ZOGAM church revolution
Written by Pastor Dongzathawng, This email address is being protected from spambots. You need JavaScript enabled to view it.

Hiai article ka gelh laitak a NICU a heart disease galdou a hangsan tak a pang ka tapa naungek Levi Thang Sianmuang kiang ah ka laan hi. -Pastor Dongzathawng

1985 laivel in ka naupang simlaia, ZNC movement hatlai tak ahi. Pu S. Thangkhangin Ngaihte in, “I Zogam saptuamte leeng i bawlphat ngai diing hi. Communal base a kiphut saptuamte a banban a hon satse diing ahi,” achih ka manghilh kei hi. Tuni’n Zogam a Theologian, Bible Scholar leh saptuam makaite kiang ah ngaidam ka hon ngen masa hi. Aziak bel, a ngaihdan uh hilou khat leh nih hon genkha maithei ka hihman in. Zogam saptuam paidan taangpi status qua hon challenge zek ka ut hi. Aziak bel, saptuam paidiklou a, a damlouh ziak in, i nam leh i society china ahihman in, tuabang ngen a i pai leh, dam mualsuahlou diing i hihman in.

Amasa in, Church growth lam a expert leh National Association of Evangelicals (USA) a President Leith Anderson in a laibu gelh “Dying for change” kichi ah, tulai saptuamte khang ut kisa a apanlak dan uh agente en masa ni:

1. Resistant Church: Hiai saptuamte ahihleh a kikheek leh thilthak photphot nawlkhin leh nang himai. Hichibang saptuamte ah bel, tuailaite melmuh diing om nawnlou in, piteek leh puteekte, saptuam banglel ahita hi. Tulai hun leh malai hun zommat theiloute ahi ua, saptuam beimang diing kuan, khang kibansam ahi uhi.

2. Yesterday Church: Hiai saptuamte ahihleh, hun paisa a ahatdan, ahoih dan, athupi dan, asepkhiak thupi dante uh gengen in, maban sawn sawmtuanlou. Hun paisa a thupinate uleh ahihhoihte uah kinga uhi. A thupi uh ahihleh, hun paisa a ahun noplaite uh himai hi. Tuni’n, Uk leh Europe gam a saptuamte’n ahun paisate khawng uh agengen louhngal uh bangmah thupina nei nawnlou uhi. Revival leh Reformation ban ah, Mission Movement ana patkhiaklaite uh agen a gengen in omzia nei nawnlou hi. Tuni leh maban thupisem bawlkhiak sawmlou in hunpaisa ah teeng nilouh uhi.

3. Try Harder Church: Amau gindan ahihleh, ‘saptuam hatna diing in hihdan (method) kheek ngai tuanlou, thilthak zuih ngai seselou, i paidan ngeina (method leh tradition) pen uangbawl semsem diing himai’ Amau ngaihdan bel, gentehna’n- ‘Na bike asiat or athautui abei leh a gear nakpipi a tot diing himai, ahong gintheih masiah’ chih toh kibang hi. Eilam ah gen tale, “I Sunday school hihdan, i kikhop dan, i kivaihawm dante kheekse ngailou, angei bang apaithou diing, himahleh, hahbawl sem diing, i hihdan ngeina pen kheek tuanlou a uangbawl semsem diing,’ chih ahi. Hiaite ngaihdan pen atokthou hat leader aneihlai siah uh masawn in paipai diing ua, himahleh, aphu hattu abei chiang ua akhawlden diing ahi mai uhi.

4. Surrender Church: Hiai saptuam ahihleh, thil kikheek leh thilthak chihte hoihsalua uh ahih chiang a, Thillui himhim paihkhiak vek diing, khat leeng keplouh diing’ chih ahi. Hiaite diklouhna ahihleh, thilhoih paidan lui leh chiindan lui khenkhat kepbit diing ahoih tampi tanpha paihkhiak zawzen asawm uhi. Amau bel, thuginpi tanpha paikhia leuleu uhi. Hiaite’n bel, Gospel genkha nawnlou in, tulai mite’n a azaknop theih diing, amau lunglutna diing lamkia uanggen gen mahmah ua, khelhna thu, meidil thu leh diktatlouhna thu lampang gen nawnlou in, hauhsakna, lohchinna, vangphatna chihte khawng uanggen uhi. Aziak bel, angai khete’n saptuam ataisan diing utlou uhi. ‘Pasian in bang achi ngaih dia?’ chihte hinawnlou in, ‘mipite’n bangchi’n angai di ua?’ chih abuaipih uh ahi zawta hi.

