Ka Nu Leh Pa Ka Tangzou Nawn Kei..!!
(Anti-Crime Bill)
By K. Lianthansang

JNP (Lamka Area) a Chief Campaigner hidan a theih a om – Pastor Jamkhanpau' aw didan deuh lupna tung apan in ka za mialmial hi. Ka phone a sana ka et chiangin zinglam dak 4:00 bang an aging a; khua bel avak siang nai kei. Phalvak a 'Vote Campaign' bawl a, Jesu Nungzui Pawl (JNP) a mi atamthei lam kaihlut sawm ahihdan ka khawnung theih hi. Azuih Van Pathian' ading in theihtawp suah in pang a; 'hichi zawdeuh leh nuam di hi a' chih omlouhna mun tuntheihna ding thu gen in kikouden hi.

Ka lupna apan thugen kiza chiang lou ahihman in ka thoukhia a, a thugenna mun Hebron EBC Biakinn (New Lamka) lam ka zuan vengveng ngal hi. Khua mialsim mahleh Damkam Bazaar sak a Tedim Lampi ( Tedim Road) kiang ah mehzuak nupite a tudim ta uh. Kei leng Damkam Bazaar sunga lutsuk in, taklam panga Hotel thum(3) kizom omte lak a khat ah lut in; singpi dawn kawmin thugen ka ngaikhia hi. Atawp in Newspaper hong tung a, a heading teng en zualzual in ka koihkik nawn hi. Thugen hong khawl takin Newspaper sim ka kipan nawn ngal mai. Huai ah, " A/R te'n gul in atuk hinna humbit " chih khawng ka mu a, nidang a leng huchibang ka muh zeuhzeuh ziakin A/R te phattham ching uh ka sa. Huai banah, kuamah kianga gensawn louh dingin khat k'n gen ding. Huai ahihleh, " THEIHSAKNA " kichi nuai ah, khamtheih sal a tang leh guktaak ching zongsang khat, a insungmite'n theihpih kha nawnlou uh ahihdan kisuah hi.

A 'ber – September, October chihte' kipanta ahihman in vot sim mahmah a, mei awi dingin ka kisa hi. Thukkhuk tung ah Bil 2 nei belkuang dai ah sathau kisuang keihkuih mai a, singkhuah 5 mawngmawng pangkhawm in, huai bel sunga sathau om pen satsak vilvel sawm uhi. Himahleh, kituak taka pangkhawm a, sathau suangsat vilvel ding hizenpi; alak ua singkhuah khat ana kuangnuam chiah lou in, ana khu luailuai maimah hi. Hotel sunga omte adi'a leng mit-hah haksa hial a hong khuut takin, Hotel neite'n konglam ah va koihkhe hilhial uhi. Huai nungin, singkhuah dangte banga kuanghoih nuamlou a, konglam a 'single' a ompen awl-awl in mit hiaihiai a, daitui lak ah kawt zezu zozen hi. Singkhuah dangte'n bel a thiltup uh a tangtun matan kituak takin nna semkhawm ua, pangkhawm in kuangkhawm diamdiam uhi.

Huai kawmkawm in, Newspaper a " THEIHSAKNA " kichi nuai a ka thu simkhak in lungsim hon vut vengveng nawn hi. Pathian in aleitung Pathian dinga apiak te'n theihpih lou ua, kholak a vakvai maimah dia a tapa uh a khahkhiat mawk uh lamdang ka sa. Pathian in zaw a etkai zohlouh ding uh 'Ta' pe hiallou ding in leng um ing. A omdan tak bel – 'Khamtheih hih zongsang a, guktak-laktak chiing a vialvak a om ka tapa un kuahiam' van a vaguk khak leh leng n'on mohsa theikei ding uh' chihna ahi mai hi. Khamtheih sal a tang' adi'n bel kholak loungal omna ding himhim a om kei. Vuahzuk-daikai' hun in leng inn-a pai chih nadan a om kei a; phalbi khawvot in meklum dingin kisa leh leng inn-lum va belhngam ding vual hidi'n ka koih kei.

Ka lungsim ah; mahni van hilou lakhia a, zuaksak sek ziaka matkhiat a om pasal khat in hon thugen khawng hong kilang dundun hi. Mi khenkhat in, " Hoihtak a thuhilhna nei " achih ching un, " deihtheih a soisa zou in, kichiamna neisak " a chihna uh hinuam mahmah hi. Huaiziak in, ka mimatpa uh huchidan deuh mah a thuhilh sangin chi'n ka houlimpih a, a khosakna uh bangkim ka kanchian vek hi. Ama'n leng hoihtak in hon dawng a, papi himahleh thuhilh theih dandan in ka thuhilh ngiatngiat hi. Mi hehpihhuai tawpkhawk ahih banah, lungakna ding neilou ahidan ka theikhe sawnsawn hi. Sum aneih chiang in Hotel ah ann ne a, nitak chiangin New Bazaar a malta zuakna geilak a, Step nuai ah giakzel hi. Ka kianga hon thugen, atangpi ka theih dandan in k'on gelhkhe suk ding.

