Ka Natna Lauhuai Vei Gige Damsiang Eive..!!
( Based On Tuailai '1434pro'Workshop )
Written By: K Lianthansang

Kiginni khat, Cycle bawlsak dia 'Cycle Workshop' ka va naih leh, a veng ua misi om ziakin ana kihong naikei. Nidang-hundang a leng huaimun mah naihsek ka hihman in, mundang ka naih nuamkei a; ka ngak top mai hi. Huchi'a ka omlai in, tha lianvetvut khat, Cycle khat liangput vualvual kawm in hong pai mawk hi. Kei omna mun ah hong khawl a, a cycle sia bawlsak dek ahihdan hon gen hi. Ka nih ua dakkal 1 vel ka ngak nung un, Workshop neite hong kuan khongkhong uhi.

Kei atung masa zaw himah leng, lawmpa upa zaw ahihman in, ama' Cycle bawlsak masa zaw dingin ka ngetsak a, Workshop neiti'n leng bawlsak masa hi. Cycle neitu'n, " ka cycle chu mak himai!. Workshop 4 ah ka paipihta a, bawlhoih zou taktak lou ahi ding ua, a sekik pahpah sek. Aziak diktak, a siatna diktak a theihlouh ziak ua asiatlouhna khawng hon bawlsak khemkhem ahi ding uam ah; se deuhdeuh zawsem bang maimah.." chi'n gen namnam hi. Workshop neitu'n a handle hon phelkhia a, akawm a siik khat hon bulhtuak zohin atung ah hekkip suk a, bawlzou ahi ngal mai ( akawm a siik 2 kibulhtuah hoihlou ahih tuak).

Cycle neitupa'n sum bei ding zah adot takin, " 50 ngai di ahi " chi'n dawng mawk hi. Khat pa'n leng lamdang sa mahmah kawmin," mun khat kia hi a, avan khen(change) leng ngailou hizaw mah. Bangziak a huai zahzah bei di eita..?" chi'n dong ngal hi. Cycle bawltu'n leng, " asiatna mun ka bawlman Rs. 10 kia ahi. Himahleh, Workshop dangdang a na paipih lai a, asiatna diktak a muhsuahlouh uh ka muhsuah (theihkhiat) man Rs. 40 ahi. Asiatna diktak muloupi a, midangte'n a bawlbawl ziak ua na cycle poihlong gawp ahi a; sia leng sezui pahpah mah ahi. Tu'n bel mundang sia ahih ngalkei leh, pawngsiat mengmeng nawn di'n ka gingta kei..." chi'n dawng a, lungkimtak in kikhen thei uhi. Kei a leng a siatna houchik ahi a, hun tomchik sungin bawlzou pah hi. Cycle siatdan toh igam uh siatdan a kibatna mahmah om hi'n ka thei (avek hilou in). Himahleh, huailam gentam ka sawm naikei phot.

Thutuam daih gen nawn lehang. Ka taklam nakguh nana ka chih leh, nakguh ana hikei daih. Ka khoih chiangin, a natna mun ding ka khoihkha theikei; asunglam ahihdan bel ka thei. Ka sin (liver) omna mun tak ahih zawkmah ziakin ka patau sim mahmah a, kingaihtuah vungvung in ka om sek hi. Ka tutsawt zek chiang in leng a na zel a, ann ka nek zek (gil vah zek) chiangin leng ana in hon phapah lawlaw hi. Theichianlou pi a damdawi va pawngnek mawk ding chih lah, Cycle Workshop a toh 'case' kibatkhak ding ka lau zel. Huai ziakin, Pathianni zingkal dak 7:30 vel in Damlou-te' naihpen leh muanpen hi a ka theih – Dr VC Pau Tonsing' kiang ah ka va pai hi( sin na hidi kikoih ka hihman in). Kei, adamlou ( a sia toh kibang) ka hihman in, ka vapaina leng 'Workshop' toh kibang hi'n ka koih mai hi ( midang in bel koih teuhlou d'uh).

Doctor pa'n hoihtak in hon en a, kei' kimuanmoh banglou takin ka natna leh amun diktak hon gen hi. Ka sin(liver) lam bangmah chilou ahihdan hon gen in, kipahna ngen in ka pumdim. Kimawlna ah ka nakguh sunakha ngei ka hihman in, ka nakguh lam buaizek di'n gingta mahleng, nakguh lam bangmah a chikei. Himahleh, nakguh kaantuah a sa-paite pen, ton zel leh kizan zel(intercostal muscle span ) a aom chianga na ana himaimah hi. Damdawi chi 2 gelhsak in ka om a; ki-etsak man leng lak in ka omkei zomah hi.

