Aww! Nang Nigerian Tangval – LifeOK..!!
( Self-Confession )
Written By: K Lianthansang

Kum 19 lel a upa, nungaknou ka hi. Melhoihna lam ah leng mi ka phalah tuan kei a; duangching mahmah ka hizomah. Ka nu leh pa' tanu neihsun kia hilou in, a ta neihsun uh leng ka hibok. Dawr lianlou khat ka bawl ua, huai tungtawn in ka kivak uhi. Ka min dingin, 'Tanu Duat' hon chile uh leng dik phial ding khop in, ka nu leh pa'n honna duat mahmah ua; Minister-te tate leng ka eng tuankei. Haksatna kichi himhim ka thei phakei a, nopsakna ngen lunggulh in ka ut-le-dah in ka om sek a; thuhilhna 'aw' himhim ka na theisiam ngeikei.

Kei ziak in kholak ah tangval kihonsual leng a om mun mahmah. Ka melhoihna in tangvalte' mit zoulua ahihdan khawng ka theih-hoih deuhdeuh chiangin ka kiliansak deuhdeuh zel hi. Nitak chiangin inn a hong heel di leng abei ngeikei a; Pathianni teng a hon pawkhe ding natawm leng abei ngei kei. Achang a 'routine' bawlkholh hial dia hoih ka sak hun leng atam mahmah. School hi'n kholai ah hileh miteng' etzui vungvung in ka om hi. Ka melhoih ziak leh ka goumanpha a dai-om luat ziak hiding in leng ka muangmoh. Aziak ahihleh, ka niik singlua hiven..!!. Mi tamtak in, goumanpha ka neih( gold leh diamond sanga manpha zaw ) pen baihlam taka muhtheih pah di'a ka koih leilawi ziakin, manpha taktak nawnlou dingin gingta vek uhi. Mi atuakpeuh in a sawktheih ding ua thil-om himhim chuh a manpha nawnkei hial ding chih ka thei. Himahleh, ke'n ka neih pen toh ka bukkak ngei kei.

Ahitak a gen in, ka goumanpha – Pasal neih hunhun a piak ding ka chih himahleh, tu'n a 'common' gawp ta. Neitu kichian omlou 'training center' bangmai ahi ta a, ke'n leng poisakna ka nei nawnkei. Mite'n, a rate niam a vanzuak om nana naih uh ahihman in, ke'n leng 'Entry fee' tawmchik la in, dawr ka guuk hon(open) zel hi. Mi theichianlou pi a simmoh mahmah bang ka hau zomah hi. Message 'reply' senglouh hun leng atam mahmah a, hon 'call' ut atamluatna lam ah khuai vaitung mah bangin ka phone ging kiphamat den phial hi. Gen uanglua n'on sasim maithei uh, himahleh ka tuahkhak ngoihngoih mah hon gen ka hizaw. K'on genlai dingte leng gintak haksa pipi a om ding. Gingta in gingta kei le uchin, kei lou leng mi tamtak in atuahsa mah uh ahi veve.

