Pawl sawm kazoh kum in koles hoihzaw a kai ding keilung gulhna kia leeng hilou a ka nu le pate hon deihsakna ziak toh in khopi a kai ding in ka inn lum uh nusia in phalbi zing kalkhovot tak nuai ah ka innsakpa uh Auto in kei hong khading ka nuleh ka utoh Bus stand kazuan uhi. Ka lawmdingte khenkhat a na om ua amautuh kilawp in a chiak zizai ua kei kahih leh ka neu a pan inn ka nutsiat na ding ahih kialou in le nu leh pa toh khosakhawm gige kahih man in ka thawmhautha a suak hi.

Ka omna ding mun katung a chimluat ziak in Internet a facebook ka log-in deuh gige a lawmte toh ki chat in ka chim thoina ding in Facebook kazang den hi.Ka meltheih ngeilouh te ah ka lung lut zoukei a freind hon request te reject khol keimahleng ka houpih khol kei a ka inbox ah laithon omte leng thuk khol lou in ka koih dapzel hi.A mi himhim a houpih utlou hikei mahleng ka Inn lam ngaihluat na in ka kithalawpna teng labei ahihziak in kuamah ka ngaihsak peihkei hi.

Khatvei leng ka thuklouh himahleh midang in nihvei thumvei hon khak khit un hon daihsan ua himahleh Khualpu Paite kichi in niteng in ka inbox ah laithon nih le thum a na thun gige a ngaihsak khol keimah leng amah ate sim nuam kasa deuh a ka thuklouhziak in simlouh in bel kakoih sak ngeikei hi...Khakhat bang hong pha a Khualpu in niteng in laithon hon khak khial kei a Nipoimoh teng in hon Wish khial kei a, atawp in kenle ki awilou in kipahthu genna khawng kakhak thuk sam hi...Huachia awl awl a hon gkihou in kinel nakhat kahon nei ua...kenleng ngaihsak louh hun ka neinawn kei a amah toh kihou nuam kahon sa a a ni ni in nuam kahon sa deuhdeuh hi. Melkimulou himah le ung ahon houpih dan nuam kasakna mahmah a om mawk a ka ngaina kei chileng le keilekei kikhem hidi bangtuk in ka ngaihnatna ahon glin hiaihiai a,aman le hon ngainasa himahleh hon ngaihnatna a hong lian hiaihiai a kougel kia kibuaipih bang khophial in facebook a midan gomlamle phawklou hile ung kilawm in kaki chat den mai uhi.Ka ki Chat tamtuk un ki chat ut na ka nei deuh deuh ua..ka kingaihnatna uh ki itna hong piang in mel kimulou in ki it in ka kingai mahmah uhi. Ka inn lam ngaihna a hong dai a tuntuh nop kasa zawta hi

Tak a mel kimulou a lim lel a kimu himahle ung ki ngaihna ka kal ua hong pian mawk lamdang kasa a haihuai bang kakisa a himah leh itna ziak a hai mah kahita. Huchi in kumkim khawl hun a inn lam a kimuthei ding kahih man un kumkim khawl kal ka ngaklah tuak ua a tawptawp in kha khat lel hunzang ding in innlam ka pai a Khualpu leng kei tun nung kal khat zoh in ahong tung hi. Ka kimuh masak nipen uh tunitan in ka mang ngilh theikei hi...

Nipini nitak ahi a khua mial pan chih ding in ka inn kon guh hong kikiu a keile keikia om kahihman in kava hong hi. Ka Ukhual leh a lawmpa Thangpu (a khonung a amin katheih) ana hi ua ka nervous petmah hi.A mah leng a zumziak in maih san etlawmtak ka innsung ua meivak in a salh kamu a mel hoihtak leh feltuaktak ana hi a kazah tak deuhdeuh hi. Facebook a ka houpihna te khawng kalungsim ah honglang thak a kazum tha khawng asuak a houpih khialkha ka hihding bang kalau thak kik zezen hi. Amah leng hon zahtak ahi chih kathei mahmah a a lawmpa Thangpu in ka kizahtaakna uh paihkhiat sawm in chiam nuih khawng a gen a nuih zaak huai sakhol keimah leng zum selna in ka nuih theihna teng suah in ka nui zelsam hi.