Huai ni apan in, thillamdang mahmah khat; genlouh theihlouh ding muhsuah thak khat ka nei. Ki-ensak dinga ka kuan in, sum 300 ( ka neih zahzah ) ka tawi a; Pathian' hatna muangkawm a kuan chu ka hipen mai. Ki-etsakman (private) lah theihsa; damdawi man lah tawm chikchik manlou hial ahihdan theihsa hizel. Pathian in thilteng hihthei a, I taksapte ahunhun a hon pethei ahihhdan gingta lua a kuan ka hikei zomah. Pathian in a 'power' hon zang in, ka taksap zah sum-le-pai leng hon pe zenzen kei. Himahleh, ei' ngaihtuahna malam pek ah thilteng ana bawllem vek hi. Pathian in Doctorpa' tungtawn in ki-etsak man hon lakei a; indirect tak a Pathian in sum-le-pai ( ki-etsakman zah) hon pia ahi mai hi. Pathian' thilhih leh lemgeldan thupi in lamdang lua a, mihing' pilna in abanzou kei. Pathian in hihtheihlouh neilou ahi chih, zuau hihetlou ahi. I nam-le-gam uh damna dingin leng, aman mailam hun ding mukhawl mahmah ahihman in, amah kiang ah 'thumna' tungtawn in dong gige ni.Eimah pilna-siamna vuak in igam uh a damsak ngeikei ding.

Damna ding ngaihtuahna ziakin leng natna thuak masak hun a om sek. Huai ka chihna ziak I theihsiamna ding un, ka nakguh nat ziak k'on gen ding. Ka cycle asiat chiangin 'Cycle Workshop' ka naih zel a; damlouh-hitaan ka tuah chiangin Doctorte kiang ah ka tai zel a, damdawi ne in ka dam zel. Himahleh, thagum-thatang a kipawng khoihnaleng tuahtheih gige ahihna ah chi'n, Martial Arts ka zil hi. Sihna ding hilou a, hinna ding a ka zil ahihman in Pathian' honpiak 'hinna' manpha mahmah kepbitna chikhat hi'n ka koih. Mihing' dam kum, kum 70 ahi a; himahleh hatna ziakin kum 80 leng a hithei, chih athei itam mahmah ding uh. Mihing' dam kum dinga bikhiah zah leng damzoulou a sihna hanmual honna zotsante bel hatlouhna tuamtuam ziak ahi a; 'sih hunlou a si' hi un ka ngaihtuah. Huai ziakin, thagum-thatang zang a ka hinna hon sukbeisak sawm a omkhak zenzen hun a leng 'sih hunlou a silou' a ka omtheihna ding ngimna in ' Martial Arts' ka zil hi (gamdang a NE mite' thuakna itheih vek uh ka gingta).
Huai ( Martial Arts) ka zilna ah, ka langpa toh 'practice fighting' nei in; ka nakguh lak sukkhak in a om hi. Damsung hun ding bikhiah a omzah damna ding ngaihtuahna in natna (nakguh kaantuah a sa pai) ka tuak a, damdawi ne in damna mah ka delh hi. Damlouh-hitaan tuah hun in Doctor-te kinaih zel a, damdawi hon piakte uh tungtawn in damna kingah zel hi. Huai mahbang in, thagum-thatang kipawng zatkhumna tuahkhak hun ah, damdawi nek in omzia a nei nawnkei zel ding. Huai ziakin, huchibang tuahkhak zenzen hun a om leh zattheih pah dingin, Martial Arts lam a siamna sangtak nei - Master-te' tungtawn in siamna kila (kizil) a, huai in hon bangtan hiam ah hon vengbit ding hi. Huchibang kawmkal ah, igam uh segawp ahi I chi ua, a damna dingin thil tuamtuam I buaipih uhi. Adamna ding diktak I buaipih khak taktak nailouh ziak uh ahi ngei ding;ahoih thei taktak nai kei.

Damlouh vai a ka ki-etsak zoh nung Kiginni in, Bungmual EBC Biakinn ah 'Workshop' chikhat om nawn leuleu a, kei leng ka vatel sam hi. Nupi-papi' nunga 'TV Remote' nangawn tangkha zoulou a, 'channel' etnuam sim nangawn leng kheng theilou a omtheih ahihman in; Diktatna toh kibulphuh kawma I gam 'channel' uh, 'remote control' zang sese lou a khengthei ding Tuailai tampi mahmah kipaikhawm hi. Huai ni ahihleh, 'Nov1415' chi'n ka chiamteh mai. Huai hun a thupi leng 'Pro1434'apan kilasawn ' TUAILAI, THUTAK LEH DIKTATNA A KIBULPHUH THAKNA' chih ahi zomah. Huai bel, ahun pen November 14, 2015 (Nov1415 ) leh athupi Bible a a-kilakna mun Proverbs 14: 34 (Pro1434 ) ahi chihna hilel hi. Thupi kilakhia pansan in, gamsung natna tuamtuam-te gen in om a, theihna tampi mahmah kibehlap hi.

