Manipur Singtangmite'n I Thiltuah uh Hiaibangin Tehkaak Leng...
— Chingboi Guite Phaipi
August 31, 2015 a Manipur State Government in ana passed Bill 3te toh kisai a Manipur singtangmite I buaina uh tu in ni 29 bang a paita. A phualpi a omte gim mahmah ta ding ua; a gamla a omte leng om maimai thei tuan lou. Muhdan, ngaihdan tuamtuam tampi a om a, agal a om kei mimal lungsim ah hiai anuai a banga tehkaakna hong lian mahmah hi.1
[Tangthu]. Nupa khat a om a, amau ta a nei tiltel ua, inkuan ki-it tak in a khosa uhi. Pathian phawk mi ahi ua; huan, innmun-loumun bang leng a (naupangte') pu-le-pi apan a luahsuk uh a nei hoih mahmah uhi. Ahi a, hunte hong pai in, a pa un zu dawn, laiden kimawl chihte hon pankha in hong zongsang khata hi. Huchi'n a lawm-le-vualte toh noplenna hon ngaikhawk in a insung hon enkol hoih man nawnlou hi. A tate laisiam leh fel pipi himahle uh, a hong khanlet utoh kiton in hong zalen gawp sim ua, unau hinazenpi in khat hih khat in theihpihlou chih khawng in hong om vingveng uhi; nu in lah inn nna toh tate na enkol zou vek lou ahihna ah. Apa ulah lawm polh leh zu leh laiden chihte tawp thei tuanlou in, sum-le-pai bang a neihsa in a daihlouh chiangin insung etkol nadia a zi in a kepte khawng nasan a ngen khe jel a, khenchiangin lah, amah buhlai sana (watch) khawng peuh na pekhe jel hi.
Hun hong paitou jel in, khatvei tuh apa un a lawmte khut ah a innmun uh nangawn mansuah didan in hong om tel hi. Nidang in leng a zi le tate'n a pa uh omdan hoih ana sa hetlou himahle uh, bangmah gen ngamlou in na om sek uhi. Tu in bel a pi-le-pu' got sa, a pi-leh-pu uh mel a muhna uh leng hi, a innmun uh mansuah ding dinmun a suah un, na sa mahmah chiat uhi. Nidanga amau ut-ut a om himahle uh, unaute tuh a innmun taan di tungtang ah heh chiat uh a, "Bangjiaka I pa le a lawmte'n hichih zezen u ahia; lawmhoih hilou a, I neih-le-lamte hon enlah ana hizaw di uh eive," chi in apa' lawmte bang a hehsan mahmah uhi. Ahi a, a loh didan tuan theilou in, khenchiang in a pa uh bang mohsa, khenchiang a lah a nu uh mohsa, khenchiang a lah amau mahmah ki mohsa in a unaute tuh hong lungbuai gawp uhi. Ann na ngawn hoihtaka anekkhawmna uh sawtta ahihman in, a gen te uh ki sangkhial zengzung bangin omkha jel uhi. Nu in a tate sam khawm in kap kawm khawngin, "Bawite aw, kiselsel lou in, aw dam in kikum thei le maw. Nidang a na neulai ua zaw, I inkuan ua pawt khawm zaizai hanga, inkuan kikhopna I neih chiang bangua na unau ua Bible chang tam genpen hihding bang, lasa masa ding bang kituh uchinua, nuam lua hi a, tu in lah unau le hilou awmtak in na ki chi gaihgaih ua, ka lungtang in pua zoulou dekdek ahi. Bawite aw, en un na neulai limlak uh, na pi-le-pu un hon pomlai lim khawng hiai ah om eive," khawng achih pih jel hi.
Hiaibang tuak inkuante a di'n bangchi panlak a hoihpen dia: apa' lawmte ava maituah (confront) ding uh ahi diam? Ahihkei leh, a innmun uh "pucca patta" khek theihna thuneite kianga ana kheksaklouh hamham nading ua a dinmun uh ava gen uh? Abang abang hileh, amau unau teng, amau inkuan sung, hong kigawm masak kei ule zaw...
Tehkaakna hoihpen (best analogy) ahikei maithei, kei lungsim a honglat dan ka hon gelhkhiat jualjual ahi. Dinmun haksa tak phu ihi uh. Ahi a, lametna bei ihikei kachi nuam hi.
Pathian in thilsiam apat tung in lim-le-mel bei in om nianua hihtuak hi (Gen 1:2).2 Ahi a, huai om nianua/om zengzung (chaos) apat in Pathian in thilsiam kilawmtakte a hon siam khia hi (Gen 1-2)!! Tua I thiltuah leng a buaihuaina athuahthuah in om chihtheih hi—Manipur Government tunga I hehna toh, I palaite tunga I lungkimlouhna toh, singtangmite unauteng deihbanga kituak diamdiam theilou ibatna utoh, I buai vingveng ua, bang thilhoih le hong piang mah diam maw!? chihtheih hi. Pa Pathian in bangmahlou leh lim-le-mel bei apat thilsiam kilawmtakte asiam bangin I dinmun buaihuai vingveng (complex/chaotic) apat thilsiam thak, kipatna thak, a hoih mahmah Pathianin hon pe ngei ding hi! Eilam ah Pathian muangin tawplou in thum in, sem ni. Tanchinhoih ah leng, nungjuite' tuanna long huihpi in a nawk ekek takin, Jesu ihmulai a phawng ua, honkhe di'n a sam ua, huchi'n Jesu'n huihpi tuh a khaam dai, chih imu (Matt 8:23–27; Mk 4:35–41). Thummite I tawl nga theikei ahi, Pathian sam ni: I heutute, I mipite, I tunga vaihawm kumpite a dingin thum ngiit ngiit ni. I huihpi tuahte Jesu in hon khaam daih sak dinga, thil bangkim ahoihpen in ahong kihei ngei ding hi.
A tawppen in, tu hun in leng Pa Pathian in a kisiasa inkuante (broken families) bawlhoih leh gawmkiikna nasep tawplou hi. Ei Manipur singtangmi inkuan leng hon gawmkik thei hi, hon gawmkik ding hi. Ei singtangmi unaute'n Pa khat I nei uhi—I van Pa Pathian uh; huai kia hilou in, sa-le-sisan ah leng suangtu khat I na hingeei uhi. Piangkhawm unau leng kibang hetlou, phiik ngoihngoih leng hihna (character) kibang hetlou thei hi. Huai mah bang in, ei singtangmi unaute leng I kibatlouhna uh omtham, bat leng I kibang ngeikei ding uh. Himahleh, I kibatlouhna sang un I kibatna uh, I ki laigui zopna uh—Pa Pathian leh suangtu bul—ah kinga (focus) zaw in, Pathian buan in pangkhawm ni. Pathian' nasep daltu Setan a om gige bangin, ei innkuan I ki gawmkik nading daltu a om gige ding hi. I hih khelhnate thupha tawi in, ki ngaidam tuah in Pathian buan ni (heutute hi in mi pi hileh I mohna a omchiat ding). Pathian in hon gawmkik ut hi. I thil tuah buaihuai vingveng, mangbathuai ngoihngoih apan in I Pa Pathian in kibulpatna thak, kibulpatna kilawmtak hon pe nuam ahi ngeingei ding chih ka lametna ahi.