Ka Pa'n Hon Theita..!!
Written By: K Lianthansang

Latrine ( Ek-inn ) se nemnom toh lim kilak ut ka hikei.Ut thu a gen di hileh bel, Obama te khawng toh kilaak uthuai ka sazaw tham. Himahleh, " Na ek-inn gei uah va ding in la, lim k'on la ding uh. Huai hileh, solkal in na ek-inn man ding uh hon ngaihtuah sak mai ding ahi.." a chih ziak uh ahi zaw. Ahitak a gen in, ek-inn hoihtak bawlna ding sum ka neikei uh. Huai ziakin, leilak toukuak zok in, agei ah buuk neuchik khat ka lam ua, langva in akuak sungah ek ka zawllut suk mai uhi. Ek-inn hoihtak ka neih ding uh hon deihsak a, lim hongla tegel leng amel uh ka thei lai a, a mobile phone zat uh leng 'Nokia' ahihdan ka thei lai. Numei ahi zomah ua, pau leng apautheih-tuak mahmah uhi. Kum khat phadek ahi ta na a, ka ek-inn uh a awnpuk dekta. Ek-inn hial nektheih sakha zenzen a gilpi ana tun ihih khak u'leh leng, ka kipak veve. Sunghatlou a banghiam kibang a, ek-inn naih zihzeh mi ka hi. Huchibang kawmkal ah, ek-inn negai vek a sung-le-lai hattak a omte kipahpihlou thei vual ka hikei.!

Khosakna lam genlut zual lehang. Unau mi 3 ka pha ua, ka nu-le-pa toh sim in insungmi 5 chet ka hi uh. Zoudawn a ana khawsa masa ka hihman un, ka neuchik apan nasep ka pan ngal hi. Lamka lam khosak anoptuam deuh khakleh chi'n, kum 2011 in ka pem uhi. Huai hunin kum 18 in ka upa ta a, lawm-le-vual ka ngaih hun laitak leng ahi bok. Kum 13 ka phak apan Skul kai tawpsan a, nasep pan ngal ka hihman in nasep lam nanana chuh lit ka nei ngeikei. Lamka ah leng ka pa toh pangkhawm in ka kiloh ua, ka naute School ka kaisak zou hamham uhi. Ka papi, asepna ziaka mun tuamtuam a kisuankual ahihman in leh inn-mun ahauhluat manin, kou amau' gam munkhat ah hon tengsak ua, " Inn na bawlzoh u'leh bawl un la, tengden le uchin....ei lah munkhat a teng hithiat man dia kikhawsa lou a..." hon chih ziakin, a gam ua inn neuchik khat bawl a, khawsa nimnem ka hi uhi.
Lamka a ka tenglut kum mah uh hi'n ka thei. Chrismas hun hong tung a, nitak khat lawmte toh lengkhawm dingin ka kuan uhi. Konglam apan lenkhopna buuk sung ka et leh; numei melhoih mahmah, ngou kiukiau zozen, amailam humsam kaikhia in amit langkhat khuhsuk leh muffler puangsim phitphet ngawng-oh (amah toh kituak mahmah ) kawm a tu(sit) ka mu hi. Ka muh tung apan in ka lungsim teng aluahdim ngal mai. Amai lak a ka lawmte khat tu ahihman in, huaipa sampawt hial a ka dot leh, ama'n leng theingeilou ahihdan hon hilh hi. Lutsuk mai a, amin leh omna mun khawng va dotkhiat mai bang ka ut a, himahleh ka ngam taktak kei zel. School naupang lah kihinawn samlou, tangval banga ki-omthei ahihman in, nungak lam nanana ah chuh ka kizahpih kholkei vanglak. Himahleh, ka nungak muhnu pen kimaiphiat lua ahihman in, va houpih mawk ding ka ngam kei.
Huchia ka omom laitak un, lawmte khat in hon sawnlut guih a, amai uah ka va tukha thepthup hi. Huai hun apan chu, phalbi ahihlam phawklou hial in khaw-ul in hon pumtuam ngal a, daakkhiat ngam ding leng ahi kei. Lenkhop kimlai in singpi hon hawm ua, huai kawmkawm in chiamnuih hon bawl uhi. Ke'n leng huai hun pen 'golden chance' a la in, duangkuai lianu ka houpih guih a, ama'n leng hoihtak in hon dawng thuk ngal hi. Amin Lily ahihdan hon hilh a, apute' kianga Chrismass zang dinga hong pai ahihdan leng hon hilh behlap ngal hi. Ke'n leng ka min leh omna diktak ka hilh a, lungsim nuamtakin ka om hi.