5. Entrepreneurial Church: Hiaite ahihleh, Denomination toh kizawm himahleh, a thunuai a omlou a Independent ahi uhi. Adiak in Mega Church-te hideuh uhi. Amau ahihleh, mi atam theipen muhtheihna diing a hihdan tuamtuam, chiindan thakthak, mipite lunglut theihna diing ahihphot leh bawlmoh neilou uhi. Contemporary Church leeng kichi hi. Music leh tulai laa leh worship chihte hahbawl mahmah mai uhi. A biakinn-te uh leeng a shape tuamtuam, design tuamtuam in bawl ua, program leh activities-te leeng a changkang thei bangpen in bawl uhi. Autralia a biakinn khat tuitung ah kuanglim (shape) in bawl uhi. Akhente theatre, sport complex bangbang leh hotel smart taktakte bang in bawllau uhi. Gospel leh Bible thu agensek ua, himahleh, hihdan lui poimawh taktak atamzaw paikhia uhi.

6. Renewing Church: Hiai saptuamte ahihleh, thillui, paidan lui ahoihte kembit in, akikheek theilou thugin ah kibulphuh kip ua, thilthak leh hihdan thak hoih a atheihte uh Bible a kigen khalou, Bible khaam louhte tanpha leeng zuihthei teng zui uhi. Amau tuh apoimawh leh kibawlthak diing a mansa gige saptuam ahi ua, khovel paidan kikheek zungzungte muchian in, khovel’ dinmun theichian ua, bangchileh Bible thute tulai khovel a apply thei diing? Thugin sukhalou a bangchidan a tulai khovel toh paikhawm thei diing? Theology leh Sociology bang chidan a paikhawmsak diing, chi-in, khalam leh salam ban ah tawndan a kibawlhoih ut leh kisiamthak diing a mansa gige saptuam ahi uhi.

Kum 100 khit chiang a kivelphat zel poimawh hi!:
Khrisitian i hihna kum 100 paikhinta! I paidan, i zuihdan, i kipuah dan etphat himhim ngaita hi. Adiak in, piching sunday skul kipidan, i lasak dante uh, atamzawte annkhiing toh kitoudelh i bang nilouhlai hilou maw? Genlailai leng, i biak innte lah thupi deuhdeuh, i head office-te uh, i company lianpite office bangmai, i project-te leh budget kiluikhete thupi mahmah ta, i khawmpite uh lah changkang in thupi mahmah, kivaihawm dante leeng hi niainuailou in kichup mahmah, saptuam leh pawlpi i paidan uh fel in dembei bang hi. Company hoihtak leh lohching takte bang in etlawm. Himahleh, Khrist saptuamte a diing a ahoih leh hoihlou, a lohchin leh lohchinlouhte theihna omsun tuh, a product ahi. I lohchinna uh tehna zaw, building leh sum hilou in, mihingte leh ahindan uh ahipen hi. Loukhoute’ lohchin leh lohsap ettheihna pen tuh abuh gaah muhzah ahi a, lou a buhhoih leh avanzatte hizawlou hi.

Khaile, Zogam a saptuam hizahta, pawlpi hizahta, belampu hiaizah zouzai, sum hizahta, crusade leh camp, seminar leh anngawl a thummi hizahta, Bible college hunkhop omna ah, a product mipite leh niteng tawndan en mahdih le? Pastor-te belam chinna ah i lohching uh hia? I belamte a hinpha uh hia? chih ki-vel nihang aw. Tuni’n office-te, bazar sung, khotang hinkhua, nam paidan, lamchiteng ah en lehang, Khristian hihna i suklatna uh tawm mahmah mai hi. I hihna uh i suklat theihna pen zaw, bangteng gengen mahle, pawlamte’n ‘head hunter to brother hunter’ “aids capital” “Sodom leh Gommorrah khopite” hon chi maimah ua! Zakdahhuai mahleh, i hihna mah uh ahi maimah hi. Hibangzah a piangthak tamna khopisung a tualgal (civil war) a omtheih tel leeng kisuut vengveng kuul petmah himai. Tu in i maban ah election hon omlai diing a angeibok hihzel diing lauhuai lua hi.

Makaite kiang a ka gen ut ahihleh, hichibang hindan i mit a niteng leh hunteng i muhlai a, i paidan puaknatna, veinatna nei khawllou a, ‘a khovel puak hi e, bangmah ei bawlphat theih diing omkei,’ chi a, ana ki-awngsut nilouh a, mohpuakna neikhalou bang a i om mawk leh, i hihkhial mahmah diing hi. Israel-te General Jehu kiang ah Ahab tapa Joram in, “ Lemna thu ahi hia Jehu?”chi-adotlai in, Jehu in, “Na bang lemna thu e? Na nu Jezebel kizuakna leh dawithu bawlna hizah zouzai abawllai in.” ( 2 Kum. 9:22) ana chihsan bang in, i gamsung hichibang a thanghuai leh siatna ban ah, setan biakna tanpha a pun hulhul lai in, bangchibang Khris melhoihna ahia i gengen? Kingaihtuah vengveng ngai hiveh.

