GIALBEM THAANG AWK: HT NEWS
-Khamkhanpau Tunglut

September 30 nitak lumdek, thuduh kisa gekgak a Net tungtawn a News khawng ka vial etet leh Hindustan Times ah hiai a nuai a Gialbem kol-awk LIMLAK ka mukha a atuung in ka nuih bang zasim mahleh a khonung a ka ngaihtuah sau leh tulel a adinmun leh a thiltuah khah hehpihhuai sak in om mahmah.

Rajasthan state gamlum, gamkeuna leh tui haksatna mun Rajsamand district a khota khat ah Sepnawnni zingkal in Gialbem dangtak hawphawp khat va lut in alunggulh tenten bel gonggek sung a tui kikoih va chiip hi. Duhtawk a adawnkhit in ( Penglam suumluh mah bang in), a lu huai bel gonggek ah taang ana hi maimah a la khethei lou in "koi lamzuan ka hia" chih le theilou in khosung ah bangmah mutheilou pi in vialtai maimah hi.

Khosung/vengsung miten lah LAUH LEH ETNOP thuah in vial delhdelh in en kheukhou mai uh. "A duh liakkha ei" a chih maimah uh bang gintak huai. Kongkhat ah hattawk in lauhhuai tawk lele tuhuntak in zo hehpihhuai in khongaihhuai chi mahmah.

A khonung in miphatuamngai bangzah hiam ten forest department te hilh ua huchi in forest department te hongpai in tranquilizer a kap in a ihmut kal in a belgonggek alu tang la khia uh hi.
Khatvei Siloam veng a zohmeng sahou luh dek sik sahou bawm sung a alu tang a vialtai, daikawm, inn ningkawm kal kho lut sawm, aman a lu tatna munmun kho lutthei zazat ding kisa, a lut dek chia a sahou bawm liantak alu a taang in daal kha zel. Huai bang phawk huai zozen.

Pic credit: HT

MAILAM KHIMKHUA ZING
(Hiai hun a Gialbem' ngaihtuahna/kahtam dia zeldim thubawl)
Ka mailam khimkhua ziing
Ka tan henkol sut zou keng
Lung a ka gulh hinna tuisik siang
Zaitha hatna leh hinna ding chi'n
Ningzu bang luup ing
Ka ningzu luup namtul hel hi hiam
Kei din awk thaang suak zou e
Ka mailam khimkhua ziing
Zan mial bikbek hun a
Gammang thuk tak mun ah
Ling le pawn lak saltang bang ing
Kawlhawm mial bikbek mun a
Ngaltun bu maiphuut bang ing e
Koilam masuan ding ka hiam!
Galmat melma sumtual a singtan avel bang in
Honvel vel uh e singta zatamten
Mel in honmalou aw seinou seisang
Ka tan henkol suut ding omlou hiam
Simthu suut siamten honsuut un
Khawnbawl lawi upate honglung gel un
Ka tan henkol hongsuut sak un
Ka mailam khimkhua ziing
Pusa in mel a honma hita hiam
Phamna'n sangkil a honngak hita hiam
Vual toh tanbangkim in
Sabang ka tatna vangkho zawl ah
Laitual len ut lai sam veng e
Ka tan henkol kuan hongsuut ding hiam