Lengkhawm tawp in, innlam ka zuan siausiau uhi. Ka lupna tungah ihmu di'n lum mahleng, ka lungsim ah Lily loungal midang a om kei. Naungek Jesu leng a tazou kei phial..!!. Ka lungsim tawng ah, muhkhak nawn hunhun a, a number nget dingin ka ngaihtuah kawm a, ihmu suk ka hingal mai. Zingkal in, sa-aat dingin ka kuan a, suun hunte kikhopna a zangin, nitaklam Biakinn huangsung ah ann nekhawm dingin ka inkuan uh ka kuan uhi. Lily zongin ka dakdak mai a, muhphak di'n a omkei. Ngui taka ka tutsuk leh, ka kiang zek uah ana tu a, honna en kilkel ahihtuak. Ka muh takin, amit a taise zualzual zozen a, kihoupih zawsam omlou in, a nuihmai hon lak cheuh hi. Lily' nuihmai ka muh mai in leng annkam limna hon pezou hial abang.
Ann nezou, nitak kikhopnate nuamtakin ka zang zou nawn uhi. Lengkhopna kong a zunbuk kianga ka omleh, amah vuak hong pai a, ke'n leng ana sam ngal in ka kihou cheuh uhi. Lengkhawm dinga ka zot leh, aman leng hon 'yes' pah a, lenkhopna sung bang ah ka tukhawm tet-tat hial uhi. Dak 10:30 in Saptuam upa khat in, lenkhopna hun hon khak a, thumang takin ka kikhen nawn siausiau ua, kholak a buaina bawl malam leng ka om kei uh. Ka tawp un, lampi a paikawm in Lily' kiang ah a phone number ka ngeen ngal hi. Himahleh, hon pedia a kisak taka gelhkhe dinga ka kisak leh 'phone battery' bei ana himaimah. Ke'n leng ka number amah ka lehpiak daih a, lungnuam takin ka kikhen uhi.
Inn tunkal bang ka ngaklah mahmah mai a, taithoh hial leng ka himai. Inn tungphet, nuilut sim heuhau zozen in, ka Phone ka charge ngal a, hong ki-switch on zoh takin ka nu'n hon call ngal a, " Bawi, inn ah na paisuak ngal na maw....kei leng hong paiman dekta ka hi...singpi dawnna nou khawng ka sil lai ua, kholak a na om a, buaina khawng bawl a alang-alang a na diantuah khak ding ka lau a ahi.." hon chi hi. Ke'n leng, " inn a paisuak ngal ka hi Nu.." chi'n ka dawng hi. Ka nu bel laisiamna lam ah bangmah hikei mahleh, Pathian' lampi zuihna ah hon makaih zou mahmah mai a, kholak a vaakthap mai dingin leng hon phal kei. Khotang leh gamsung chidamna ding a, Innsung mah poimoh masa ahihdan leng a theisa vek ahih ziaka huai teng hon gen ahihdan leng ka haih kei a, ka nu ka ngaisang mahmah.

Ka nu toh ka kihou zohnung uh minute 3 paipan di'n, number vuak hong pai hi. Ka kihou pat u'leh, Lily ahihdan ka thei ngal mai a, ka kikoukhe khadek hial. A 'aw' mahmah in leng hon zoulua ahihman in, ka theihlouh kal in ka itdan thu khawng ka genkha suk a, aman leng hon muhni apan hon ngaina pah mawk ahihdan hon gen hi. Dakkal 1 val ka kihou nungun, ka tawpthei zenzen uhi. Ka kihou zohphet un, message 2 hong lut ia; amsapen ah, " K'on ngailua...." kichi a, a nihna ah " Sihna loungal in hon khenlouh di aw...." chih kigelh hi. A message ka muhnung tanpha in leng ka muangzou taktak kei. Lily' melhoihna leh tongsuahte ka ngaihtuah kawmkawm in ka ihmu kha hi.