Kikheek diing maw, si zaw diing?:
Reformation omzia bel, a omsa, a kibawlsa puahpha chihna ahi a, Revolution ahihleh, a omsa pen susia a athak bawl or kheeklumlet chihna hi (mawltak in hilhchian le, i gen-ut pen ahon panpih diing hi). I saptuam kivaihawm dan, paidan puahphatna di’n, tua i system uh kheklumlet ngai in ka thei hi, i dam mualsuah ut aleh.“Change of growth or change of dead” chi-in, communist leader khat ana kikou hi. Tuni’n khovel paidan hizahta a kikheek kin-gang pen zatdan i siamkei aleh, saptuamte’n i theihlouh kal in i granttee kichai maimah diing hi. Moreh van lel leeng kumsim a kikheek zihzeh hiveh. Himahleh, saptuamte kum 100 beinung in leeng i kikheekzou taktak thei naikei lai uh. Missioinary-te’n bul hon patpihlai bangbang ua tunitan i paitouh nilouh aleh, eite pen a creative lou, agahsuahlou i hi. Europe saptuamtte’n paidanlui mah chitinten ahihman un, tuni’n a biakinn thupitaktakte uh thillui etnop etna in om maimah hi. America saptuamte’n ahihleh, hun kikheek lapsawm hamham ua, a khanglaite uh khahsuahlou uhi. Himahleh, a kikhek utloupawl lak ah bel, khanglai kimuzou nawnlou uhi. Hichibang a apanlai nangawn un leeng, America ah kumteng in biakinn 3500 apat 4000 kikal kikhak tel hi. Kumsim in member 2,765,000 in biakinn nusia in om uhi. (J. M. Ngulkhanpau, Goscent pg 33) Leith Anderson in, “America a Prostestant Church 85% te asi dekdek leh a akhang nawnlou (stagnating) ahita uhi” chi hi. London vanglai hun a Spurgeon Church Baptist Tabernacle pen member 14,692 ahi a, huailai a diing in atam mahmah. Himahleh 1972 in member 87 lel in Pasian bia uhi. Pu Anderson in, “London a kikheekta, akim-apamte a kikheekta, khovel leeng a kikhekta. Himahleh, huai saptuam in hun kikheek ana lapmanlou uhi,” chi-in khasiathuai tak in comment pia hi. Zogam saptuamte kikheek diing maw, ahihkeileh si zaw mai diing?

Saptuam in mipite lungtaina pezou nawnlou!:
Dr J. M. Paupu in, numei kizuak tanchin agen in ka lungkhoih mahmah hi. Chicago a numei kizuak khat a dinmun beidothuai dan tuh, a tanu naungek leeng kizuaksak top hi. A dinmun beidot huailua ahihman in, counsellor pa’n alampi omsun biakinn va kai diing in sawla, aman, “Biakinn ! Bangziak a biakinn va kai diing la? Tua ka dinmun gentheihhuai tak leeng huntawk ta hilou maw? Biakinn va kai leng, ka haksatna hon behlap sak diing uhi.” achi in. Huai numeinu thugen tulai a i gam a saptuam dinmun hon musak hi. Tuni’n, i paidan i saptuam member-te interview le, atam zawtham in saptuam a alungkimlouhna gendiing nei diing uhi. “Biakinn kai bang e, ka phattuampih? Ka pastor toh bangchibang kinaina ka neia? Ka saptuam apan bangzah ka kha leh lungsim damna ka mu dia? chi diing uhi. I natna tamzawte saptuam a kipan hileh kilawm bang maimah ta hi. I saptuam kipawlkhawmnate lunggim genthei liangvaite dia damna leh ginna thak leh lametna thak muhna sang in, lungsim liam semsemna hithei diing abangta hi. Na lungsim asiat utleh saptuam ah kipia in. Anuai ah dotna nihte dawnna i en diing:

1) Ahihleh, bang dia mi hizahta kikhawm gige a, budget leh project hizahta kibawl khethei ahia? i chikha diing e. Member tampi i saptuam ua a omlai ziak bel, a) I neulai apat i kipiakna, i khankhiakna ahihziak. b) I nu-le-pa ana omna, i nam i pau kibatpih omna ahihziak. c) Pawl tuamtuamte lak a i beh i phungte tamna pen ahihziak. d) I haksat laia hon panpihte, milian milal ahon panpih thei tamna chihte khawng ziak maimai a pawlkhat a ki om. e) Pawl mawk suansuan, mi theih diing a zumhuai ahihban ah, pawl dangte leeng bangpi hituanlou. f) Pawl kikhen laia ana hahpan kha or anu apa ana hahpan ahih chiang a tunitan a thangpaih pana omsuak nilouh, kuahiam tung a thangpaih man a kisuan utlou. chihte ziak lel khawng ahi. Ka naupan’ lai in, India a Congress party pen ahoihpen hikhollou himahleh, a sepen hilou chi uhi. A omzia tuh a seteng laka ahoihpen chihna hi.

2) I gam Pasian thu lam ah i hat huntawk hilou hia, thohlawm lah hiaizah kithohkhia sek a, khalam dinmun tehna thohlawm lam leeng hilou hia? i chikha diing e. Khristian gam i hi a, zukhamte’n leeng sawm a khat piak ahidiing mah in ngai ua, govt a tax piak bang in a pia uhi. Huan, vualzawlna i deih ziak leeng ahi. I gennop ahihleh, hichibang dinmun i hihziak in, saptuam machinery pen apai bang in pai diingmah ahi, Khristian gam i hihziak in biakinn kai diing, thohlawm thoh diing, pawlpi khat a om sam diing, chih ahi. Kha Siangthou tel seselou in leeng paitoutou theimah diing i hi.

Biakinn amin a kaia, thohlawm thoh a, saptuam a hahpan a pan ziaka Jesu’ mel bang diing chihna hilou hi. Saptuam a kihahpiak mahmah, ahindan lah dawite toh kibang tamta hi, saptuam peichavaih makai kipum dimta! Ataktak in zaw, saptuamte’n i mipite khalam a taksapna/dangtakna beisaklou i hi phot hi. Zogam saptuamte zaw, Job bung 39: a kigen vasa gilou Ostirch achihte uh toh kibang ka kisa hi. Amau atui gamlak a gamsate’n a ut-ut uh aloh diing un nusia uhi. Tulai saptuam pen, nu - ta neitheilou leh nawi tuikang bang a hita (Hosea 9:14,16) Aziak ahihleh, azungte hinna tuinak toh kizawm nawnlou ahihman in. Zogam saptuamte numei chiing leh nupi nawituikang bang i hi maimahta ua, i tate asisi diingmah ahi uh, adamsunte leeng mibanglou diing mah ahi uh.

Khalam malnutrition a sibei diing hihang:
Kum 10 val khawng paita a Somalia galpi omlai a naupang gilkial ziak a sih diing ngaak a om asing asimte lem i etleh mulkimhuai hi. Malnutrition i chih, naupang ataksa khanna diing a ann kiching nezoulou leh nekhial chih ahi. Tua mahbang in, i gam Khristian hindan pen, pawlpi adia si phialphial a pang a, khalam thil buaipih kisa a i diandian lai un, khalam a vahna khop muzoulou, ann khamlou leh nekhial dan in ka mu hi. Akhente’n ann khamzoh louh ziak a muhmuh ne i hihman un, i khandan diklou hi. A buaihuai diak ahihleh, ei hon vaak diing belampute nasan in amau khamzoh diing muzoulou hi-thei hi. Amau ann hon piakte ann hoihlou leeng hi-theilai hiveh. Nu in anekte peuhmah ata in anawitui apan in nesawn ahi ve. Nupi naunei zou in, ‘ka duhduh ka nediing, chi-in ngari, sathu, singzu, malta, sasung leh aduh teng dawmlou in netaleh, a naungek damthei tak a a-om a gintakhuai kei. Huchibang ahi i gam khalam a nu leh pate’n i ta ngekte i vakdan uh. Hiseltak a damsuah vang diing mah i na ahi.

Tukum June in, Pu Elvis Nehlal makaih in khanglai camp ka nei ua, khanglai 200 valte’n ahinna uh Khrist adi’n laan uhi. Atawp nitak a khanglai khalam a kipak mahmahte ka et in chiang in, ka kipak mahmah maia, himahleh, alangkhat lam ah, kikna diing innsungte leh saptuamte ka et chiang in ka hehpih a, ka kahtha asuak hi. Khanglai khenkhat apa zudawn, anu leeng bangpi hituanloute’ innsung tungnawn diing ahi uhi. Atamzaw saptuam upa piangthaklou leh sami mahmah in a etkolna mun a khalam ann nedia kisa diing ahi uh. Tuaban ah, pastor neichiat mahle uh khalam pastor hilou in, pawlpi pastor atamzawphial hilai uhi. Belampu hi-ngal belamte etkolna diing hun neilou khawp a belam etkolna orgn toh buaite i hihziak un. Hiai khanglaite maban diing leh atuah diing uh ka et chian lungziinhuai ka salua hi. Ka lungsim ah, environment ah khalam hinkhua a hing mualsuah tam mahmah lou diing a, kumnawn chiang in khanglai camp kibawlnawn leh tua telkhateng mah i sapkhawm ngainawn diing. Hichi a kivial lehleh di i himaizen hi.

