Nu, Nang Tellou A I Sauliim Uh Daidam Lua Eive..!!
( Based On True Story )
Written By: K Lianthansang

Lamka Khawpi ah October 6, 2015 apan – Zinglam dak 5: 00 leh nitaklam dak 2: 00 kikal sung 'Bandh' khahkol ahih ziakin, khawpi sung hulum tuan mahmah hi. Bandh khahkol hunsung in aneu-alian, miksi (ant) bangin kiphuul souhsouh mai a; bandh kipat chiangin inn-lum kizuan sauhsauh zel hi. Ke'n leng, sum-le-pai zontheih hunsung nanana in tuh, ka 'Rickshaw' mah ka tawl (hawl) keuhkeuh zel hi.

Innsung kituahlouh ziak a inn-tuan a, 'Kivaihawmna Tuam' nei ka hi zenzen kei - nau zaw ka hihziak a inn-tuan ka hizaw. Inn-le-lou tuam neih nunga, mi' lohsuahsa a va kingak nadan omnawnlou ahihman in, sum-le-pai zontheih nana a ka zon chuh aloutheilou hong hita hi. Huai ziaikn, October 7, 2015 in leng ka 'Rickshaw' toh ka taipawt nalnal a, vanpuak ding ka vialzon nilouh hi.

Vanpuak di khat lel leng ka muh ma in bandh hong kipan man diam aw chi'a, beidong taka ka omlai in, Nupi thausim kihkiah khat in honna gaalsap chenchen hi. Amun ka tuntakin, " Hiai singkhuah-te khatvei in na pawkhin zou diam? Hotel a ding ahi.." chi'n, a Hotel mun uh hon hilh hi. Ke'n leng khatvei thu a pawkhin zou ding ka hihdan hilh kawm a guang mengmeng in, a hotel uah ka va koih ngal hi. Huai hunin, ama'n Bazar lam va phasawn lai a, a hotel uh ka tun in leng hong tung naikei. Hotel sungah, Nungak khat ana om a, kichinglah mahmah kawmin puri ana kang hi.

Tui khawng dawn a ka omsung in a nu hong tunga, nungaknu' kiang ah, " Hoihte, rickshawpu leng tawl mahmah di ahi. Atawldam kawm a adawn di'n singpi leh puri ana pia in la, inn ka va phaphei zual di. Eh! Vanpuakman leng ama' chih zahzah ana pemai lechin aw.." chi'n pawtkhe pah hi. Huai apan, nungak ana omnu' min 'Hoihte' ahihdan theingal ka hihman in, " Hoihte, ka dangtak a phathei mahmah kei a, tui vot dikdek omleh hon pezaw lechin ka tawldam zaw di ahi.." ka chihleh, fridge sung apan in tuithawl hon lakhe ngal a, nou toh piak hon thuah ngal hi.

Tui dawn a ka omlai takin, School naupang bangzah hiam leng hong pai uhi. School uniform silh himah le uh, a omdan uh a mitsiip-huai mahmah. Huaite lakah, kingai leng om ahi maithei uh. Himahleh, a form u'leh a hihna uh zahtak lou in, kikawi neknak zomah uhi. Khenkhat in laizial khawng tep riahriah mai ua, 'Student Movement' chi'a aminloh hial uh, 'Enjoy Moment' suah uh ka sa hial hi. Tui dawnkhin mahleng, vanpuak man a fel nailouh ziakin ka om nilouh a, School naupang-te' omdan en in, lungsim tawng ah ngaihtuahna tampi ka kisualsak nilouh hi.
Bangtan hiam nungin a pawtnawn pah ua, 'Silent Sit-in-Protest' nei di'n chiakphei vengvung uhi. Vanpuakman ding ka kipiak zoh un, Hoihte' kiangah, " Hoihte, den a school naupang-te' lak ah na theihngei a om hia?" ka chih leh, " ka theih ngei omlou uh. Nuam chu sa mahmah eive ua ( a omdan uh), ei lah School kainuam hinapi a kikaithei nawnlou maimah a..." chih teng hon gen hi. Lamdang ka sa sim a, naupang chik hinapi School kainawnlou ahihdan ka theih in, a hinkhua theihnuamna in ka pumdim ngal hi.
Tukik thak zozen in, " Bangziak a kaithei nawnlou e? Na nu'n Hotel a sem dia hon zangden hia Hoih?" ka chih leh, " Ka nu om nawnlou eive...!" chi'n hon dawng lel hi. Amel etmai in leng, alungsim-ngaihtuahna ding bangtan hiam muhkhawl theih himahleh, thuchian zaw theihnuam ziakin " den a nupi thausim pen, nang nu di ka sa a, bang chidan e...chiangdeuh in n'on hilhthei diam Hoih.." ka chih ngutngut leh, " awle, k'on hilh di. Kei tuah bangbang, midang in tuaknawn kei le uh chih ka deih mahmah ziakin, miteng in atheih ding un honna gelhkhiatsak lechin leng poilou di ahi.." chi'n hon dawng pah hi.