Zingkal bang ka thouhak khasim a, khanglou phet; lukham kawm a Phone maikhe ngal a ka et-leh " 3 new messages " chih ana om a, anuai ah " 1 missed called" chih kigelh zom ngal hi. Ka ethoih leh Lily apan ngen ana hizomah a, lungsim anuam ngei mai. Ka phone kik ngal aleh, " kikhawm di maw? " hon chi hi. Ken leng " kikhawm lou di....." ka chih zohphet in, " hong hoh in awleh..." hon chizui ngal a, ka 'yes' suk ngal mai. Suun in ka va pawt a, nitum tanpha ka omzou mawk hi. Nitak hunte kikhop leh lenkhopna hun a zangin ka om ua, kuamah ka eng kei uh. Lenkhop tawpin, a inn uah ka hoh nawn a, tuilum noukhat ka dawnkhit in ka paita hi. Eh! Ka paileh a gate tan uh hon kha a, " K'on ngailua " chih toh kawi hon thuah in, ka muuk ah hon tawp cheuh a, " ihmutlim " chih toh insung ah lut athuah nawn hi. Inn ka tun in hon message a, " K'on kiss mawk a, naheh hia? " hon chi hi. Ke'n leng, " heh zenzen lou e" ka chihleh, " OK " chih teng hon khak leuhlauh in adai vengveng a, kei leng lumsuk in ka ihmu ngal hi.
Zing khua hongvak nawn in, nisa khawng bang etlawm diak abang hial. Nasem a kuanna di omnailou ahihman in, suun hunte Lily' kiang ah ka va zang nawn leuleu hi. Amah ka muh nakleh ka lung nuam ahihman in, ka hun-awl neihteng chu ama' kiang ah ka zang bei zel a, nuam ka sa mahmah uhi. Suun khat ka va hoh leh, Lily in; tagah ahihdan leh anu leh pate aneulai a kikhen ua, zi leh pasal aneihtuak ziak ua a pute' inn a khanglian ahihdan khawng hon hilh hi. Apute'n a duat mahmah mai ua, vaigam a-ut nana a School kaisak ahihdan khawng uh leng hon gen behlap hi. Huaite khawng ka theih apan in, ka hehpih deuhdeuh a, hehpihna ziak in ka itna akip semsem hi. Ka itna lian semsem in, kuamah angsung a zaal di'n ka phal kei. Amel et-et ka ut mai......

Hunte pailiam zel in, kumthak hunte bang leng loptheih zahzah a lopzoh in a om ta. Lily ngei leng vaigam lam a School kai dia apai hunnawnta a, kikhelah takin ka om nana uah ka omkhawm uhi. Mi khenkhat in Nupa bang honsa hial uh. A paini di zan in hon sam a, kei leng kintakin a inn uah ka va hoh ngal hi. Kou tegel vuak om ka hihman un, ka kiang nai ah hong tu a, kip taka hon kawi in; pai utlou ahihdan leh ka kianga omden nuam ahihdan hon gen a, abiang ah khitui nuul senglouh phial di'n hong luangkhe zungzung mawk hi. Hehnep didan tuan leng ka thei kei a, a mittui nuulsak kawmin, " nang adia gin-om gige ding ka hi.." chi'n a muuk ka tawpsak cheuh hi. Huailam ah vapai leh, laisim mah awlmoh a va nei ding ahihman in, kei toh kithuzak theilou a aom khak nikhua a, midang ka neihsan ding alauh ziaka kap hial ahihdan hon khonung hilh hi.
Nitak sawtsim ahihtak manin, pai dingin ka kisa a, Lily paikhiatsan ding ahaksa tel mai. Ka dingkhe lah mahmah mai a, ka dinkhiat zoh sunsun hun a leng tusuk zel in, akiang ah khamuanna thu ka gen zel hi. Atawp-tawp a ka dinkhiatsan dek leh, " hon taisan ngeilou ding na hihdan latsakna di'n kichiamna hon neihpih mai ve.." chi'n a room sung ah hon lutpih a, nupa bangmai in kiciamna ka nei maimah uhi. Ka pai in leng gate tan hon zui a, " Nupa hingei dinga I kichiamnate peel kei ni aw...kimuhkik nawn mateng Mangpha.." chi'n, mangpha hon khak a, ke'n leng Mangpha 'quality' hoihpen ka khak kik hi. Ka nungaknu'n hon zinsan nung ka chimthei mahmah mai a, ngai law petmah ka hihdan ka sungte kiang bang ah ka genkha sek hi. Hun hong paizel in, nasep ding hong omnawn a, nasem in ka kuan zelzel hi. September kha bang theihlouh kal in hong hitou vengvong nawn a, Lily leng " School ka kainuam nawn kei.." chi'n innlam ah hong pai hi. Kou leng ka kithuah theih zahzah ua kithuah zel in, ka hun tamzaw uh munchih-mualchih ah ka zangkhawm ta uhi.