Liing keuhkeuh kawm in, " Pu aw ( ama' sanga naupang zawtham himah leng 'Pu' hon chi ), kei ka hihleh zi neisa ka hi a, tapa khat leh tanu nih leng ka nei. Ka neulai a zaw khamtheih bangmah hihlou hi'ng a, Class – X ka zoh apan kipan ka hi. Class – X ka zoh a, College kaizou nawnlou inga, Vaigam a kilawh a kuan ka hi a, free tak a va khawsa ka hihman in khamtheih sal ah ka tang kha hi. Huai hunin bel Herion No.4 ka kikap naikei. Kum 5 sung vaigam a ka omsung in, Lamka lam ah nungak khat ka nei a; ka pawtkhiat takin ka kitenpih hi. Ka kiten sung uh bel bangmah hihlou in ka omzou a, innkuan nuamsa mahmah leng ka hi uhi.

Ka tate lak a aneupen kum 2 aphak in, ka lawinu'n ( ka zi'n) hon omlouhsan guih hi. Huai apan in ka kingaise deuhdeuh mai a, Pathian' kianga ka haksatnate tunlou in, lawm-le-vual' kiang ngen ah ka haksatna ka tun zel hi. Ka lawmte'n leng lungnuam taka omtheihna ding a, 'khamtheih' hoih ahi achih ziak un, ka hihpan ta hi. Khamtheih in lungnopna kiching hon pethei tuan kei. Ka khamsung kia nuamsa takin ka om a, ka kham aveng chiangin lungkham-mangbatna in hon pumtuam pahpah zel hi. Huchi'n Khamtheih hih sunteng lungnuam taka omtheih ahihdan ka theih manin, ka lungkham zek chiangin khamtheih ka hih zelzel ta a; khamtheih in kol hon bulhkhum ta mai hi.

Ka nu leh pa' kiang ah ka naute teng ka koih a, kei bel ka utna lam teng ah ka diang zaw ta. Achangin mi' aak leh vatawt peuh ka va gu a, sum ka guuk hun leng atam mahmah. Anei te'n hon theihkhiat chiang un, ka nu leh pa' kiang ah genzel uhi. Huai hun chiangin ka suulnung ah ngaihdam ngen in kuan zel ua, hehpih-huai mahmah uhi. Ka hehpih hangin, khamtheih man di'a sum lakna ding kithei zoulou ahihman in, maitheih nana a mailouh ngal a didan dang a om kei. Huaiziak in, ka nu leh pa'n inn apan hon hawlpawt zozen ua, inn siik nawnlou ding in hon vau hial hi. Ka khelhna ka kithei a, himahleh tawpzoh ding vual ahi kei. Ka nu leh pa'n kei a dingin khatvei mah leng hon thuumsak naikei uh; thuumna zaw ngaina lua hive'ng. Upa leh Pastorte kiang a vapai a, haksatna vagen ding lah ka zum zel a, ka munpi uh New Bazaar lak khawng ah zing leh nitak in thugenna hong neiden le uh chu kilkawm khat apan leng ana ngaihkhiat theih gige ding hi aa..

Huai banah, k'on gennuam nawn khat ahihleh – hinkhaw thak pannuam in bang hitawk leng le, thil hithei vual hi'n ka koih kei. Leitung Pathian a ka neih, 'Ka Nu Leh Pa Ka Tangzou Nawn Kei'. Ka nu leh pa natawm tangzou nawnlou ka hihman in, kei a di'n hin thaman himhim a om nawn kei a, na ut leh ka vanguk ziakin hon that suk mai lechin leng poi ka sa kei. No.4 kap khat Rs.100 in ka lei zel a, ni khat in 3vei khawng ka kikaap tangpi hi. Ka kikaplouh chiangin ka thuaklah mahmah mai a, ann leh tui nasan kamsung ah alut theikei. Sung khawng nasan phiah in, taang leng kitaang zoulou phial hi. Kihahsiang sawm in tui khoihdek mah leng, tui nasan ka khoih ngamkei zel. Gim petmah a kigimpih ahihtaak man in, sih leng poisa nawnlou zen a van guuk ding zong a vialvak maimah dan ka hita. A omdan tak bel – khamtheih ka hih (kikap) chiang a 'normal' a omthei pan phet ka hihdan ka genna ahi zaw.

