Nu, Bangziak A Hon Taisan Tel E ?
(Based On True Story)
Written By: K Lianthansang

College kai sunzom nuam ka hihman in, sum-le-pai zonlouh theih ahikei. Sum zonglou in om maimai leng lah; College kai chih khawng kei a dia, Meitei pau in gen leng 'Upai Lei-tereeee' himai. Huaiziakin, Pawl sawm leh nih ( Class – XII ) ka ekzam zohphet in; Vengnuam South ( New Lamka) ah 'cement leh leingoi' tokpolh telawi (Jugali) in ka va kiloh hi. Ka theihkhelh keileh, ka na sepna mun kong a lampi kikhamsuk zenzon pen – " Goukhenpau' Lampi (Goukhenpau Road)" hidan in ka thei.

Ka na sepnate toh kinailua hikei mahle ung, inteknu pen Khuptong' Tanu ahih ziakin; Ni (Aunt) chi'n ka sam a, intekpa pen Gang (Uncle) ka chi hi (kei Khuptongte). Genchiang vanglak ni. Ka na sepna te'n, tu'n Bus khat ( FOUR SISTERS ) anei ua, Lamka leh Singngat kal kawmtuah in tai gige uhi. Ka khosakna uh bangkim hon theihpihsa uh ahihman in, hon hehpih mahmah ua, amau' hon deihsakna leh hehpihna zar a, ka laisimna maban sunzomthei hidan in leng ka kikoih top. Amau' hehpihna khazaak nuai ah nasep ding mulou himaizen leng, ka maban di ka theibun kei..!
Huai hunlai aa ka nitha (wages) ahihleh, Vaidangka.150 tak ahi. Cement bag khuina khau phelkhiat chihkhawng, huai hun a ka hihtheih pat ahi. Ka nitha hoihtak in ka khol zel a, nasem a kuantuahzel na di'n ' Secondhand Cycle' khat ka leikhe dom hi. Hoihlua hikei mahleh, pheiphung khailou a tuanglam zot(zawt) asiam veve ziakin, hon thadawn tuan ka sa mahmah. Nasem a ka kuan nawnlouh hun ( College ka kainawn hun) chianga leng, sumzonna a pangkai thei diing chi'a ka lei leng ahi bok hi.

Kha 2 phadek ka sep nung in, ka Ekzam lizar (exam result) uh hongsuak petmah hi. Ka Result uh asuah hun in leng, ka nasepna ah ka om a, lawmte'n 'SMS' tungtawn in hon hilh uhi. Ka Gang ( intekpa ) in, " Na Pate' toh omkhawmlou na hihman in, amau ma in ke'n na passed k'on lopsak masa di. Zingchiang Kiginni ahih toh, nasep I khawlbaih deuh di ua, nasem teng toh ann nekhawm zaizai le'ng himai lou maw Sang?" hon chi hi. Kisuanlah huai mahleh, ka nu-le-pa toh omkhawmlou ka hihman un, lemsakpihna lu (head) susuk ngaungau kawm in, ka kam mahmah in leng ka 'pompihna aw' ka suah ngal hi.

Atom lamlam in gen ni. Tulai in Solkal' College-te hoih in luun mahle uh; huailai a nungak-tangval' kiheelna toh a kilamdanlouh ziakin, Rayburn College ah 'Bachelor of Arts' zil di'n Admission ka va bawl hi. Private College ahihziak mah in, sum leng tawmliai abei kei. Ka lohsuahsa in daihlou ahihman in, ka Pa' kiang ah ka gen a, ama'n leng ka uital deihthoh mahmah uh zuak in, sum hon khak chenchen hi. Ka sungkuan dangte ahihleh, Zoudawn lam a lou nasem a om ahi ua, kei kia Lamka mun a laizil a om hidan ka hi.

Suun a College kai ngai ahihman in, ka suun nasepna pen ka khawlsan hi. 'Admission Fee' pezou mahleng, 'Tuition Fee' pelou a kaikai theih ahikei zel. Ka lung abuai mahmah mai a, Pathian' kiang ah thuumna khawng ka nei zelzel hi. Nikhat, kua' theihsakna adiam chih zaw ka theikei, College kai ka paiphet in innlam ka zuan kei a, Tedim Road dung ka zuisuk nilouh hi. Hohna di kichian nei hi awmtak in ka paisuk zomzel a, SBI Bank(CCPur) kong tan ka tungsuk mawk hi.