Nikhat, Damdawi Inn lam a ka tanaute uh va vehzou, inn paikawm a Lily' kianga bang ka sawm leh ana omkei a, innlam zuan in ka pai ngal hi. Ka inkiang ua dawr kong khat ah ana om a, ka muhtak in, " Ly..bang hih e...na inn uh k'on et leh nana omkei a.." ka chih saisai zozen leh, " nangpa maw no'n kop mawngmawng " chi'n hon maitang kawk pah zuauzuau mawk hi. Ke'n leng kuamah houpih ngeilou a, amah kia houpih sek ka hihman in, hon chiamnuih di khawng ka sa a, kam neem takin koplou ka hihdan ka gen hi. Alungkim dek kei a, " nitak chiangin Biakinn kong ah hong pai ou, kihou ni.." hon chih behlap hi. Ke'n lah bangmah thu theikhalou ka hihman in lamdang ka sa mahmah mai a, nitak in Biakinn konglam ka zuan ta hi. Kikhen di hon chih mawk pen in ka lungtang hon dawt pailet ahihman in, ann leng ka duhkei a, gilkial takin Biakinn kong ah Lily ka ngak hi.

Bangtan hiam ka ngak zoh nungin, Lily hong pai hi. Agal a hongpai ka muh in, ka itna alian deudeuh mai a, ka ngaihna apung deuhdeuh mawk hi. Kikhen di lam himhim ka ngaihtuah ngeikei a, thil hithei didan in leng ka koih kei himhim. Hong tun takin, " Bangziak a n'on kop tel e, hichituk a hon ngai inga?" hon chimawk hi. Ke'n leng, " Kua toh k'on kop a eita.." ka chih leh, kamkhat lel leng apau kei. Atawp in, " n'on khennuam ziaka huai n'on chih eive maw?" ka chihleh, message khat hon ensak hi. Huai message ah, " ka tangvalpa toh ana kingai uh maw? Na kingaihna uh ana tawpsan unla, ana ngaihsak nawn ke'n.." chih teng kigelh hi. Ka hehtha asuak mahmah mai a, a number la in, ka phone ah ka save ngal hi. Lily toh ka kihoulai mah un, " k'on ngai lawvoi..bang ziak a..." chi'a hon kawi in, kap huphup mai hi. Kei leng ka mittui hong pawt a, kikhem tuah zawsam ka omkei uh. Sawtlou nungin Lily in hon paisan a, kei leng ka dinna mun ah ka khukdin suk top mai hi.
Inn ah ka pai a, ihmut ka sawm hangin a hithei kei. Lily ngailua ka hihman in, na leng ka sempeih kei a, ann leh tui nangawn leng ka duhkei a, gawnlam ka man-oh hiaihiai tamai hi. Ka nu'n, " bawi, bang ziaka hichi puaknat tel e " hon chi lel a, adang agen di athei tuan kei. Beidong gawp in, Lily message ana khaktu ka houpih leh, nidang a ka classmate ngei Chingboi kichi ana hi a, ka hangsan gawp hi. Amah toh kingai ngeilou ka hihman un, aman leng ngaihdam hon ngen a, Lily' kianga leng ana gen a, ngaihdam ngen dingin ka sawl ngal hi. Huai nungin, Lily in leng hon theisiam thak a, a nihveina dingin ka kingai nawn uhi. Lily' a dinga mansa leh kihong gige ka hihman in, kingaih thak a baihlam mahmah. Mi khenkhat in, " Mehkhing suanlum abaihlam.." achih uh ka chian ta hi.
Huchi'a ka buai sung un, Chrismas leh kumthakte zangzou zel in ka om uhi. Ka itna grape gui uh a thulimlouh ziakin, huai kum a ka hun zatdan uh anopna ding himhim om hi'n ka theikei. Kum 2013 mel mukha chu a kihi peuhmah mai a, ke'n leng sum-le-pai zonna awlsam zawk di ngaihtuahna in Vaigam lam ah zinkhait ka sawm leuleu hi. February 9, 2013 a zinsawm ka hihdan Lily' kianga ka gen leh, " n'on ngaihlouh man a hon zinsan dek nei ve maw.." hon chinawn taget hi. Ke'n leng, " Huaidan hilou ahi. Hiailam a nasep gimhuailua, thagum-thatang mahmah zat ngai a, tha in zoulou ahi..." chi'n ka gen hi. Ka zin dek nitak in leng a inn uah ka va pawt a, gensawnlouh dingin zinglam dak 3:00 tan mawngmawng ka va om a, ki-aam takin ka omkhawm uhi. Zingkhua vaak leh zinkhiatsan a, kum bangzah hiam kimu nawnlou ding ka hihman un, khelah pipi in ka paisan a, huai hun in aak masa a khuang ta.

