Zi Ka Neihkhakdan Tamlou..!!
Written By: K Lianthansang

Sepna hoihtak nei hilou hial ka hi. Himahleh, ka zi bel Solkal' buhpang (sumbawm) sawkpihte lak ah a telkha veve. Mi khenkhat in, ka zi hai a sa maithei uh; amah bel hai a kisa kei hial. Ka zi neikhakdan saupi a suut sawm ka hi kei a, suut leng ka suut kei diing. Niteng a kiloh a kuan niapniap gige pa'n, zi hoihtak khat ka neihkhak zenzen, lamdang ana salua om ngei ding a ka gintak ziak a, tamlou chik hon gelh lel ding ka hi. Ahih hang in, a taklatnop teng a kim veve ding.

Mimal a buaina tuamtuam neihte genkhiatna ding a kibawl hidia gintak, ' Buaina Khukpi' kichi 'facebook' group ah nungak khat in, ka ngaihtuahna tawngnungpen tanpha khawngliing zou ding thu khat hon post hi. Ka muh tung in ka ngaihsak pah kei. Ahun hong sawt deuhdeuh tak in, 'comment' hong tam mahmah mai a, ke'n leng ngaihtuahna chiimtak a ngaihtuah masa kawm in, a buaina apan a suahtakna ding lampi ka kawkmuh hi. A khawnung sawtlou in, message hong lut a, " Ka buaina leh lungkhamna n'on dawn zangkhai ziakin ka kipak....May God bless U " chih teng hong kikhak hi. Huai apan, tua ka zi toh kitheikha ka himai uhi.
Kei ka hihleh, Class – X lel leng phusuah zoulou a, cement tokpolh a kiloh ka hi. Huai kawmkawm in, Newspaper leng ka hawm kawm ngal. Ka kizenna mahmah ahihleh – tutna neu phan bang, chiang ( mehlom khawng koihtheihna) gat bang, phazah, lohpi, sengpi, seng ziing leh seng vang gat (phan) chihte khawng ka hihtheih lamtak ana hikha hi. Huailou in, van (things) sia himhim leng ka sawksawk mai a, ka bawlhoih leng tampi a om. Thil ngaihtuah vengveng masa a sep chihte ka hihtheihlam ahihban-ah, mi' buaina khawng genvengpih chihte ka hihtheihlam tak ahi.

Ka talent ( hihtheihna) lak a khat (mi' buaina sukvengsak) tungtawn in, ka lawinu toh ka kimaikha ua; a hampha khat chu ka himai. A utlua a zi nei ka hikei a, a poimoh luat ziak a nei ka hizaw hi. Ka pa'n hon omlouhsan ta a, ka nu damtheilou tak toh ka khosa uhi. Sanggam dang neilou ka hihman in, ka thawmhau thei mahmah uhi. Ka nu'n a chang in ann leng a huan zoukei a, nasem gimtak a tung a, ann kihuan chih khawng gentheih huai mahmah hi. Huai ziak taka leng zi poimoh ka hi a; a deihthu in bel ka deih law nai kei!. Ka zi bel, kei sangin kum 3 in a upa zaw a, duat leng hon duat mahmah hi. Ka zi neihdek in, gensiatna leh muhsitna tampi ka tuak a, ama'n leng atuah ngei ka gingta!. Dansiangthou a kiten lah, ka neu apan ka lunggulh leh ka kichiamna lak a khat ahihman in, taisiat ka sawm kei. Sum-le-pai neih dandan kaikhawm in, khualgam a om ka zi di pii dingin ka kuan uhi. Mi khenkhat, a zi ding pi na ah hohkei mahle uh, kei bel ka va hoh a; khakna a neih hun ua thu kigen teng leng ka thei vek hi.

