Zi Ka Neingam Nawn Kei..!!
Written By: K Lianthansang

" Na kisiik mah kei dia! Phalbi khawvot a-doupih theih nakleh chi'a, a kituah leh kituahlouh theih masak sawm lou a, pawng lei(neih) mawk hive chin. Na damsung teng na khe toh kituaklou pi khedap bulh di chu na hipeuhmah ta ve..!! " – Desi Jejem*

MC Mary Kom in, Beijing Olympic a Bronze Medal a va puakkhiat kum in, Lamka Public Ground ah kipahpih etsakna a Mithun ( Sial ) piak in leng ana om hi. Huai kum a nungak nei himah leng, huai hun chet in zaw ka nei naikei a; hawi guuk chu ka nei veve!. Mipi'n Public Ground lam a naih souhsouh lai un ka phone ah message khat hong lut a " Mary Kom kipahpihna programme ah va hoh ni, U Muan. Hong taisuk in la...hong pi lechin..." chih teng kigelh hi. Ke'n leng, " nang kua neita.." chi'a ka reply gemgam leh, " ee...huai...facebook a na star nu kei voi...." hon chi a, ka hi heihuai zozen.

A message masa ka enkik a, ka lungsim hon kal tentun om hi'n ka thei. Ka star nu hisuk-hitou leh leng, hon deihna bang in ka om thei kei (ding). Amel zaw gensiatna di ka thei kei; ka hawi guuk ka chih nu leng ahi zomah hi. Ka lungsim ah, 'Hong taisuk in la...hong pi lechin...' chih a gingden a, ka kingaihtuahna khop a pha hi. Numei melhoih – feet 6 nuailam a hak ngeilou ( en ngeilou) himhim ahihdan ka man ngal a; gari neilou himhim tuh a pasal ding a chin lou khop ahihdan ka musuah hi. Himahleh, amelhoihna ah ka kipalpuk ta a, thohkhiat zoh ding vual ahi nawn kei zel. Gari neilou himah leng, amah tankhakna ding lampi ngaihtuah veve in, " ka gari sia inchin, workshop a ka koih eive...." chi'n ka dawng a, " K..poykey " chi'n hon dawng keuhkauh a; ka thuk-kik nawn kei. Huai nitak tanpha in leng ka kihou sunzom kha kei uhi.

A ninawn nitak in, a inn ua va hoh ka sawm ta hi. Gari neilou pi, gari nei dandan a kibawl ding chih mawk zaw ahaksa tel mai. Hoihdeuh a liimlang toh hun bangtan hiam ka kimaituah nung un, sih-le-sih chi'n ka pawtkhia hi. Kinuhtheih teng kinuh a, kikap namtui theih teng kipak zou a pawtkhia chu ka hipeuhmah. Himahleh, ka lung anuamthei tuan kei – gari neilou ka hih maimah chia..!. Bangtan hiam ka pai nungin, ka lawmpa' kiang ah ka hoh malam a, a helmet ka ngen hi. Lawmpa'n, " gari neu lah neilou chin a, helmet kia bang di oi..." hon chi zomah a, ken leng " nungak helna dia poimoh ahi...tulai nungak te'n gari neu bek neiloute bangmah di chi nawnlou pi uh..." chi'n, nuikawm in ka dawng a, ka pawtkhiatsan ngal hi.

Melhoih salua ka hihman in, ka lutngam zok kei. Atawp in ka helmet tawi lenglang kawm in ka lut a, a nu leh pa toh ana om uhi. Amah ahihleh, tanu neihsun ahi a, duat leng aduat mahmah uh ahi. Tutna leh lupna bang leng a taak lua a lum ngei di'n a gintak-huai kei. Bangtan hiam ka om nungin, a nu'n 'interview' hon bawl panta a, dotna dawn haksa pipi ka maituah hi. Haksa ka sak mahmah lak a khat hon gen mawkmawk leng. Thil tuamtuam tampi ka dawn khit nungin, " bang veng a teng uh e..?" chih hon dong a, haksa ka sa mahmah. Ka inluahna te un, " zingchiang a na kituahkhiat teitei ding uh ahi, inn bahara natawm pezoulou khawng.." chi a, hon genlai khawng uh ka mitkha ah a lang dundun mai a, ka gen didan ka thei mahmah kei. Tua ka omna uh gen leng lah, zingchiang apan dik nawnlou zel di; koi mun a teng di ka hi ua chih tanpha theihkhawl ahihlouh man in, ka pute' veng min ka gen ek mai sam hi.