Beidong sim mahmah chu ka hipeuhmah dia; SBI kong a lampi paitou (Mission Road suntou) pen zui in, 'Lamka Net' kichi omna (huailai a a-omna) kong ah ka va tukha mawk a, ahai mah ka bang. Huchia bangtan hiam ka tutnung in, ka ngaihtuahna hong vaak kuau hileh kilawm in ka thei. Ka omna tung lak, 'The Lamka Post' Office ahihdan ka ngaihtuah khekha guih a, News hawm di'a va kinget didan ka ngaihtuah ngal hi.

Office a ka va paitak in, News hawmte khat leng ana om a, News fee ana submit hi. Laizilna maban sunzom dia, mundang a zinkhenuam ahihdan ana genkawm dan ahi a, kei va kinget toh kituak khachet zomah in, hampha ka kisa mahmah. Min, Omna, Nu-le-pa min, piankum chihte khawng hoihtak a gen in, a ninawn apan atawp sawmpen zui dia ki thukim in leh, phone number khawng kipia in ka kikhen uhi.

Zingkal dak 2:30 – 3: 00 khawng a thoukhia in, mialnuai ah ka 'Secondhand Cycle' deihthoh takmai toh Office lam ka zuan vengveng hi. Ka khekkhiat dek pa'n, ama' hawmkhakna area a news kipiakna inn te hoihtak in hon hilh a, amin u'toh leng hon genzel hi. Khawmiallai ahihman in, theih kokalh abaihlam mahmah. Himahleh, ni 4 hiam ka kizuih nung un, ka theihoih mahmah mai a, kei kia in ka hawmtheita hi.

News hawm ahihleh, phalbilai leh tuuktui luanlai in ahaksa diak. Vuahzuk ziakin hawmhak zel le'ng lah, I piak nanung lamte ana phun man uh. Phalbilai ngial, thohkhiat di alithuai ngoihngoih hun atam mahmah. Mibang a kituamlumna di neihoih I hihlouh zawkmah toh, kitui-ek phialphial abang hial. Himahleh, sum-le-pai muhna kichi ahaksalou omlou ahihman in, ei-le-ei kihanthawn zel angaih hun tam mahmah hi. Thoupeihlou, Khangma chihte lawi khawng, News hawmte adi'n 'Kilometer 999' pawlam pek ah koih angai gige sim hi.

News hawm kia hileh phave. Ahaksa diak khat a omlai. News fee dong kichi thil haksa mahmahte lak a khat ana hinawn a, hun tam leng neih angai. Mi khenkhat te'n ahaksatdan theiphalou in, a ut-le-dah teng uh honna siatkhum sek uhi. Fee I donbaih luat leh, " Loh lanailou.." chi atam mahmah ua; I donhak deuh leh, " n'ong paihak lua a, ka na zangbei man uh.." chi di khop leng abeikei. Loh neiloute' mah in pethei baihzaw sek dan un ka thei. Huailai a News fee, Rs. 100 lel ahi a, ahawmte'n 20% a kiloh hamham. Inn khat-le-nih kia dong akihihlouh man in, hun haulou-te' adi'n abuaihuai ton atam. Khenkhat in bel, news fee di chi'n ana koihkhe thiintheen ua, I vapai chiang in honna pepah chetchet uhi. Kampau kha velvul honna zatkhumleng abaikei a; kamsiam mahmah leng abei tuankei. Ka hawmna area a teng' mizai tuni tanpha in ka theikim lai.