Sawtlou nung in tuh ki itna ziakmah ahi ding a kimai ngalna khat kon nei ua houlim in thutuamtuam kagen ua nuam chih kia inle a gen khakei hi.Ka kizahtak na ziak ua ka kihou hoihtaktak louh un hunsawt lazaw ahihman in tomchik kasak lai un nitak dak 10 lam a naging a apaina din guh agamlaat toh kikhelah simtak in a hon paisan uhi. Keikia in ka hong om a kipahziak in ka ha in vun a pawman kei hi.Ka Ukhual a lim akamuh sang in a mel a hoihzaw tham a ka kihouna ua a thugente sang inleng a tak a athugen i ngaih huaizawlai a....A bangkim a limsang in a tak a hoihzaw,ngaih huaizaw,suan huaizaw ana hi a kipahna in ka dim a,ka tankhak louh ding lauhna in hon buak a nidang a fb a kaki chatna ua kathugen khenkhat haihuai a sak khakding bang kalau thakthak hi.Kum a hong paizel a BA kahon zoh tan un kisiatna neihetlou in ki it mahmah in ka om ua itna siangthoutak a ki it in BA kazoh khit in nulepa phalna in Saptuam dan in kitenna ka nei uhi. Ka lawm ka vualte leh kuapeuh in hampha a hon sa ua keileng hampha kisa in pasal neihna thu ah kuamah ka eng kei hi.Ka kiteen na ulah a vengsung ua kiteenna lak a thupipen ahihlouh tawp a a thupi lam ahihziak leh mipi hong uap a tamziak lel in leng hampha kakisa a ka hinkhua nunnopna a zang touden dia ki gingta in nupi hinkhua ka hon zangtou hi

Ka inn sung uah kituahlouhna a a omkei a,nu leh pa hoihtak, innsung ki it tak leh Pathian theitak inn sung a ka lut khatuh numei a ding a huchikan kilam etna ding a om kei a kipak chi kialouh gending kathei kei hi. Ka nu leh ka pate'n lah amou uh lel hi a hon en lou un a mauta mahmah bang a hon en ua..ka nutsiat ka pianna nu leh pa te mang ngilh keimah leng amaute ngaivung vung in hon koih hetkei uhi. Ka lungsim in ka teeknu leh ka teekpa hoihna,Pathian alauhna ziak ua hiabang a inn sung nuam ahi chih kathei a ka it in ka zahtaak mahmah hi.A maute suk lungkim louh ding ka lau a a lungkim na ding ua omlouhkhak ding kalauhna ziak in fel lou ding pi hilengle nupi fel ka hong hi hi.

Pathian panpihna in ka Ukhualtoh ka kiteenna uh kumkhat a chinna ka hon muh nung uh a khathum zoh in tapa mel hoihtak leh chidamtak ka hon nei ua ka inn sung uh nuam mahmah a nopna a hon behlap semsem a kahamphatna uh Pathian vualzawlna kachilou theikei hi.Huchih hun in nidang dan in ka Ukhual bel hun awl a neih teng in Facebook mah alut in ahun awl neih sunteng computer mai ah hun a zangzel hi. Akhen chiang in ka nu'n "Khual,papi hita chin a huaikhawng a hun nazat det ding hilou ahi, Tapa melhoihtak nei chin a huai khawng nadon ding eive" a chizel a huchih hun chiang in ka Ukhual kisunglh in ka naupom lai bang hong pomkhia in Computer mai ah atut pih nemnum zel hi. Kei le facebook addict a chih zente khat kahih ziak in ka Ukhual in a hun awl huai a azat poi kasa kei a,mi psal khenkhat bang a kholak khawng a vak a nek le dawn a kibual a a om san gun hoihzaw in kathei a poisakna ka neikei hi. A khen chiang in a kiang a vatu in mitoh a ki chatna khawng kavea simpih zel a "Nu pipi hiaikhawng lunglut louh di ahi" chi khawn gin hon na chiam nuih a hon hua bel ahikei hi