Agawl bang hon khuah masa zozen a, " Ekha maw...kou unau mi 3 hi ung ua, ka ute pasal tuak ahi uh. Nidang a kou kha, ka veng ua dinga ahausa pawl ka hi uh. Ka pu (ka pa' pa) bang, dawi siampu ana hi zomah ahi. Hon gensau zek leng; ka pate unau 7 pha unchin, pasal 2 lak a ka pa anaupang zaw ahi. Ka papi toh ka pa sepaih a pang tuak unchin, mi englua a khawsak chih om ngeilou himhim ahihdan ka U tegel in hon hilh zel uh. Kei chu 1997 a piang inga, ka pian kum mah a ka pa inn-lam hong pai. Unau hingal a, pautuam zawdeuh kal a kitheih siamlouhna om ziaka ka Veng ua Duty om gige dan hi'n chin, ka pa leng duty a pang gige ana hidan ahi.

Zankhat, ka Veng tawplam ua va duty inchin, amah kia duty kha zomah ahi. Duty khin, inn-lam zuan a apai lai a, sihna mulkimhuai mahmah ana tuakkha ahi. Huai hun a kei kha 8 lel a upa pan inga, ka pa' meel mukha man lou. Ka nu' hon hilhdan a k'on gen ahi. Ka pa asih taka, kou leng ka innpi lam ua tengkhawm vek. Ka pi-le-pu banah, ka nupi leh papi te khawng toh omkhawm souhsouh mai ka hi uh. Ka papi leng Sepaih mah ahih chianga, ka nupi in nuam sak a sa mai. Zu-le-sa khawng a kibual inchin, atawp a sawt hon dampih zoulou. Ka nupi asihzoh nung sawtlou a, ka papi zi neihsak sawm uh. A zi ding midang a zong tuankei ua, ka pianna tuunnu toh gawm sawm maimah uhi.

Ka nu' ngaihdan ahi himhim kei. Ka papi toh kigawm ding angaihtuah chiangin, ka nu malmial dedu mai a, nial theihtawp in nial hi. Huai apan in ka pute'n, ka nu nawlkhin deuhdeuh ua, atawp in ka nu'n a pianna khua lam ah hon paipih hi. Ni bangzah hiam nungin, ka pu'n mi bangzah hiam hon sawl a, ka unau un hong pikhiak sawm uhi. Ka pite( ka nu' nu) inn a nuamtak a omdet ka utluat uh zaw hiven maw..!. Ka unau un, ka nu toh kikhen ding a ut kuamah ka om kei uh. Kum 3 lel hipan mahleng, utlou pipi in hon pikhia ua, gari sunga hon lutpihdek lai ua, " Utlou..ka nu ka ngai lua " chi'a kapkawm a, ka pi' niik ka letkip tinten lai khawng leng ka theihoih mahmah. Gari sunga, ka nu ngai a ka kahkah lai khawng leng ka mitkha ah hong kilang dundun zel hi.