Zinglam dak 10: 10 agin in, Hunkemtu'n – Paunakte 14: 34, Sam 37 leh 2 Timothy 2: 22 ( 2222 ) hon simkhe masa hi. Bible chang hon simkhiat nanung pen ah, "Himahleh, valnou duhgawlnate khawng taisan inla, lungtang siangthou a Toupa lou peuhmahte lak a diktatnate, ginnate, itnate, lametnate delh in " chih hong hipah giugeu mai hi. Huai nungin, Pathian' kiang ah thumkhawmna nei dingin ka kisa nawn ua, thumkhawmna pitu'n Bible mah phen masa in; Paunakte 3: 37 – 41 leh Jakob 4: 3 (Na ngen ua, na nget diklouh ziak un na mu kei uh, na nawpsak bawlna ding ua zat na tup ziakun ) hon simkhe masa hi. A simkhiat zoh phet in, " Eite' chitna ziak leng hilou a, tuni tanpha itung ua Pathian ahoihlai ziak in hunhoih hon bawlsak a; Tuailai Pawl Kum 50 chin tanpha hon pikai phet hilou inmi tamtak Diktatna a kibulphuhnuam a omlai ziakin KIPAHTHU GENNA nei ni. Huaite ban-ah, mimal a I khelhna te uleh, i innkuan ( hon suangte tanpha in) leh Nam pumpi' khelhnate ziakin, Pathian' kiang ah THUPATAWINA nei ni. Atawpna pen dingin, mimal' maban ding, Saptuam pumpi' maban ding, Nam leh gam' maban ding, Pawl tuamtuam' maban ding leh hon makaih I heutu leh maikaite uh maban ding Pathian' khut ah LAANKHIA in, a PANPIHNA ngen ni " chi'n hon gen a, mipi'n thumkhawmna kinei zuazua hi.

Van (things) kia sethei hilou, mihingte vuak leng damlouthei hilou I hihman un, I gamsung un leng siatna leh natna tuamtuam ana vei in ana damlou sam hi. A natna veite hihdam sawm a, mundang apan hong kuan vengveng pawl leng om uhi. Gamsung natnate lak ah 'NEKGUKNA' kichi a kumlui ( chronic disease ) mahmah pawl hidi'n ka gingta. Mi tampite'n a damna dingin damdawi ( thuhoih-lahoih) hon chah (suggest) ua, kinesek mahle phatuamlou abang. Meimatum nei te'n anatdan theivek ding uhi. Adam ding ideih mahmah mai ua, a naai saalkhiat ding I lin ngoihngoih zel uh. Ana ithuak peihlouh ziak un, I nasesak mun mahmah mai ua, adam taktakna dingin nitampi alut loh hial sek hi. Tu'n leng Nekgukna toh kisai in, Tuailai thahatlai te'n, 'Tuailai 1434Pro' chi'n kalbi (step) kiptakin kikhoh panta a, I gam uh hong dampah leng lam-et ahi.

Huchibang kawmkal ah kei mimal lungsim a om hon thunlut zual leng, " bangchik kum a piang e..?" chi'a dotna ka maituah chiangin, gen dipen ka thei kei. Piankum 2 nei ka hihman in, buaihuai thei mahmah hi. Piankum guukna ( naupang zawdeuh dia) leng salam thil ah hoih mahleh, khalam thil ah hoih dingin gintak huailou hi. Pathian in, " piang zekai nuamdeuh nahih u'leh, na kum uh na naupansak zahzah un k'on sibaih sak ding" hon chileh leng uthuai deklou zel ding ahihman in; Diktatna a kibulphuh dek taktak ihih u'leh huaite khawng natan leng etkai tuak mahmah hi ( adiak in School ah). Heutupa Jimmy Ginbiakthang in agenna apan in; Bible zilna ding a Class – 10 Certificate bawltawm sawm a, abawlsak thei ding mi zong hial leng om ahihdan theihtheih in om hi. I mawlluat ziak ua leng, theihlouh kal a thilsual hihtheih luat ahihdan leng kilang chian mahmah hi. Class – 10 zoulou pi azou dandan a kibawl a, Pathian thu zil dinga kipat sawm mawk pen thil lauhuai mahmah khat hiding in ka ngaihtuah hi ( well begin is well done ).

Heutupa Jimmy Ginbiakthang in 'I Gamsung Natnate – Nekgukna Toh Kisai' chih pansan a 'Presentation' apiakna ah point wise in gen deudeu a, himahleh hiaimun ah a gennop diak hi a theih teng I bangensuk ding. Aman agenna ah, " Nekgukna ( kineksiatna ) kichi 'Corruption' chi'n kithei deuh chiat hi. Latin word ' corrupt' apan kilasawn ahi a, huai tuh 'to destroy or spoil' chihna ahi.Gensau zek lai lehang, Corruption kichi tuh – mi khat in thuneihna teng tawi kawma vaihawmna nei a, a thuveekdan muhpailetna himhim omsaklou chihna leng ahi hi ( Corruption = Monopoly + Discreation –Transparency).

Huchidan a thilhih leh vaihawmnate, Pathian in leng ana deihlou ahihdan Laisiangthou ah ana gen khin thamta.
Huaiban ah, nekgukna ichih kineksiatna chikhat ahi. Kineksiatna tuamtuam tampi petmah om a, golhgukna kichi bang leng kineksiatna chikhat ana hisawn-nawn. Banghiam I ngaklah deuh te muhbaihna ding a 'piak cheuh' I chiin-te uh leng golhgukna in a huamkha veve. Thuneihna sang(super power) nei zawdeuh te'n, deihsaktuam nei a thil I sai sek uh leng kineksiatna chikhat hinawn leuleu hi ( thagum leh power zang a kineksiatna). Khenkhat taget in lah, lim diklou zangin Solkal' sumbawm sawkpih kisawm guigui a, akhen te'n lah Solkal in sum zatna ding a ahon piaklouhna lamlamah I sungbei tawmtawm ua; i khang hulhul maimah uhi. Laisiangthou ah leng ' Huaiziakin, Toupa lau unla, pilvang takin hih un; Toupa I Pathian uah gitlouhna leh khentuam neihna leh golh neknate a om kei ahi (II Kronikil 19:7)'chih leh 'A pannaa na migenthei vaihawmna na hekkawi ding ahi kei. Thil taklou akipan gamla pi ah omin; huan, misiangte leh midikte that ken: giloute siam ka tansak louh ding jiakin. Huchiin thilpiak na la ding ahi kei: thilpiakin mipilte mit a tosaka, midiktatte thute a kaihkawi ziakin (Eksodas 23:6-8)'chite ana kigelh hial ahihman in, kineksiatna-te tawpsan ta ni.

