Ningani Nitak..!!
Written By : K Lianthansang

Ningani ( 5th November, 2015 ) nitaklam ann nezou, kam khuah kawm a konglam ka pawt leh; gate tung zawn ah 'A4 Size Paper' khat hong lenglut dangdang hi. Hon pailuttu bel ka thei kei ( gate in hon liah ahihman in). Ke'n leng kintakin ka va tawm ngal a, ka et-leh - Young Paite Association (YPA), New Lamka Block apan ana hi a, thulu (topic) dingin " THEIHSAKNA " chih laimal lian-te in kigelh hi. Anuai ah thu saulou in, mulkimna bei a TUALTHATTU(TE) matkhiatna dinga Police-te panlakna ze-awl sakziak a nohna neihnadan leh tualthat-te mawhpaihna kawm a 'Bandh leh Procession' neih ding tungtang kigelh hi. Huai laipek mah ah, YPA General Head Quarter' makaihna nuai a sai a om ahihdan leng kigelh a, Block leh Unit chih apan nungak-tangval, nupi-papi atamtheilam kikaikhawm dinga ngetna leng a om banah, New Lamka Block-te kingakkhawmna ding mun leh ahun tanpha chiang takin kitaklang hi. Ke'n leng huai hun mah in, hohlou-thei vual hilou ka hihdan thei in, dam a khovakpha muh leh hoh ngeingei dingin thupukna kiptak ka lata hi.
Sawtlou nungin khua hong mialzui ngal a, innsung ah ka lutnawn hi. Huai ah, 'LifeOK' a chihte uh TV tungtawn in ka en a, ka ngaihtuahna asau pai ngei mai. Nidanga kithah-kimat kichite gamdang kia a tung ding a kikoih hina pi; eigam hong tun banga 'LifeOK channel' a I etkhakte khawng uh leng igam ua maingal mahmahta ahihdan khawng ka ngaihtuahkha nilouh. Cable News leng ka en a, 'Tualsung Thuthang' ah November 6, 2015 ( Ziltawpni ) chianga Lamka khawsung' omdingdan chiang takin hon puangkhe nawn leuleu hi. Huai nitak a ka ngaihtuahna khempeuh muhtheih hileh, kipeeltuah zungzung hial ding un ka gingta.

News ka ngaihkhiat (enkawm) zoh in, lupna lam ka zuan vengveng hi. Computer ka 'on' ngal a, lungsim a suakkhia teng gelhkhe ding a mansa chu ka hingal mai. Ka khawlkhuaknei' mai (computer screen) ah hong kipei chelchel zozen khat om a, 'loading.....' kichi leng a om. Huai kawmkawm in ka ngaihtuahna leng ana kipei chelchel a, thiltuam dang daih ka ngaihtuah kha thepthup hi. Ka lungsim ah " Huan, Pathian itte, aman a seh banga a sapte adi'n, a hoihna ding un bangkim in a sep sak chiat chih i thei hi " chih, Rome-te 8:28 a kigelh, simkha ngei ka hihdan hong kilang dundun hi. Hiai Bible chang ka lungsim a hong lutna ziak ahihleh – Bill 3, August khatawp (2015) a Pathian' lemgelna toh passed a om a, Manipur Singtangmite' lak a kituahna hontut ziak ahi masa hi. Gensau zek lehang, Legal (Dan) thak tungtawn a Meiteite'n Singtang gam laksak hon sawm ziak un buaina piang a, igam uh mangthang dek lai daal in om man hi. Pathian in, Manipur Singtangmite' lungsim a 'Kigawmna Bill' pawt ngeilou ding ahihdan theihoih mahmah in, mailam hun a ei ading a hoihzaw di a muhkhawl ziaka 'Bill 3-te' kigawmna bill ding a hon zatsak hizaw ding in ka ngaihtuah.
Huai ban-ah, 31st August nitak in mi bangzah hiam si-le-liam in I om ua, Government' ngaih in " amau leh amau kithat-tuah uh ahi " chih ahi tel hi. Ei-le-ei kithat hilou I hihdan uh chetna dingin, Pathian in a thilhihtheihna hon suah nawn a; a ninawn in Police Station mai ah sihna mulkimhuai mahmah hon tuaksak nawn leuleu hi. Huai apan michih in Pathian ibuan ua, belhtak leh muantak ahihdan thu khawng tangkoupih in I mau vengvung uhi. Pathian in ama' lam nga dinga hon sapna lamdang hina tel e!. Huai sanga nasa zawsem a leng hon samthei ahih lailai in, igam ua khawvak puaklutna dinga kalbi khat a pangkawm thei dia sapna 'aw' I zaak zenzen ziakun hamphat-huai mahmah hi.