Discipleship omlouhna saptuamte:
Dr J. M. Ngulkhanpau in, “Eite’n hotdamna pen van gama diing a free ticket dan in i ngainep ua, nungzui hinkhua pen deihtel theihna (option) dan in i koih hi.” ana chi. St Gregory in, “Pasian in gingtu hihna leh nungzui hihna atuam didan in ngaihsun ngeilou hi” (Goscent pg 34) chi hi. I gam Khristian khandan pen amimal a zungkai a, Jesu toh kizopna diktak nei om ngellou a, A thutak a khang hilou in, apawl a khang, abudget a khang, a building a khang i hi. I gahsuah dan uh adiklouh dan leh Church growth concept i lakkhelh dan uh i muhchian uh ngai mahmah. Nungzui (mathetes) omzia zaw, “ziltu” chihna hiziau hi. Jesu toh omkhawm a, Ama paina a pai, ama omna a om, akhebul a zil a, zil kawmkawm a sem, semkawm a zil, damsung a graduate chihte om ngeilou ahi. Sawltakte laibu i sim leh, gingtu masate tuh, Baptist, Methodist, Pres, kichilou in “nungzuite” chi-in ana kiminvoh ziau uhi. I gam ah saptuam leh piangthak i tam ua, himahleh, nungzui i tawm uh. I pawlpi budget leh project leh building-te khang hulhul mahleh, nungzui diktak i bei huaihuai uh. Piangthak or gingtu leh nungzui hinkhua i khen ua, himahleh, Bible ah zaw a kikhen keihial hi. Gingtu i chih nungzui ahi a, nungzui tuh gingtu ahi. Saptuamte nungzuite ahi ua, nungzuite tuh saptuamte mah ahi. Kha mangthang matna evangelism i hahbawl mahmah ua, kipahhuai hi, himahleh, nungzui bawlna pen nil i hi. Nau i piangsaksak ua, himahleh, keplouh donlouh in i nusia ua, tuni’n i tate uh malnutrition a si toh, akhangtheilou toh, a khandan diklou toh biakinn teng ah i dim pheuphou ua, Khrist melhoihna a kilatkhiak sang in i gam uh melsesak gawp hihang.

Hiai thilte kua ngohta diing la? Bangkim ah belampute ngoh higige diing maw? Ahihke’h, saptuam makaite maw? Hi gige samlou e. RM masa lama i na gensa bang in, i belam etkolna a system dikzou nailou hiding hi. Belampu khat in khua 10 phialphial enkol taleh, bangchi’n gingtu mimalte ann pia a, adamlou kem a, a liamte tuamsak a, a hatloute hatsaka, athawmhaute hehnema, a vakmangte va pi a, amangte va zongzong thei diing la? Thil hitheilou ahi. I velthak chiang in ahoih lawlam i hizawmah uhi. Pasian ni in biakinn i kai ua, thohlawm i thoh ua, biakinn i bawl ua, pastorte’n loh hoihtak a i laktheih lai ua , saptuam a siampu nasepte’n i septheih lailai leeng i lungkim diing ahi. Belampu khat in khua 10 phialphial a etkol leh ahichi diing mah i hi. Belampu khat in member 1000 val avak mawk lebel, mipite’ ann khamzoulou a om diing mah ahi uhi.

