NEKGUKNA POLITIKS ZIAK IN MAW!
By: Hauzel Gou

Hichibang gam-le-nam awlmohna thu khawng va gelhgelh bangle den chia kua hiam upa mitlian khat tuah theihna khovel ah itengta uhi. I Laisiangthou ah sawltak Paul in Korinth' Saptuamte kiang a, a lai khakna khenkhat ah 'lau kawm simpi pi a, k'on gelh ahi' ana chihdan deuh in, laigelhtu' te'n le lausimpi pi a gelh zel uh a ngaihna chiang om hi'n ka thei hi. Huaiziakin, awlmoh luatziak a hon kigelh khazel ahi a, mimal kuahiam leh pawlpi demna hilou in kuahiam khat in ana phattuampih theih khak zenzen leh chih lametna bangle kinei zel hi. Tutung in kuaman agen ngam khollouh uh Saptuam lam le nawk zek le ka ut hi.

Kiginni zaan khat ihmu thei pah lou in ka om a, kangaihtuahna ah hiaibang hong suak hi. Naga te'n lah va-uk a hon leen san ta, talpakte'n lah vaite chauh hawdan in pang mah le uh, a diktak a zaw singtangmite suk chimit utna lungsim nei in, thaang honkam khum in tu'n i awk vek ta uhi. Hithei ngial hileh, i singtangmi' hihna (ST status) nangawn bang uh le hon suh nuam in kisiingsa ten lai uhi. Alehlam ah ei lawi dinmun i ngaihtuah chiah baang (wall) phukha bangmai a, maban sawn thei tuanlou in, i om na mun uah isaipi ding bebu laitak un; thakhat in talpakte thaangkam ah tuh i awk geigawi uhi. Lungziin-mangbatna in igam hon tuam ngal a, bangziak a dia aw chi'n lungngai vungvung kawm in i om chiat uhi. Hiai talpakte thaangkam ah awklou a om theih ding hizenpi, nekgukna politiks saisiam di lel nateel/kateel khak ziak in maw hiai thaang ah tuh ivek un i awk khawmta uhi. Bangmah hihtheih dang a om nawn kei, kipeksuah tum in ikipek saw-souh ua, lametna atawm mahmah mai hi. Imuan mahmah te'n lah bang ngaihdan nei uh atel diam, tunitan phunlou-paulou in dai dide lai uhi.

Naga leh Talpakte' politiks gen sawm ka hi kei a, eilawi politiks pai dan en zek le hang ichi hi. I politiks kibulphuhna himhim uh le adik louh ziak ahi mai ding e, i kipat dan un le zillou deuh ei vawi.... nekgukna politiks ah ikipan pah uhi. Mipite palai i hong hih theihna dia nekgukna politiks apply bawl pah ngal, mipite vote sum a leisawm pah, mipite lah aw .. sum-le-paai ma nana a tuh kuamah taise ngamlou, i vote manphatak tuh sum in i khawng zel uhi. Kuamah dang mohsakdi tuam omlou, ki ui-eek bat vek, heutu nasem lou, hon gum ngamlou chi'n iphun khum lai zomah ua, i vote uh hon lei khitsa uh hilim hive aw! Huaiziakin, kuaman nekgukna politiks kasai kei, i chithei kei ua, a mipi ei mahmah in le naakpitak in ina negu uh hilou hiam? Igam Christian gam ahi ichih ut zozen na mun uah, hiai bang nekgukna politiks in itung uah thu hon neih khum a, zumhuai lua hilou maw? I Christian hihna te uh maikhuh na'ng lel a zang maimah ta ihi di uam aw chih in om hi. Hiaikhawng hial zaw i Toupa' melsiatna lel hilou hiam? Igam-le-nam a dia politiks sai sa'ng in, nekgukna politiks ah ilunglut chiat uh abang zaw hi. Heutute'n lah aw...i thuneihna leh mohpuaknate uh ahilou lam a heikawi in, mahni angma-sialna, deihsaktuam, khentuam neihna, thuneihna zat dik louhna politiks, kikhemna politiks leh zuau leh thutak theih khen theihlouh dii khop in mipite ipei am-hai uhi. Hiaibang a nekgukna politiks isai zel uh, Pathian in le hon awi nawn mahmah lou hikha mai thei ding, hiai talpakte thaang a ihong awk na uh. Kuamah a taisia thei i om kei ding, ithuak ding uh kibang vek, ahausa pen, azawng pen leh iheutute nangawn le hiai talpakte thaangkam ah tuh i awk suakvek uhi.