Kei chauh khovel a numei om bangin ka kingaihtuah mun mahmah taget zel hi. Huchih kawmkawm in Class – 10 ( BSEM ) ka exam tei a, ka zeina lam dotna hong paikhaklouh ziakin ka lohsam hi. Himahleh, hon ngai ding ka tasam tuan kei. Mi 2 leh 3 bang ka kop zelzuul mai a, nuam ka sa mahmah. Valentines Day, Chrismass leh New Year chiang bangin 'Gift' ka dong tamthei mahmah a; 31st December nitak ngial, kei toh zangkhawm nuam tangval a tamthei khopmai. Ka simmoh deuhte'n hon 'call' khak chiang bang un ka pick-up hamham a, inkiang a naupang kimawlte khawng toh kihousak ek-ek zel in, chimnuih bawlna in ka nei hi.
Lehkha lam pai lawmlawm nawn dinga ka kigintaklouh ziakin, ka tawpsan hi. Huaizoh sawtlou nungin Vaigam lam ah lawmte'n hon sam ua, vapai ngal in Company khat ah ka va sem hi. Ka nu leh pa'n bel hon duatluat ziak un ka ut dandan in hon omsak ua, ka zalen mahmah. Vaigam a ka om tung in pau ka siam naikei a, lawmte' pang beel in ka khawsa hi. Kum khat zawh in bel, kei-le-kei kitoudelh in inn khat ka luah tuam ngal mai. Huchih kawmkawm in, Lamka tangvalte hinawnlou in 'foreign tangval' ka maikhia hi.
Khovel nopsakna kichi liauh a liauh-thoh ka hipen mai. Intuam luah a khawsa ka hihman in, nasem a ka kuanlouh hunteng in ka tangvalpa hong hoh gige hi. Sapte'n, " Living together " a chihte dan uh ka hisim mai ua, ka tangvalpa'n bel, " Living To Get Her " chi'a alawmte kianga gen di'n ka gingta. Ka hunzatdan nuam ka sa mahmah mai a, ka omna peuh a sum lawh ka himai. Company a ka vasep sangin, ka inluahna a kei mimal' Company ah sum tam ka lawh zaw hi. Ka nu leh pa sum tampi pi ka thon ( khak ) sek a, kipak mahmah uhi. Huai sumte in gari bang ana lei ua, saptuam lam hi'n khotang vai ah hitaleh, donpi-donke tuamtuam om-te leng hoihtak in ana pezel uhi.

Hunte hong paizel a, zu-le-sa toh hun zat a, ka tangvalpa toh lupna khat a giahkhawm tuh ka khosakdan tangpi - khekzoh vuallouh ding hong hita hi. Kisiik tuntun in leng ka om ngeikei a, innlam ngaihna himhim leng ka nei ngeikei. Sum ka khak nakleh, ka nu leh pa natawm leng ka lungngaih vungvung ngei kei zomah hi. Amau leng tuabang mah ahi veve uhi. Nupa bangmai in niteng-hunteng in ka om ua, kuamah eng dingin leng ka koih kei ua; kuama'n kou hon eng tuntun dingin leng ka kikoih tuan sam kei. Hon genchian suk vanglak leng, ka tangvalpa ahihleh Nigerian tangval ahi. Ahoupen in gen lehang, mivom chiik mahmah telawi ahi. Powder kinuh leh 'sahou vutphual' bang philphel zomah ding in ka gingta.

Nitak khat, ngeinadan zui dia kisa nawn in, bangkim mansa diam in om hi. Ka veilam pang a Zu (wine) tawi in, dawn dinga ka kisak laitak in ka 'Phone' hong ging hi. Ka et leh, " Mom " chi a ki-save apan ana hi a, kintak a pick-up ngal in " Hallo Nunu " ka chihleh ka Nu' kahging ka za ngal a, lamdang ka sa mahmah. Aw liingsim pilhpilh kawm a, " Nunu, bang thu a...bangziak a na huchih kah mawk..?" ka chihleh, " Bawi, na pa a om nawn kei.....zingchiang in aluang lap di'n hong pai teitei in aw bawi..." hon chih khum ta maizen zaw, ka etna ding natawm leng ka thei kei. Ka kianga Nigerian tangval pa'n bang lamdang sak chitak in honna en heuhou zozen hi. Ka Nu' kiang ah, " Nu! Ka pa' damlouh lam lah n'on hilh hetkei a, bang chidan a siphut mawk aa..." chi'n ka kap a, hon dawnna ka zakchiang sun bel " gari accident ahi.." chih ahi.

Ka Nu' kahna aw ka bilkha ah amang ngeikei a, lungsim hon vut mahmah hi. Huai nitak Zu-le-sa hihlou in, programme omsa teng leng ka 'cancelled' uhi. Ka pa lah omnawnlou, ka nu kia om didan khawng ka ngaihtuah a, ihmulou hial in ka kapden phial hi. Zingkhua hong vak a 'flight ticket' ka et leh ka mupah vanglak a, ka paithei pah hi. Lenna sung ah leng ka mittui hong pawtpawt mai a, ka kisiik tuntun maimah hi. Ka summuhdan a diklouh ziak a, huai sum pansan a kilei gari mah a ka Pa si ahihdan ka theih chiangin, kimohsakna in ka pumdim hi. Ke'n, summuhna diklou taka ka muh ziaka gawtna hichi tuka nasa tuak ka hihman in; tagah-meithaite panpihna ding a sum paite leh gam khantouhna dia sum paite azatna ding banga zangloute maban ding ka ngaingam kei!. Kei damlai mah in, ka thilhihkhelh man ka thuak ngal a, mi khenkhat in bel a tusawn-khawngsawnte uh tan ah leng thuakthei uhi. Huaiziakin, lennna sung a ka om sungin, summuhna diklou zaw zatngam-huai lou ahihdan ka musuah ta.