Nitaklam khat, College kai paiphet ka kikheng ngal a, News fee dong di'n ka pawtkhia hi. Bangtan hiam ka donkhit in vuah hongzu a, ka News piakkhakna-te' inn khat ah ka tailut ngal hi. Verandah ah piteek leh puteek ana om ua, innsung ah inteknu'n ann ana huanta hi. Ke'n leng, News fee ka kan leh, " n'ong pai hunhun a honna piak di chi'a ka koihkhiat tuam zozen ahi. Kizen e, inn ka omlaitak in n'ong paikha a, vuah zukei leh ka Dawr lam uh vaphak di ka chih hi a..." chi'a hon dawng in, a mehbel siin gaih a, ka kianglam ah hongpai hi.

Ka sam khawng kawtsim nengnung ahihman in, kinuulna ding 'towel' hon piakkawm in, 'common room' ah ka tu uhi. Akiang ah, " nou inn chuh, news fee don-nuam mahmah eive....khatvei phak a honna pepah chetchet chin ua.." ka chih leh, " news fee dong ahaksatdan ka neulai a, kei mahmah in ka na theihsa ahihziak a, kingengkhaisak sese lou a hon piakpah ka sawm gige ahi.." chi'n hon dawngkik hi. Hon dawnna ka gingta kei, aziak ahihleh....inn hoihtak sung a teeng a, News hawm maimai khawng ana hihkha di'n ka gingta thei himhim kei. Numei ahi zomah a, mi theisiam himhim hidi'n ka koih a, news hial bel hawmkha di'n ka gingta kei.

Atawp in, akiang ah, " nang leng News ana hawmkha ngei sam na hi maw....?" Ka chihleh, " tu'n, hichibang innsuang ah teeng mahle ung, nidanglai a ana zawng petmah ka hi uh..." chi'n hon dawng hi. Lamdang sakawmtak in, " Pasal hausa leh hoihpi khat neikha dan neive maw leh....tua na pasal mundang a om hia? Ta neilou u'maw? " ka chih dondon leh, hong kingaihtuah dedu zozen hi. Thil dongsau lawkha ka dia aw...chihkhawng ka ngaihtuah vungvung a, aguuk in ka ki-iip tentun hi.

Sawtlou nungin, " Hiai pen ka pasalte inn hilou in, kou inn mah ahi. Verandah a tu tegel – ka pianna nu leh pa ahi uh. K'on hilhchian vanglak di aw. Kou unau numei hon ngen ka hi ua, ka neulai un haksatak in ka na khosa uh. Ka nu'n, New bazaar ah meh khawng azuak zel a, ka pa ahihleh 'Cement Mistry' ahi. Haksa pipi in, ka nu leh pa'n School honna kaisak ua, Class – X nuai ka omkei uh. Ke'n leng, B.Com Certificate meel ana mungeisam kei ve..hehe.." hon chi masa zozen hi.

Laizial hon pan zual a, " Nungak ka hihlai in, mi te'n – omdan hoih, lai siamthei, nungak fel leh gin-om hidan a hontheih uh ka hi. Huailai mah in, News leng ka na hawmkha. Class – XII ka zoh in, State dang ah B.Com ka va sin a, huaihun in tangval leng ka nei bok. Himahleh, ka tangvalpa leng State dang a kai ahihman in, ka kimukha vaang mahmah uh. Kumtawp, innlam ka pai chiang ua ka kimuhkhak uh ahimai di e..(?). Ka kithuzaklouh hun un leng, gin-om takin ka om ua, nupa bangmai in bel ka omkhawmkha ngeikei himhim uh.

Ka laizillna te uh zou in, Lamka lam ah ka omkhawm tuak ua, anuam ngei mai. Kum 7 vingveng ka kingaih nung un, khennawnlou dia tongchiam in, sihtanpha a di'n mawngbang ka kikawita uhi. Ka kiteen hun un, ka pianna pa a omkei. Amah ahihleh, Aizawl lam ah inn bawl in ava omden hi. Ka pasalte ahihleh, mihausa mahmah ahi ua, School leng anei uh. 'Arrange marriage' hilou in, True love a kiteeng ka hih mahbang un, ka nu leh pate tuak un hon deihsak kei tuaktuak uhi. Ka pasal ahihleh; ka first love leng ahi a, ka first 'sex leh kiss' leng ahi bok.