Lamka ka tunkik tak un, Home ah ka unau un hon koih uhi. Hiai hun a ka nu' lungkham didan bel haih ding vual ahi kei. Alungkham luat ziaka kingaisia leng ahi ngei ding a, a omdan ana kheng lamdang in – Khovel thil lam ah ana kibual ta hi. Home apan ka pawtkhiat un Class – II lel ka simpan a, ka pute' inn mah ah lutkik nawn ngai hi. Home a ka omsung un, ka nu leng Lamka ah hong om a; a unu' ( ka nupi') kiang ah om den hi. Huaiziak in, ka nupite kiang khawng ah ka va om zel a, aneupen ka hihman in ka pute'n leng hon dal taktak ngam tuankei uhi. Ka U tegel bel phal leng aphal himhim kei ua, a kimuh ngeingei u'leh 'boycott (etsan)' puankhum ding in mansa diam uhi.

Kei leng achang in hong sam zel uhi. Ka nu' kianga lup a, ihmut hithit nuamsa lua ka hihman in, ka pu'n hong sap chiangin ka kibuk san zel hi. Atawp in ahihleh, ka ni (ka pa' sanggam nu) leh ka pu'n Home a om nawn di'n hong pikhe teitei uhi. Home a ka lutnawn in, ka U-te toh ka omkhawm kei uh. Atuam ngenngen ah hon khenzak uh ahihman in, ka thawmhau mahmah mai a; ka U-te ngai a ka kah hun atam mahmah. Nu-le-pa bang a ka et, ka U-te toh omkhawm bek hile ung zaw nuamdeuh di hi a, himahleh lelliang vontawi-te a di'n deihteelna neuchik leng piak in ka omkei uh.

Home a kum bangzah hiam ka omsung in, ka ompihte khawng toh School kai kuan leh pai ka kiton zel ua, ka nu ka mukha sek hi. Kholai a ka muhkhak chiang bangin a khamsa ngen in om a, lawmte muh di'n zumhuaithei mahmah hi. Himahleh, khovel a nu ka neihsun amah kia ahi a, amah omkei leh pianglou ding ka hihman in - Peter in Jesu a kitheihmohbawl dan hial in bel ka omkei. Ka nu'n khovel ana zangnuam mahmah in, tanu bang leng ana nei man a, a pa' mel bel ka theihpih sese kei. Sanggam numei deih lua himah leng, a 'process' a diklouh ziakin ka lung akimthei taktak tuan kei.

Haksatna leh lungngaihna tampi thuak mualsuah in, Class – VIII ka sim tan dong Home ah ka omsuak charchar hi. Class – VIII ka zillai in, ka omna Home neite' tanu gamdang ah omdek a, ompih di aneihlouh ziak in, va ompih di'n kei hon sawl uhi. Ka siamsinna maban lakloh mahleh, a tanu uh bangmai a honna kemtoute thu zui in; school kai tawpsan ka himai hi. Gamdang ah kum 3 vingveng ka va omkhiat nung in, Lamka lam pai dinga ka kinget leh phalna ka mu zenzen hi. Kei leng kipaklua in Lamka lam ka zuan pah ngal a, inn ah sungkuan kim in ka omkhawm nainai uhi. Sanggam numei thak ka neihpen leng kou kiang ah omden hi. Zingkal ka thoh ma nasan un ka nu'n zu ana kham man sek a, ann nekzoh chiangin leng atunna gam theihphak ahi nawn kei. Ka pa' damlai a kibawl, kou inn taktak mah aa teng ka hihman un , inn bahara ding neihlouh ziak a nohkhiat a omkhal ding ka lau vet kei ua, adan om mahmah hi.