Khanglaite bangloh sawm?:
I gam a saptuam changkang mahmah khat ah ‘Khanglai Day’ ka va zang hi. Kiginna zan apan Pasianni zan tan khanglaite hunteng pekhia uhi. Khanglaite kithalop dan tuh, ni sawtpi a satnung a vuah hong zu a loupateh hong nouthak abanghial uhi. Saptuam changkang khat in kum 1 sung a khanglaite ni khat apiak uh hichibang a dampih a ahalhpih ahih uh leh, bangdia khateng a khatvei bek pelou i hi dia aw…? Ka chisim hi. I meisel dezom diingte khanglaite ahi ua. Tuni a naupang leh khanglaite zingchiang a i makai diing ahi, chih i mangngilh khak di lauhuai hi. Tuni’n khanglai tamzaw in biakinn ataisanta uh. Aziak bel, biakinn sang a nopzaw leh amaute ana vaidawn a ana ngaihsak zaw Dawimangpa zolna mun tampi muta ahihman un. Himahleh, ava bualna munte uh munbit hilou hi. Tuni’n biakinn a khanglaite atawm leh Rehab-te dimsem diing chihna himai hi. Khanglaite’n ei biakna lamkaite muanna leh gintaakna hon neizou nawnlou bang maimah uhi. A maute muanpen leh a kinepna tawpna pen uh saptuam hiveve hinapi, eite’n i betray na uh sawtta hi. I gintaksang in lungsim a agelte uh ana thuuk mahmah a, thil leeng ana theithei mahmah uhi. Himahleh, amau ngaihsak diing leh muantham diing saptuam ah mi muzou nawn manglou bang uhi. Upa khenkhat lah, biakinn a khanglaite hih taphot soisel diing a upa ordain hileh kilawm pawl om hi. Pulpit sermon-te lah amau khetna diing a pastorpa leh board in pre-plan abawl uh hileh kilawm. Thawmhau leh lungtang liam kawm a biakinn lam hon zuante’ hinna tung a vaivut buahkhum mahbang in, natna tamsem i piakbeh ua, thawmhau tak in kik ua, abualna ngeina ua va vakthaap kik omtham uhi.

I Sunday school zatdan, i biakna laa sakdan, i kipidante uh amau a diing in annkhing banglel hilou in, annning bang ahita. Alangkhat lam ah “nou khangthakte na poimawh naikei uh, kou paidan na zuihnop uh leh om unla, na utkei ua leh paikhia un. Kou hihtheih dan leh nop ka sakdante uh hoih in poimawh pen hi,” chi hile kilawm hi. Tuaban ah, saptuam sung natna i chih, kikhentuamna, ahaute mai-etna leh saptuam politics tengteng leeng atheihlouh uh omlou mai hilou in, amau ngei leeng a liamkha in pang uhi. Biakinn ah thugen in kikoukou in, thumthum mahle, innsung leh i nekzonna a i hihna teng theichian lawtel ahihman un, hon thupi ngaihlou hial uhi. Munkhat a chialpina diing ah, Upa khat in khanglaite a va chial aleh, khanglaite’n a nunglam ah, “Amah hong piangthak masaphot leh,” chih san maimah uhi. Jail taang tangval khat, anu’n Bible va pesak hi. Tangval in, “Ka nu Bible ahihleh ka deihkei, pekik mai in. Ama hon pidandan a ka om ziak a hiaimun a om ka hi,” ana chi hi. I hahpan mahmah na ua ahawmvuak, ataktak omlou a a kibawltawm ngen i hihdan khanglaite’n thei lawtel uh ahihman un , i biakna paidan hon nuisan panpanta uhi. Tuni’n, i khanglaite i zoh nawnlouh dan munchih ah muhtheih in kilangta hi. Ahon ompihlai hamhamte ziak in i kipak, himahleh, ahon taimangsante ziak in i kap in i mau diing uh aw. A omsunte leeng thumanna a om maimai himai thei uhi. Nopsa leh phatuamsalua a om hiloulai uhi. Huaiziak in, i paidan ngeinate velthak a i kikheek kin keileh a omsunte’n leeng hon paisan zel khadiing uhi. UK ka hohlai in, ka kikhopna biakinn lianpipite a kikhawm atawmdan uh, innkuan kikhopna abang maimah hi. USA ah leeng hihdan, paidan ngeina a paiteitei saptuamte ah, khanglai muh diing om nawnlou uhi. Hun sawtlou in, tuabang biakinnte Great Brittain leh Europe bang in vanzuakna munpi suakthei diing hi. Unaute, i khanglaite pidan leh zatdan i siamkei leh zaw, i maban Post Christian Era kichi, Khristian khangbansam i tung petmah diing hi. Pilvang mahmah ni aw.

UK or USA
London’ hehpihuai dan: Operation World report dan in, Great Brittain kum 200 paisa a missionary galhang teng hong kipatna leh leitung pumpi a Gospel ana thehzak gam pen, tu in gam tuamtuam apat missionary 1230 in UK ah sem uhi. London pen khalam a gamdai bang ahi. Pasian ni a biakinn kai 2% lel hita chi uhi. England ka omlai in, ka lawmpa’n, “Missionary in hong kuan in,” achih ka theikhehial hi.. Nidanglai a biakinn lianpipite, tuni’n entop bawlna leh dawr khawng in kizang maimah ta! Wales a Revival hong kipatna mun Loughor ka mit in ka va mu a, a enkoltupa’n, “Nipini chiang in, mi 10 vel ka kikhawm lel uh,” chi-in mittui luang zungzung kawm in chi hi. Biakinn thupi a omsun teng ahihleh, tourist-te et diing a kikemhoih a himai hi. Pu NT Khankhup IFS in, ei Lamka leeng London bang a i biakinn thupi taktakte a akai diing omlou a vanzuakna, hotel leh sumbawlna khawng ahong suah diing alauhuai dan ana gen hi (Goscent 28).

