I GAM UA I KIPUM KHAT SEMSEM THEINA DING UN HATUOMTE/SAPTUAMTE LAH AH ZONG KIPUM KHAT SEMSEM NA PAWIMAW LOU DING MAW??? (Johan 17: 1-17)
By Revd. Hangpi Manlun

1). Thumapi
Awle u-le-nau, lawm-le-guolte aw, i govenrment in August 31st ni-a bill thum ang passedte un, igam ilei leh eite mama zong dachieng a hing sukhathei ding a ingai ziehun, deilouna zieh a nasatah kiphinna a ipanlahna uah salpha mi kua (9) tah in ahinnate uh tan/pia in, aliem-le-bai tamtah um in tuni dong in asun ajan in anu, a pa'n theitopin pan ila uhi. Tuachin salphate sisan zieh leh igam ileite uh kepbitna ding ua pan ilahna uah kum zakhat val vingveng ana kigawmtheilou leh nou kou chia, chibing nambiang, be-le-phung a na kikhen leh na kidouphialngaite tuin unau khat leh lungsim mun khat pua in idingkhawmta uhi. Tambang a i nam lamkaite uh panlahna uh toh igam ua kituohna leh kigawmna ang umtah ziehin, ei Manggam nnasem leh hagaumi chia kigente jong ilungsim leh ngaidante uh alienlam a ipuahsih leh dachiang in mani dih kisahna, kihagau misahna leh mani denomination/doctrine leh hattuomte ngainatna zieh a igam ua ikituohna uh leh ikipumkhatnate daltu ihikhah ding uh jau huai kasa hi.

A zieh ahileh bangteng gen lei zong sahkhuo/hattuom a kipum khatna panglouin kilemna leh kituohna tahtah khawvel ah aumthei tahtah sih ding abang hi. Pasian thusiem Pu Hans Kung, Wilfred, leh Cauwell-ten tambang in a gen uhi: "Na chimoh hang un, Pasian thu chia biehna tuomtuom inei a atawpna ah KHAT ma toh ikalsuon sih leh piengtheilou ding hi achi" uhi. Tuachin, 'World Theology/ Global Theology' ang mu khiata uhi. Tualeh amauten mailam a kalsuon ding dan thupi ni agen uhi. Tuate khu:i). Biehna chinteng in igam/leitang uh kepbit ding, ii). Kilemna, kilemna ichichi hang un, 'Biehna kilepna/ kituohna aumsih leh leitung ah kilemna tahtah aumsih ding hi" chite ahi. (There's no world peace, without religious peace). Tuajiehin, hattuomte i kipum khat ua, kipum khatna lungtang ineilou lai sia uh tahsa-le-hagau ah jong kichimatna leh kipum khatna tahtah um theisih ding hi. Thamlouin pum khat ihitheina ding un tamte ingaitua ding uhi. Tuate: i). I kigensiettuona leh kigalsainate itopsan ding uhi. ii) Tualeh eima pawl maimai dih pen, leh eipawl behbeh van gam kai ding tanpha ikigennate topsan in, midangte a hoinate uh jong mupi ding in panla ni. iii). I lungsiem neuna leh leader i-utnate topsan in midangte jong mun-ot sawm ni chite ahi uhi.

Tualeh misiemte gen dan in, "Sahkhuo/biehna khu khamthei opium bang deu sim ahi a, min ang addict tahtah leh mipil laipi jong hing ngawl gopin jahtheilouphialin ang um thei moh uhi," achi uh khu igam din mun uah dihin akilang hi. Tuabanah, mani pawl dihpen a ngaina, pawldangte dem a musitna bang ineithei ua, tuakhun kilemna sang in kilemlouna atun jaw hi. Tualeh ei Lamka context ah enkiata lei, mani pawlchiet ah ihapanthei mama ua, shini man ni nangawn un ikideidan theina nalai ua, banah unau khat, be-le-phung khat jong pawl tuomtuom aumte pen akhente khu shini manni nangawm a kingaisahlou phial jong ki-umthei moh hi. Akhenten lah midangte bang galbawl sim mai, adihlouna uh gengen a, ei dihna gengen pawl lah akibei sih hi. Tuabanah i milien milal khenkhatte leh Pasian nnasem khenkhate nasan jong hattuom leh pawl thu igenchieng un i lungneu thei moh ua, akhente bang in alet alalnate uh mipawlte demna, lahna ding leh douna ding a jang nuom lah akibei sih hi. Tamte pen lungsim neuvai leh nam tom lungsim leh Pasian thu toh jong kituoh vot lou hi. Tualeh apeisa kumzabi 19th leh 20th hun sungpen, kipat chil hun, mawllai hun leh pawlpite kilahtua hun ahi a, ahin tu 21st century pen Pasian mapuina toh pichin lam kimanaw chietta in, thamlouin iphahna ding uh iphachietta ua, tuhun pen kigawm hun, pankhawm hun, in zangthei lei tahsa-le-hagau ah masawnna um ding hi.