Ka pasalte, unau tam mahmah ahi ua, a upa' tate khawng in hon ngaina mahmah uhi. Innsung ah – annhuan, huanbawl, naupangte lehkha hilh chihte khawng ka nasep pipen ahi phot. Ka kiteen tuung un zaw nuam mah e. Himahleh, kha 3 khawng paipan phet in, ka pasal in Zu dawn hon pibawl mahmah mai a, nungak hel diakdiak bang, ka kingaihlai sang un a kuhkal zawtham. Zaannung khawng in inn ah hongpai zel a, innsung honglut naak leh chu..hon phil hipah mai. Ka pasal in huchia honbawl chiang in, a innkuan dangte'n leng hon simmoh deuhdeuh uhi.

School nei ahihman un, a School uah hon semsak ua, loh bel ka mukei. Sum-le-pai muhna dang neilou ka hihman in, ka poimoh neuhneuh tuamte leina di'n sum nget angai zel hi. Sum honpiak di bang uh, thasial ngoihngoih abat hun uh atam mahmah mai a, kisuanlahhuai vungvung hi. Inntung kikop a teeng himahle ung, pindan tuam a teeng ka hihman un, ka pasal' 'boxing ring' abubit khopmai. Asiamlou ngen toh, zaannung a kisukha(kibeikha) gige ahihman in, zohlouh ni anei ngeikei. Nungak heel a awlmohluatna lam a, zaannung ngen a 'play' tangkha ahihman in, kua ma'n 'live' in en ngeilou ua, athuaktu pen hehpihna dan thei kuamah a omkei uh.

Achang in, ni 4 leh 5 bang hongpailouh hun a om zelzel hi. Ka beidotluat chiangin, zuzuakna inn teng ka va banzon a, achang in zu inn ah nungakdang toh ana omkhawm zel uhi. Akiang khawng ah ka va ngak ngiitngeet zel a, zu zuaknu' hehpihna bang ka tanloh hial. Zu zuaknu'n kuhkal honsak dan khawng honna gen siausiau zel a, ka pasal paisan di peuh a honna nget hun leng a om. Himahleh, deih a chibang ka teel sa, sihtanpha a dinga tong ka chiampihsa chi'n, paisan ding simthu ka geel ngeikei himhim.

Nitaak khat, zu khamsa in hongpai a, pai di'n hon sawl ngal hi. Vau a hon vau maimah ahihman in, ka paita hi. Ka pai in leng, ka pianna pa inn ah a omkei. Kua ma'n hon sam sese kei ua, ka pa'n athu agaal zaak takin aheh mahmah mai a, hihtheih dang anei tuankei. Kuama'n lah hon samlou ahihman un, kei leng lungnuamtak a om ka kizil hi. Ka vengte un leng ka haksatna tuah honna theihpih mahmah ua, hon theisiam vek mai uh.

Ka unau ua School leh College ka na kaina uh Principal pa'n leng ka thu ana zakha in, amau' School a sem di'n hon sam hi. Ke'n leng ka va sem ngal a, smart taktak in ka kichei gige hi. Gen uang deuh leng, ka pasal in hon etlah di dandan khawng in ka kichei a, tulai pau in gen leng, hon 'chaaaaakk' leng tamkhop om unteh. Ka pasal in leng, honna mukha zelzel ahi ngei dia, hon deihkik ahihdan hon genzel hi.

Kum 7 hilhial ka kingaihpih phet hilou, ka first love leng ahihzawkmah ziakin, ka itna abei tuankei. Ka sungte toh kilemna (agreement) khat hong bawl di'n ka ngen hi. Huai kilemna suai ka kaih ni un, ka sungte'n; ama a, gentheitak a ka-om banga hon omsak nawn ngeingei u'leh, 1 lakh aliau uh ngai di ahihdan tanpha uh agenkhum ua, ka pasal in leng lem asa hi. Huai ni mah in ka paikik a, sawtlou nung in nau leng ka paai zuingal.

