Sorry! Manipur Express..!!
Written By: K Lianthansang
Ommoh’ lam ah ‘Zawng (Monkey)’ ka phalah tuankei. Kingang lam chi leng lah, ‘Physics’ natawm in a lu (head) hon peikhum khitsa ka hizel. Kiselna leh Kinialna (Argument) lam ah leng, ‘Ukil (Lawyer)’ te ka phalah tuankei ding. Mi’ thilhih peuh soisel kichi, ka nagum septheihpen ahi mai di eee(?). Mi’n, “ mi selsel, seel-pawng..” hon chih chiang ua, “ nang seel-thep(pawng lou) ” chi’a, seelkikna ding zong teitei-te pawl ka hi, k’on kichi masa zozen di. Athumapi chihdan pian in…….!
Simbeng upat sim kingkeng mahleng, kam-hat lam nanana in chuh lauh ka neikei. Khenkhat in, “ na kam omkei leh Vasa in hon tuahta in teh..” hon chih gige uh leng ka hibok. School leh College ka kailai in, ‘Debate Competition’ khawng ah ka pang sek a; lawman lam ahihleh, kei a dia sehsa toh kibang himai. Kei’ lu (head) hizenpi; “ hiai lu pen kei’ lu ahi himhim kei “ chi’a pang a, vualzohna langei pa ka hi. Athu a, mahni lu natawm genbeizou hilhial dia chitna neipa ka na hiphiangsan hi.
Teacher-te’ genkhelh bang ka zathei viau a, thei leng ka theiden sek. Ahoih agenkhiat-te uh bel, ngaihsak in leng ka nei tuankei. Mimak tak khat chu keive. Lai ka sim lelah, adiklouhna di zonna lel in ka na zang thepthup zel. Bible bel, sui kichianman lou in, ka ‘Marathon Reading’ suk ziahziah mai a, sau ka simzoh khop leh lungkim ka hazel mai. Lehkha sim ka lunglut lam ahi a; soiselna di zonkhiat pen ka ‘goal’ ahi gige hi.
K’ong piching deuhdeuh a, ‘Printed Newspaper’ sim khawng leng k’on panta hi. Niteng in a diklouhna ding ka mukhe gige. Laigelhdan, spelling leh adangdang tampi, adiklouhna di omte ka pawna thei mahmah. Paite Bible ka sim chiang in leng, laimalzatdan kichiantak zuilou hi un ka thei (J leh Z zatna ah). Ahihhang in, ka soisel ngamkei. Ka soisel ngam omsun ahihleh, Newspaper-te’ hihkhelh neuhneuhte ahi mai. Huai kawmkawm in, Social Media khenkhat ( facebook, WhatsApp ) chihte leng, k’on khoihthei panpanta hi.
Miteng’ muhtheih di’n, “ kivaakna dia azat uh ahihngal leh, News saite’n leng hoihtak in hon sai le uh himai di….!. Pilvanglou law mahmah uh ahi. Niteng a adiklou omzou gige tel..” chi khawnga genzel k’on panta. News bawlte’ pilvanna ding deihna in, minautang’ lak ah ‘campaign’ ka bawlzel a, phatuam tuanlou abang. Atawp in, pilvanglou ka sakna ziak phet hilou; ahihkhelhte uh alim (photo) mahmah a la in, ka thehzak sek a, ka lungkim thei mahmah.
Hunte hongpai zel in, ‘Zi leh Ta’ bang k’on neisam hi. Innsung etkai a, zi-le-tate’ neek ding suktuah chuh alou theilou ahita. Nasem a ka kuankhiat ziak in, ka tate ka enkol mankei. Huaiziak in, ka zi’ tung ah mohpuakna ka ngakhia hi. Sumzong a nasep kichi anuam liai ahikei. Nisanuai hi’n Ceiling nuai hitaleh, tha leh lungsim zatna ngenngen ahihman in, agimhuailou tuam a omkei. Huaikia hileh phave. Ka tate honglian hiaihiai ua, mi khenkhat toh a kisual hun uh leng a omtham. Achang a, mi adia thilpoi a vahihkhak hun uh leng a om veve. Ka ‘goumanpha’ hi ua, ka tate ka etkai zohlouh mawk…..thilmak mahmah ahi. Goumanpha sanga manphazaw dan a ka theih, sumzonna ahihziak ahi diam, ka theikei.