Ka nu lah hichimai ahih chiangin, ka unau un sum zontheih nana ah zong dingin k'ong kikum uhi. Ke'n dawr khawng ngak in sum ka zong a, ka sanggam te'n leng kilohtheih nana zong in ka khawsa tou ningneng uhi. Nitak chiangin, ka naunu ( sanggam thak) ka don zel a, ka sanggam te'n lai khawng sim zel uhi. Suun chianga ka nupi'n nau honna donsak thei zel ahihman in, kizen kawikawi ka sa mahmah uhi. Ka nu zaw, theihphak ahi nawn kei!. Akhen chiangin inn hong pha zual zel a, pawtmang nawn pahpah sek hi.
Ka dawr ngakna mun a kha khat lel leng kuan nailou himah leng, ka ngakna dawr neitu'n thiltuam daih a zat di'n honna deih pah hi. Mibang a hoihlua ka hihlouh hang in, etnop huntawk hipeuhmah dingin ka kikoih. Niteng phial in ka sepna pa'n 'Sex' neihpih di'n hon zawn gige a, ka nial gige hi. Nitaklam khat, paikuan in ka awm (chest) apan, amit taiselou hial a koih ahihdan ka theihtak in, ' ka awm (chest) ah, thil khat a tangden om a...n'on lakkhiatsak thei diam? ' ka chih leh kiguih hial hi. Hon naihphei zozen in, ' bang om maw...kei in lakhe pah di bele...' chi'n hon dawng a, ' ka awm na en gige a...na etna mun kheng lechin, hon lakkhiatsak zou himai ding na hi...' chi'n ka dawng hi. Ama' gintaklouh dantak a dawngkha ka hihman in hon mantang guih a, Oxygen tasam lua hikei mahleng 'mouth-to-mouth respiration' hon hihsak chonchon maimah hi. Ka thaneih teng zangin sawn mahleng, ataksa alet banah atha hatlua ahihman in, bangmah a phatuam kei.

Inn ka tunnung nasan in leng ka omdan alemthei mahmah kei. Ka muk (lip) maimai hon sukha himah leh, ka tangvalpa adi'a ka siit chenchen ahihman in, ka lung anuamthei taktak kei. Ka U-te kianga, ' dawr ka ngak nawn dah mai diam?' ka chih leh, ' huai na ngaklouh a bang hih di la leh, sum muhna ding adang omtuanlou ahi....ngak hamham mai ve maw..' hon chi ngutngut uhi. Ka thiltuah lah genngam mawklou ka hihman in, ka lungbuai ngei mai. Zingkal hong hi a, kuanlouh theihlouh ahihman in, inn apan ka kuankhe nalnal sam hi. Ka dawr ngakna mun tun ding nangawn ka ngam mahmah kei a, dawr ngaklou a inn tunkik nawn ding lah ka Ute'n hon tai ding ahihdan uh ka haih kei zel. Ka tangvalpa, School kai dinga kuan ka ngak a ' no'n it taktak leh hon kitenpih mai ve...' chi'n, ka thiltuah-te ka genkhum hi. Ama'n leng bangmah gentam lou in, a inn uah hon pilut a; ka utpen hikei mahleh 'Pasal Nei' chu ka suak maimah hi.

Ka pasal, School kailai ahihman in, kei adi'n kisuanlah hun atam mahmah. Ke'n lah septheih bangmah neilou ka hihman in, ka ki-ip tuntun hun atam mahmah. Innkuan tamlua ahihman un, mehbel natawm ka domkhe zou kei – kei lah chu naupang lawlai mahmah ka hihchia maw!. Mi neizou ahi hetkei ua, nektawm zong ahihman un ka kisuanglah diak hi. Mi maipha et natawm leng ka siamlam ahi kei. Nautum ka hihziak mah in leng ka nuakhat petmah a, pasal ka neihnung in bel huai teng paihkhiat ngai ahihman in, haksa ka sa mahmah hi.