Bangziak a kineksiatna hichi tel a uang adia aw? Mihingte I duh-am lawzen ua le eive!. Angmasial zomah hanga, sum deihlaw zozen in zankhat thu banga hauhsak sawm mawk ihih chiang ua, alou theilou hita ahi. Banah, I Lamka khawpi mahmah uh leng zalen lua a, mat dia poimohte matngam omlouhna khopi ahihziak leng ahi ding e!. Akhente bel dan(law) thehlouh ziak in leng i awk thei tham uh. Atamzaw i huchi kei hial ua; solkal' buhpang athawn a sawk sawmsawm te ihi uhi. Thugen te'n lah genngam taktak nawnlou; awkkha vek ihih maimah chiang ua!. Hihna a lungkim thei mahmah lou zomah in, sum-le-pai thahatna toh a sang zawsem kaltouh I sawm ziak ua leng hichitel a nekgukna leh kinesiatna natnate igam un vei hiding hi. I Laisiangthou uah, 'Dangka sum deihtak zaw gilou chiteng bul ahi ngala; huaituh khenkhatten a eng ua, ginna a pai mangsan ua, amau leh amau lungkhamna tampiin a kisunlet tektok uhi. Himaleh, nang Pathian mipa aw, huai thilte taisan inla, diktatna bang, Pathian limsakna bang, ginna bang, itna bang, thuaktheihna bang, kingaihniamna bang delh zel in (I Timothi 6: 10, 12 ) 'ana chi hi. Huaikia hilou in, nekguk utna kichi lungtang a hong kipan ahihdan Laisiangthou mah in, Jeremia 17:9ah'Lungtang bel thil tengteng sangin khemhat pen, hoihlou pumlum ahia; kuan ahia theithei ding? ' chi'n ana gen khin daih hi. Huaiziakin, I gam uh damna dingin, lungtang (ngaihtuahna) I thuzoh mahmah uh ngai ding hi.

Kineksiatna kichi I gam un veilua ahihman in, khotang ah thil adik-atang in paithei nawnlou hi. Mipite lak bang ah thawmhau kisakna tunthei mawk hi. Siamna-pilna leng angai nawn kei; sum hauhau aching himai hi'n a kilang. Kaam muhbaih nuam leh, laizilna a tampi seen ngailou; sum khol in, leikhe hiau lehang hun hilel. Huaikia ahi kei, thuneite toh leng kitheih hoih mahmah ngai nawn leuleu hi. Thukhenna himhim leng, adik-atang a thukhenna avang mahmah mai a, sum hauzawte' vualzohna khovel ahita. Election chiang ngial in, sum in mi a thuzoh mahmah mai a; chewing gum haikha lawi in, sih leng poisalou in adiklou pi leng gum tinten mawk uhi. Sepna mun a gin-omloute leng, sum ziaka chingte ahi deuh uh. Alehlam ah, mi chitak leh gin-om te'n bel igam uah sem ngam taktak lou zel uhi. Huaiziakin, ' Punna a duhgawl in amah a hihtuai a; himahleh kuapeuh thilpiiak hua a hing hi 'chih, Paunakte 15: 27 a kigelh I mangngilh louh ding un deihhuai hi.
Kineksiatna I dawmbawllouh luat chiang un, simlei vai (Politics) lam leng hon sukha ban mahmah hi. Heutute muanna om nawnlou in, simlei vaisaina ah a 'chewing gum' haikha teng kihel nitniit uh bang hi. Election vai ah mihoih a kihel (candidate) ngamlouh chiangin, ahoih khat mah leng a chinkhak ding kinephuai mahmah lou mah ahi hi. Huai hun chiang ngial in, pai didan kitaklang bangbang zui ki-om lou phial a; Party leh Candidate natawm deihtel-tuam ding omlou hial in, deihlou pi leng vote teitei hun tam mahmah chipawl leng om zeuhzeuh uhi. Huchi hong hih chiangin, mipite lungke vungvung in ki-om a, i Democratic Rights uh i mansuah zawkmah chiang un, kikhendalh zelzuul ngai maimah hi. Pathian in, 'Huaijiakin, ngai in, nana lepgukna thu ahte, nanga sisan pawt thu ah te khut ka honbet khum ding (Ezekiel 22:13 ) ' chi'n ana gen hi. Pathian in eimite tunga hiai Bill pen Act hon suahsak ma in, kisiik mahmah ni. Pathian in a khut honbet khum taktak leh thuakhak law mahmah ding ahih ziakin.