Inn ka tun in, hankuang vot dikdek sung ah ka Pa' ana lum a, akuang pen tuanglai ah ana kikoih hi. Khovel a ka pa neihsun in kamkhat lel leng, " Bawi..dam a hong tung maw? " chia, anuihmai kilawmtakte honna suahkhum lou a, amel natawm ettheihlouh dia ana om maimah zaw ka thuakzou mahmah kei. Aluang bul ah tu in, kahtheih zahzah in ka kap huphup tamai hi. Ka pa' kiangah ngaihdam ngen ding chileng le a kikheel vek ta. Ka pau dek chiangin ka awm a bing a, ahithei kei. Kou nuta vuak nutsiat a ka om maimah tel uh zaw thuaksiam vual ding ahi kei.

Ka tun ni mah in, ka Pa' luang koihkhiat in om ngal hi. Ka nu'n, " Bawi, Vaigam lam ah zaw hon zinsan nawn dah mahmah mai ve maw?" hon chih ngutngut ziakin, ka zin nawn kei a, ka dawr uh hoihtak a etkol-touh a, kei leng hoihtak a omtouh ding ka lunggulh ziakin, ka nu' thu mangin, inn ah ka om denta. Vaigam lam a ka tangvalpa ka phawk nawnkei a, ama'n leng hon phawk nawn di'n ka gingta kei. Himahleh, ke'n ka phawklouh lai a leng honna phawkden – Van Pathian' kiang ka zuan a, khelhnate ngaihdam ngen in, ka hinkhua ama' a dingin ka laan kheta hi. Nidang a ka simmoh mahmahte khawng, tu'n ka eng pen asuak maimah ta ua, lawmte kiang ah maizumna ngen toh ka omsek hi. Himahleh, Pathian in hon hehpih ziakin, ka Pa' hinna tungtawn in hon sam a, " Aww! Nang Nigerian Tangval k'on poimoh nawn kei. Gawtmun lam zuan dinga 'Channel' n'on bawlpihna apan in ka suakta ta. Huaiziakin, LifeOK Channel ka zuita.." ka chithei ta hi.

Laigelhtu' Lungsung Pan:
Hiai laigelh dinga hon sawltu' min leh omna taklat hikei mahleh, a hinkhua apan midangte'n ziltheih ineih khak u'leh chih ziakin, a hinkhua a apalkhak diktak hon taklang lel ka hizaw. Hiaibang thu gelh dinga honsawltu'n " Kuamah simmoh leh pampaih louh ding ahi. Tunung chianga kisiik tuntun theih ahihna ah, simmoh huaipen-te leng nuihza bawlna ding in zang mahmah kei ni. Huai banah, ka Pa' hinna tungtawn in Pathian in hon sam a, ka kipak. Kei hinna tungtawn a hon sam himaizen leh ka maban ding 'Gawtmun' hitel ahi. Huaiziak in, gamdang a om ka numeipih-te'n leng kei hinkhua tungtawn a pilvangsem a hong om uh ka deihsak mahmah a; kei' hinkhua banga hinkhua zang khenkhat omlai ahihman in, huaite'n leng 'LifeOK Channel' zuihsawm chiat le uh chih ka deih mahmah. Ka numeipih khenkhat, kei banga ana omkhate kiangah, 'a kikheel ma in kisiik mahmah mai ve ua maw..?' ka chihnopa leng ahi " chi'n hon gen hial hi. Huaiziak in, hiai hinkhua tangthu tomkim taka igelh uh Pathian in hon zatsak a, lamdiklou a paikha zenzen te'n lampi dik hong tot-nawnna ua apan ngei I lam-en hi.

0711 – Ka Kipak – 2015