Huchia thuum kawmkawm in, Nampi makai Sia Pau' inn haal in hong om nawn a, Pathian in thilteng thei lumlet ahihdan lang chian semsem hi. Manipur Solkal in, Phualpi Solkal' kiang ah, " Underground-te tawsawn a buaina piang ahi " chi'a a 'report' u'leh leng (report khin uh hizomah hia leh?), " Underground-te'n hon tawsawn hile uh, ka Nampi makaipa' uh inn ka haal tel ding ua hia?" chi'a I pantheihna ding uh ana himawk zel hi. Pathian' thil geldan achang in lamdang bang mahleh; I maban ding teng uh mu pailet vek ahihziak in, Pathian mah belhtuak ahihdan theihsuah semsem in a om ta.! Akhen chiangin " mipite' gamtatna uang lawdeuh hiveh aw.." I chi vungvung sek uh. Mipite' gamtatna pen 'uang lua' hilou leh ahoihzaw ding ngiimna ahihzawkdan khawng ka ngaihtuah kawmin, " Lametna lamah, kipak unla; gimthuakna lamah, kuhkal unla; thumna lamah, thum teitei unla; Misiangthoute taksapna ah taksap awnghu unla; mikhualte kipahpihin om nilouh un. Honsawite vualzawl sak unla, vualzawl unla, hamsiat kei un. Kipakte kipahpih unla, kapte kahpih un. Ngaihtuah kibangin om chiat un; Kingaihtuah sang lo kei unla, mi neuneu kithuahpih zaw un. Kipil sak kei un " chi'a, Rome-te 12:12- 16 a kigelh thute in ka lungsim a zeelsuak hi.
Thakhat a khanglou guih bangin ka om a, mailam ka et leh khawlkhuaknei in honna maingat hi. Ka theihhoih thakthak leh; nidang a 'gelhlouh ding..' chi'a ka na koihdap-te lungsim sunga ngaihtuah nilouh kha ka hihdan theikhia in, laigelh taktak ding in k'ong kisa ta hi. Ka patna ding pen ka thei kei a, ka kingaihtuah dedu sungin YPA-te thilsawm in ka lungsim hon luahdim mawk hi. Hinna tunga thunei banga kikoih I omkhak zeuhzeuh ziak ua, tuabang teng tungsek ahihdan ka phawksuah sawnsawn hi. Ka lungsim ah, "Kua gitlouh leng gilouin thuk kei un. Mi tengteng muhin thil kilawm ngaihtuah un. A hihtheih liai leh, noumau lambek, mi tengteng toh kituakin om un. Deihtakte aw, phu kila kei unla, Pathian tuh hehna awn zaw un, Phulak himhim kei lak ding ahi, ken ka thuk ding, Toupan a chi, chih gelh ahi ngala. Huaijiakin, na melma a gilkial leh nek ding pia inla; adangtak leh dawn ding pia in; huchibang na hih leh a lu tungah meiam na sekkhawm ahi ding hi " chih, Rome-te 12: 17 – 20 sung a kigelh hong suak zungzung nawn hi. Gensau sese louh a leng agennop pen imat ngei uh ka ging ta.

Achang in, Setan natawm in a hihtheih-louh 'hinna' tanpha I kilaksak toptop uhi. I hehna uh Pathian I awn mankei ua, ama' sanga kinzaw a I gamtat ziak un hinna tampi mahmah I mansuahta uhi. Christian I kichih ngal u'leh Laisiangthou thute zuih siausiau dingin tuak mahmah hi. Tupmawng a kithahna atam mahmah lai in, tuplouh pi a kithahna leng a omthei tham. Huaite khawng ka ngaihtuah khop belbual chiangin, mite' houlimna vantang ka zakkhak zeuhzeuh te'n ka lungsim sung mah hon zeelsuak zel uhi. I gamsung ua thiltung lamdang leh mulkimhuai taktak-te mu a, ka zaak chiangin, ka lungsim ah ' Indongta Court leh Solkal Court' chih toh kisai in ngaihdan tamlou hong lut veu hi.
Thudik lah genngam-huai nawnlou ahihna ah; 'Ningani Nitak' a, ' Indongta Court leh Solkal Court ' toh kisai a ka ngaihtuahnate tamlou k'on sung baw himhim ding. Panpah ngal lehang. Zosuante lak a kisukkhelhna om chiang in, Police leh Sorkal Court a kipilut mailou a; Indongta Court leh Pupa' tawndan pansan a i kisukveng tuahna tungtang uah, ngaihdan tuamtuam tamtak om hi. Khenkhat-te' ngaihdan in, buaina a om nawnlouhna dia khutkhialtu' gamtatdan toh kituak a gawtna piak ding chih ahih lai in; khenkhat ngaihdan in, Khristian leh Zosuan khat i hihna u'toh, Indongta level a kisukveng a, kingaihdam ding chih ahi.
Ei, Zosuante lak ah khelhna khawk taktak a om hun om mahleh, ki-ittuahdan, kihehpihtuahdan, kipanpihtuahdan pupa' hun apan i na chiin touh uh, i koihkhiat theihlouh uh ahi. Vaigam khawng a tuahsiatna (rape, thah, soisak) tuak a-om chiang in, khutkhial a ngoh-a om ding lauhziak in mi tangpi kisubuai nuamlou uhi. Himahleh eilak ah bel, kholak a buaina tuakte huchi mai a nutsiat hilou ua; khutkhelhna leh kisukkhakna om chiang bangin leng, namdang leh gamdang in a neihlouh uh 'Indongta' vai in kisuveng a, hun tamtak ah i kingaidam sek uhi.