I genlai vanglak un, sum-le-pai zeekna ( Economics) toh kisai lam leng genkai zek lehang. Scheme leh fund tuamtuam, Solkal apan hong paite heikawi dan isiam mahmah ua, atangkha ding diktak in kitangkha pahpah lou sek hi. Election hi'n Business line himhim ah hitaleh, diktatlou taka sum golhgute kidempih a, zoh ding vual hilou uhi. Azawng-ahau kal kigamla hiai-hiai a, ahaute' khatehnen sukkiatkhak zenzen teng, azawngte kituh sauhsauh in, kihing liailiai sam hi. Adiktakin gen lehang, ei singtangmite' lak ah Mathematics siamlua omkei mah lehang, percent ( % ) zondan I siamvek-sim chiat ziak un, I gam uah Company liante hong lutngamkei ua, I nektak zonna lam uh leng niamkiak deuh hi. Infrastructure hi'n, Business ah hitaleh lohching a, khang hulhul a kitam hetkei. Bangdang ziak hilou in, kineksiatna a maingal luat ziak ahi pen ding. Laisiangthou mah ah, ' Kumpipa'n vaihawmna in gam a hihkip a; himahleh kuapeuh thilpiak phut teitei in a hihsia hi ( Paunakte 29: 4 )'chi'a kigelhdan toh, igam dinmun uh kibang mahmah dingin a gintak huai.

Huaiban ah, kineksiatna khenkhat theihhak mahmah pawl omnawn hi. Thilthawnpiak toh kinaih mahmah hinapi, golhgukna leng om ahihman in, pilvanhuai mahmah hi. Ki-unau ahih louh hang un, amel-le-puam uh a kilamdang lawmlawm kei. Hoihtak a sui detdet masak louh in theihkhiat zoh ding a hikei. Thilkhat hihsak a om ziaka I kipiak teng uh leng thilthawnpiak kichi theilou a, golhgukna leng kichi vek theilou zel hi. Thil I hihsak ma leh nung a ipiak zel un leng akhenthei sam kei. Siamna leh sum-le-pai a hon thuk-kik zoulou dia gingta zenpi a thilpiak ineih leh bel thilthawnpiak kichi thei hi. Kipahman leng atamzaw golhgukna ana hinuam mahmah hi. Eigam ah, golhgukna teng leng kipahman leh thilthawnpiak I hisak sek ua, buaihuai mahmah hi. Bangteng gen mah lehang, golhgukna leh thilthawnpiak kichi zaw, a petu' ngaihtuahna ah kinga lian penpen a ( Paunakte 17: 23), line diktak giit-tan theih leng ahi kei.

Tulai in, sepna lei leh zuak kichi kithang mahmah mai a, 'tawndan' ana sakha leng I om phial d'uh e!. Sepna lei leh zuak kichi thilpoi mahmah ahihdan I theih uh deihhuai mahmah hi. Huchidan a sepna I lei chiang un, mimal' dikna mang hiau mai a; siamna sangin sum mah poimoh zaw suak hi. Huai in, diklou taka summuhna hon tun in, I Education system tanpha uh nengniam ban mawk a – poi mahmah. Huai kia hileh phave! Sepna hon gauntu pen sih ngam a igup uh a ngaita a; damsung daih ding boss kiguan suak maimah hihang. Huchidan a sepna I muh chiangin, sum apoimoh zah pekhin I hihman un, sepna a apai sese a poimoh nawn kei zel a, I gam natna uh behlaptu kisuak zel hi.

Tulai in zuaktheih atam mahmah ta a, Vote natawm leng kizuak in, kikhawngthei mahmah hi. Huchi'a Vote izuak chiang un, 'Blank Cheque' a suai kai toh I kibang uhi. Hon leisa uh a kihih manin, solkal apan sum hong pai chiangin, suai I kaihna sa ah amau a ut zahzah uh ana gelh ta ua; kam hum in ki-om maimah hi (leisa ihih maimah chiang ua). Ei leh ei 'Vote' tungtawn in bat kiguan nawn mahmah kei ni. Hiai toh kisai I Laisiangthou un, II Peter 2:19 ah, ' Amau tuh siatna sikha hi kawm piin mite tuh sikha suahtakna thu achiam nak uh; mi zoha a omna mahin, huai mahin sikhain a siam nak ngala ' chi'n ana gen khin dimdiam ta. Thilthak lua ahi kei. Huaiban ah, I behpai luatna uh leng I natna bulpi uh hithei hi. Dik in dikkei taleh, I tanau naileh behte uh kitaisan mawklou a, huai in I natna uh damsak ngeilou hi. Hiai toh kisai leng Laisiangthou in, Paunakte 28: 21 ah ' Mite deihsak tuam neih a hoih kei; tanghou them ziakin mi a talek ding leng ahi sam kei hi ' ana chi giugiau lel hi.