2). Kipumkhatna bul khu Pasian ahi a, Jesu deidan leh thumna zong ahi hi.

I Bible tang tel uh sungpen etdan leh suidan tuomtuom um ma leh jong tami sung a imubang un, Jesu'n athum lai-in, "Pumkhat a hitheina ding un" chi'n li (4) veitah a thum hi. Ajieh ahileh Mangpa Jesu leitung a hing peina jieh jong khu kilemloute kilemsah ding leh akituohloute kigawmsah ding un ahi. Tuachin a thumna khu, "Amaute pumkhat ahitheina ding un" chi ahi. (Johan 17:1-17). Tualeh tam thumna khu Jesu anuajuite toh Nitah ann aneh ding kuan uh leh agalte un amat ding kuon a athumna ahijiehin, "Shi kuon thumna leh ngetna achi theiding" a ahisih leh "Shivai hahna chilei jong kichi khiel sih ding" uhi. Thamlouin, Johan 17, pen misiemte gen dan in Mangpa Jesu Siempu thungetna (The high priestly prayer) jong akichi hi. Tualeh tam siempu thumna khu Jesu main khen thumin akhen a:
i). Amama ading a thumna (Johan 17:1-5),

ii). Anuajuite ading a thumna (Johan 17:6-19) leh

iii). Nuajui leitung pumpi a hattuomte kipum khat nang a thumnate ahi hi. (Johan 17:20-26).
Tuajiehin, hattuomte kipum khat nei a ium ding uh khu hattuomte neitu leh lutangpa deidan ahijing hi. Aman Pasian kung ah, "Nang-le-kei pumkhat ihimabang in, amaute jong pum khat ahitheina ding un" chiin Pa kung ah anathum hi. Tualeh Rev. Dr. Simon Paukhan-en in tambang in gen a, "Tualeh agen nuom pen sapham in 'Oneness' or 'Unity' ahi hi. Tamnah pumkhat 'One' pen khenjah thei ahisih a, Jesun jong kipum khatna ding in number ni-le-thum ajang sih a, 'One' chi in pumkhat ajang jaw hi. Tuaban ah gingtute khu pum khat ahilai sia uh Pasian deidan lampi jui ihi uhi." achi hi. Ahin, ki-itlou pipi leh kimuda sasa a pawlkhat um khawm a, ui-le-kel bah jong Jesu deidan ahituom dieh sih hi.

Tuaban ah kipum khatna pen hatuomte/saptuamte phutkhietupa leh neitupa Jesu Khrist deidan leh thumna jong ahi ichithei uhi. Khristian leh Jesu nuajui ihilaiin ijuipa deilam theilou a jong um khahthei ahi. Tualeh apoi leh dahuai mama khat ahileh akhenten kipumkhatna i poimaw lam uh jong theiphalou zen a Pasian nna isepkhahding uh zong ajau huai mama hi. Mi khatin, "I poimawpen khu ipoimaw pen uh thei ahi" achi bang deu in ipoimawpen uh jong theilou a kalsuon thei jing ana himawh hi. Tualeh hattuom kipumkhatna igen chieng a Pasian deidan lou dan agel itamna uh jong silda um vot ahi hi. Thamlouin, igam ah laisiem pipi leh degree sang tahtah nei jong kitamta a, ahin lungsim neu leh ngaidan kochihna paikhia theilou lamkai kitam lai hi. I lungsiem aneu jaw phot leh khawvel ah bang ma tan kitunglou ding a, ilung sim neuna toh ikimangthai lel thouthou ding chi jong imanghil sih ding hi.