Hon gensau zek lai leng. Ka zi, Solkal' sumbawm sawk ahihman in, a nu-le-pa'n hon sit sim uhi. Himahleh, a tanu neihsun un adeih pen, a deihpihlouh uh thil kilawmlou hizel hi. A lehlam ah, lengkul lam leng a hisim ta a, pasal neih a sawmtheih zenzen leng kipahpih adim-aha in om veve uhi. A khakna hun ah, a nu-le-pa'n thu hon gen tuak uhi. Tomkim takin, " Ka tanu uh hoihlua ahi ka chi het kei uh. Himahleh, kou keptheih dandan in alet tan dong ka na kem ua, nou leng na hihtheih tawp uh suah in ana kem un. Gari bangbang ahi a, asiat hun leng a om ding – repair hat a na pan hun uh leng a om ding a, huai hunchiang in len g duattak a na honna kepsak ngei uh ka lam-en uhi. Banghiam chi a, hong sawi-vak khak leh, 'a nu-le-pa suun a sawivak ahi' chi'n, kou hon mohsa zaw un. Huai ban-ah, ka tanu un leng - bawnglong sung a atang ( bawnglong khengingtu) bangmai a hihdan kithei hen la, a va lutna innsung kilawm takin va khen leh ka chi mahmah uhi. Bawi, Na lutna innsung na va khetging hun chiang in, u-le-nau samkhawmtu in va pang in la; innsung khendalhtu va suaklou teitei dingin k'on deihsak uhi. Tunung chiang a pumkhat suak ding na hihtak man un, pumkhat hingal a kina leh kisel chihte a hithei tan in hong kidek hamham sawm un chi'n, nupa hong hiding tegel' zak in k'on genbeh sawnsawn lai uhi..." chi'n hon gen uhi ( a gen teng uh a a laklak a k'on lakkhawm ahi). Thumanpha leh zuihtuak ngenngen ahi a; paih ding khat lel leng a om kei.

Thutuam daih hon gen leng. A chang a, " Ka zi, kei a di mawngmawng a kisiam ahi dia awww..." ka chih vungvung hun atam mahmah. Kum 5 paisa in ka zi leh College kailai tangval khat ana kingai ngei uhi. Huai hun in, aman kaam ( sepna ) a muzouta a, a tangvalpa' College kaina di'n sum-le-pai khawng bang leng a kul leh poimoh bangbang a pezel hihtuak hi. A tangvalpa khual mahmah ahihman in, a sepna lam ah salh leh tai leng bangzah vei hiam tuak zomah hi. Mi hehpihna hau kia hilou in, mi awlmoh zou mahmah khat ahi a; a lungsim leng a piching huntawk mahmah. A itna grape gui uh zaamsau lua a hihman in, Nu-le-pa hi'n khotang ah hitaleh, a theilou a om kei uhi. Miteng in, a kiten hun ding uh a bildoh mahmah-te uh lak a khat leng a hitei sam hi. A tangvalpa' sepna zon hunsung in leng a buaipih zou mahmah mai a, zintuah-vaktuahna a poimoh ding bangkim natawm a 'supply' vek hi. Kum 5 sung vingveng a kingaih nung un, a pasal ( tangvalpa) in kaam (sepna) hon mu khongkhong hi. A kipak mahmah mai a, a lungtup mualsuah hidan in leng kikoih mai hi. Huai nungin, a tangvalpa'n leng a sepna zom in, nungak dang leng zopsan hiau hi. Kum khat zoh in, Saptuam' Dansiangthou in ZI neihsan zomah hidan in leng gen hi. Huai mah leng ahi, a buaina leh lungkhamna ka sukvaiveng sak!

A tangvalpa'n akheem chavaih nungin kei ka tangkha a, ziinmang' lemgel hiding in ka gingta kei. Sum-le-pai neikei mah leng, tanau-laina tampite' panpihna ziak in, dansiangthou in zi ka na neizou hamham hi. Ka zi neih ni kan a ka kipahlam ka theikha nai kei. Ka pian apan ka 'smart' nipen leng a hibok. Biakinn sung ah kichiamna ka nei ua, ka lung anuam mahmah hi. Kichiamna neizou, stage tung ah, mipi' lam nga in ka tu nawn uhi ( mi 4). Ka kingaihtuah zel a, bangmah hiloupi hon kitenpihnuam ka zi ka ngaihna a pung deuhdeuh hi. Huai kawmkawm in, mipi' mai a tukhe ngeilou ka hihman in, ka zum mahmah mai a, chilvalh ging khawng kiza gulgul hileh kilawm hial hi. Huai hun ah, Tuailai pawl-te'n leng kipah etsakna in pakkhi hon oksak ua; thilpiak hon piak ban uah, la leng hon oih-khum zuazua mai uhi.