Inn a ka omlai a sepkhak ngei leng hilou tampi petmah semkha ka hihman in, haksa ka sa mahmah hi. Himahleh, huaite ziakin ka lungke tuankei a, kipahna in ka sim zaw hi. Nasep haksat pen zaw poi ka sa kei – ahi ding him leng ahi. Himahleh, ka tekpi un innkim-innkiangte lak a 'propaganda' tuamtuam ana thehzak gige pen thuak haksa ka sa mahmah hi. Huai kia deihkhoplou in, ka inn ua hong lengla teng' kiang ah ka pianna nu' omdan ana tangkoupih gige a, tuibuk natawm muam manlou hial in ka nu' tanchin genin aphur mahmah sek hi. Huchih hun chiangin ka pasal in, ka pi thuhilh zel hi.

Hunte hong pai zel in, ka pasal Class – X exam thei di'n hong om hi. A exam ma ua, 'Study Camp' nei dek ahihman un, a School mun lam uah hon omkhiat san a, kei adi'n chu linglak a om toh a kikhiatna om hi'n ka theikei. Ka thilhih peuhmah soisel louh anei kei ua, ann ka ngolh hun leng tam mahmah hi. Hong hoh teng kiang ah honna gensia ua, ka invengte un leng lamdang sa zozen uh a hiding ngei ding a, kei kiangah hon dong kik zel uhi. Achang in, ' nang n'ong om apan, na pasal in laisimna lam bahloh ahi. Nidang a lai siamthei mahmah thou ka sak uh hi a, ahunloupi in n'ong kiteng ua eive...' chi'n hon mohsa mahmah sek uhi. Ka mittui dai ahihman in, ka kap kha pahpah sek hi. Ka kahkhak chiang bangin, ' kinehnou sak....chalak bawlsiam mahmah lai..' chih, ka tankhak omsun ahi zel hi.

Haksa ka saluat ziakin ka inn-lam uah ka pai mai hi. Ka pasal bek om hileh zaw athuak nuamdeuh di hiven. Ka pai in leng, ' tangval aneih ziaka pai ahi...' hon chi zomah uhi. Ka pai nungin sap leng hon sam kei ua, inn ah ka innkuan un ka khawsa liai-liai uhi. Ka unau ua alianpen in leng zi nei ahihman in, innkuan hunkhop ka pha sam ua, nuam nainai vanglak hi. Ka sanggamnu ( ka nu' zawlta) bang leng pauthei mahmah mai a, ka kithuahden phial uhi. Nuam taka omkhawm dia ka kilam-et laitakin, ka naunu pen apa' lamte'n hong pii ua, ka thawmhau mahmah uhi. Ka nu'n leng thuaksiam haksa salua in, inn ah leng hong pai vang mahmah ta hi.

Ka nu'n lah kholak a huntam zang zaw ahihman in, ka innsung uh anopna ding himhim a om nawn kei. Achang in bel inn ah hong pai zel sam mahleh, sawt a omthei ngeikei. A khamtheih duhna in zoulua ahihman in, a tate ngoihgngoih leng hon hehpihzou nawnkei a, kholak ah khawsaden maimah ta hi. Kha khat in khatvei khawng hong phazual in, a mangnawn pah zel hi. Khawlai a ka kituahkhak dek chiang un leng hon lampialsan zel a, ka omna mun ah mittui vung kilkel kawm in ka om zel hi. Ka pianna nu hingal a, kemtu bei a kholak a vaakvai taka om ka muhchiang in thuakzoh vual ahi kei. Kahkhiat zoihzoih bang ka ut mai a, achang in ka nu toh khawlak a omkhawm ka teel zawk hun atam mahmah.

Nitak ka lup chiangin leng ka ihmu pahpah theikei a, ka lungsim in ' Nu, Nang Tellou A I Sauliim Uh Daidam Lua Eive.! Suul hong hei in la'n, I saullim uh liimbang hong bel sam ve maw Nu...' ka chi vungvung zel a, ka lukham (pillow) kawt zen a mittui aluan zungzung hun leng atam mahmah. Ahun nanung lam in ahihleh, khawlak a ka kimuh chiang un - a sum neih sunsun khawng hon pezel a, nek aneih leh leng ahon muh nakleh hon pekhial ngei kei. Kisuanglah lua ahihdan amel ah akithei mai a, hou leng hon houpih ngei sam kei. Khatvei bel, a kisuanlah luat ziaka inn hong paingam nawnlou ahihdan hon gen a, ke'n leng a adawnna di zok theilou a ka omsung in, ka dangtawng hong bing a, ma mittui hong luangpawt zungzung maimah hi.