Helmet lah tawi ka hihman in, deih chu hon deihbawl hi'n ka thei. Adang hon dotbeh nawn khak ding ka lauhluat man in, " lawmpa le hong paihak na mahmah e! 'Khanglam ah ka Papite' inn ka vapha zual di' chi zozen a, Bike I zatsak leh tutan hong pailou, lung nuamkei na e..." ka chi a; lungsim guuktak in bel ka kisiamtan kei. Mi khenkhat in bawn a lakh a sim a kaam ( job) lei toihtoih sam uh hiven, ke'n zuau gen maimai a nungak melhoih mahmah khat ka ngahtheihna ahihnakleh hoihlua chi'n, ka kisiamtan kik thei zel sam. Ngakngak leng le, lawmpa hong pai ngei mahmah lou di ahihdan lah theihsa ahihman in, ka omom nilouh in gen anei nawn kei. Atawp in, " zan sawtgawp ma in, ka pai dia....lawmpa, a papite inn ah ka va tawn malam mai di...." chi'n, ka paisan ta hi.

Hunte hongpai zel in, Bike khelhna di ka muhzoh sunsun chiangin ka va hoh zelzel a, hausa lua hi awmtak in Bike bang a tuamtuam ka zang thepthup hi ( mi tuamtuam a khel ka hih maimah chia ). Anu lah interview tungtawn a zohsa, amah lah helmet leh lawmte' gari tungtawn a zohsa ahihman in, kei a ahi tamai hi. Humahleh, thil a deihlouhdan ka genkhak chiangin, numei a hihlam a phawk kei. Kam khat ka pau leh aman kam 3 in hon dinkik chetchet a, interest 2% ( 3 – 1 = 2 ) tung toh kibang hi. A diklouhna a I thuhilh khak chiang bang in leng a zum teuhkei a, zahtakna himhim leng a hon neikei. Ngaihdam hon ngetna di mun ah leng hon ngen ngeikei a; hon hehsan maimah chiang in ke'n Ngaihdam ka leh-nget angai maimah sek.

Vangphat thu a, zuau toh pangkhawm a ka neihkhak hamham ahihman in, ka chaan khak ding ka lau mahmah hi. Ka kal ua ding a thuhoih-lahoih zuih ding ka gen chiang in hon ngeingaih kei a, ama' thu kia deih in, huai dan in pai giugeu lel hi. A melhoihna in hon zou lua ahihman in, ka ngai deuhdeuh maimah zel. Phalbi khawng hong tung a, lum a alum nakleh chi'n ka gusuk tamai hi. Blanket pauthei nei chu ka himai a; Washing machine leng nei ka himai ta uh. Eh! Washing Machine di'n a zattheih mahmah kei. Ann natawm leng ahuan theihlouh pi..!!

Ka kiteen nung un, gari ka neihlouh lam hon theikhia a, hon phunsan na khop a phata hi. Diklou taka zuaugen in eimah' tung ah lungkhamna hon tun ahi chih ka muchian semsem. Diklou takin kaam nei leng atam mahmah, himahleh a hinkhua uh nuamsaktu in apang taktak kholkei ding. Ke'n leng dikloutak in zi ka ngah a, interview leh bangkim leng zousuak mah leng thildiklou akawm a hong kigolh khak ziakin, ka khawnung buaita. Kei dan a tuailai hilai te'n ka suulnung hon zuih ua, diktatna taisan a thil muh leh neih a pibawl luat khak ding uh ka lau mahmah hi. Ke'n bel zi ka nei ta a, ka zi neihdan diklou ahihman in, ka kituak theikei uh. Bike leh bang hiam a mi enlou leng numei tampi mahmah om hi a, kei kituahpih (khosakna toh) ding mah ana neikha hileng tu'n ka buai khonung kei hial ding hi.

Ka Zi'n, tut (sit) sangin leng lup mahmah a teel zaw a, a hun neih teng in lumden phial hi. Lupna a aluplouh chiang in, tutna tung peuh a alum henhan gige hi. A luplouh kal in, " ka chimlua, ka va pawt zual di.." chi'n pawtkhe gige zomah hi. Lungkham-huai tak ahi. Zingkal lah a thoubaih ngeikei himhim a, zinglam dak 8:00 a athoh leh thoubaihlua hidan in kingaihsun zomah hi. A ihmu zaw hiden hial kei zel veh! Puan kawm ah phone mek den a, facebook leh atuamtuam khoihden zou hilhial hi.