Tuabanah eite ikituoh ding uh akulna jieh jong ahileh, mihing zousie khu Pasianin a lim-le-mel sun asiemte ihiban uah, eite ngel khu suongtu kibang leh Jesu sisan jieh a, unau khat jong ihinalai uhi. (Nasepte 18:26; I.Tim.2:5). Tuaban ah pumkhat hiding a Hagau khat a baptis ihi ua, (I Kor.12:13); tualeh eite khu Khrist tahsa pumkhat a um ding a hatte jong ihi uhi. (Kolo. 3:15). Tuabanah hattuomte khu Pasian innkuonte ihijiehun kikhen jah thei jong kihilou chite khu i Bible uh in ang hildan uh ahi. Thamlouin, Jesun, "Na kiittuo uh leh miten ka nuajuite na hi uh chi ang thei ding uh" achi hi. A lang khat lam ah, (1 Johan 3:15,) "Mi koipou a-unau muda khu tuolthat ahi; tuolthat koima kumtawn hinna nei aum sih chi na thei uhi," chiin ang hil kia hi. Tami tang in a gen ut ahileh i lungtang ua kipat a mudannate paimang ding china ahi.

3). Hattuomte kikhen jah poi/khawh dan
Hattuom kipatchillai in Roman Catholic leh Protestant hattuomte ina kikhen masa ua, tuin ei protestant hattuomte ngel pen ihileh nasatahin ikikhen sawnsawn kia ua, simsenglou phielin kikhenna atamta hi. Tuajiehin Pasian gam ah khantanhoi in deibang in ma asawnthei sih hi. Thamlouin khawvel a mihing maktaduai 6,000te lah ah maktaduai 4,000 valte khun Jesu khu Pasian tapa (sawl) ahichi agingta thei sih uhi. Pawl kikhenna in gam miel gam nnasepna jong nasatahin asubuai a gingthate ding in jong lungbuaina atun jing hi. Ajieh ahileh missionary nna ivasepna ua eima palwpi ma va kgen chiet in, gingthate ading in jong lungbuaina leh adihpen jong theilou khopin abuai thei uhi.

4). Atopna ding in.
I theisa bang un United Nations Organization, (UNO) ang kiphuna jieh jong khawvel pumpi a muonna-le-lemna umna ding leh khawvel pumpi a kichimat semna aumtheina ding gelna ahipen mai hi. Tuaban ah, min khawvelpumpi huop a kigawmna aneithei a, asaithei leh eiten jong bang tan e khat ah pan ilathei ding uhi. Min sahkhuo khu khanna leh masawnna aneilaiin eite ading in khat-le-khat kimudana leh doudal kisatna hitheina lai hi. Tambangten politics leh sildang tamtah ah ngiem kiehna leh basapna ahing tun thei hi.

Tualeh, atung a igente apat ilung gel sonson ding uh ahileh, hattuom khat-le-pawl khat in ding theisih lei jong hagaulam a kichimat semna apientheina ding a pan ilahtou ding uh khu eite mawpuohna ahi hi. Thamlouin, lungsim neu tah a nou pawl kou pawl chia kideidanna bangpite khu Jericho kulbangpi bang ichipsah uh ahunta hi. Tuaban ah, kipawl lahtuonate, kidem tuanate, kihui tuomnate leh adangdangte khu topsan in lungsim mun khat paw ding in mabang ipanta ding uhi. Tambang a idinthei chieng un tahsa-le-hagau ah masawna inei ding ua tuakhu Jesu deidan leh thumna ahingal hi. Genkhel genval aumtah leh jong simtute jousie ngaisiemna kahing ngen hi. Mangpan simtu jousie hing mapuiin hing guoljawlta hen. AMEN!

Sources:
1. Lungdamna Aw, February issue, 1997 & 1999
2. Lalremliana, Christian Unity, Mizoram
3. Makedonia, August Issue, 2013 leh adangdangte apat ahi.