leh mohpuakna a neite'n, tup kibang leh lunggulh kibang chiat, pankhawmna omlou a lohching lou ding i hi uh chih a hong kitheih chiansem theihna ding ua, mipin naktaka i thumpih ua, i hanthawn uh poimawh hilou hiam? Tua hiai a suangthu 3 i gente uh amau leh a mau ua, hong tu khawm mai ding uh ei diam? Huchia tukhawm mai ding thubaih hilou theih a hihchiangin, palaina/tuanvai ding Pathian in hon piakna ding in leng thum ni uh. Pathian in Tribal Movement masa ah, lunggulh leh tup kichian tak hon nei saka,Tribal Movement dan nihna (phase-II) ah tua i lunggulh leh tupte uh tangtunna (Solution) hon piakna ding in thumni uh. I Society damna ding, i Gam i Nam damna ding, Politics a i lunggulhte uh a tangtunna ding in itna taktak toh theih tawp in pang fanfan kawm in thum ni uh, Gam leh lei Pathian a ahi a, a deihsak mite kiang a a piak zel mai ahi.
-----------------------------------