Gari sung nasan ah ka nungaknu ka ngaihtuah den a, ka sepna ding mun ka tunnung tanpha in leng ka lungsim ah midang himhim abelh thei kei. Nitum kuan chiang bangin, ka hun zatkhawmdan te uh hong lang dundun a, theihlouh kal in mittui khawng ana pawt sek hi. Sawtlou nungin, ka sepna ding mun ah Interview ka bawl a, nasep ka panthei pah ngal hi. Naupang neuchik ka hih apan nasem pah ka hihna ah, nasep ding hong kipia bangbang thazoh takin ka sem a, heutute deihsakna leng ka tang hi. Huchi kawmkawm in Lily toh ka kithuzak zel ua, ka paikik di kal a ngaklahdan khawng hon genzel a, nuam ka sathei mahmah uhi.
Kum khat ka om nungin, Lily' omdan hong tuam hiaihiai a, ka lungsim anuam hetkei. Kum 1 leh kha 2 ka om nungin, Lily in hon thuzak vang mahmah mai a, kei leng ka lung nuamlou in nasem zoulou hial in ka omkha sek hi. Ka heutute bang un damlou hon sa in, Hospital peuh ah hon paipih ua, a phatuam tuan kei. Nitak khat, ka lawmte khat in " Lily in pasal nei eive.." hon chi a, ka kiguih zot zozen hi. Ka gingta thei himhim kei. Niak sawtnung ahihman in, ka sungte kiangah thuchian ka kan nawn tuan kei a, ihmulou in zankhua ka zang hi. Zingkhua hong vaak a, ka nu' kianga ka dot leh atak mah ahihdan hon hilh a, pasal ka hihlam ka hamhaih kha!. Houpih theihlouh in ka puk a, ka khanloh takin Hospital ah ka om hi. Ka nung-le-ma theilou ka hihman in, lawmte kianga ka dot leh, thil omdan hon gen ua, mittui hong kipan nawn leuleu hi. Kar khat val ann nelou a ka om nungin, hehnepna tuamtuam ka za a, ka thuaksiam deuh takin, nasem in leng ka kuanzou a, ann leng ka ne cheuhceuh ta hi.
Huai nung, kha 3 zoh vel hi'n ka thei. Nitak khat, insawng tunga khapi vaak phingpheng nuai ah ka tu a, phone ah la ka ngaikawm heuhheuh hi. Lily loungal ka lungsim ah midang a om thei mahmah kei a, ka langaih teng kei ka kipia a, Lily ka mitkha ah alang dundun maimah hi. Mittui toh kingaihtuah vungvung a ka om laitakin, message khat hong lut a " Damzel maw? Bang hihzel e? " hong kichi hi. Ke'n leng, " dam chih di hi tulai zaw. Nang kua e? " ka chih leeh " Lily ka hi..." hon chi a, ka hihuai zozen. Ka phone leh hon pick-up sak zenzen a, ka kihou lai un ka kidek zoukei nepnup nawn a, amah leng hong kapkhia hi. Ka kihoulai mah un, " ka pute toh kisuheh kha ung ua, ka nute' kianga giak dinga ka pawt leh, na zinkal a tangval ka na guukneih khat toh kimaikha in, huchia ana kigukha mawk ka hi uh, kei chinlouh ahi..hon ngaidam in.." chi'n kapkawm in hon gen hi. Ke'n leng ngaidam ka hihdante gen in, pasal neisa ahihtak ziaka sawt houpih ding nuamsalou ka hihdan ka gen zoh in ka phone ka 'off' khum ngal hi.