Tulai in, ilak uah kineksiatna natna ziakin kithahna tanpha tungsek a, I Laisiangthou un hon thuhilhdan toh kikel-ki mahmah hi. I Laisiangthou un bel,Ezekiel 18:23 ah, 'Mi gilou sihna ah kipahna himhim ka nei ahia? A lampite a lehngatsana, a hinna zaw pen lou? chih TOUPA PATHIAN thu pawt ahi' ana chi leuleu hi. Kineksiatna mah in, migentheite' dikna laksak mahleh, I Laisiangthou un bel Thudik a vaihawmna ana ngiat zel hi. I gintakkei u'leh, Laisiangthou leh Pathian muangmoh kihi ding hi. Aziak ahihleh, Jeremia 22:3 ah ' TOUPAN hichiin a chi: Diktak leh hoihtakin vai hawm unla; simmohmi khut akipan loh thuakmi hunkhia unla; huan, mikhualte, pa neiloute leh meithaite tungah diklouhna hiam, hiamgamna hiam ching kei un; hiai mun ah mi hoih sisan leng suah sam kei un ' chi'a honna thuhilh ngitngiat sa ahihman in, gingta ni.

Adik-atang leng khual sese lou a hauhna idelh sauhsauh uh leng Pathian' deihlam ahi kei. Pathian in zaw, Diktatna mahmah poimoh eive! Huaiziak ahi di, ' bangmahlou a hauhsakna muh a kiam ding; himahleh sepgimna ziak a lakhawm apung ding hi ' chi'a, Paunakte 13: 11 a ana gen.
Kineksiatna toh kisai a panlak ding ichih leh a kikhel naikei. Tu ahun laitak ahi. Mi tengin kineksiatna chimtak gawp in, I ningawpdan uh mun tuamtuam ah kilang kheta hi. Saptuam makaite bek hong kisak taktak kei u'leh mipi'n kimakhelh gawp ding ahi. Lewin's Change Model ( Unfreeze – Change – Refreeze ) ah Unfreeze pen I maituah zouta ua, Change (social change) a I om laitak uh ahihman in, Lewin's Change Model i zat theih ding ua aom laitak ahi. Himahleh, hiai pen amawk mai a khenzoh ding ahi kei zel. Kineksiatna kichi kiphankhawmvek ahihman in, mi khat leh nih in hihzoh vual ding hilou hi. I Gam natna diktak – Systemic Corruption ahihman in, mi teng awkkha vek kisuak a, akheng di kitasam sim abang zel. Huaiziak in, hunpaisa a I omdante ua kisunawngkai mailou a pangkhawm vek in; corrupt culture pen ' Big Bang' theory pian a I sukbei sawm chiat ding uh ahi. Huchilou in zaw, upai himhim a om kei. Romte 3: 10 ah, ' Kuamah mi diktat himhim om kei uh, khat lel leng om het kei uh' chih ahihman in, Diktatna I ikibulphuh ua, Systemic Corruption I beisak uh hun lawta hi.

I Gamsung natna diktak uh 'Systemic Corruption' ahi chih I thei ua, huai sukbeina dingin ei Tuailaite'n poimohna lianpi kinei hi. A hoihlou a itheihte uh a langtang a nang dingin 'Anti-Corruption' bang I phuhkhiat ua, Special Power leng piak ngal ding ahi. Huai te'n Investigation neihtouh zel a, a kisaipih thuneitute kianga 'report' zel a, action kila leng etzui zel ding in hoih hi. Christian ngen ihi ua, I khohei-gamtat ding dan tanpha uh leng I kisinsak zelzel ding uh ahi. Sunday School ah leng anti-corruption awareness subject guanlut a; Workshop leng regular taka sai hileh, kineksiatna I gam uah hong beithei ding hi. Huai ziakin, ei Tuailai te'n I mimal' hamphatna dingte uh taan ngam in, I ngaihtuahna uh Khrist thuzohsak peumah phot lehang, a lampi di hong kihong mai ding hi " chi'n, dakkal 1 sung mawngmawng Presentation nei a, Tuailaite thathak guan mahmah hi'n ka thei hi.
Hun tomchik paipan ka sak sungin, nitaklam dak 12: 45 bang an aging man hi. Thu ichih la, la ichih thu chih ahihman in, EBC Central Choir te'n ' Haksatna mun a pangngam in, Toupa' na sem ni ' chih la hon awi ngiahngiah ua, bil tai semsem hi.

Hun in ngak neilou ahihman in, Programme aban ah hon paipih ngal uhi. Huai hun ah, ' I Gamsung Natnate – Kitelna Siangthoulou' chih pansan a, 'Presentation' nei dingin Mr. S Thangkhanlal Ngaihte hong kipan nawn hi. Aman ahihleh, tulai a I buaina uh hong kipatdan tangpi hon suutpih masa a, mailam hun a 'Kitelna Siangthou' I neihtheihna ding uh ngimna in, mailam kalsuan leh panlak didan point tuamtuam hon genkhop pih hi. Atom lamlam in I gensuk himhim ding.

Khatna ah – Heutu, muhtheih a diklou a ana gamtang zihzeh, mipite muanna ngah nawnloute leng gam leh mipi' interest a atawp ding mah uh ahi. Ngai taktak mah ahi. Mimal target di a omkei. Kihuatna, ki-enna ziak ahi kei. I gam leh mipite maban toh kisai ahih ziaka igen ahi. Ahi a, thagum in, mi kikheng nuamlou I va khengthei kei. Hilele nam leh mipi' adia hoihlou a itheih chu individual level ah non-cooperation piaktheihdan tuamtuam om ding hi. Ei ngaihtuah ban ah Pathian a om a, amah kiang ah tun ni hang.
Nihna ah–Mihingte adik-atang ngaihtuah a khenthei, sia leh pha thei a Pathian' hon siam ihi ua, sia leh pha I theihna pen uh chiim taka izat leh zuih ding uh Pathian deihdan hiding in ka gingta. Thil diklou, diklou chihngamna PATHIAN thu toh kituak hi'n ka thei.