Ei lakah i paidan uh hoihtak om mahleh, " mi'n gilou a hon bawl leh gilou a thuk ding, i tunga mi a khutkhelh u'leh, a kituahpih bang gawtna piak ngeingei ding; mi ngaihdam cih khawg mihai leh mi dawilokte omdan ahi " cih ngaihdan nei tulai in kitam mahmah hi. Huai ban-ah, " mi'n hon sukkhelh u'leh, hon lauhtheih ding bang pen ua om a, kimaingal sak louh ding - et gemgam a, awkhauh leh thagum thatang a kinawkpih ding " chih, mi tamtak ngaihdan ahi hi.

Tulai i khovel kidemna - chalak a kibeihna, tha-hat leh poisak neilou deuhte' vualzohna, sum hau deuhte vualzohna, 'ha sik in ha, mit sik in mit', chih paidan hisimta hi. Jesu'n amah nungzuite om dingdan a sinsakdan toh 'kikelki hilhel' hi. Khristiante i kithah tuahtuah chiang ua, unau Meiteite'n agen uh bang a? " Jesu leh Jesu kidou (Khristiante mah kidou) " chih hitel hi. Ei Khristian tamtakte'n i ginna uh taisan a, khovel' paidan a vualzoh i sawmlai un, khenkhat ei pupa' ngeinadan in kingaidam uhi. Athuak tute leh khutkhialte' kingaihdamnate thupi mahmah hi. " Ka zi, ka pasal, ka ta, ka nau hon huchih sak uh, ka thuak bangbang thuak sam uh hen " chi a mi khenkhat a omlai ua, " Khutkhelh theih mah ahi, thupha tawi a n'ong paina uh k'on sansak uh. K'on ngaidam ua, bangmah ka la kei ding uh " chi leng ki-om zel hi. Khristian dan toh koi a kituak pen dia? Jesu'n eite leng bangmah laak hon neilou a, hon ngaidam ahi chih mangngilh kei ni.

Sawltak Paul in, " Na lak ua buaina aom chiang a, thukhenna nei ding a gingloute na zot uh, na lak ua gingtu, thukhen thei heutu neilou na hi uh hiam? " chi'n ana gen hi. India in 'Judicial System' hoihtak neimah leh, buaina sukvengna dinga hun sawtpi lut, sum tampi bei, case sukvenglouh a lakh a sim bang om ahihman in; thudik in vai ahawm-louh hun tam mahmah hi. Hichi bang dinmun ah, ei Zosuante'n Indongta, Pupa' tawndan leh Pathian' min suang a i kingaihdamnate uh phattham ching mahmah hi.

Tua bang kal ah, theihtuak mahmah ana om veve hi. Indongta' kingaihdamna in, khutkhialte tung ah kipahna leh kisuanlahna thupitak tun in, siam kituhna thupitak in zui hi. Himahleh, 'Khutkhial' hilou a 'Tupmawng' a kithah leh kikhoih chihte Indongta Court a genveng ahih chiang in migilou pen sukha zoulou suak hi. Indongta Court leh Solkal Court a thu khen dingte khensiam poimoh mahmah hi. Tupmawng a kithah leh kikhoih chihte pen Indongta Court ah genveng mai hikei hen la, Solkal Court tung teitei leh deihhuai mahmah hi. Solkal in Danbu sah mahmah neisam ahihna ah, tupmawng a kithahna leh kibawlsiatna himhim ah 'Solkal Court' a maituah ua, a kituahpih bang uh gawtna aphut-touh ding uh chih ngaihdan ka nei a, mi atamzaw' ngaihdan hidi'n leng ka gingta.