Insung kepsiangna toh kisai in leng panmun a neikha kei. Official tak a 'Portfolio' kipiak chih omthei ahihlouh man in, ama' sep dia kilawm tan asep di zaw hiven. Pau zek lehang lah, ei tunglam pek a hong kivawk in, ei daih khipkhep ngai maimah zel. Inn lah kizut ngei manglou a om gige in, leivui pumdim sek a, a lupna sek 'bench' tung nangawn ahah siang pahpah kei zomah. Um-le-bel lah chu, gialbem(leopard) vun a kituam vek mahbang in gial belbual maimah uh. Kholak ka pawt sunsun chiang un lah; Zarda, Paras, Talab hon KHILAI in chi-khial ngeilou. Khilai chih kammal toh akam kilawmhoih mahmah zaw ahi ding uh. Achang in, 'Khilai' kichi kammal hon zangkhe masatute bang ka theinuam tuntun sek hi.

Kha 5 ka kiteng man hamham ua, ka kikhen pah uh. Phalbi khawvot sung zaw hon daih hamham chih theih hi. Phalbi chiang kia a ki-it a, kikawi tentan zozen di ana sakha ka hihman uh leng ahi ding; itna diktak in zaw khawlum leh vot khentuanlou hial hiven. Ka kikhen nung un, ka lawmte apan in thuhilhna tampi mahmah ka za a, ka bil ah adimlet phialphial. Hon gen leh thuhilhna te uh zaw dikthei mahmah hiven; ahun lai in a kingaihsak kha kei sek a! Zi neih di chu pilvan kan om kei; giahbuk singtom suk maimai te zaw sawt daihlou mah uh ahi. Ka theichian hoih lawta....
Ka kingaihlai ua a omdante ka ngaihtuah kik chiang in, a pilthei chiang in neingamlou ding uh ahihdan ka musuah dundun hi. Ka kikhen nung un, ka kingaihlai hun uh ka ngaihtuah kik a; kei leng ka kimohsa mahmah. Zingkal dak 8: 00 lak khawng a ka call khak chiangin, puankawm apan " hallo " hon chisek a, facebook leng 'online' zou gige tel hi. A hel dinga ka va kuan chiangin, ana pawtkhe sek a, bangtan hiam ka ngak nung chianga hong pai in, " n'ong hoh haklua a, chimlua inga invengte inn a ana hoh man kei voi.." hon chisek hi. Sawt ka om sim chiangin, a bench tung uah hong lum el-ual maimah zel a, poisakna himhim anei kei.

A insung uh ka lut dek chiangin lah, khedap suah dia hoih sim; suah dia lah a inn uh niin law mahmah zel. A sungte'n banghiam agen chiang ua leng, ana bak laklak sek ahihdan ka khonung theihsuah dundun hi. A um-le-bel uh chu ka kiten nung ua, kou a azuun louh dan toh a kikhe lawkei. Khilai chih mahmah bang leng za munlua inga, akaih bawl a sak dia leng hoih ana samai dan ka hizomah hi. Himahleh, huailai khawng a a-omdan peuh hoih kisa mahmah zel khah hi'n chin, lamdang tak ahi. Itna mitdel achih uh zaw hididan eive.

Ka kikhenma deuh ua, lawmte Desi Jejem' kiang a ka lungkhamdan ka gen leh, " Na kisiik mah kei dia! Phalbi khawvot a-doupih theih nakleh chi'a, a kituah leh kituahlouh theih masak sawm lou a, pawng lei(neih) mawk hive chin. Na damsung teng na khe toh kituaklou pi khedap bulh di chu na hipeuhmah ta ve..!! " hon chihsan zomah. K'ong kikhen ua lah, minsiatna tampi phuttouh hizel. Kei a di'n zaw zi neihngam ding le hinawn mahmah kei. Ka lawmte teng in, zi hon neihsan ta ua, ke'n bel a nihvei na dingin ka neinawn ngam nai kei. Zi nei dinga hon sawl a om nikhua in leng, " Zi Ka Neingam Nawn Kei..!! " chi'n ka dawng ta mai hi.

Laigelhtu' Lungsung Pan:
Hiai Tangthu phuahtawm ahi. Himahleh, a taklat nop tampi a om veve a; avek in bel I taklang seng kei ding uh. I simna ua pan in leng a taklat nop bangzah hiam I mat ngei uh ka gingta. Tulai in, mizawng-migentheite a di'n mun awng atawm lawta a; diktatna leng I tasam deuhdeuh uhi. Thil dikloutak a ( diktatna taisan a) I muhte un sawt daih hetlou ding ahihdan leng a taklat nuamte lak a khat ahi. Zi neihna toh kisai a pilvanna ding ngimna leng ahi. Zi neikhial kisa in, kisiik mah lechin; puansil-niikteen banga Zi khentheih ziauziau ahi mawk kei. Huaiziak in, a khawnung a kisiiklouna dingin, ahunlai in pilvang ta ni.

2111 – Ka Kipak - 2015