Thumna – Individual Morality, Public Morality leh Accountability khen siam ni. Solkal' sum saite I buaipihna ziak, mipite sum saitu ahihziak uh ahi.

Lina – Khemzoh-leizoh in om nawnkei ni. Bible ah kibulphuh ni. Mi' simmoh di'n om nawn kei ni. Pathian kiang ah, ' Toupa chidamna hon pia in, nasem nuam ka hi ' chi a thum ngam di'n kilan ni. ( Example: Self and Oficer's Case).
Ngana – Internet leh Social media zatsiam dan kisin ni. Tulai khovel ah transparency leh accountability kihahgen mahmah hi. RTI ( Right to Information ) kichi dikna ineih uh, ei Manipur a teng te'n I zattheih hun uh hong tungpah ding hi. 2017 election ma ngei in, Televised debate neih teitei hi hen. Dan bawl di chu – dan simthei, athu a lunglut leh laisiam poimoh; ei ate Contractor apan a kai hitangpi uh. Sum leh pai toh kisai khalou, athu toh kisai a nasep te'n impact thupi leh sawt neizaw gige ahi. Election chiang a candidate-te kiang ah pan alaksawm dan uh leh a position uh dot chetchet hihen. Kuamah free pass piak nawnlouh ding ahi.

Gukna–Tulel a non-government institution credibility leh authority nei omsun Saptuam ahi. Social, Politics leh Sahkhua hinkhua khenkak haksa ahihman in Saptuam in proactive role, morality leh principles toh kisai in hon semta hen.

Sagihna – Party kichian khat neih ding. Ruling Party ngen support dik khinlou ahi. Political demand a di'n Party khat I poimoh ua; sum-le-pai ah bel Ruling toh kisai theih ngai veve hi.
Giatna – Perfect Leader I zon nilouh sang un, banga I deih, I target, I goal uh chihte zong masa zaw in, huailam a hon makaih thei ding a chitna nei heutu zong in telching le.

Kuana – Heutu apan diktatna leh vaihawmna hoih I demand toh kiton in, eimah in leng mimal hinkhua ah huai bang hinkhua neihsawm in kipe thak ni. Adikte dik chi ding, adikloute diklou. Phattuakte phat ding, phattuak louhte phatlouh ding. Huaite ziaka thuak angaih hial leh ithuak phot mai kei dia, I ma ah martyr tampi ana omkhin vele. Pathian in hon taisan hetlou ding ahi.

Pathian in I genkhelhte hon ngaidam hen. I gam leh mipite damsak ding, thutak leh diktatna a kibulphuh thak dingin tuailaite hatna hon pia in honpi ta hen, chi'n zohna bawl hi. Ama' zoh toh kiton in, Musical Drama lahna in zui ngal a, lungkhoih-huai taktak scene tampi lahkhiat in om a, Tuailaite' lungsim leng zou mahmah hi'n theihtheih hi.
Brainstorming Session leng neih in om a, huai hun ah Panelists te apan in thupoimoh tampi ngaihkhiat in om hi. Huai hun a thupoimoh kigen khenkhat ahihleh ( atom lamlam in) –

1) Thuzuau bulbal neiloute internet tungtawn a thehzak kidam deuh ni. IPC 500 nuai a awk theih ahi.
2) Namdangte toh I kibatlouhna uh ahihleh, Pathian nei nam ihih ziak uh ahi. Ei adia advantage omsun tuh Pathian ahi mai.
3) Corruption Subject - piching leh naupang lam ah om leh hoih ding ahi.
4) 'Pathian ei lam-ah apang diam?' chih sangin, 'eilam ah Pathian apang diam?' chi zaw ni.
5) Ei sawkphakna chiangchiang ah fair takin thil I ideal na uhia?
6) Ei level ah justice I zang uhia?
7) Bible a kibulphuh a, I ngaihtuahna pen Bible apan test zel ding ahi. Mitdel saipi genchiante dan a, mahni muh leh theih dandan kigensiak a, dik kisakvek theih ahi. A kimkhat leng theilou a, thudik bang mai a gen louh ding.
8) 'Khelhna neilou penpen in deng masa ve ua', I chih veu uh Setan' vanzat ahi. Hunlui a khelhna-te en a, kisubuai mailou in mailam enkawm in kisathak ni.
9) Pathian eilam a pang gige lou hial ahi. Apan gigena ding a, I nitna te suksiang masak a; thumna leng tawndan a neihthoh mailouh ding ahi.
10) Laisiangthou pen kitehna masa di ahi. Himahleh, thupukna atamzaw ( 90 % khawng) Bible ah Black & White in kigelh kimlou a, indirect in kigelhthoh hi. Thilkhat na hihziak a, midangte'n siatna atuah ding u'leh, na thilhih pen dik hithei tuanlou ding hi.