Nitaak khat, zu khamsa in inn hongtung nawn leuleu a, hong kitom ngal hi. Ka Almirah sung ua, ka 'Certificate' om tengteng lakhia in, hon bohkeksak tamai hi. Huai nitak chiah in zaw, etna di leng ka theikei a, ka hah-kah ngial aka. School dang a ka vasep pen hon hehsan ziaka, koimah a ka septheih nawnlouhna ding tup a nei a, hichia hon bawl chu ahi peuhmah a, haih leng ka haihkei. A sanggam dangte'n lah, ka pasal' mohna tengteng..kei hon ngoh ua, thuaksiam ahak ngei.

Bangtan hiam nungin, Tanu melhoihtak khat k'on neilkhe samta hi. ka kipak mahmah a, ka kinepna omsun tuh ka tanu ahimai. Ka tanu' ziakin, sihtanpha a om di'n hanchiamna ka nei thakthak hi. Ka pianpih sanggamte natawm ka inn uah hong hoh ngamkei ua, amaute ka ngaihluat ziak a ka kahkhak ni atam. Nauneihna a kiliam zek sam ahihman in, naupuan sawp a gamtat chihkhawng ahaksa ngei (nupite'n athei hoih diak d'uh). Midang omtuanlou ahihman in, khukdinsa khawng a naupuan ka sawp hun leng abei tuankei. Ka pasal in lah, nawizu tamna di leng hon ngaihtuah sakkei a, ann huan natawn hon huh kei. Achang a chini tui vuak ka dawn hun leng atam mahmah hi.

Nikhat ni chiangin hong kikhek na'n teh, chi'n kinepna leh lam-etna lianpi ka nei lailai hi. Ka Tanu kum 3 khawng hongphak tak in, ka sanggamnu' tate numei khat ka ompih uhi. Nikhat, mehlei a ka pawtkhiat kar in, ka pasal inn ana pai a, ka ompihnu uh ana sawkgawp hi. Asiangsiang in genmai leng. Innsung ka luttak in, ka pasal in ana pummat a, anawi ana meksak zialzial hi. Huai ka muh in, ka lungtang in athuakzou mahmah kei. Ka kikhou khum a, ka hansan zialzial hi. Ka sanggamnu' tanu ka ompihpen uh leng, innlam ah ka paisak ngal mai hi. Huainung in, kholak ka pawtkhiat di leng honkham thepthup a, khotang a ka kihel ding leng hon phalkei. Kei lah; Siamsinna lam leh phattuamngaihna lamte khawng ka lunglutna lam ahihziakin, ka lawmte'n paisan di peuh in hon thuhilh zel uhi.

Ka gensa mahbang in, inntung kikop himahle ung, room tuam ah 'boxing ring' ring a om a, huai ring sung ah kou innkuan ka omtuam uh. Naupa himahleh, teekpi-teekpute ka enkol khawm a, sil angaih hun un leng ka sil zelzel hi. Amau leng hon ngaina ua, kamsiam taktak in hon houpih uh. Himahleh ka pasal leh asanggam te'n hon bawldan uh lamdang ka sa. Ka pasal' upa'n, ' na pasal in zu aduh leh na dawnpih zel di. Pasal hoihlou ichih khawng, zite ziak ahi. Nungak ahellouh di na deihleh, alungkimna banga om nasawm gige di..' chi khawng peuh in hon thuhilh zel a, himahleh zu kichi himhim chiam leng ka chiam nuamkei.
Hunte hongpai zel in, ka tanu hong lian deuhta a, pil leng hongpil mahmah hi. Ahihhang in, a pa'n hailam man-oh deuhdeuh abang maimah. Ka pasal nitaak a hongpai chiangin, nupi khenkhat hon tonpih zel a, kongpua ah kei hon giaksak zel hi. Thou thak toh, khua amial toh, mi hontheih di I lauhgukna toh ahaksa ngei mai. Huai nupite bel, a nungaknu toh kal a care-of(c/o) dia a zatte hididan ahi. Zaannung khawng in ka tanu in kong hon hong guzel a, innbaang khawng a kingaikawm a ka ihmut hun leng atawm liai kei.