Ka nu damlou a hong om in leng, inn ah hong pai ding kisuanglah ahi ngei dia; ka nupite' inn ah va pai hi. Kou unau in, ka nu' damlouh ka theih un ka delh ngal ua - kikhel ahi ta. Et leng hon en kei a, houpih theih di'n leng ana om nawnkei. A ninawn in kei kia ka va hoh nawn leh, ana halhdeuh in, a aw neihteng suah in, ' Ann neta maw Bawi..?' hon chi a, ke'n leng ' Hi, nezou ta ka hi Nu ' chi'n ka dawng a, kidek zoulou in ka kapkhe zoihzioih mai hi. Akiang ah omom leng, ka nu sugim sawnsawn ding ka hihman in ka paisan pah a; ka bilkha ah ka nu' hon houpihna agingden hi. Inn ka tunnung sawtlou in, ka nu beita ahihdan hon hilh ua, kap leng ka kap theikei zozen. Ka nu iit petmah in ka iit a, ka itdan zaw agen didan leng ka theibun tuan kei.

Ka nu hong sih takin, ka pa' lamte aluang la dingin hong kuan uhi. Himahleh, ka U-te'n, ' Ka Pa u'lah vuikhalou ung ua, ka nu bek ka vui ding uh ' ana chi uhi. Hon phalsak pah kei ua, thu tuamtuam hon genpih nilouh uhi. Huchi'a hong om chiang un, ka U alianpen leng hehlua ahi ngei ding a, ' Nou thutheih ziaka hiaitan tungvek ka hi uh...' chi'n hong hang motmot hi. Huai nungin, ka unau un hon sam ua ' ka tute na hi ua, na nu' luang vuinuam a n'on nget man un, k'on nialthei nawnkei uh ' chi'n hon phalsak ua; khitui-naptui tampi toh ka nu' luang ka koihkhia uhi.

Huai nungin, kei tunga chet pen in Bible zil a, alianpen in leng gamdang ah sepna khat mu hi. Huaiziakin, a zi-le-ta toh a sepna lam ah pai ua, ke'n leng zuihsawm mahleng, ka nupi'n ' Hoihte zaw kei kiang ah om mai hen la, hotel khawng ah hon seppih mai leh...' chi'n ka upa' kiang ah gen hi. Ka upa'n leng nial teitei ngamlou ahihman in, ka nupite' inn ah hon omsak hi. Ka inn uh ahihleh mi ka luahsak ua, ka U Bible zil pen' zattawm dingin phatuam mahmah suak hi. Tagah-meithaite khotuah a, taisan ngeilou Pathian hing neihkhak hamphat-huai lua.." chi'n hon gen hi. Huchih sung a, dakkal khat bang ana pai dek man ahihman in, lungsim tawngnung pen a Hoihte' hon thugente ngaihtuah kawmin ka paisan ta hi.

Laigelhtu' Lungsung Pan:
Hiai tangthu gelh dinga hon sawl tu'n, " Nute bang chituk in hoihkei le uh leng, pampaih hetlouh ding ahi. A omlouh chiang ua bukim thei mahmah lou, 'NU' chi'a sap ding ineih maimai leng nuamlua ahi. Huaiziak in, 'Nu' chi'a sap ding neilai te'n a kikhel nunga, kei dandan a kisiamtan louhna aneihlouhna ding uh ka deihna ziak leng ahi. Huaiban ah, ka numeipih te'n naupang chikin pasal hon nei mahmah kei le uh chih ka deih mahmah. Khatvei I minsiat leh damsung daih ahi " chi'n hon gen hi. Thildang tampi leng zuihtuak sa a, laaktak a om leh kisuanglah lou hialin ana la chiat ni.

0910 – Ka Kipak – 2015