Hun nanunglam ah, Evan T Damkhothang in ' Kisikna Gahsuah' chih thupi pansan in Sermon hon neinawn a, tuailaite hon thathousak mahmah hi. Ahun patna lam ah, " Na nu leh pa'n, na kaam di hon leisak dek leh, ' ken kaam leithoh ka deih kei' chi chiat ni " chi'n, Tuailaite hon chou masa hi. Huai kawmkawm in, ei mimal kia kibulphuh mailou in, midangte leng awlmoh ni chih hon gen apan in, midangte awlmohna toh, programme zat hun a thu kigenkhiate tomkimtak a gelhkhiat ding lungsim ah ka vom pah ngal hi.
Zakai siah khon ( tax collector) toh kisai leh a kisiikna thu khawng Luka 19: 8 pansan in hon gensuk phekphek nawn hi. Kisikna gahsuahlou kichite a genna ah, " Khelhna kiphawk tan chauh zaw kisikna ahi kei. Khelhna puaknatpih tan kia leng kisikna hilou ahi. Huaitan lel a zaw bukimlou lua ahi. Khelhna huat tan kia in leng kisikna buching a tun teuh kei a; 'tua kipan diktat ta di' chih tan maimai leng ahun kei " chi'n hon gensuk muatmuat mai hi. Huai nungin, Kisikna gahsuah ichihte bang chibang kisikna hihiam, chih hon gennawn hi. Huai hun a agenna ah, " Khelhna hih nawnlou ding a, lungsim heilamdang vilvelna leh tawpsan siang vitvetna ineih chiang in kisiikna gahsuah chihtheih pan hi. Tuailaite'n, mitmei veng kawm a thugen tawpsan ta ni " chi'n hon genchiang kuau mai hi.
Huai nungin, Luka 3: 7 – 14 pansan in; Mipite kisiikna ding leh Siah khonte' kisiikna dingthute hoihtak in hon genpih a, eite kisiikna ding toh leng kibang ahihdan leng gen ngal hi. Kumpi Saul apan in leng, heutu khat kisiklouhna ziak a mipite athuak dan hon gen hi. A tawpdek in, " kithoihna sangin thuman ahoih zaw. Huaiziakin, kisikna diktak mah ah kibulphuh in, gah suangkhe ni " chi'n tomkim takin thugen hon zou linlian hi.

Huai nungin, Rev K Kamchinkhup in, ' Kipumpiakna leh Hunkhakna ' hun hon zang nawn hi. Huai hun mah in, 'Pledge' ah suai kikai a; diktatlouhna himhim doudal ding a kichiamna leng ahi ngal. Aman a thugenna ah, " Gamtat gilou lehngatsan lou in, thumthum lehang leng bangmah phatuamlou ding ahi. Damlouhna ituah chiang un, thumna I ngaina ua, Pastorte tanpha leng ngaina in;Pathian in hon damsak ding ahi I chi uhi. Huai kawmkawm in Damdawi I ne ua; Pathian muanlouh ziak a damdawi ne a kihi tuankei. En leng I zuih ngai ahi. Gamsung damna ding Solkal in hon pethei mawklou ahihman in, 'Pro1434' ah kibulphuh thak ni. I gam uah ki-itna beilou hial ahihmanin, mailam nawt ni. Pathian in midik 10 ziak a Khopi a venbit leh, tua Diktatna a kibulphuh sawm taktak mi hiai zah I omlai ve uale....lungke mawk kei ni " chi'n hon gen a, Tuailai tengteng khut kilentuah kawm in, thumna a hun khak in om hi.

Huai nungin, Biakinn kong ah 'Banner' a suai kaihna om in, suai kikai souhsouh mai a; huai hunsung mah in Phone sumang om ahihdan puan in om hi. A mutu'n a Diktatna asuah ngal ziakin, aneitu mah kiang ah piakkik in om nawn hi. Huai kia leng ahi kei! Programme zat hunsung mah in, Rs. 5 siik leh Rs. 10 note mangsakkha om ahihdan puan in om zomah hi. Programme lohching ahihdan, thil mang neupen leh lianpen leng muhkik ngal ahihna in taklang hoih mahmah hi. Huchi'n, khawmui zuul in innlam chiat ka zuan ua, ke'n leng Diktatna a kibulphuh ding lungsim a vei kawmin innlam ka zuan vengveng hi. Innlam ka zot kawm in, I Gam mahmah un leng " Ka Natna Lauhuai Vei Gige – Nekgukna leh Kitelna Siangthoulou Kichite Damsiang Eive..!! " hon chipah ta ding ahihdan ka ngaihtuahna ah hong lut mawk a, lungnuam takin ka om thei ta hi.

Laigelhtu' Lungsung Pan:
Cycle Workshop, Mihing' Workshop leh Gamsung Damna ding a Workshop ( Bungmual ah)– a kigawm a Workshop chi 3 kigente apan in thuhoih-lahoih tampi om hi. Gamsung Damna dinga Workshop kinei pen, 'report'piakna dan ahi zenzen kei. Kei hon sukha diak a ka theihte'n, midangte leng va hetkha sam hen la, Thudik leh Diktatna a miteng' kibulphuhna hong hileh chih lam-etna toh k'on gelhkhiat lel ahi zaw.
1911 – Ka Kipak - 2015