Huchi in ka Ukhual in ahun awl neihteng net a fb na in azang a,keilah katapa utoh, inn nnatoh kabuai den a akingaihsak tet tet ding ka omkei uhi. Ka Ukhual muanmohna kaneihlouh ziak in poisakna kaneikei..!Hunbangtan hiam apan in ka Ukhual omdan nidang bang lou hi in kathei,a fb namun a kavapai khakchiang in nuamsak louhna banghiam nei hi in kathei a himahleh ka nu leh pate'n fb haipih chi a ataitai ziak kisuang lah hidin kakoih lel hi.Hong sawt hiaihiai a avangkim in pawt khiat toh honthuah a huchih hun inleng a haichilh fb pen daideuh hi a koih in poi kasa tuankei hi.Hun hongpai zel a nitaklam khat ka nite uh inn a lengla ding in kanaupua in kakuan khia hi. Khuamial pan ahihziak in agal ah mi kimuchiang theikei mahleh muhtheih mialmial lai a koulam zuan in tangval leh nungak kingaihtuak mahmah a kikawikawm a hongpai kagal muh a..kalungsim in kare khosung a zumna dantheilou a hichi a om mi om ahimaw ka chilungsim a amau zumhetkei mahleh kei kazum gulua hi.

Kahon naih deuhdeuh ua keibel kazumziak in kuate a chihle thei ut zezen lou in kasikna ding kia en in kakun a amauleng kakituah dinghial tak un pauhetlou in a hongpai ta akikawina uh bel akikhah kei uh chih kamitsik in kamuthei hi. Kakipelh tak un kata kapuak in "papa..papa..." chi in ahong kikou khia a huaiki kawi a hongpaite lou apa hongpai anamu hidia gingta in kamailam ka en a kuamah kamukei hi.. "bawi,napa koi a om eita?" ka chi a pautheitung himahleh agentheih dan in den a kakituah pih nungak le tangval zumdan theiloute kawk in "papa...papa..." chi in vadelh ut in kum a sawm hi. Gingta keimahleng katapa in mukhial mawk dia gingta lou in " Ukhual" chi in kasam a hong kinung heimahleh ahondawng kei a a kiang a nu'n "nang hia honsap" a chih ging kaza a amah dawnna bel kazakei.. "Ukhual" kachi nawn a huaitak in "vapawt ua,inn ah kanapai ding" chih teng in a hon dawng a,akikawi dan uh akithuahdan uh kamit mahmah a mukahih man in kaheh petmah a gen dingtheilou zezen in kal lesuan ding ahihlam lengtheilou in kading tangmai hi. Kanau mah in "papa" chia asapkhiak in hon phawng guih a...

Vadelh a sual theih tawk a vasual ka ut mahmah a himahleh milak a vahuchih ding ka insung uh azah huaina beisipsip dia mihoihtak kanu le kapa zahhuaina tengbei ding ahihman in hihdingdan kathei kei hi. Hehluat ziak in kabiang ah khitui aluangzungzung a kadin namun ah kadingden a kanung a ka puak kanau lah a a kiang ut in akap a keilah hehlua in kakap hi. Ka pawtna ding a pawt theiding kahi nawnkei... Inn a kik ding inlah kanu len pan kakikziak uh ahon dot kialou ualeng kamaisuah a thil diklou om in ahonthei ngei2 ding ua..manoh nadinglam katheikei a kalungsim paisau mahmah in kanaw lam akikpaisuak bang ka ut hi.

Atawptawp in kisel theihtawp a kisel a ka teknu leh tekpa theisak louh teitei a aguk a ka Ukhual toh kihou ding chi in kakik hi. Ka nau in "nunu, papa koi a o a" Chi ahonkan a kahehluat ziak in "a zikiang ah" chihteng kia in kadawng hi. Inn katung kik ua kagin tak bang in ka teknu'n "Ching,vapawt lou umaw hong kik baih na uchia" ahon chi a dawnding dan kathei kei a amahlam ngalou in kakihei phei a kamit ah khamvual louh in khitui ahong luang a,kadawng theikei hi. "Chingbawi, (katek nun honduat sapna) bangchi e" ahon chi a kidek thei nawnlou in kakihei phei a kanu delh phei in angawng a kawi in kakah khum ek ek hi. Hon nakawi thuk in "bangthu a Ching" chi in kalu ahon zutsak hianhian a, nu...nu...nu...chihteng kia kagen thei a aban kagenthei kei..k kap khe ek ek a ka khitui in kateknu liang abuak jawt phial hi. Ka nu'n le gending theilou in ahonkawi naksemsem a hon thuakpih mahmah ahihdan kathei hi. Kapa (katekpa) ahon paiphei a "Ching,bang thu ahia?" chi in kakhut ban in ahon len a, genthei tuanlou in kanu kaletna khah in kapa kakawi pheinawn a kanu kakahkhum bangbang in ka kahkhum nawn a 'pa..pa..pa..' chih tengmah kagen khethei lei hi. Ka tekpa ang ah kabelh thinthen a aman leng honthuakpih mahmah in ahon nakawi thuk a huchi in sawtkuamtak ka om uhi. Atawp in tutna atu in haksa sa pipi in ka Ukhual toh nungak kamuhdan ka genthei khongkhong hi.