Pathian zah louhna le hituan lou in, tutung in tuh Saptuam sung le nawk zek ka ut hi. I saptuam sung politiks bang le naakpitak in apoimoh a, nekgukna politiks toh isaptuam apai ngeingei a leh niam kiak lam ima nawh deuhdeuh ding. I saptuam sung lam beek ana hoih/pha dawm deuh ding i sak leh huchi zaw lou in, muh theihlouh a, aguktak a puaknat huai velvul di khawng in politiks ina sai zaw uh abang hi. Pathian zahna ziak le ahikha maithei, kuaman le gengen in inei ngam kholkei ua hive'n, ahoihna khat zaw om vanglak veh. Himahleh a Saptuam neitu' Pathian mai ah iki sel thei gige hetkei ding uh chih mangngilh louh ahoih ding. Sum-le-paai deihtaakna in ilungsimte uh luahkhin, ibiakna mun Biakinn leh iteenna inn te uh muh theih ding in khang hulhul a, himahleh asung a om te'n ibiak Pathian gamlaat hiaihiai ibang mawk uhi. Nekgukna politiks isai ziak in, isaptuam sung a sum thelthang chih zak di om zeuhzeuh a, himahleh kuaman genkhe ngam ngei lou hi. Huchi'n salam mahmah ale kitaiteh in kigensiatna politiks, nekgukna politiks leh ki deidanna politiks te'n, Toupa lungkimsak isawm uh abat hun om hi. Hiaibangte tengteng zaw Saptuam heutute politiks saidan a dik louh ziak ana hi nuam mahmah hi. Huaiziakin, Saptuamte'n le sum hau peuh Upa Ordain di khawng in iching sak pahpah mawk ua le dik lou deuh hikha ding hi. Ibiak Pathian zaw sum-le-paai a tasam het lou ahi chih mangngilh louh ding ahi. I Laisiangthou a Akan khelhna ziak in Ai khua neuchik tuh Isreal te'n ala zou kei mawk uhi. Sum-le-paai deihna ziak a Toupa Jesu sum a ana khawngtu Juda Isakariot in a sum bangmah in azang tuan kei a, thamlou Siampute nangawn in le deih lou mawk uhi. Saptuamte gam-le-nam a adia thum sa'ng in thohlawm tamsem muh theihna di'n thumna kinei tamzaw a, huaipen igam siatna hontuntu ana hi maithei hi. Himahleh tutung a ithiltuah un, naakpitak in ilungsim uh hon dengkha chiat ahi ding, Toupa sapna zaa in Amah ibuan ngei ua, i hong lohchin ngei uh le lamen hang. Toupa eilam a apan naakleh hiai thaang , i awkna ua pa'n nikhat tei isuakta ngeingei ding.

Politiks diktak bel, sum-le-paai muhna leh nekgukna lam ahi kei a, a piakkhiatna lam leh a sepkhiatna lam ana hi zaw hi. Tuni'n kuamah politiks mai ah itaise thei kei ua, i hinkhua-le-khosakna tuh politiks in ahon hetkhak angai gige hi. Pathian thu kahat e, ka siangthou a politiks ah kaki golhkha kei ichi thei kei uhi. Hiai khovel a ihinsung in kha (sprit) chauh in i hing thei kei a, neek-le-taak, silh-le-teen i taksa in a poimoh gige hi. Huan, midangte toh hinkhawmna i poimoh a, tulai khovel changkang takmai ah mite idelh phak kiphamoh ding, hiaite tengteng politiks lou in a bukim thei kei hi. Huaiziakin, i politiks saidan ah, Toupa deihna bang in isaina hiam chih ngaihtuah a nei a zuite'n hiai politiks diktak tuh a zarzou kha ding uhi. Huchi zaw lou a, nekgukna politiks chauh isiam lel in zaw, i gam ah vaihawmna apai dik thei ngei kei ding a, tuaphetlou i innsung tanpha ah lohchinna sang in niamkiakna lam ima nawh zaw ding. Huchi'n i Christian hihna te'n ikim i kiang gingloute tuh a thuzoh zou ngei kei ding uhi. Vaihawmna diktak politiks isai a, ilohchin theihna di'n michih in mohpuakna inei a, sum-le-paai nekgukna toh isai khawm lailai leh isuakta hetkei ding uhi.

I gam i en a, ipu-ipa ua pat Christian i hihna uh bang kum 100 valta in, kipak chiat le ihi ding ua, lawm in, nuam i sa mahmah uhi. Himahleh, igam-le-nam banah isaptuam a dia i politiks saidan khawng uh i et vengveng chia'ng in eilawi Christian hihna toh ibiak Pathian a kipak huntawk na dia aw... chih ngaihsutna om thei mawk hi. Christian i hihna uh sawtta, mihing khang thu suidan in, a khang nihna ah tulel in i om uhi. Tua i politiks paidan in a khang thumna ding hon gaal muhsak in kathei hi. Huaiziakin, michih in panla thak chiat in, pichingtak a Toupa deihdan a politiks sai kisam mahmah ding hi. Hiai nekgukna politiks pen hichia ahong pai touhtouh aleh khantouhna chih om ngeilou ding. I sepna peuh ah ginom tak a sem a ei mah innsung bang a ngai in sem le, i saptuam leh khotang chidamna hon tun zaw ding hi. Toupa mah zuanthakni in gam-le-nam tungding theipa Pathian ahi a , gamgite khung theitu Toupa ibiak Pathian mah ahi. Huaiziakin, a poimoh pen zaw Toupa deihna toh kituak a politiks sai ahi pen mai hi. Tutung a ithiltuah ziak a pilvang chiat sawmta in, nekgukna politiks paikhia in, Kumpite' Kumpi, heutute' Heutu bangkim hihthei Pathian a om chih thei kawm in politiks sai ni hang.