Ngaihtuahna a hong lut dandan a kizom leh kizomlouh khuallou hial in mawk gensuk nawn lehang. Nidanglai mite'n, banghiam thukhen ding aneih chiang un Hausa Court ah athu vatun uhi. Huchibang a Hausa leh a Khawnbawl upate'n thukhen haksa sa a, kuapen dikzaw hiam chih atheihlouh chiang un, 'TUILI LUT' in thu ana khen thepthup uhi. Hichi bang a thukhenna ei khangthakte'n a thuvuak a i zakzak himahleh, 2012 kumtawplam in News tungtawn in ka na mukha hi ( Tuitha lui a mi 2 Tuili alutsakna uh). Hichibang a 'tuili lut' a thukhenna pen, theihpihtu kichiantak a omlouh hun in ana zang tangpi uhi.

Putek khat kianga ka dotna ah, " Tuili lut a thu akhen chiang un, a kiton in tuilak ah sawntum ua, a mohzaw penpen tuilak apan hong kilamkhe masa ahi " chi'n hon hilh hi.Tuili luh (tuili lut) a thukhenna bawlpen dik taktak hiam chih bel i theikei; a ginna ziak un leng dik leng ana dik maithei a, alangkhat lam ah, tuisiam leh tuisiamlou kal ah leng a 'result' a diklouh ton om maithei hi'n ka ngaihsun. Himahleh, tuisiam leh leng, amohzawte tuilak ah sawt tumtheilou hidan a gen pawl leng om veve zel hi. Hichibang thukhenna ah, golhgukna ziak a kihotkhiat theih ahikei a, thuneihna leh thagum-hat thu a leng siamtan theih hisamlou uhi. Khosung mipi' mai ah ana hihsek ua; 2012 kumtawplam in leng press leh media te tanpha sam hial uhi. Guptuam leh paihtuam chih himhim omthei di'n a gintak huai kei. Tulai a thukhennate sang a 'fair' zaw adia aw...chihtheih hun tam mahmah hi.

Tuni chiangin 'Dan leh Thupiak' khauh taktak pansan in, thukhen dingin i kisa ua, thudik theihpihtu ding leng atam mahmah. Mihingte kia leng muanglou in, technological leh document evidence tanpha baihlam tak in i ngah thei uhi. Thudik a thukhen haksa hetlou ding bang mahleh, adik a thukhen chih vang mahmah di'n a gintak-huai zel. Bangziak in? Thudik' thuneihna sang a thunei zaw – sum-le-pai thahatna, pilna leh siamna, hauhsakna leh thuneihnate ziak hipen dingin a gintak-huai. Hiaite i genna ziak ahihleh, bangkim a thukhenna (judgement) ibawl ding chiangin evidence hoih leh muanhuai pipi om mahleh, i pansan nawn takei ua; sum-le-pai' thuneihna leh a dangdangte tuh siam hong tangsaktu hizel uhi.

Maban ah, a zawng leh dai kilkal a mite a dingin siamtan a omkhak ding kinephuai lawmlawm lou abang. Manipur Phaizang leh Singtang bial a kikhentuamdan i thei. Singtang bial a Singtangmi tuamtuam te'n i lungkimlouhnate uh ziak a, kipihnna tuamtuam tungtawn a Solkal i phil mahbang un; Singtang bial sungah leng, a zawng leh khentuam a omte'n thukhenna diklouh ziak a, atung ua mite hon philkhak ding uh lauhhuai mahmah hi. Thukhenna dik i gamsung bek uah deihhuai hina maizen e maw?? Thukhenna himhim ah azawng-ahau kideidanna omlou leh adik-atang a thukhenna apaitheih ding deihna ziak in Young Paite Association in; Nikhat chauh 'Churachandpur District' sungteng 'Total Shutdown' puang hial uhi. Hiai 'Total Shutdown' hunsung in 'thudik leh thutang a thukhenna' deih khempeuh in 'support' puang ua, a support lou teitei-te bel 'golhgukna sum toh thukhenna mah' chi lailai mite hidan in ka koih top mai. Huaiziak in, YPA' panlakna ka kipahpih mahmah mai a, 'Rally' a tel teitei ding lungsim a veikawm in ka lum ta hi.

Laigelhtu' Lungsung Pan:
Ningani Nitak a, ka lungsim a hong omdeuh tangpite ko'n gelhkhiat in agennuam pen I mat vek uh ka lam-en. Hiai thu gelhdi'a hon tawsawn leng a om kei. Kei mahni lungsim a om bangbang hon gelhkhia ka hizaw.
0611 – Ka Kipak - 2015