Tu’n London ah, leitung pumpi a Temple (India chihlouh) lianpen om a. Pound million 12 beia kilam ahi. Guiness world record a Biggest Temple outside India” chi a chiamteh ahi. Tuaban ah, 70 wonders of modern world leh 7 wonders of England in chiamteh ahi. England pumpi ah Hindu temple 150 om a, London kia ah 6 om hi, tuate Mantri pukhri a Cathedral toh tehvual hilou ahi. Khristian-te biakinn lianpen tuh, Liver Pool Anglican Cathedral ah mi 3000 taakna ahi a, himaleh, Europe pumpi a biakinn lianpen International Christian Centre Thames Gatway ah, mi 8000 kaitheih na diing nasatak in bawlpan uhi. Budgest pen pound $ 50,000 ahi. Thil kipahhuai mahmah ahi. Europe pumpi a biakinn lianpen mi 8000 taakna diing a buaipih lai un, Muslim-te’n London a Mosque Wester Europe a biakinn lianpen mi 10,000 taakna diing pound million 5.5 bei hial leh, acre 5.2 munluah leh 700 yard, hial kum 2003 in a honna nei uhi. Tua pen hawmthoh in London Olympic 2012 site toh kinai in mi 70,000 leeng dawlzou diing 18 acre luah diing pound million 100 budget in bawlpan ua, kum 2012 a zohsiang diing chilai uhi. Himahleh, agam thu leh terrorist thu a buaina a omziak in, sunzawm nawnlou bang uhi. Huan, Sikh-te temple India pawlam khovel pumpi a lianpen, Amritsar a Golden Temple bang a hoih diing a kilam pound million 17 bei in, May 2000 in hongkhia uhi. Ahon ni’n mi 40,000 val kikhawm uh. Hichibang a Mosque leh Temple UK ah bangzah a om dia i genseng kei hi.
I gen utpen ahihleh, Khristiante a dia mun poimawh mahmah, missionary leh Bible society kipatna London pen hichibang dinmun tungthei ahihleh, eite koimun tung a, koia ah i om uale? UK hihkhelh thil 2 ka muhdan ahihleh- British-te kiliansak mahmah ahihman un, midangte hihdan etton sang in, amau paidan a sih diing telzaw hilhial uhi. Anihna ah, Church of England or Anglican Church pen State Church or National Church ahihziak un, ginom tak in nam ngainatna toh taisan utlou uhi. Pasian in Church of England taisan mahleh, amau bel taisanlou diing hi. Pasian sang in a pawlpi uh itzaw uhi. Ataisan ngam Puritan-te ahihleh, ahong genthei mahmah ua, atawp in a gam uh nusia in America tung uhi.

America mahmah: America pen akipatna himhim leeng ana dik ngal hi. England a saptuam paidan hoihsalou a ana doupawlte ahi uhi. Amau ava pemlut ua, zalen tak a Gospel gentheihna leh Pasian a biak theihna diing un, England-te chiindan hoihlou teng zuihlouh teitei diing tuh a step masapen uh ahi. Europe lamte’n paidan luite sihpih ngap-hial a akhah utlouh lai un, America in chindan thak a zon in azong uhi. Brittain in saptuam a zuihkhak vanglak muat diing himahleh taisan utlou a a omlai un, America in bel, tuni a a method a work kei aleh, akintheipen in a work diing method dang zongpah ngal uhi. Na saptuam paihoih, paidan dik na sak keileh, zingchiang mahmah a adangkhat a kisuantheih ngal ahi. Ahihkeileh, Pasian in nangmah ngei saptuam dang khat pandia hon phuut leh, kumpi phalna om seselou a na kipattheih ahi. Huan, family church bang omlel hi. Tuni a Mega church lianpipite’ lak a mikhat Pasian in vision apiak bangbang a mitawmchik a hong kipan in hiaitan tung ahi uhi. Land of maximum apportunity achih bang in, mihing khat, sakhua hitaleh banglampeuh hileh atupna leh a vision tan uh daltu omlou in tungthei hi.