Minute 1 zoh in hon phone kik a, " hon ngai nawnlou maw?" hon chi hi. ke'n leng, " Hon ngaih thu in zaw, nang sangin leng k'on ngaizaw tham a, ka damsung teng in k'on ngaiden ding. Himahleh, I kal ah thil haksapi omta ahihmanin, ahithei nawn kei.." ka chihleh, " k'on phone chiangin n'on pick-up sak hamham lai di aw..." hon chi a, "awle" chihteng in ka dawng lel. Ka kihoukhit nung un, nidanga " k'on ngailua.." hon chih ngutngut laite ka bilkha ah hong ging nilouh a, kidek zoulou in ka kap nawn hi. Hon phone chiangin leng ka pick-up ut nawn kei. Nikhat, hon call den a, ka pick-up nuam tuankei. Messge khawng ah pick-up hamham di'n hon sawl zel a, atawp in ka pick-up khong hi. Bangmah agen ma in, hong kap huthut mawk a, ka lungtang a-na mahmah. Lily bel a lunggim ding leng ka phallouh, uanggen deuh lehang, huih in amutkhak dia leng ka phallouh ahihlai a, khase taka a kah huthut mawk pen ka pawna mahmah hi. Aziak ka dot leh, " ka pasal in niteng a zu kham gige a, hon vaw gige. Ka pasal' nu'n lah tagah chi a hon simmoh lua...ka thuak zou nawnkei.." hon chih takin, ka hehtha bang asuak dek mawk a, " na deihlouh ding uh bang ziaka nei na hi ua?" chi'n dotna ka bawlkhum nuam zozen hi.

Huai nung, kha 1 zoh in hong kikhen ua, minsiatna ka tang leuleu hi. Kei ziaka kikhen hidan a ngoh in ka om a, ka nu' kiangah leng kampau zakdahhuai pipi ana gen pawl leng a bei kei. Lily leng ka inn uah ana hoh zel a, ka nu' kiang khawng ah ka tanchin honna kangu zel hihtuak hi. ka nu' kianga hon ngaihdan ava gen leh, ka nu'n " pasal na neihsan mawk a eivoi..ama'n nang sanga honna ngai zawtham zaw hiven.." ana chihsan zel hi. Kum khat nung tanpha in leng Lily ka ngaihna a beithei ngeikei a, lamdang ka sa. Himahleh, kingai taktak in ka omkik nawn kei ua, nungak dang bel ka ngeingam tuan kei a, sai lel leng ka saipeih nawn kei hi.

Tu'n bel kum 2 bang pailiam ding ahi ta a, apuakdan ka siam simsim ta hi. Mangngilh theihna ding ahihkhak leh chi'n nungak leng ka sai nawn panta hi. Ka kikhen nung uh kum 1 apai tan in bel nungak dang himhim ka sai ngamkei. Himahleh tu'n pathian' panpihna toh nungak hoihtak ka neinawn a, khosakna lam leng adan omdeuh ta hi. Pathian' lam ah ka hihtheih bangbang in ka kipelut a, nidang a ka pa toh zu dawnkhawm thei himah le ung, tu'n bel ka siangthou ta. Ka pa'n leng lamdang honsa hial hi. Ka hinkhua kikhekna 'Ka Pa'n Hon Theita' a, amah leng hong kikhek in, inkuan nuamsatak in ka om ta ua, zukham-sakham a kitom muh ding, ka insung uah a om nawn kei. Ka sepna mun ah leng Senior pen in ka om ta. Ek-inn leng, kum nawn a Solkal' buhpang sawklou hial a, hoihtak khat ka bawlzoh ngei uh ka ki-lamen hi. Lamka ka paikik khak hun sunsun a, ka kilimlakpih ka ek-inn uh ka mitkha ah alang dundun sek a, cameramen te natawm leng ka mitkha ah alang dundun hial uhi. Bangteng hileh, Solkal' panpihlouh a, ek-inn hoihtak ka neih ngei uh ka gingta tinten a, huai dingin na hoihtak a sepzom zel ka sawm hi.

Laigelhtu' Lungsung Pan:
Hiai Tangthu phuahtawm hikei mahleh, asung a min (name) kizangkhate phuahtawm ahi. Nang min toh kituakkha ahih zenzen leh leng nang na hikei chih ana kithei mai in. A 'moral' I en lel ding ua, laktuak isakte uh la in, paihkhiat dinga tuakte zui teitei lou a, eimah mimal lungsim ah ana paikhia in; I hinkhua mahmah uah leng zuih sawm chiat ni.

1111 – Ka Kipak - 2015