Huchibang vingveng kal ah; inkal kitawi zen in gari ka leikhe dom hi. Gari ka neih hang in, aheksiamlua ka hikei. Huaiziak mah in, mi khawng ka va nawkkha cheuhcheuh zel hi. Gari a mi phutkhak kichi, thilnuam ahi hetkei. Kei utziak a ka phut leng ahikei a, pilvanlouh ziak ahi. Pilvan zaw ka tup gige himah ve aw, kiginlouh laitak in mi I va sukha sek chihman thu. Athudan himhim in, kei pilvang mahleng, midangte apilvan tuankei u’leh kisukkhak theih veve hi.
Hunte hongpai zel in, ‘Vengsung News’ bawl k’on pan uhi ( ka lawmte toh). Kei’ makaihna nuai ahi a, Pathianni teng a suak dia ka geel uh leng ahi. Kar khat a khatvei kia suak di ahihman in, ni 5 sanga tamzaw hun ka nei gige uh. Apek(page) lianlua a lah kisuah zoulou ahihman in, pek neuchik in ka hih ua, thu (news item) tam angai kei. Copy lah tawmchik ahihman in, a ‘print’ lam ngial ‘tuibuk muamtam sung’ lel khawng in ka zou ziahziah uhi.
Ihmut suak pipi a, news ka bawl hun uh a omkei. Ni 5 sung in, ‘aak maichia phet’ a lian hudim zou di thu ka kaikhawm zou mahmah uh. Ka thazoh mahmah ua, ‘proof reading’ lam leng ka hoihbawl mahmah uhi. Himahleh, k’on suahkhiat taktak chiang un, a soisel di tamkhop ka ngah veve ua, lamdang ka sa. Laigelhdan zuilua hidan a ka kikoih lai un, ka zuihkhelh uh leng ana om veve a, spelling lam leng adiklou a omlou tuankei ( a diklou omlua). Lungsim kinoh taka ka gelh uh leng hilou, zaan nung a ka gelh uh leng hituanlou napi, adiklou a om veve chuh…thillamdang tak ahi.
Ka kingaihtuah dedu zozen a, kamtam sim himahleng huaihun chiang in ka kam a kikak zoukei. Niteng a News bawl a kivaak-te ka mohsakdan khawng ka ngaihtuah kik chiang in, ka zum tuntun maimah hi. Nidang in, “ kivaakna dia azat uh ahihngal leh, News saite’n leng hoihtak in hon sai le uh himai di….!. Pilvanglou law mahmah uh ahi. Niteng a adiklou omzou gige tel..” chih kampau khawng ana zang mahleng, kei tung hong tuk chiang in, gen di kamkhat lel leng ka theikei. Ka goumanpha-te ( tate) natawm enkai manlou pa’n, mi’ kivaakna ka soisel gige pen thildik ahikei. Soisel ka chihna a, amau’ kianga soisel hileng phave. Mipi vantang’ muhdia ka soisel khawng ka kisiik tuntun hi.
Facebook ‘face’ gige telawi ka hihman in, ‘Group’ leng ka bawl hi. Huai ah Admin ( Group enkaitu – eh! Editor chimai ni) in leng ka pang ngal hi. Mi tuamtuam omkhawm ka hihna uah, midangte’ adia zakthadah huai ding hong ki-post kha leng a omtham. Nikhat, Nam vai hong ki-post a, internet pack omlouh ziaka ka online louh laitak ahihman in, saupi ana kitun uhi. Ka online nawntak in, “ Group Admin hingal a, Group enkai zoulou. Group bawltaak leng hikei teh. Hoihna sanga siatna lam deihzaw na hi hia?” chih khawng, ana ki-post seuhsouh hi.
