A hangsan Singtaang numei sung pan a hangsan tapa ong piang dinghi

By Hang Khan Lian

Meigong nupi khat atapa neihsun in taisan hileh a taamlawh ding hilhkul hetlo ding, ii thuakpih thei hi. A lametna khempeuh bei, khahsuah, nuntak hingim nam nawnlo, nuntak hang akhiatna om nawnlo, nuntak thaman om nawnlo, sih ding kihta nawnlo, kikhualnopna om nawnlo ding;

I neih sunsun I gam I lei kithaang bawlding, kisehsat ding, kihawmthaang ding, numei kizuak bangding dinmun hong tun taktak ciang Lamka khuasung ah Singtang suak Zomi nupi teng ong pusuak khia uh aa, meigong nupi tapa khahsuah mah ong bat uhciang;

Kalungsim sung ah, bangteng tuahbeh sawnsawn zel ihihiam kaci khata hi. Zan deuh mah in I inn, I lo teng guahtui in ong taihsak, ong neeksak, I khua I tui kicim, neekding taakding teng bei, sawlpaang buk tungkik, meikuang paisuak I om laitak hizen aa;

Minam khat aa I din lingleng hang, I kiim I paam mite zahzong phalo, mite zah aa haulo, pillo, kuamah ii ten noplohna mual leh guam kawm aa I ten kawmkal ah, I neih sunsun tua mual leh guam mah ong kideihgawh, ong kithaang bawlsak, ong kisut ding cih pen in I lametna beisak aa, I nuntak thaman omlo zah ong suah in, sih leh hin kilamdang nawnlo zah ong suahhi. Topa maipha I zon hang, bangding aa Topa'n a mai ong sel hiam? Banghang in Pasian muhna ah it bang thei mahmahlo ihihiam?

"Manta khalgah ka nekman hiam, nahtang to lawk ka nekman hiam?" ci-in lamet bei, ngawhsawn ding bei zah in I omhi.

Innsung pan aa ong pusuak khia hih nupite lainatna, veina, awmbinnate ong nei Topa in zalo hiam icihtha peuh ong suak dekphial aa;

Khatveivei ciang I ngawhding mel theilo in, "Topa aw, nang nong piak ahihlam mangngilh lua kha ka hi uhhiam?" kakici aa, Kawl mang khutsung ah phellang khat I khahsuah khitciang Vai mang khutsung ah a omsunsun teng khahsuah lai lehang i minam abeiding hita, I gam abeiding hita, leitung tangthu khangsutna ah a muih ding, a mangding, apaak tawng ding, khang kibotsat tading, "hunkhat lai in Zomi, singtangmite" cih tangthu sung aa om ngei bek hita ding lawmlawm, tuading in ong PiangsakPa in ong phal hita maw" ci-in ka khasiat ong suak peuhmahhi.

Gam leh lei, leitangh icih pen I it mahmah kei leh a kineikipzo hilo aa, sum leh paai, peuh I iplah zawkciang a kikhahsuah hipah hi.

Cihtakna, kuhkalna, thumanna tawh I kep kei leh a kikembit zo hilohi. Hih gam leh hih leitangh tung ah citak ning, thuman ning, kuhkal ning I cih kei leh a kikemzo hilo, a neipa inzong piakhuai ong salo ahihi. Hutding, dalding, puahding I sawm kei leh a neihtaaklo, apiaktaaklo, akepsak taaklo ahihi.

Tutung in i mipi palaite a kalsuanzia uh ong khialkha uhhi. I leitangh sum leh paai tawh kheekkha uh cihna ahihi. Pilloh, siamloh man hizawlo in, Taangmi nasep ki ngeina sehluata, thupi sannawnlo uh hiding in ka umhi. Sum lom in a khuamuhna uh dal hidinghi.

Citui al dawn khate a dangtaak akap theihloh dan ahihi. Galvan pua sakolte leh leng kaai sakolte mitdal akibulhsak dan tawh kibang kasahi.

Amau bek mawhsak nading om kei, I gam puah nading aa ong kipia sum leh paaite a kizek nading mun tunglo tampi om, I minam paulam, I gam I lei paulam angsung hamphat nading zong tampi om hang. Thatang hatna, molh tum, lum leh tei suang aa taangpi taangta tha leh ngal, kumpi kiang pan aa I ngah mu khat pe khat a suukkhia honpi khat om hang. Sum leh paai ngah nading ahihnak leh I pianna I Pa maituam ngam, I pianna I Nu khitui luan a awlmawh zolo zah in kalsuan khialta hihang. I minam bup kalsuanzia Pasian maipha muhna ding hinawnlohi. I biakpiaknate Topa in kih hi.

Hizongle,

Tapa neihsun a kisimmawhsak meigong nupinu in, a tapa akhualna tawh kihtak leh khual neizo nawnlo zah aa ahansan bangin, pasal xxxxkhaiteng icihmawh mahmah laitak Lamka khua nupi teng ong diangkhia in, lungsim pulaakkhiatna ong neihna uh in, ii makai ginnalo teng' angsung theihna, huaihamna, gamtatkhialhna, i minam bup zumhuaina, daina teng ong seelsak uh aa, zahtaakna lianpen I piahi.

Hizah aa gam leh lei it Zomi numei hangsan, hizahta om ka muhciang I minam mahmah mailam ding lungmuan huai om kasahi. Hiteng suan khaak te ong khankhiat ding kal kangaaklah hi. Nu hangsan sungpan ta hangsan ong piang ngeingei dinghi. Zomite ong maimai nawnloding hi.

Kalungsim ka gelgel aa, tuan aa pupa khangpan I luahsuk hih Zogam leitangh gal-et lel bek ding dinmun I om laitak, bangmah khualzo nawnlo aa ong diang khia hih singtaang Zolianu teng khut dawn len in zahtakna tawh kanam nuamhi. Hizah aa hangsan, a maitang un bangmel pua tuam peuhmah hiam cih ka mukha ngei nuam aa, a huihdik uh ka dikkha ngei nuam hi. Alungtang tawn aa ong pusuak a huu uh namtui vangvang kasahi. (Khatvei peuhmah Lamka ah va ento hamtang ning)

Lamet bei, cimawh, maizum, muanding suanding a om nawn mahmahloh laitak, athanem pen ahi inn nupi teng Pasian in tha ong guan, ong hangsan sak in, "Cikmah aa ong taisan ngeilo na Pasian hiah om ing" ong cihi.

Laphuaksiampa in:

Upna hang aa ze-etna thuak Zawba

Mawhlopi mawhsakna thuak Zawtah

Tuate ahonkhia, kua hituan ahihiam? Na Pasian hiah om ing!

a cih ong phawkkiksak aa,

"Hih leitang, hihgam leh hih minam a piangsak zong nangmah na hi aa, na maipha muhding a zong minamte ka hi uhhi" cikawmsa in zing nisuak ding lametna lianpi I nei hi.

Hih gam, hih leitang, hih minamte tung khial kha ngei nawnlo ding phawnna lianpi hisak ni.

Topa in ong maisak khin ahihman in eite khat leh khat zong I tatkhialhna, I ngaihsut khialna, I thanem khaaknate kimaisak zoding hihang, tua hileh I minam mailam ong limcii mahmah dinghi.