Kanu gendithei lou in a om heihuai zezen a keigen hikeileh a gingta keiding.. Kapa bel hehpetmah in aheh a innsungle hongsik nawn keiheh chi in ahang ek ek a huailou gending thei zawsam omlou in paulou in katu ua,numeite gel bel kapkhekei mahle ung kakhitui uh kanulnul uhi. Huchia gending theilou a ka omlai in ka phone a hong ging a ka et leh ka Ukhual ana hi a lak dingleh laklouh ding kasaikak sung in aging anabei man a,sawt kihal lou in ahong gingnawn a inn konglam a pawt in kavadawng hi. Ka hehpetmah a hamsiat ek ek ka ut a himahleh a honthugen te in kahehpihna ahon sulian a kahamsiat kei a nemtak lah nna sapetmah kahi chih kilangsak in kadawng hi. Ka Ukhual in "Ching,na ngaihdam na ngentak le kahikei, diklou kahi chih kakithei,keileng katup jiak ahon hichih kha kahikei,nahon ngaidam theihding leh kahong paidia nahon ngaihdam theihkei dingleh inn kahongpha nawnkei ding,inau hoihtak in honkem inla i innsung uh enkai a inu ipa enkol theiding in hon kem in aw.. Kei omlou inle inau nakem theilaw ding chih konthei a kahon muanglua.. Ka poimoh pen zaw nangleh inu ipa nahi uh... Ngaihdamtak kahikei na anangaihdam na kinem in kahon ngak ding..kahon itdan leh kon ngaihdan tuhun in hon genleng hon suhehtu lel kahih dingziak in kagen keiding.. I nu leh pa toh hon gen khawm unla,na hon hilh nawn kinem in ka phone off lou in kakoih ding.. Atawpna ding in,non ngaihdam theihkei leh tunung pek inle ka omdan itapa kiang ah gen ken aw" chi in a phone a koih a ka kap khe ek ek a innsung ah kalut nawn hi.

Ka Ukhual honthugen te ka nu leh kapa kiang ah kim sipsip in kagen a kapa'n bel "ngaidam louding innle hong sik nawn keiheh" chi in ahehmah mah a ka nubel gending theilou in a guk kahkah hi. Keileng ka kingaihtuah nak mahmah mai a kalung simkhat ah kahehluat ziak in ngaihdam ka ut kei a innsung kining chingtak a tapa khat etkoi ding haksatna omding in katheikei..pu muanhuaitak leh pi hoihtak toh etkol ding ahaksatna omdin kamukei a ngaihdam louhding ka ut hi. Alangkhat ah ka Ukhual ka it mahmah a amahlou a khosak ding anopna omding in katheikei a,kisik a ngaihdam hon ngen ngaihdam louthei in kakikoih keizel hi. A tawp in kanu'n "Chingbawi, na Ukhual katapa neihsun leh nang katanu neihsun uh nahi ua,ka hon itdan uh akibang ahi. Na Ukhual ka itnaziak ua ngaidam in kon chitheikei a.nang na ngaihdam zoh a hunluite ziak kamang ngilh zouding nachih leh ngaidam inla,ka mang ngilh theikei ding nachih leh kou it in ngai mahle ungle ngaidam ken,nang le na itna ziak leh na hehpihna ziak lel in ngaidam kenla,maban a kituahlouhna a zanglou a nidang hinkhua bang in ka ompih theiding nachih leh ngaidam inla nang mahmah in a om na apan vapi in" a hon chi a,kanu thugen dik kasa mahmah hi. Ka kingaihtuah nasapet mah mai a atawp in kapa kiang ah "pa, ka Ukhual,kisij mahmah ahi chih kathei a ngaidam keile ahinkhua aseden ding chih kathei a,kenle a omdan luite mangngilh teitei sawm in kapang dia noule a omdan thu akhonung in amah muhsoihna in neikei unla,ivek uapang in huchia om nawnlou ding in bawlthak isawm ding uh,kei non hehpihziak ua ka Ukhual nahehsan na uh beisak unla,kavapi maiding aw pa" ka chi a kapa amit a khitui luang kawm in "Ching, keisang a piching zaw in thu non gen a nang tanu a kon neihkhak kakipak lua" chi in ahon kawi a ka Ukhual kiang ah a om nadong in vapi ding in kakuan hi.