I gam uh, adiak in Lamka khawpi ah damdawi khamtheih leh ahihtu ka tam petmah ua, himahleh hun sawttak ka na saltanna Heroin No. 4 i chihmai uh k'on gensau zek lai ding. No. 4 kha, sigui a I kaplut pen  second 1 leh 2 sung mah in khuak ah lut ngal a; chi thak siaisiai in, kam ah anam hiauhiau khat hong om in, nop petmah in a nuam hi. I hong addict taktak a, sum ihon neikei zaw, guh-le-tang teng na mai a, kihaam puampuam maimah! Ihmut suak chu hiteuh lou. Kilungtom petmah a,tha zoi ngeingui in taksa teng navek zomah hi. I hihnawn chiang in bel, theihlouh kal in huai teng mang hiau zel mai hi.

Ka gennop pen bel hiai ahi. Kei pasal thahatlai ka hi a, ka hihnawn hun ma in bang chichi hiam in, 'next dose' man ding ka sutuah man sek hi. Lamka ah, nupi No.4 addict tam petmah ua, huaite atangpi in a pasalte' addict ziak a kipankha hipen dingin ka koih hi. Hiai nupi addict te'n, naungek kum chinglou nawi teplai nei tangpi ua, huai naungekte hehpihhuaidan chu genvual ahikei . Anu' damdawi hih asisan a om pen, naungek' nawitui a kihel ta ahihman in, huai naungek pauthei nailoute No.4 addict ana himawk uhi. Anute damdoi man ding neilou a, 'suffer' a agim chiang un nakpi takin hiai naungek te'n leng ana 'suffer' in, zoi ningniang ua, kah leng kap peihlou in om top uhi. Kei bel tawpthei ding vual ka hinawn kei. Himahleh, hiai naungek khawthei nailoute bek in khamtheih ahih khaklouh teitei uh ka deih law mahmah hi " chi'n hon gen hi.

Ka lungsim ah, 'I Korinth-te 10:13 (Mihing thuak theih val khemna himhim na tuang uah a tung ngei kei hi. Pathian jaw a muanhuai ahi, aman na thuak theih val uh khemna na tuah uh a phal kei ding; na thuak theihna ding un khemna peuhah taikhiak na lampi abawl pah zo ding hi)' chih, Bible cang hong lut guih a, akiang ah gentheih dandan in ka genchian suk hi. Thugen siam hih bang ka ut mahmah mai a, himahleh ka genkhiat sunsun bel atheih siam ngei ka lam-en. Huai banah, " Haksatna leh kingaihsiatna tawpkhawk tuak mah le'ng, ei sanga haksatna leh bawlsiatna tam ana tuakzaw – Jesu' kiang ah tai lehang, aman hon panpih mahmah diing ahi. Aman ei sang in 'experienced' ana hau zaw a, amuanhuai louhna di himhim a omkei. Nang leng haksatna na neih leh, a Helpline number; Jeremiah 33:3 ahi a, Bible sung ah zong in- sam zel in. Network hoihlou chih a omkei a, na call(sap) nakleh hon dawng(answer) diing a mansa gige ahi. Khamtheih duhlaw mahmah a na om chiangin leng hiai number mah masuan zaw ta in aw ? Pathian in ama' lam a kihei a, ama' kiang a nuamtak a omden dinga hon deihlua ahi. Na khelhna bang chituk in thupi mahleh, ama'n ngaihdam zohlouh neilou ahi. Na nu leh pa' kiangah leng ngaihdam ngen in la'n, na thilhih zaw tawpsan mahmah in aw? " ka chih leh, honna 'amen' mahmah mai a, ka lungsim anuam mahmah hi.

Laigelhtu' Lungsung Pan:
Ka tuahkhak mahmah ahi a, lainat luat ziak a k'on gelhkhiat mai ahi. Damdawi addict-te simmoh leh pampaih mai ke'n la; bang chi'n a hinkhua ka kheng in ka panpihthei dia aw, chi zaw in. Nang insung ngei ah leng hong tungthei gige thil ahi. Huai ziakin, hoihzaw ding gintakna toh ' Ka Nu Leh Pa Ka Tangzou Nawn Kei' chih thupi pansan a thu kigelhkhia (Bill) in nna asep a; sual thilhih kiamsak leh doudaltu (Anti-Crime) a apan ngei ka lam-en mahmah hi.

2710 – Ka Kipak – 2015