Kitenna neihkhit in, Biakinn kong ah singpi leh sang ( bread) nekna mipi'n nei in, lim khawng ka kila zungzung uhi. Eh! Ka genkhaklouh khat om - Singpi leh sang ahihleh Saptuam in, hon loppihna dan ua a sai uh ahi. Ka genkhaklouh sawnsawn nawn ahihleh- kiteng ding a biakinn sung a ka lut hun ua, mipi'n hon kipahpih uh ahi chih etsakna a ana ding suausuau uh thupi ka sakdan ahi. Saptuam' dansiangthou a kiteen kichi, tunung chiang a vangam a Pathian in, a misiangthoute hon lakkhawm hun chiang a kitenna om ding cheplawkna ahi chih ahi. Tua ahih man in, ka kiten lai uh ka ngaihtuah khak chiangin, misiangthoute lakkhawm a om a, vangam a kigawmkhop hun ding hon ngaihtuahsak vungvung hial hi. Kitenna ka neih dek un, ka zite (moute) toh Biakinn sung ah ka lut ton diamdiam ua, hoih ka sa mahmah. Pathian' mitmuh a, numei leh pasal a thupi zawtuam omlou a, kikim hilhel ahihdan leng hon musak sak sawnsawn hi.

Biakinn mun a kitenna neih ahih zoh in, ka inn-mun lam uah laklutna hunseh(programme) ka nei uhi. Huai hun ah, lawm-le-vual leh tanau-laina tamkhop in hon uap ua, kipahpihna thugen tampi mahmah leng ka ngaikhia uhi. A tawpna lam ah, Pastor in vualzawlna thumna hon neihsak a, hunseh zou ka himai uhi. Sa (meat) in leng ka lawm zuazua kei ua; ka loplouh ziak ua phun nulnul kawm a innlam pai leng a om sam kei. Huaikia hilou in, moulopna nei a ka hih zuazua louh hang un, mi tawmchik leng ka kingah tuan kei uhi. Ka hihzoh dandan un, singpi-tuilum ka awm ua, a lungkimlou ka om kei uhi. Tantawk a lungkimdan siamte mah, khovel a minuamsa leh enhuai penpen-te a hihdan uh leng miteng in thei le uh chih ka DEIH MAHMAH hi!

Laigelhtu' Lungsung Pan:
Dansiangthou a kiteen zaw, sum bangzah hiam beizek kha mah in teh. Himahleh, lauhthawng bawl a taisiat mawkmawk ding a hikei. Mite' ngaihdan pen a thupipen a hikei a; Pathian' ngaihdan a thupi pen a hizaw. Zankhat thu in kitaipih lehang leng, a khawnung a kitenna neihthak veve ngaisek a hihman in, khatvei in zouthei lehang vaiveng pen ding hi. Mahni hihna chiang thei in, ei toh kituak in kitenna nei lehang, Dansiangthou a kitenna neizoulou kichi vang mahmah ding hi. Huai ziakin, Khristian Inkuan bawl dia kisa a, Pathian' Pahtak Inkuan hih sawm I hih leh, Pathian leh mihingte' theihpih mah in koppih nei ni.

( Hiai thugelh ahihleh kei tanchin hilou in, midang' tanchin ahi. Kam mahmah a, " Ka tanchin hon gelhkhiatsak lechin, midangte' adi'n leng phatuam mahmah di'n ka gingta..." chi'a, sawl a ka om ziak a ka gelhsak ahi.
1901 – Ka Kipak - 2016