Bazar khawng ka vaak chiangin, nungakte khawng toh a tutkhawmlai uh ka tuakkha zel a, a nungak tutpih tekhawng in hon nuihsan velvul zel ua, azumhuai theihdan. Huchi pi'n, nau k'on paai nawn leuleu hi. Sihtanpha a dia pang ka hihtaak man in, ka tung a hongtung khempeuh ka thuak zomzel hi. Kha 9 vingveng nau ka paai nung in, tapa ka neikhia hi. Himahleh, ka pasal in hon donsak kei. Naungek vuak toh om himahle ung, inn ah leng hong giak ngeikei a, achang in hon zinmangsan zialzial sek hi. Akhen chianga lah; 'Boarding ah School naupangte ka giahpih' chi peuh in hon gen thepthup zel hi.

Nikhat, ka tapa hong damkei a, kei leng beidong kisa in ka pasal' kiang ah ka gen hi. 'Damlou ahihleh, damdoi lei in la'n, na ta ki-etkol ve, ke'n sum nei di hon sa tuan maw' chi khawng peuh in hon dawngzel a, lamdang ka sa. Kei honhuat leh deihlouh ziaka, a ithuai naupang neute'n athuakloh ding uh ka phal mahmah kei. Kei ziaka, ka tapa etkollouh a om a, asihloh maimah sangin paisan leng a pa'n hoihtak in a enkol zaw dia, nuam asa zawtham ding, chih ka ngaihtuah ziakin, kap ngoihngoih kawm in ka tapa nawiteplai ka paisanta hi. Ka pa leng inn hongtung a, aheh mahmah mai. Lah mizawng leh gentheih ka hihziak un, kou thugente 'vailak zunthak' abang maimah.

Nuthawi hinkhua k'on zangtou a, ka tate kia ka lungsim ah a-om uh. Amau kiakia ka ngaihtuah zel a, ka hailoh dekdek hi. Achang a kithah ka sawm hun leng atam mahmah. Huaikia hilou, pasal toh zu leh sa a kibual a ut-le-dah a omsiat abaihlam mahmah hi. Huaihun in, khatvei zu ka dawnkha a, laizial leng huaihun a ka tep, tutan a khawlthei nawnlou ka hi ( alaizial tepkawm lai). Kingaihsiat ziak a hinkhua bangmahlou suahtheih luat ahihdan huailai in ka theihoih mahmah a, tulai a numei khenkhat bazaar kawm peuh a kimute leng, kei tuahbang tuak a huaitan tung tampi a om ngei ding uh.

Ka nu leh pa'n, zalenna hoihtak honna piak ziak ua tua hiaitan tungthei ka hi, ka chi hi. Eklijiasti 11: 09 na a kigente ka paipih gige hi. Siattheihna khovel ah ding mahleng, nungchiang a Thukhenna ma a pi a om a, vaihawmkhum a om di ka hihdan ka theihhoih luat ziakin, ka zalenna zatsual di ka utkei. Ka lawm-le-vualte pawl in ka vaakkhe zel a, achang in a inn khawng uah ka va giak zel. I haksatnate, lawm-le-vualte kianga I genkhiat leh athuak anuamdeuh hi. Zaan hun a, keikia ka omchiang in pathian ka buanzel a, mite' simmohna leh gensiatna zak di tamhetlou in ka omthei hi. Huai ban-ah, ka lunglutna gige – khotangvai ah leng ka kihel zelzel a, Biakinn leng ka gamlat tuankei. Kei' thulimlouh ziak a Nuthawi ka hikei a, Pathian' mai ah leng kichiamna neikha nailou ka hihman un, ka kisiamtan veve (Pathian in a it te sawi masa nak ahi).

Ka tate ka ngaihtuah chiang in, ka hing zoukei dekdek a, kingaihsiatna in ka pumdim pahpah sek hi. Huaihun ciangin, thildang daih ah ka lungsim ka 'divert' a, ka suakta zel. Huaiban-ah, khotang leh thil tuamtuam a ka kihel chiangin, ka nu leh pa'n hon tawsawn zel ua, hon zahpih kei uh. Zalenna hoihtak hon pia ua, huai zalenna pen zatdik di chuh kei mohpuak ahimai. Zalenna hon pelou in, innsung ah hon khumden le uh, kingaihsiatna in hon tuamlum di'n ka gingta. Tua hiaichiang ka tuntheihna zaw, Pathian in ka nu leh pa' tungtawn a na honsem a, zalenna hoihtak ka muhziak ahi, ka chi.