Ka ngaihtuahna ah, ‘ Internet pack kinei gige zoulou ahihlam thei himaizen le uh, hichia…miteng’ muh a hon chilou d’uh zaw hiven maw. Hon deihsak ahih u’leh, personal in hon message mai le uh zaw…Office nei zen a Group bawl kihilou ahihna ah, kei kiang ah ‘direct’ in hon gen mai le uh zaw…’ chih khawng ka ngaihtuah doudou hi. Huai kawmkawm in, niteng a news bawlte’n leng taksa hatlouh hun ( internet pack ka neihlouh dandan a) anei hun uh a omtham ding. Huaihun chiang in a news bawlna lam uh leng sukha ban mahmah ding in ka gingta. Hihkhelh aneih chiang ua, amau’ kianga gen mailou a, miteng’ muh dia ka taklat gige khawng ka kizephawk mahmah a, hihkhial leng ka kisa. Office nei ahihna uah, Office a ka awlmoh thu ka vagen zel tuh, thil kilawm leh ahidi him ahihdan leng ka theikhe sawnsawn hi.
Kei utziak hilou a, gari a mi ka sukkhak bang in; News bawlte’n leng ahihkhelh neuhneuhte uh, a utziak uh ahih ka gingta kei. Pilvang tawpkhawk ka kichih hun a bawn hihkhial tel ka hihman in, ka mit akeuh panpanta hi. Koulawi in, Kar khat a khatvei suak di buaipih a, diktak a leng suahkhe theilou tel ka hi uhi. Huaiziak in, zaansawt nunga a hulou-halou a News bawlte’n a hihkhelh zenzen u’leh leng lamdang hilou ahihdan ka musuah sawnsawn . Ka tate’n, thilsual ahihhun chiang un, kuahiam in kholai ah hon deihsakna thu tangkoupih leh, bang ka chiphet diam aw? Deihsakna dan in ka sangthei taktak diam? Ka dawnna tuh; “ Sangthei zenzen lou e, hon deihsak u’leh inn neisam hiveng, huai ah hon gen kei d’ua ” chih tuh ka dawnna ahi ta ding.
Pilvan mahmah hun a leng hihkhelh kichi omthei tham ahihdan ka muchianta. Ka tate apan, ka gari apan, ka facebook group apan leh vengsung news ka bawl apan in ‘ka mit a keuhta’. Paunak in, “ Khedap sunga ling(thorn) om, abuntu lou in theilou..” ana chih mahbang in, thilpaidan theilou pi a thilteng ka pawng soisel in omzia a neikei chih, ka theita. Huaikia hilou in, mi I deihsak leh….kisumualphou mailou in, deihsakna toh mimal mahmah in kihilh zel leng chih, ka deih mahmah nawn. Kisukmualphou zaw, mualphoutak a omte a di’n kibawlhoihna ahikei a, ‘zumna’ lel ahi zaw, chih leng ka muchianta.
Huaiziak in, niteng simthu (daily Newspaper); adiak a ‘Manipur Express’ deihsak kisa selua a, ka sukmualphou munluat ziak in, ka kisuanglah mahmah a, “ Sorry! Manipur Express..!!” chilou thei ka hikei. Ban-ah, a News mahmah leng botkek a, “ Breaking News “ chia’a, nuihchiam lelna dia ka zatkhat tungtang ah leng, a Newspaper’ mahmah kiang ah, “ Sorry! Manipur Express..!!” chi’n, thupha tawi in, ngaihdam ka ngen hi. Lawmte aw..kei’ bawlbang in, News hon bawlgenthei nawnkei un la’n, tuadan a ngaihdam ngenlou hamham di’n hong khosak sawm un. Huchi hileh, News mahmah leng hong hoihtuan huaihuai diing hi.
Laigelhtu’ Lungsung Pan:
Kuamah ahoih bukim ki-omlou ahi. Mi deihsak ineih leh, SUMUALPHOU mailou in, VEINA tak toh I DEIHSAKDAN sulang zaw ni. Hiai k’on gelhna pen, mimal kawktuam nei a gelh ahikei. Himahleh, ana kizephawk geuguau I om u’leh bel, mahni kipiak dandan chimai ni.
2708 – Ka Kipak – 2015