Ka Ukhual kiang kavatung a hon muhleh akipahziak in kidek zoulou in kisiamtan hetlou in amohna a hon gen hi. Ka Ukhual in

"Ching,nangtoh ikimuhna fb a hi a kon itluat ziak in fb hoih kasapetmah hi. Hucia i ki chat khawng nop mahmah ahihman in chimthoi nading in mikava chat khazel a,lungsimsia neipah keimah leng tuanu toh kaki chat uapan ahoihlou lam awl a hon ngaihtuah in atawp in 'khatvei bek' chih in kalungsim ahonluah a kanget leh aman leng a utlam ahih ahonhilh ziak a khatvei kipetuah sawm mah a nakuan kahi uh, omdan hoihlou a om a angkon kawmsan ding phallou a pathian in hontuak ding a nang honsawl ahi.. Hongpai lou hile chin khial ding ung a khat vei aleng hitheilou ding a gentheitak a omding hihang a..." chi in kap kawmkawm in ngaihdam hon ngen thakthak hi. Inn katun un kapa'n Bible sim in kikhopna leh kithuhilhna hon nei a huah a athugen kamang ngilhtheih louh tuh..

" Khualpu, tapa khat kon neihsun nahi a,kon it petmah uhi. Nangleng tapa thumang leh hoih nahong hi a kipak in nanutoh pathian kiang ah kipahthu kagen gige uhi.Huchihlai in nangtung tawn in tanu mel hoihtak leh feltak Chingou pathian in ahonpia a,hampha kakisa ua nanutoh lupnatung ah kougek hamphatna ahihdan kakikum khial ngeikei uhi.Huaikal ah tapa melhoihtak pathian in ahonpe nawn a kakipahna uh genzoh vual ahikei, huchia sile ungle lungkimtak a sidia kakikoih lai un hiaibang thusia hong om mai na isavek ua,puak hak isa uhi. Himahleh Chingnou lungsim pichin ziak leh nakhelhna nakisik naziak in nidangdan a innsung nuam hinkhua zangthei nawnding a i om man in kakipak mahmah uhi. Hunpaisa te mang ngilh teitei isawm ding ua,hih khial pen Khualpu kousang in nahihkhelhna nathdizaw dia huaitai san in konchithei keiding uh,nang taihsat dia hoihte hontaisan in,innsung nopna dia amohpaw pen nang nahi, kahìh khial lua chi in kimoh sakna in nahun zangsawt ken,na nu toh kou konthumpih zoh louhziak uh ahi" chi in kuamah hon mawhsalou a amau hon kimohsak na in ka Ukhual lungsim khoih mahmah ahi ding a..

Ahong dingtou a " pa, aw nou ziak a hichi kahikei,kei om mohziak leh nahon muan na uh zangkhial kha kahi. Nahon ngaidam ua kakipak petmah,adiak in Chingnou in amit mahmag a hon mu a hon ngaihdam theih lamdang kasa a thupi kasa.. Hahon ngaihdam uh kinemlou a siatna khukpi a lut didan ngaihtuah a ka omlai a non ngaihdam un kam anonthuhilh sang un kahinkhua ahon bawl hoihzaw..." chin hon gen a..kipahziak in ka innsung uah kitui a tak tam mahmah hi.Huchi in ka innsung uh kingaihnatna thak in a zelsuak a kalung sim in kaki itna uh tok halhna ding a pathian in vaihon hawmsak ahihdan katheithak a pathian vaihawm asia omhet lou eive ka chi hi...!!!!!!