Athupina diak ka gen ut ahihleh, pawlpi khat, Pasian in kithuahpih ziak a hat mahmah hong thupi hiaihiai in, khovel thil a ahong kigolh chiang, atawp in ahong bahgawp a, Pasian Kha in leeng ompih ut nawnlou maimah hi. America hamphatna ahihleh, hibang hun chiang a Pasian’ ompih nawnlouhna bawm pen pawteitei nawnlou in, adangkhat a pankhethei zel uhi. Pawlpi khat akhin chiang in, Pasian in movement thak khat aning a mikhat zang in ahon dingsak nawnzel hi. Tua ban ah, tua movement thak ( church) hong lui in hong khingnawn a, adangkhat akilkhat apat hong kipan zela, a saptuam leh nam mitden saklou in, Europe bang in puuksegop lou hi. Hiai ahi American Church hatna thuguk ka muhdan.

Huan, amau gam ah hiai saptuam ah kipeleng, school hong kipe diing, i tanau khat worker a pang thei diing, sihni chiang a hon-uap diing tam diing, khawmpi chia kihulum diing, ka mi ka sa, ka pau kibatpih tamna, saptuam makaite solkal a mi lianpipi tamna, i buaini a hon panpih thei diing, chihte khawng America-te biakinn zondan hilou hi. A zondan tangpi uh bel, naupang SS hoih ka sa, Pastor pa’ sermon ka deih, a church mission statement hoih ka sa, small group paidan hoih ka sa, Bible study hoih ka sa, ki-fellowship na nop ka sa, mission outreach hoih ka sa, a youth program-te hoih ka sa, chihte ahi zawdaih hi.

Thukhakna: Revival adiing in kisakhol ni:
I Zogam ah, Pasian vehna thupitak van a kipan hong kibuakkhe diing a, Kha Siangthou vuahtui nunung hong tunngei diing i lamen hi. Himahleh, tubang ngen a i om lebel, revival nasan kemtheilou diing hihang. I kholna beel in dawllou in keekzak sak laidiing i hive. Huaiziak in, theihtawp a i na kisakkholh ngai diing hi. Welsh revival thupidan pen revival dang toh ateh a teh theihlouh ahi. Aziak bel, khoneu (khaw-ta) a meisel neuchik hong kihalkuang in khovel gamchih kaangpha (pehvek) hi. Revival lampang theithuuk mahmah Rick Jayn in, “Revival tuh leitung a vualzawlna thupi mahmah i tantheih sun ahi. Himahleh, i na kisakkhawl hoih keileh, thil vangsiathuai tak suakthei hi. Revival dongkha saptuamte a kisakkhawl louh ziak un, revival dong saptuam tampite a susetu suak thei hi. I leen (net) alet huntawk keileh keekse diing hi” chi hi. Pasian’ hehpihna’n i gam ah revival hong tung taktak leh, revival ziak a gingthak nisim-hunsim a asang a simte etkol didan i na thei na diing uam? Adiak in, makaite i lungsimput dan (attitude) adikna diam? Tuni a zukham leh khamtheih bawlte khawng in biakinn lam hon zuan taleh, hoihtak leh ngaihnat-huaitak in i na welcome thei diing uam? Zankhat thu in i thautawi tangval teng in, “Missionary ka ut uh, Khrist sepaih hih diing ka telzaw uh, bang ka chi di ua?” hon chimawk le uh bangchi’n i handle di uale?

Huaiziak in, saptuamte aw, tua i dinmun bang a i dinlai in, revival in hon tunkhum leh pawzoulou a i leen uh kehgawp diingdan ahi. Tua i system ua bangmah omsawt zoulou diing hi.Tutung in Zogam church revolution diing toh kisai apoimawh dan i gen a, next issue ah Toupa’n pha asak leh, kheek lumlet diingte bangbang hihiam? abanban in i en diing hi. Unaute, i Khristian khang uh adam mualsuah diing i deih aleh, tua i paidan pen a grantee kichai ahita. I kheekthak uh ngai mahmah ta hi. Kikheekna pen hong om diing a, himahleh, a kikheek zekaite kisik diing uhi. A kikheek mengmengte khangtou kin diing himai uhi. Atung i gen church-te akoipente ah i omkha ua? Renewing church hidiing in Pasian in i luhlulhnate leh i paidanlui itna lungsimte hon lakhiaksak in, alui zattheih nawnlouhte paikhethei a, thilthakte zatdan siam diing in pilna leh khalam mitvakna hon pia hen aw!

[Ruth Messenger November - December, 2011 (Zokam – kha nih a khatvei suak), pp. 10-17, Editor: Miss Dimzangai]