Ka lungnopna di'n, ka tate mangngilh sawmsek mahleng, a 'birthday' uh hongtun chiang in ka omtheikei. 'Birthday Gift' khawng lei in, mi khawng ka va pesak sek a, himahleh ka thilpiakte a pa'n ana paihsak zel hi. Phone tungtawn a ka houpih di nangawn aphal kei a, amel uh muh di chu, tulaipau in gen leng 'kahase' himai. Ka tate kiang khawng ah, 'na nu'n hon deihlouhsa ahi, hiai hon thilpiakte leng bangmah laaklouh himhim di' chidan khawng peuh a ana thuhilh zel ahihdan ka khonung zaakzel a, ka lungtang ana thei ngei mai.

Ken leng, ka hihtheih lamlam sawk in, Dawr bawl k'on panta hi. Kaam dang vazong di chileng lah; Certificate teng 'kichai vawt' hita. Dawr khawng bawl a, business pichingtak suahlouh ngal hinsuah didan omlou abangta. Pathian' hehpihna zar in, ka lamzang vanglak a, dawr ngak di bang leng ahunkhop ka nei sam. Achang in, tagah kepna khenkhat khawng ka phakual a, panpihna khawng ka va gukpiak sek hi. Ka tate leng tagah a om uh ahihman in, tagah kepna mun ka phak chiangin, ka luankhi in tuibang hon tuum zeel a, sawt ka om theikei.

Ka pasal toh ka kikhennung uh kum 5 zoh in, ka Dawr bawlna ah hong vaaklut a, 'tate na it leh hong paikik in ' chi'n honsam hi. Huai kia hileh phave, ' tate na it nawnkei leh zi dang ka nei di...' hon chih behlap a, ka ngaihtuahna apaisau ngei mai. Ka tate, nuthak nei di'n ka phalkei. Agentheihluat di uh ka khualna ziak a paisan inga, tu'n nuthak neile uh bangzahta in agenthei sawnsawn di ua, chih ka ngaihtuah chiangin, ka pawzou mahmah kei. Atawpin, 'tate ka itziak in ka hai dekdek a, tu'n tate ka itziak mah in hongpai leng, nang no'n it tuankei leh aphattuamna omkei. Ei I ki-it tuankei leh ei' nuai a tate ahoihlam in a khangkhe kei peuhmah ding ua, tate a kipisual vek di. Nang no'n itmasak ngai ahi' chi'a ka dawn leh, apaikik vengveng a, anung sawtlou in zi dang anei petmah hi.

Nikhat, dawr a ka omlai in, ka tanu leh tapa khut kilen kawm in, School kai tawp hongpai tattat ua, ka gaalmuh tak in ka kideek zoukei. Aguuk in ka kinuul nilouh hi. Ka tate'n, dawr ka bawlna hon theihpih kei uh. Ka tapa pen in hon theikei dia; ka tanu in bel honthei mahmah hi. Hon galmuh uh ahi ngei dia, ka kiang ah hongpai uhi. Ka khasiattha kia asuak a, ka mittui apawt den sim maimah. Ka tanu' kiang ah, 'bawi, bang na deih uh..bang k'on leisak di...' ka chihleh, ' nunu, van hon leisak lechin ka papan hon tai di...' hon chihkhum hi. Ka tapa pen in leng, huai apan anu ka hihlam hontheita. Himahleh, sawt omlou in hon paisan tit-tit nawn uhi.

Ka pasal in zi thak aneih pen kum 20 mi ding vela ahi a, amah bel kum 40 a vaal thamta. Zi thak aneih apan adamtheihna kise deuhdeuh in om a, lupna angakden phial achi uh. A zi'n nau leng apai a, himahleh, apasal sihsual a om amuh chiangin, beidong kisa a 'abortion' vabawlgu hihtuak hi. Huainung, nau leng a paaithei nawnkei ua, nuamlou khah in ahing leiluai uhi. Ka tate ahihleh, gamdang ah akoih ua, ka lung anuam veve. Mi khenkhat in, 'nang toh a kiteen lai in, ahah cheet lua a, tua agu thuakta ahi...' hon chisek ua, dik hia? diklou chih, ka thei tuankei. Ka pasal bel, damlou in lupna ngak mahleh, alungtang akhauh mahmah mai a, ka tate uh hon musak nuam tuankei. Ahihhang in, kisiik mahmah ahihdan bel, alawmte khenkhat kiang a genzel ahihdan ka zakik veve.

