[Note: Hiai thu, tulai bouruak tawh kimil sak ziak a hon kikhahkhia ahi. A gelhtu: Rev. Dr. Pum Za Thang Tombing, Post Graduate Course on Psychological counselling (Christian Counselling Centre, Vellore pan, 1991 kum-a a zoukhia) ahi hi. Teikhiakna laibu: MANGPHA LAWHSAPNA, ZINGPHA LAWHCHINNA, 1994, pp. 56-61. A simkha mi kuapeuh khansauna, daupaina, leh A' deihna banga hin utna Vanglian TOUPA’N hongpia chiat hen aw! – Admn, ZDC].
...........................
KITHAH SAWMTE THUHILHNA
(Counselling to Suicidal)
“….Na hun tun ma-a bang dia si ding na hia?” Eccl. 7:17b
THUPATNA: Ni dang pek a kipatin, amah-le-mah kithat ana om gige a tu chiangin ni dang sangin eite lakah leng amah-le-mah kithat a tamzawta a; hoihtaka sui hingial leh houh a `percent’ leng sang simta dingin ka gingta hi. Huan a kithatte a tamzaw tham tuailaite ahi mawk uh hi. Tua ziaktakin Tuailaite ading khol deuhin hiai thuhilhna (counseling to suicidal) gelh ahi hi.
I. KITHATTE TEHNA: World Health Organisation (WHO)-te gendan in ni tengin mi 1,000 a kithat uh a, mi 10,000 te’n ni tengin kithah a sawm uh hi. India ah minute 2(nih) a gin tengin mi khat in kithah a sawm a; minute 10 a gin tengin mi khat a kithat zeel hi. 1999 kum in India gam ah mi 60,000 a kithat uh hi. Research and Development Bureau of the Union Home Ministry in 1969-a a zonsuah (Research) na uah India a kithahna ziak a thubuai (case) 43,633 apha, chiin a chiamteh uh hi. Hiai atungate India ah za a 75 (75%) kithatte pen kum 15-40 mi ahi ua, a kithat tampente kum 18-25 kikaal mite ahi uh.
Tulaiin nidang sangin siam-le-pilna-a leng I khantouh uleh kithahna tuailaite (teenagers) lakah a pung seemseem hi. A kithat dingte peuhmah in a kithahma un, bangzah vei hiam “Sih ka ut”, ahihkeileh, “Ka kithat ding”, chiin a gen teitei uh hi. Mi kithatte za a 75 (75%) te’n a kithah ding uh a gen khol uh, chih a suite muhkhiakdan ahi.
II. A KITHAHNA ZIAKTE UH: Aziak tampite laka khat tuh mi kingaisia lua mahmahte ahi nuam uh hi. A khenkhatte nasepna/ siamsinna a lawhsapna ziak, leh itna (love affairs) zatsiam louh ziak ahi deuh hi. Tumlam gam mite ahihleh, kichimtak, hin chimtak, anop seem ut ziak ahi deuh hi. Atangpiin mi kithatte pen amau a kihehpih luat ziak ua, kihehpih lum ahi uh. A kithatte peuhmah mi dawilok, hing ngamloute ngen ahi uh hi. “…dawilokte … amau tan tuh dil, mei leh kat a kang ahi…’ Kil. 21:8b.
III. KITHAH SAWMTE THUHILHNA (COUNSELING):
1. Examna failed ziakin kithat lechin na pass ngei diam? Na failed abawn mi na muh ngam keileh kithatta lechin min bang a hon chi ngaih ding ua?
2. Nungak/tangval khat in a hon deih louh ziakin kithatta leteh, mikhat in Nang a hon ngaih hetlouh ban ah nang va kithat zaw mah lechin kuan poi asa ding? Na thuak thawn kei ding maw? Hon ngailoute aa dia nang na hinna manphatak phal maw?
3. Tungjanna ding ngaihtuahna ziakin kithatta lechin na sih nungin na inkuanpih nu-le-pa/zi-le-tate a damsung teng un akhang-akhang in mi’n “kithatte innkuan” chi le-uh a tungjan huai na diam? Huchibang a na nawtsiat inkuante mite gimneih (social stigma) di’n na phal maw?
4. Na khatvei ngaihtuah (thupuk) pen nihvei thumvei (second thought) lou in hih pichin het ken.
5. Mi tampite’n neizou lou leh damtheilou pipi a leng hin/damtheih ut a, damdawi inn khawng delh a a ki-etkol lai un nang “Na hun tun ma a bang dia si (kithat) ding na hiam” Eccl. 7:17b.
6. Mi khutlum-a site bawn mulkimhuai I sak nak laia bang dia, nang-le-nang kithat ding na hia?
7. Mi thatte/ tualthatte, mihing hinna late pen Pathian in mihing amah kibatpih a a bawl ahihziakin a it a, “Tualthat ken”, ana chi hi. Tuabang dan kalh a tualthatte tungah Pathian a heh a, a tung uah vai a hawm ding hi. Hinna kha piapa Pathian ahih manin tuabang a mithat/ amah-le-mah kithatte tungah “Phulak peuhmah ken ka lak ding ahi”, achi (Exo.20:13; Heb.10:30-31, Eccl. 12:7).
8. Mithatte pen a kisik taktak nak uleh mikhial phapen ngaidampa Pathian in a khelhna uh ngaidam in HOTDAMNA a mu thei uh hi.
9. Ahihhangin mi amau kithatte pen in kisikna ding hun a neih nawn louh ziakun a tan ding uh a mulkimhuai hi!!
10. Mi kithatte (awklumte) peuhmah a lei uh a kai khia a, a khut un bang (wall) ahih kei leh a puannak/puanten/khekol a khuat teitei ua, a khut uh tum zial sim lah bang, sim la bangin a om nak uh. Hiai pen a kigen danin mi thilhih kisikte omdan ahi achi uh hi. Tua ahih manin mi kithatte peuhmah a sihma un kisik lou khat bek a om kei uh chihna ahi. Ahihhangin a zekaita kha ding hi.
THUKHITNA: Huaiziakin, haksatna bangzong teng tuak mah lechin, kithah peuhmah sawm leh ngaihsut-in zong nei kha kei in. Mite khut lum a sih ding nangawn I ut louh nak laiin, eimah-le-eimah kikhutdota a hun tun ma a kithah hetlouh ding ahi. Na hinna nanga ahi kei a, Pathian, hinna bawlpa a ahihziakin tualthat leh amau kithat peuhmahte tungah Pathian a thangpai hi. “Na puakgik teng Toupa tungah nga in Aman a hon limsakin a hon ngaihsak a, na omdan ding Toupa tung ah nga in Aman ahih vek ding hi”(I Pet. 5:7; Sam 37:5).
“Hon awlmawh hon khotuah ka thei,
Ka dahna hon thuakpih hi.
Zan khomial leh lam haksa ah,
Ka Hondampa’n kei hon khotuah hi.”
“Ka lungzinna Nang hon tun leng,
Toupa na deih lam hi;
Lungkham dahna teng hong tun leng,
Toupa na deih lam hi.”
References:
1. Prasantham, B.J.: Empowerment for Development, Prasantham
Publications, Vellore-632001, S. India. 1983.
2. India Today: March Issue 1991
3. Prasantham, B.J.: Indian Case Studies in Therapeutic Counselling,
3rd Edition, Christian Councelling Centre,
Vellore . 1988.
=========