Nitaak khat, ka lawmnu'n hon call a, ' na tate' omna toh kou omna kinai ahi...' chih hongen a, ken leng ka lawmnu sum khak in, ' ka tate van di ana leisak in la'n, nang leisak dandan in ana gen zel in...' ka chizel a, aman leng huchidan in ana hihzel hi. Nikhat, ka lawmnu'n hon call nawn a, ' na tanunu toh khatvei bek kihou ve ua maw....' Chi'n, ka tanu phone a pia hi. Ke'n leng, 'Hallo...' ka chih patpat leh, kapkawm in ' Nu, Bangziak A Hon Taisan Tel E ? Ka nau toh gentheilua keive ua Nunu.!!.Nang hon ngailou maw Nu?' hon chihkhum tamai hi. Gen didang ka theikei, ' bawi...innlam n'ong paikik chiang un, vengsung makai khenkhat kiang ah ana dong zaw mai un, amau agensiam zaw d'uh..' chi'n ka dawng lel a, ka mittui khamvuallouh in hon taakkhe keuhkeuh hi. Ka tate'n, thudik atheih hun chiang un, keikiang hong zuan ding uh chih ka kinepna ahi a, 'court' ah leng hekna ka bawl tuankei.

Kei ahihleh Pathian zar in ka khawsathei mahmah mai a, unau pasal omlou himah le ung Pathian in ka nu leh pa kemtu dia honna sep hidan in ka ngaihtuah. Pasal leng hon ngai tampi a omtham uh, himahleh kuamah ka iit thei taktak kei. It thei in pasal nei mawk leng, ka tate'n, 'ka nu mithulimlou eive' hon chih di uh ka lau zel a, itna huang ah puuk ka sawmkei himhim. Ka business hong hichi lamzang mawk pen, mi khenkhat in Pathian' vualzawlna ahihlam hon phawksaklou in, ' Niiknuai Business' toh thuah hidan khawng in honna minsesak khemkhem uhi. Nuthawi himahleng, 'Business Kawmbu' ah zaw ka kibualkei himhim a, kuhkalna leh chihtakna toh ka lohsuahsa ngen zang a khosa ka hizaw " chi'n, hongen hi.
Hon gensung teng hoihtak in ka ngaikhia a, vuahtheu lamlam leng ka phawkkei. A mehhuan teng leng bang asuak phet diam, ka thei bunkei. Aphulhbuak tak a Gas buakmit suk a, amehhuan teng kanglou vanglak hidi'n bel ka gingta sim. Agentu lah phur, angaikhetu lah kilunglut lel ahihcia, thildang bangmah ka ngaihsak mankei uh. Atawp in, ka paikhethei khongkhong a, ke'n leng innlam ka 'direct' ngal hi.

Laigelhtu' Lungsung Pan:
Hiai tangthu, phuahtawm maimai ahikei. Ataktak a tuak tu'n, " kei dandan a - innsung hi'n, khotang ah hitaleh haksatna leh bawlsiatna tuak a omtham ding. Huchibang tuakkha om zenzen leh, kingaise mailou in, thathak lakna di'n zang zaw ni. Huaiban ah, nu leh pa te'n leng tate tunga 'zalenna' piakdan hongsiam le uh, kingaisia atawm deuh dia, mahni kithat a vaang deuh diing. Nuthawi teng leng, mahni thulimlouh ziak a thawi hikimlou ahi. Hon bawlgentheite'n leng a paap apuak hun chiang un, a nui tuankei diing uh..chihte ka lakkhe nuam a, ka thiltuah hon gelhsak in.." chi'a hon nget ziaka, k'on gelh ahi.
2408 – Ka Kipak – 2015